Apo mu Israyeli mukaŵa chilangalanga, Yehova wakaphalira Eliya kuti: ‘Luta ku Zarefati. Chokoro chamukupa chakurya.’ Eliya wati wafika pa mulyango wakunjilira mu tawuni ya Zarefati, wakawona chokoro chikavu chikuthenya nkhuni. Eliya wakachipempha maji ghakumwa chokoro ichi. Apo mwanakazi yura wakalutanga kukatora maji, Eliya wakachemerezga wakati: ‘Uniyeghereko na kachingwa.’ Kweni chokoro chira chikati: ‘Nilije chingwa kuti nimupani. Nili waka na tuufu na tumafuta tuchoko waka kuti nipangire kachingwa kane na ka mwana wane.’ Eliya wakati: ‘Yehova waniphalira kuti para unipangirenge chingwa, ufu na mafuta ghako vimarenge yayi m’paka apo vula yizamwambiraso kuwa.’

Chokoro chira chikaluta ku nyumba yake na kupangira chingwa ntchimi ya Yehova. Nga umo Yehova wakayowoyera, chokoro na mwana wake ŵakaŵa na chakurya mu nyengo yose iyo kukaŵavya vula. Chiŵiya cha ufu na mafuta vikaŵanga vyakuzura nyengo zose.

Pamanyuma, pakachitika chinthu chinyake chiheni. Mwana wa chokoro wakalwara na kufwa. Chokoro chikapempha Eliya kuti wachovwire. Eliya wakanyamura mwana yura na kuluta nayo mu chipinda chamuchanya cha nyumba ya chokoro. Wakamugoneka pa bedi na kupemphera, wakati: ‘Mwe Yehova, zomerezgani kuti mwana uyu waŵeso wamoyo.’ Umo iwe ukuwonera, chifukwa wuli chikaŵa chinthu chapadera kuti mwana yura wawuke? Chifukwa ntchakuti kumanyuma kose kukaŵavya munthu uyo wakawuskikapo. Nakuti chokoro ichi na mwana wake ŵakaŵa Ŵaisrayeli yayi.

Mwana yura wakawuskika ndipo wakambaso kuthuta! Eliya wakati kwa chokoro: ‘Wona! Mwana wako ngwamoyo.’ Chokoro chikakondwa chomene ndipo chikati kwa Eliya: ‘Ndiwe nadi munthu wa Chiuta. Namanya ichi chifukwa ukuyowoya vyekha ivyo Yehova wakuphalira.’

Fumu Ahabu yikawonanga munda wa mpheska wa Naboti pa windo la nyumba yake yachifumu iyo yikaŵa ku Yezireli. Ahabu wakawukhumbanga munda uwu, ndipo wakayezgayezga kuti wagure kwa Naboti. Kweni Naboti wakakana kuguliska munda chifukwa Yehova wakazomerezganga yayi kuguliska munda uwo munthu wahara ku ŵapapi ŵake. Kasi Ahabu wakakondwa kuti Naboti walondezga dango la Chiuta? Yayi. Ahabu wakakwiya chomene. Wakakhuŵara chomene mwakuti wakatondeka na kuwuka pa bedi lake, kweniso wakakana kurya.

Muwoli wa Ahabu, Yezebeli, wakaŵa muheni chomene ndipo wakaphalira mfumu wake kuti: ‘Ndimwe fumu ya Israyeli. Mungaŵa na chilichose icho mwakhumba. Nimupaninge munda wura.’ Yezebeli wakalemba makalata na kughatuma ku ŵalara ŵa mu msumba. Wakaŵaphalira kuti ŵapusikizgire Naboti kuti watuka Chiuta ndipo ŵamudinye na malibwe. Ŵalara ŵakati ŵapokera makalata, ŵakachita ivyo Yezebeli wakaŵaphalira. Kufuma apo, Yezebeli wakati kwa Ahabu: ‘Naboti wafwa. Sono munda wa mpheska ngwinu.’

Ni Naboti pera yayi wambura mulandu uyo Yezebeli wakakoma. Wakakoma ŵanthu ŵanandi awo ŵakatemwanga Yehova. Yezebeli wakasopanga vikozgo ndipo wakachitanga viheni vinandi. Yehova wakawonanga viheni vyose ivyo Yezebeli wakachitanga. Kasi wakachita nayo wuli?

Ahabu wati wafwa, mwana wake Yehoramu wakaŵa fumu. Yehova wakatuma munthu munyake zina lake Yehu kuti wakalange Yezebeli na banja lake.

Yehu wakakwera gileta lake na kuluta ku Yezireli, uko Yezebeli wakakhalanga. Yehoramu wakiza pa gileta lake na kukakumana na Yehu, ndipo wakamufumba kuti: ‘Kasi mwizira mtende?’ Yehu wakazgora kuti: ‘Pangaŵa wuli mtende apo amama ŵako, Yezebeli, ŵakuchita vinthu viheni?’ Yehoramu wakang’anamuka na kwamba kuchimbira. Kweni Yehu wakamulasa Yehoramu, ndipo wakafwa.

Pamanyuma, Yehu wakaluta ku nyumba ya Yezebeli. Yezebeli wati wapulika kuti Yehu wakwiza, wakajiphoda, wakatozga sisi lake, ndipo wakalingizganga pa windo lamuchanya la nyumba yake. Yehu wati wafika, Yezebeli wakamutawuzga mwakujikuzga. Yehu wakaphalira ŵantchito ŵa Yezebeli awo ŵakayimilira pafupi nayo kuti: ‘Mupondomoskani!’ Ŵakamugodobora Yezebeli kufumira pa windo, ndipo wakawa pasi na kufwa.

Pamanyuma, Yehu wakakoma ŵana ŵa Ahabu 70 na kumazga kusopa Baala mu charu. Kasi wawona kuti Yehova wakumanya chilichose, ndipo pa nyengo yake wakulanga awo ŵakuchita viheni?