Mafumbo Ghakufuma Ku Ŵaŵazgi

Kasi lemba la Mupharazgi 5:8 likuyowoya za ŵawusi ŵa charu panji Yehova?

Lemba ili likuti: “Usange wawona mukavu wakuyuzgika kweniso weruzgi wakunyoloka na urunji vikubendezgeka mu chigaŵa chako, ungazizwanga navyo yayi. Pakuti walipo wapachanya uyo wakuwona mulara uyo wakuchita ivi, ndipo paliso ŵanyake awo mbapachanya chomene kuluska iwo.”—Muph. 5:8.

Lemba ili para tingaliwona waka mwapachanyapachanya, tingawona nga likuyowoya waka vya ŵanthu awo ŵali na mazaza mu boma. Kweni para tingalisanda makora, likuyowoyaso unenesko wakukhwaskana na Yehova, ndipo unenesko uwu ungatipembuzga na kutikhozga.

Lemba la Mupharazgi 5:8 likuyowoya za muwusi uyo wakutambuzga ŵakavu na kuŵachitira vinthu mwambura urunji. Muwusi uyu wakwenera kukumbuka kuti pali munyake wapachanya panji wamazaza ghakuru mu boma kuluska iyo, uyo wakumuwona. Nakuti panji pangaŵaso ŵanyake awo mbapachanya chomene. Chachitima ntchakuti mu maboma gha ŵanthu, ŵanthu ŵakusuzgika chifukwa chakuti kanandi ŵawusi wose aŵa ŵakuŵa ŵakhuluku panji kuti ŵavimbundi.

Nangauli vili nthena, kweni tingapembuzgika chomene para tingamanya kuti Yehova wakuwona nanga ni ŵanthu awo ŵali na mazaza chomene mu maboma gha ŵanthu. Tikwenera kumulomba Chiuta na kumuthwikiska katundu withu kuti watovwire. (Sal. 55:22; Fil. 4:6, 7) Tikumanya kuti “maso gha Yehova ghakulaŵiska uku na uku mu charu chose kuti walongore nkhongono zake pa awo mitima yawo njakufikapo kwa iyo.”—2 Mid. 16:9.

Ntheura lemba la Mupharazgi 5:8 likutikumbuska za charu icho tikukhalamo, kuti nyengo zose pali munyake uyo ngwankhongono chomene. Chakuzirwa chomene ntchakuti lemba ili lingatovwira kumanya kuti Yehova, ndiyo ngwapachanya chomene kuluska waliyose. Sono wakuwusa kwizira mwa Mwana wake, Yesu Khristu, uyo ni Themba la Ufumu. Wankhongonozose uyo wakulaŵiska vinthu vyose, ni murunji ndipo Mwana wake nayo ni murunji.