Yehova wakaphalira Mozesi kuti: ‘Kwelera kwa ine kuno ku phiri. Nilembenge malango ghane pa malibwe na kukupa.’ Mozesi wakakwera ku phiri ndipo wakakhalako mazuŵa 40, muhanya na usiku. Apo Mozesi wakaŵa ku phiri, Yehova wakalemba Malango 10 pa malibwe ghaŵiri na kumupa.

Mazuŵa ghakati ghajumphapo, Ŵaisrayeli ŵakaghanaghana kuti Mozesi waŵaleka. Iwo ŵakaphalira Aroni kuti: ‘Tikukhumba munthu munyake kuti watilongozgenge. Tipangira chiuta.’ Aroni wakati: ‘Nipani golide linu.’ Wakasungunura golide na kupangira kang’ombe. Ŵanthu ŵakamba kuyowoya kuti: ‘Kang’ombe aka ni Chiuta withu uyo wakatifumiska mu Eguputo.’ Ŵakayamba kusopa kang’ombe kagolide aka ndipo ŵakachita phwando. Kasi ŵakachita makora? Yayi, chifukwa ŵakalayizga Yehova kuti ŵasopenge iyo pera. Kweni ŵakachita yayi ivyo ŵakamulayizga.

Yehova wakawonanga ivyo iwo ŵakachitanga, ndipo wakaphalira Mozesi kuti: ‘Khira, welera ku ŵanthu. Ŵanthu ŵakunipulikira yayi, ŵakusopa chikozgo.’ Mozesi wakakhira phiri, uku wayegha malibwe ghaŵiri agho Yehova wakalembapo malango.

Mozesi wakati wafika pafupi na misasa, wakapulika ŵanthu ŵakwimba. Ndipo wakawona ŵakuvina na kugwadira kang’ombe. Mozesi wakakwiya chomene. Wakaponya pasi malibwe ghaŵiri ghara ndipo ghakasweka. Wakatora kang’ombe kara na kotcha. Pamanyuma, wakafumba Aroni kuti: ‘Kasi ŵanthu aŵa ŵakachita nawe vichi kuti uchite chinthu chiheni nthena?’ Aroni wakazgora kuti: ‘Kukalipa yayi. Mukumanya makora umo ŵanthu aŵa ŵaliri. Ŵakakhumbanga chiuta, ntheura nkhaponya golide pa moto ndipo pakafuma kang’ombe aka.’ Aroni wakananga kupulikira ŵanthu. Mozesi wakalutaso ku phiri kuti wakaŵeyelere Yehova kuti wagowokere ŵanthu.

Yehova wakaŵagowokera awo ŵakakhumbanga kumupulikira. Kasi wawona kuti chikaŵa chakuzirwa kuti Ŵaisrayeli ŵapulikirenge ivyo Mozesi wakaŵaphaliranga?

Apo Mozesi wakaŵa pa Phiri la Sinayi, Yehova wakamuphalira kuti wazenge chihema. Pa malo agha ndipo Ŵaisrayeli ŵakasoperanga Yehova. Ŵakayeghanga chihema ichi apo ŵakendanga ulendo wawo.

Yehova wakati: ‘Phalira ŵanthu kuti ŵapeleke ivyo ŵangakwaniska kuti viwovwire pakuzenga chihema.’ Ŵaisrayeli ŵakapeleka golide, siliva, mkuŵa, malibwe ghakudura, na majuda. Ŵakapelekaso weya wa mberere, salu, vikumba, na vinthu vinyake. Ŵakapeleka vinthu vinandi chomene mwakuti Mozesi wakachita kuŵaphalira kuti: ‘Mbwenu vyakwana. Kupelekaso vinyake yayi.’

Ŵanalume na ŵanakazi ŵanandi awo ŵakaŵa na maluso ŵakawovwira kuzenga chihema. Yehova wakaŵapa mahara kuti ŵachite makora ntchito yawo. Ŵanyake ŵakalukanga panji kudaya salu. Ŵanyake ŵakaswanga malibwe, kupanga vinthu vyagolide, panji kuŵaja makuni.

Ŵanthu ŵakazenga chihema nga umo Yehova wakaŵaphalilira. Ŵakapanga katani yakutowa. Katani iyi ŵakagaŵira chihema kuti chiŵe na vipinda viŵiri, Malo Ghatuŵa na Malo Ghatuŵa Chomene. Ku Malo Ghatuŵa Chomene kukaŵa bokosi lakuchemeka likasa la phangano. Bokosi ili ŵakapangira khuni la akasiya na kulimata golide. Ku Malo Ghatuŵa kukaŵa chakuŵikapo nyali chagolide, thebulu, na jotchero lakotchapo vyakununkhira. Pa luŵaza pakaŵa beseni lamkuŵa na jotchero likuru. Likasa la phangano likakumbuskanga Ŵaisrayeli ivyo ŵakalayizga Yehova. Kasi ukulimanya phangano? Ntchinthu icho munthu walayizga munyake kuti wachitenge.

Yehova wakasankha Aroni na ŵana ŵake kuti ŵaŵe ŵasembe ndipo ŵagwirenge ntchito pa chihema. Ŵakeneranga kupwelelera chihema na kupeleka sembe kwa Yehova. Aroni pera ndiyo wakazomerezgekanga kunjira mu Malo Ghatuŵa Chomene, chifukwa wakaŵa wasembe mukuru. Wakanjiranga mu Malo Ghatuŵa Chomene kamoza pa chaka kuti wakapeleke sembe ya zakwananga zake, za banja lake, na za mtundu wose wa Israyeli.

Ŵaisrayeli ŵakamara kuzenga chihema pati pajumpha chaka chimoza kufuma apo ŵakafumira ku Eguputo. Sono ŵakaŵa na malo ghakusoperapo Yehova.

Yehova wakazuzga chihema na uchindami wake ndipo bingu likakhalanga pachanya pa chihema. Para bingu layima pachanya pa chihema, Ŵaisrayeli ŵakakhalanga mu misasa yawo. Kweni para bingu lakwera, ŵakamanyanga kuti ŵakwenera kulutilira na ulendo wawo. Ŵakazguranga chihema na kuchiyegha, na kulondezga uko bingu likuya.