Mozesi na Aroni ŵakaluta kwa Farawo kukamuphalira uthenga wakufuma kwa Chiuta. Uthenga uwu ukaŵa wakuti: ‘Para ukuleka kuzomerezga ŵanthu ŵane kuti ŵalutenge, nitumenge ŵabulumembe mu charu.’ Ŵabulumembe ni membe zikuruzikuru. Ndipo ŵakiza nadi mu nyumba za Ŵaeguputo, ŵakavu na ŵasambazi wuwo. Charu chose chikazura na ŵabulumembe. Kweni ku charu cha Gosheni uko kukakhalanga Ŵaisrayeli, kukaŵavya ŵabulumembe. Kwambira pa muliri uwu kuya munthazi, miliri yose yikakhwaskanga Ŵaeguputo pera. Farawo wakaŵeya Mozesi kuti: ‘Pempha Yehova kuti walekeske ŵabulumembe. Nizomerezgenge ŵanthu ŵako kuti ŵalutenge.’ Kweni Yehova wakati walekeska ŵabulumembe, Farawo wakasintha maghanoghano. Kasi Farawo wakasambirapo kanthu?

Yehova wakati: ‘Para Farawo wakukana kuzomerezga ŵanthu ŵane kuti ŵalutenge, viŵeto vyose mu Eguputo vilwarenge na kufwa.’ Machero ghake, viŵeto vyose vikamba kufwa. Kweni viŵeto vya Ŵaisrayeli vikafwa yayi. Farawo wakalutilira kuchita nkhwesa, ndipo wakazomerezga yayi kuti Ŵaisrayeli ŵalutenge.

Yehova wakaphalira Mozesi kuti waluteso kwa Farawo na kuponya vyoto muchanya. Vyoto vikazgoka fuvu ndipo likazura mu mphepo. Fuvu ili likawa pa Ŵaeguputo wose. Fuvu ili likapangiska kuti Ŵaeguputo ŵakoleke na vilonda vyakuŵinya chomene. Viŵeto vyawo navyo vikakoleka na vilonda ivi. Kweni Farawo wakakana nipera kuti Ŵaisrayeli ŵalutenge.

Yehova wakatumaso Mozesi kwa Farawo. Wakamutuma kuti wakayowoye kuti: ‘Kasi uchali kukana kuzomerezga ŵanthu ŵane kuti ŵalutenge? Namachero, vula yamalibwe yizamuwa pa charu.’ Namachero ghake, Yehova wakatuma vula yamalibwe, ŵaleza na moto. Yikaŵa vula yiheni chomene iyo yikaŵa kuti yindawepo mu Eguputo. Makuni na mbuto zose izo ŵanthu ŵakapanda vikanangika. Kweni ku Gosheni uko kukaŵa Ŵaisrayeli, kukaŵavya vula iyi. Farawo wakati: ‘Pempha Yehova kuti walekeske vula iyi! Para vula yaleka, nimuzomerezganinge mose kuti mulutenge.’ Kweni moto na vula yamalibwe yikati yaleka waka, Farawo wakasintha maghanoghano.

Pamanyuma Mozesi wakati: ‘Sono zombe liryenge vyakumera vyose ivyo vula yamalibwe yalekako.’ Kukawa zombe linandi ndipo likarya chakumera chilichose icho chikakhalako mu minda. Kweniso likarya mahamba ghose mu makuni. Farawo wakaŵeyelera Mozesi kuti: ‘Pempha Yehova kuti walekeske zombe.’ Kweni Yehova wakati walekeska zombe, Farawo wakalutilira kuchita nkhwesa.

Yehova wakaphalira Mozesi kuti: ‘Nyoloskera woko lako muchanya.’ Wakati wanyoloskera woko muchanya, nyengo yeneyiyo kukaŵa mdima ukuru. Ŵaeguputo ŵakakhala mazuŵa ghatatu kwambura kuwonana panji kuwona chilichose. Mu nyumba za Ŵaisrayeli pera ndimo mukaŵa ungweru.

Farawo wakati kwa Mozesi: ‘Ungaluta pamoza na ŵanthu ŵako. Kweni viŵeto pera muvileke.’ Mozesi wakati: ‘Viŵeto vithu navyo tikuluta navyo chifukwa ndivyo tamupeleka sembe kwa Chiuta withu.’ Farawo wakakwiya chomene. Wakachemerezga kuti: ‘Fumapo pamaso pane! Para uzamwizaso kwa ine, nizamukukoma.’

Mozesi wakaphalira Farawo kuti wazamwizaso yayi kwa iyo. Kweni pambere Mozesi wandanyamuke, wakaphalira Farawo kuti: ‘Pakati pa usiku, mwana waliyose wakwamba mu Eguputo wafwenge, kwambira mwana wakwamba wa Farawo, m’paka mwana wakwamba wa muzga.’

Yehova wakaphalira Ŵaisrayeli kuti ŵanozge chakurya chapadera. Wakati: ‘Mukome mberere yanalume panji mbuzi, ya chaka chimoza, ndipo mumije ndopa zake pa mafuremu gha milyango yinu. Muwotche nyama na kulyera chingwa chambura nthukumusi. Muvware skapato zinu, kunozgekera kufumamo mu Eguputo. Usiku uno nimufumiskaninge mu Eguputo.’ Kasi ukughanaghana kuti Ŵaisrayeli ŵakakondwa yayi?

Pakati pa usiku, Yehova wakatuma mungelo ku nyumba yiliyose ya Ŵaeguputo. Nyumba yiliyose iyo pa furemu ya mulyango pakaŵavya ndopa, mwana wakwamba wakafwanga. Kweni mungelo wakajumphangapo waka pa nyumba iyo pa furemu pakaŵa ndopa. Mwana wakwamba mu banja lililose la Ŵaeguputo, wakafwa. Kwali mbakavu panji ŵasambazi. Kweni mwana wakwamba wa Ŵaisrayeli wakafwapo yayi.

Nanga ni mwana wakwamba wa Farawo, nayo wakafwa. Sono Farawo wakatondeka kulutilira kuchita nkhwesa. Nyengo yeneyiyo, wakaphalira Mozesi na Aroni kuti: ‘Wukani. Fumanimo muno. Lutaninge mukateŵetere Chiuta winu. Torani mberere zinu na ng’ombe zinu ndipo mulutenge!’

Pakati pa usiku, uku mwezi ukuŵala, Ŵaisrayeli ŵakafumamo mu Eguputo. Ŵakagaŵika kuyana na banja lawo na fuko lawo. Pakaŵa ŵanalume ŵakukwana 600,000 na ŵanakazi ŵanandi na ŵana. Ndipo ŵanthu ŵanandi awo ŵakaŵa Ŵaisrayeli yayi, ŵakaluta nawo kuti ŵakasope Yehova. Ŵaisrayeli ŵakakondwa kuti wuzga wamara!

Ŵakamba kunozga chakurya chapadera chaka chilichose kuti ŵakumbukenge umo Yehova wakaŵaponoskera. Chakurya ichi chikachemekanga kuti Paska.