Mu charu cha Uzi, mukaŵa mwanalume munyake uyo wakasopanga Yehova. Zina lake wakaŵa Yobu. Wakaŵa musambazi chomene, kweniso wakaŵa na ŵana ŵanandi. Wakaŵa walusungu, wakawovwiranga ŵakavu na ŵanakazi awo ŵafumu ŵawo ŵali kufwa. Kweniso wakawovwiranga ŵana awo ŵakaŵavya ŵapapi ŵawo. Kweni kasi Yobu wakaŵavya masuzgo pakuti wakachitanga viwemi?

Yobu wakamanyanga yayi kuti Satana Dyabulosi wakamuwonanga. Yehova wakati kwa Satana: ‘Kasi wamuwona muteŵeti wane Yobu? Palije munthu pa charu chapasi wakuŵa nga ndiyo. Wakunipulikira na kuchita icho ntchiwemi.’ Satana wakazgora kuti: ‘Mbunenesko kuti Yobu wakumupulikirani, chifukwa mukumuvikilira na kumutumbika. Mwamupa charu na viŵeto. Mupokani vyose ivyo wali navyo, ndipo walekenge kumusopani.’ Yehova wakati kwa Satana: ‘Muyezga tiwone. Kweni kumukoma yayi.’ Chifukwa wuli Yehova wakazomerezga Satana kuti wayezge Yobu? Yehova wakamanyanga kuti Yobu walutilirenge kugomezgeka.

Satana wakamba kuyezga Yobu na masuzgo ghakupambanapambana. Chakwamba, Satana wakatuma ŵanthu ŵakuchemeka Ŵasabi, ndipo ŵakiba ng’ombe na mbunda za Yobu. Kukizaso moto ndipo ukakoma mberere zose za Yobu. Gulu linyake la ŵanthu ŵakuchemeka Ŵakalidi, likiba ngamila zake. Ŵateŵeti ŵake awo ŵakaliskanga viŵeto vyake ŵakakomeka. Pamanyuma, Yobu wakapulika uthenga wachitima chomene. Ŵana ŵake wose nyumba yikaŵawira apo ŵakaŵa na phwando, ndipo ŵakafwira papo. Yobu vikamuŵinya chomene, kweni wakaleka yayi kusopa Yehova.

Satana wakakhumbanga kuti Yobu walutilire kusuzgika. Wakamupweteka Yobu na vilonda thupi lose. Yobu wakapulikanga ulwilwi ukuru. Yobu wakamanyanga yayi chifukwa icho wakaŵira na masuzgo ghose agha. Kweni wakalutilira kusopa Yehova. Chiuta wakawonanga vyose ivi, ndipo wakakondwa chomene kuti Yobu wakalutilira kugomezgeka.

Pamanyuma, Satana wakatuma ŵanalume ŵatatu kuti ŵakayezge Yobu. Iwo ŵakaphalira Yobu kuti: ‘Ukwenera kuti wanangira Chiuta ndipo ukubisa zakwananga zako. Chiuta wakukulanga.’ Yobu wakati: ‘Palije chiheni icho nachita.’ Kweni Yobu wakamba kughanaghana kuti Yehova ndiyo wakapangiskanga masuzgo ghose agha. Ndipo wakati Chiuta wakumupweteka pawaka.

Mwanalume munyake zina lake Elihu, wakapulikizganga ivyo Yobu wakadumbiskananga na ŵanalume ŵatatu ŵara. Elihu wakati: ‘Vyose ivyo mose mwayowoya ni vyautesi. Yehova ni mukuru kuluska ise. Wangachita yayi chinthu chiheni. Wakuwona chilichose icho chikuchitika ndipo wakovwira ŵanthu para ŵali mu suzgo.’

Sono Yehova wakamba kuyowoya na Yobu. Wakati: ‘Kasi ukaŵa nkhu apo nkhapanganga charu chapasi na kuchanya? Chifukwa wuli ukuti nkhuchita makora yayi? Ukuyowoya waka, kweni ukumanya yayi chifukwa icho vinthu vikuchitikira.’ Yobu wakazomera kuti wabuda ndipo wakati: ‘Nananga. Nkhapulika vya imwe, kweni sono namumanyani nadi. Palije icho chingamutondani. Nkhuphepiska pa ivyo nkhayowoya.’

Satana wati wamara kumuyezga, Yehova wakamuchizga Yobu na kumupa vinthu vinandi kuluska ivyo wakaŵa navyo pakwamba. Yobu wakakhala umoyo utali kweniso wakukondweska. Yehova wakamutumbika Yobu chifukwa wakamupulikira nanga ni apo chikaŵa chakusuzga kupulikira. Kasi nawe uŵenge nga ni Yobu? Kasi ulutilirenge kumusopa Yehova nanga ungakumana na masuzgo?

Mu Eguputo, banja la Yakhobe likamba kumanyikwa kuti Ŵaisrayeli. Yakhobe na Yosefe ŵati ŵafwa, Farawo munyake ndiyo wakaŵa themba. Farawo uyu wakamba kopa kuwona kuti Ŵaisrayeli ŵamba kuŵa na nkhongono chomene kuluska Ŵaeguputo. Mbwenu Farawo uyu wakazgora Ŵaisrayeli kuŵa ŵazga. Wakamba kuchichizga Ŵaisrayeli kuti ŵawumbenge njerwa na kugwira ntchito zinonono mu minda. Kweni apo Ŵaeguputo ŵakaŵasuzganga chomene, ndipo Ŵaisrayeli nawo ŵakababanangaso chomene. Chifukwa chakuti Farawo wakakhumbanga yayi kuti Ŵaisrayeli ŵalutilire kwandana, wakayowoya kuti tubonda tose twa Ŵaisrayeli uto twababika tukwenera kukomeka. Kasi ukughanaghana kuti Ŵaisrayeli ŵakachita wuli ŵakati ŵapulika nkhani iyi?

Pakaŵa mwanakazi munyake Muisrayeli zina lake Yokebedi. Mwanakazi uyu wakababa mwana mwanalume wakutowa chomene. Kuti wavikilire mwana uyu kuti waleke kukomeka, wakamubisa mu matete mu Mlonga wa Nayelo. Mudumbu wa mwana uyu, zina lake Miriyamu, wakayima pafupi kuti wawonenge ivyo vichitikenge.

Mwana msungwana wa Farawo wakaluta ku dambo la Nayelo kuti wakageze. Wati wafika kura, wakawona chitete mukati mu matete. Wakati wajura chitete chira, wakasanga mwana mwanalume wakulira, ndipo chitima chikamukora. Miriyamu wakafumba mwana wa Farawo kuti: ‘Kasi nkhamuchemerani mwanakazi kuti wamulelerani mwana uyu?’ Mwana wa Farawo wakati wazomera, Miriyamu wakakachema amama ŵake a Yokebedi. Mwana wa Farawo wakati kwa Yokebedi: ‘Tora mwana uyu ukanilelere, ndipo nikupenge malipiro.’

Mwana uyu wakati wakura, Yokebedi wakamupeleka kwa mwana wa Farawo ndipo wakamuthya zina lakuti Mozesi. Wakamba kukhala nayo nga ni mwana wake. Mozesi wakakura nga ni mwana wa mwana wa Farawo ndipo wakaŵa na chilichose icho wakakhumbanga. Kweni Mozesi wakaluwa yayi Yehova. Wakamanyanga kuti iyo wakaŵa Mueguputo yayi kweni Muisrayeli. Wakasankha kuteŵetera Yehova.

Mozesi wati waŵa na vyaka 40, wakawona kuti wakwenera kovwira ŵanthu ŵakwake. Zuŵa linyake, Mozesi wakawona Mueguputo wakutimba muzga uyo wakaŵa Muisrayeli. Mozesi wakamutimba chomene Mueguputo uyu m’paka wakafwa, ndipo wakamubisa mu mchenga. Farawo wakati wamanya ivyo wakachita Mozesi, wakakhumbanga kumukoma. Kweni Mozesi wakachimbira na kuluta ku Midiyani. Yehova wakamupwelelera uko wakaluta.