Mwana wakwamba wa Fumu Sauli, zina lake Yonatani, wakaŵa msilikari wachikanga. Davide wakayowoya kuti Yonatani wakachimbiranga chomene nga ni nombo kweniso wakaŵa wankhongono kuluska nkhalamu. Zuŵa linyake, Yonatani wakawona ŵasilikari ŵa Ŵafilisiti 20 pa Phiri. Wakati ku wakuyegha vilwero vyake: ‘Tamuŵatimba pekha para Yehova watipa chimanyikwiro. Para Ŵafilisiti ŵatiphalira kuti titimbane nawo, tamuluta kukatimbana nawo.’ Ŵafilisiti ŵakachemerezga kuti: ‘Zani mutimbane nase!’ Yonatani na wakuyegha vilwero vyake ŵakakwera phiri na kukoma ŵasilikari ŵa Ŵafilisiti.

Chifukwa chakuti Yonatani wakaŵa mwana wakwamba wa Sauli, ndiyo wakeneranga kuzakaŵa fumu para Sauli wafwa. Nangauli Yonatani wakamanyanga kuti Yehova wasankha Davide kuti ndiyo wazakaŵe Fumu ya Israyeli, kweni wakamuchitira sanji yayi. Yonatani na Davide ŵakatemwananga chomene. Ŵakapangana kuti ŵavikiliranenge na kugomezgana. Yonatani wakapa Davide munjilira wake, lupanga, uta, na lamba kuti walongore kuti ni mubwezi wake nadi.

Apo Davide wakachimbiranga Sauli kuti waleke kumukoma, Yonatani wakaluta uko Davide wakabisama na kumuphalira kuti: ‘Ungawopanga yayi, ndipo uŵe na chikanga. Yehova wakusankha kuti uŵe Fumu. Nakuti adada nawo ŵakumanya fundo iyi.’ Kasi ungatemwa kuŵa na mubwezi muwemi nga umo wakaŵira Yonatani?

Yonatani wakaŵika umoyo wake pangozi kanandi waka kuti wawovwire mubwezi wake Davide. Wakamanya kuti Fumu Sauli yikakhumbanga kukoma Davide. Iyo wakati kwa adada ŵake: ‘Munangenge waka para mwakoma Davide; palije icho wabuda.’ Sauli wakakwiya na ivyo Yonatani wakayowoya. Pakati pajumpha vyaka, Sauli na Yonatani ŵakafwira lumoza ku nkhondo.

Yonatani wati wafwa, Davide wakapenja mwana wa Yonatani, Mefibosheti. Wati wamusanga, wakamuphalira kuti: ‘Chifukwa chakuti adada ŵako ŵakaŵa ŵawemi kwa ine, nikupwelelerenge umoyo wako wose. Ukhalenge mu nyumba yane yachifumu na kurya pa thebulu lane.’ Davide wakamuluwa yayi mubwezi wake Yonatani.

Sauli wati wafwa, Davide ndiyo wakaŵa fumu. Pa nyengo iyi, Davide wakaŵa na vyaka 30. Wati waŵa fumu vyaka vinandi, dazi linyake apo wakendanga pachanya pa nyumba yake, wakawona mwanakazi wakutowa chomene. Davide wati wafufuza za mwanakazi yura, wakaphalirika kuti zina lake wakaŵa Batisheba, muwoli wa Uriya uyo wakaŵa msilikari. Davide wakachemeska Batisheba kuti wize ku nyumba yake. Wakagona nayo, ndipo wakasangika na nthumbo. Davide wakabisa ivyo wakachita. Wakaphalira Yowabu uyo wakalaŵiliranga ŵasilikari ku nkhondo kuti waŵike Uriya panthazi apo nkhondo yikafika pakusuzga chomene, na kumuleka yekha kuti watimbike na kufwa. Uriya wati wakomeka ku nkhondo, Davide wakatora Batisheba kuŵa muwoli wake.

Yehova wakawona viheni vyose ivyo Davide wakachita. Kasi Yehova wakachitapo vichi? Yehova wakatuma ntchimi Natani kwa Davide. Natani wakati kwa Davide: ‘Munthu munyake musambazi wakaŵa na mberere zinandi, ndipo pakaŵaso munthu munyake mukavu uyo wakaŵa na kamberere kanakazi kamoza ako wakakatemwanga chomene. Kweni munthu musambazi yura wakatora kamberere kanakazi ka munthu mukavu.’ Davide wakakwiya wakati wapulika ivyo Natani wakayowoya, ndipo wakati: ‘Munthu musambazi yura wakeneranga kufwa!’ Natani wakaphalira Davide kuti: ‘Munthu musambazi uyu ndiwe!’ Davide wakakhwaskika chomene, ndipo wakazomera kwananga kwake, wakati: ‘Nanangira Yehova.’ Ivyo Davide wakachita vikapangiska kuti iyo na banja lake ŵasangane na masuzgo ghanandi. Yehova wakamulanga Davide, kweni wakamukoma yayi chifukwa wakachitanga vinthu mwaunenesko kweniso wakaŵa wakujiyuyura.

Davide wakakhumbanga kuzengera Yehova tempile, kweni Yehova wakasankha mwana wake Solomoni kuti ndiyo wazakazenge. Davide wakamba kunozga vinthu vyakuzakazengera tempile na kuyowoya kuti: ‘Tempile la Yehova likwenera kuŵa likuru na lakutowa. Solomoni wachali mwana, kweni nimovwirenge kunozga vinthu vyakuzakazengera.’ Davide wakapeleka ndalama zake kuti zizakawovwire pakuzenga tempile. Wakasangirathu ŵakuzenga ŵaluso. Wakawunjika golide na siliva, ndipo wakachemeska mathabwa gha sidara kufuma ku Ture na Sidoni. Apo wakaŵa pafupi kufwa, Davide wakapa Solomoni pulani ya umo wangazakazengera tempile. Wakamuphalira kuti: ‘Yehova wanituma kuti nilembe vinthu ivi kuti nikupe. Yehova wakovwirenge. Kopa yayi. Uŵe wachikanga ndipo nozgeka kugwira ntchito iyi.’