Mozesi wakakhala vyaka 40 ku Midiyani. Wakatora mwanakazi na kubaba ŵana. Zuŵa linyake apo wakaliskanga mberere kufupi na Phiri la Sinayi, wakawona chinthu chinyake chakuzizika. Wakawona moto ukubuka mu chivwati chaminga, kweni chivwati ichi chikanyekanga yayi. Mozesi wakaluta pafupi kuti wakawone icho chikachitikanga. Apo wakasendeleranga, wakapulika mazgu mu chivwati, ghakuti: ‘Mozesi! Kusendelera kufupi yayi. Vula skapato zako, chifukwa wayimilira pa malo ghatuŵa.’ Yehova ndiyo wakayowoya mazgu agha. Wakatuma mungelo kuti wamuyowoyere.

Mozesi wakawopa chomene wati wapulika mazgu gha Yehova ndipo wakajara kumaso. Mozesi wakapulikaso mazgu ghakuti: ‘Nawona umo Ŵaisrayeli ŵakusuzgikira. Niŵaponoskenge ku Ŵaeguputo na kuluta nawo ku charu chiwemi. Iwe ndiwe uŵafumiskenge ŵanthu ŵane mu Eguputo.’ Kasi ukughanaghana kuti Mozesi wakazizwa yayi?

Mozesi wakafumba kuti: ‘Kasi namuzgora vichi para ŵanthu ŵakanifumba kuti, ni njani wakutuma?’ Chiuta wakazgora kuti: ‘Ukaŵaphalire kuti Yehova, Chiuta wa Abrahamu, Chiuta wa Yisake, na Chiuta wa Yakhobe, ndiyo wanituma.’ Mozesi wakati: ‘Wuli usange ŵanthu ŵamunipulika yayi?’ Yehova wakaphalira Mozesi kuti wachite chinthu chinyake kuti wagomezge kuti wamovwirenge. Wakamuphalira Mozesi kuti waponye ndodo yake pasi. Wati wayiponya pasi, yikazgoka njoka. Mozesi wakati wayikora kumchira, mbwenu yikazgokaso ndodo. Yehova wakati: ‘Para wakachita ivi, ŵanthu ŵamugomezga kuti ndine nakutuma.’

Mozesi wakati: ‘Nkhutondeka kuyowoya makora.’ Yehova wakamulayizga Mozesi kuti: ‘Namukuphalira chakuti ukayowoye, ndipo nikutumenge na mukuru wako Aroni kuti wakakovwire.’ Mozesi wati wagomezga kuti Yehova wali nayo, wakatora muwoli wake na ŵana ŵake ŵanalume ndipo ŵakanyamuka na kuwelera ku Eguputo.

Ŵaisrayeli ŵakaŵa ŵazga ndipo ŵakaŵachichizganga kugwira ntchito zakusuzga. Yehova wakatuma Mozesi na Aroni kuti ŵalute kwa Farawo na kumuphalira kuti: ‘Zomerezga ŵanthu ŵane kuti ŵalute mu mapopa kuti ŵakanisope.’ Farawo wakazgora mwakujikuzga kuti: ‘Nilije navyo ntchito ivyo Yehova wayowoya, ndipo nizomerezgenge yayi kuti Ŵaisrayeli ŵalute.’ Pamanyuma, Farawo wakamba kuchichizga Ŵaisrayeli kuti ŵagwirenge ntchito zakusuzga chomene kuluska pakwamba. Yehova wakakhumba kuti wamusambizge Farawo. Kasi ukumanya ivyo wakachita? Wakatuma Miliri 10 pa Eguputo. Yehova wakaphalira Mozesi kuti: ‘Farawo wakunipulikira yayi. Namulenji, walutenge ku Mlonga wa Nayelo. Luta kwa iyo na kumuphalira kuti maji mu Nayelo ghazgokenge ndopa, chifukwa chakuti wandazomerezge ŵanthu ŵane kuti ŵalutenge.’ Mozesi wakapulikira ndipo wakaluta kwa Farawo. Farawo wakawonanga apo Aroni wakatimba ndodo yake mu dambo la Nayelo, ndipo maji ghose ghakazgoka ndopa. Maji ghakamba kununkha, somba zikafwa, ndipo mu Nayelo mukaŵavya maji ghakuti Ŵaeguputo ŵamwe. Kweni Farawo wakalutilira kukana kuti Ŵaisrayeli ŵalute.

Pakati pajumpha mazuŵa 7, Yehova wakatumaso Mozesi kuti wakaphalire Farawo kuti: ‘Para ukulutilira kukana kuti ŵanthu ŵane ŵalutenge, Eguputo wazurenge na ŵachule.’ Aroni wakanyamuska ndodo yake muchanya, ndipo ŵachule ŵakamba kuzura mu charu chose cha Eguputo. Ŵanthu ŵakasanganga ŵachule mu nyumba zawo, pa mabedi ghawo, na mu mbale zawo. Ŵachule ŵakaŵa waka palipose. Farawo wakapempha Mozesi kuti waŵeyelere Yehova kuti ŵachule ŵamare. Farawo wakalayizga kuti wazomerezgenge kuti Ŵaisrayeli ŵalute. Yehova wakawuskapo ŵachule, ndipo Ŵaeguputo ŵakawunjika ŵachule ŵakufwa ŵanandi chomene. Charu chose chikamba kununkha. Kweni Farawo wakalutilira kukana kuti Ŵaisrayeli ŵalutenge.

Yehova wakaphalira Mozesi kuti wamuphalire Aroni kuti watimbe pasi na ndodo yake, ndipo fuvu lizgokenge skuwuwu, panji kuti tuvibenene twakuluma. Nyengo yeneyiyo, skuwuwu zikaŵa palipose. Ŵanthu ŵanyake ŵa Farawo, ŵakamuphalira kuti: ‘Skuwuwu izi zafuma kwa Chiuta.’ Kweni Farawo wakalutilira kukana kuti Ŵaisrayeli ŵalutenge.