Solomoni wati waŵa fumu ya Israyeli, Yehova wakamufumba kuti: ‘Kasi ungatemwa kuti nikupe vichi?’ Solomoni wakati: ‘Ndine mwana muchoko, ndipo nkhumanya vinandi yayi. Nipani vinjeru kuti nilongozgenge makora ŵanthu ŵinu.’ Yehova wakati: ‘Chifukwa chakuti wapempha vinjeru, uŵenge wavinjeru kuluska waliyose pa charu chapasi. Nikupengeso usambazi. Ndipo para unipulikirenge, ukhalenge umoyo utali.’

Solomoni wakamba kuzenga tempile. Wakagwiliskira ntchito vinthu nga ni golide, siliva, makuni, na malibwe ivyo vikaŵa vyakuzirwa chomene. Ŵanalume na ŵanakazi ŵanandi awo ŵakaŵa ŵaluso ŵakagwiranga ntchito pa tempile. Pati pajumpha vyaka 7, tempile likamara ndipo kukakhala kulipeleka kwa Yehova. Likaŵa na jotchero lakupelekerapo sembe. Solomoni wakagwada panthazi pa jotchero na kulomba kuti: ‘Imwe Yehova, tempile ili likumukwanani yayi ndipo ndakutowa chomene yayi, kweni pokelerani kusopa kwithu na kupulika mapemphero ghithu.’ Kasi Yehova wakaliwona wuli tempile lira kweniso ivyo Solomoni wakapempha? Solomoni wakati wamara waka kupemphera, moto ukafuma kuchanya na kotcha sembe izo zikaŵa pa jotchero. Yehova wakakondwa nalo tempile lira. Ŵaisrayeli ŵakati ŵawona nthena, ŵakakondwa chomene.

Fumu Solomoni yikamanyikwa mu Israyeli mose kweniso ku vyaru vinyake chifukwa cha vinjeru vyake. Ŵanthu ŵakizanga kwa Solomoni kuti waŵawovwire pa masuzgo ghawo. Fumukazi ya ku Sheba nayo yikiza kwa Solomoni kuti yimufumbe mafumbo ghanonono. Yati yapulika umo Solomoni wakazgoleranga mafumbo, yikati: ‘Nkhagomezga yayi ivyo ŵanthu ŵakaniphalira vya imwe, kweni sono nawona kuti vinjeru vinu vikuluska ivyo ŵanthu ŵakaniphalira. Chiuta winu, Yehova, wamutumbikani.’ Umoyo ukaŵa uwemi ku Ŵaisrayeli, ndipo ŵanthu ŵakakhalanga mwakukondwa. Kweni vinthu vikaŵa pafupi kusintha.

Nyengo iyo Solomoni wakasopanga Yehova, ŵanthu ŵakakhalanga mwamtende mu Israyeli. Kweni Solomoni wakatora ŵanakazi ŵanandi kufuma mu vyaru vinyake, ndipo ŵanakazi aŵa ŵakasopanga vikozgo. Pachoko na pachoko, Solomoni nayo wakasintha na kwamba kusopa vikozgo. Yehova wakakwiya chomene. Wakamuphalira Solomoni kuti: ‘Nipalurenge ufumu wa Israyeli ku banja lako na kuwugaŵa paŵiri. Chigaŵa chikuru nipelekenge kwa muteŵeti wako, ndipo banja lako liŵenge na mazaza pa chigaŵa chichoko waka.’

Yehova wakachita chinthu chinyake kuti walongore ivyo wachitenge. Yumoza wa ŵateŵeti ŵa Solomoni, zina lake Yerobowamu, wakendanga mu msewu ndipo wakakumana na ntchimi Ahiya. Ahiya wakakelura chakuvwara chake mu vigaŵa 12, ndipo wakaphalira Yerobowamu kuti: ‘Yehova wapokenge ufumu wa Israyeli kwa Solomoni na kuwugaŵa paŵiri. Tora vigaŵa 10 ivi chifukwa uŵenge fumu ya mafuko 10.’ Fumu Solomoni yikapulika ivi ndipo yikakhumbanga kumukoma Yerobowamu! Yerobowamu wakachimbilira ku Eguputo. Pati pajumpha kanyengo, Solomoni wakafwa ndipo mwana wake Rehobowamu ndiyo wakaŵa fumu. Yerobowamu wakawona kuti sono wangaweleraso ku Israyeli.

Ŵanalume ŵalara mu Israyeli ŵakaphalira Rehobowamu kuti: ‘Para ŵanthu ukhalenge nawo makora, ŵakupulikirenge.’ Kweni ŵabwezi ŵa Rehobowamu awo ŵakaŵa ŵanthanga yake ŵakati: ‘Ukwenera kuŵasuzga chomene ŵanthu! Uŵagwiliskenge ntchito zinonono!’ Rehobowamu wakapulikira ivyo ŵabwezi ŵake ŵakamuphalira. Wakaŵachitiranga nkhaza ŵanthu ndipo ŵakamuwukira. Ŵanthu ŵakasankha Yerobowamu kuŵa fumu ya mafuko 10, ndipo ufumu uwu ukachemekanga kuti ufumu wa Israyeli. Mafuko ghanyake ghawiri ghakachemekanga kuti ufumu wa Yuda, ndipo ghakapulikiranga Rehobowamu. Mafuko 12 gha Israyeli sono ghakagaŵikana.

Yerobowamu wakakhumbanga yayi kuti ŵanthu ŵalutenge ku Yerusalemu kuti ŵakasope, chifukwa ndiko kukaŵa ufumu wa Rehobowamu. Chifukwa wuli wakakhumbanga yayi? Yerobowamu wakawopanga kuti ŵanthu ŵake ŵangamuwukira na kwamba kutemwa Rehobowamu. Sono wakapanga matholi ghaŵiri ghagolide na kuphalira ŵanthu kuti: ‘Ku Yerusalemu nkhutali chomene. Musopenge kwenekuno.’ Ŵanthu ŵakamba kusopa matholi ghagolide ndipo ŵakamuluwaso Yehova.