Kovwira Ŵanthu pa Charu Chose Kuti Ŵamanye Kuŵerenga na Kulemba

Mwanalume munyake uyo wakukhala ku Brazil, zina lake Agostinho wakuti: “Nkhakulira pa famu yinyake, ndipo tikaŵa ŵakavu chomene. Nkhaleka sukulu na kwamba ntchito kuti nisangire vyakukhumbikwa banja lakwithu.” Apo Agostinho wakaŵa na vyaka 33 ndipo wakasambira kuŵerenga na kulemba. Iyo wakuti: “Kusambira kuŵerenga na kulemba kwanovwira chomene kuti nileke kujikayikira.”

Agostinho njumoza mwa ŵanthu ŵanandi chomene awo Ŵakaboni ŵa Yehova ŵaŵasambizga kuŵerenga na kulemba, mu vyaka 70 ivyo vyajumpha. Chifukwa wuli Ŵakaboni ŵa Yehova ŵakusambizga ŵanthu kulemba na kuŵerenga? Kasi masambiro agha ghaŵawovwira wuli ŵanthu ?

Ntchakusuzga Chomene Kumanya Vinthu Usange Munthu Wakumanya Yayi Kuŵerenga na Kulemba

Kufika mu1935, Ŵakaboni ŵa Yehova ŵakaŵa kuti ŵakupharazga mu vyaru vyakujumpha 115. Kuti ŵapharazgire ŵanthu awo ŵakuyowoya viyowoyero vyakupambanapambana, ŵamishonale ŵakajulanga nkhani za mu Baibolo zakujambulika kale kuti ŵanthu ŵapulikizge. Ndipo nyengo zinyake ŵakaŵagaŵiranga mabuku gha mu viyowoyero vyawo. Nangauli ŵanthu ŵanandi ŵakalongoranga kuti ŵakukondwa na uthenga wa mu Baibolo, kweni ŵanyake ŵakatondekanga kupulikiska chifukwa chakuti ŵakamanyanga yayi kuŵerenga na kulemba.

Chikaŵanga chakusuzga kuti ŵanthu ŵamanye umo ŵangalondezgera fundo za mu Baibolo chifukwa chakuti ŵakatondekanga kuŵerenga ŵekha mu Baibolo. (Joshuwa 1:8; Salimo 1:2, 3) Ŵakatondekangaso kuti ŵachite makora milimo yinyake iyo Mkhristu wakwenera kuchita. Mwachiyelezgero, para ŵapapi ŵakutondeka kuŵerenga,vingaŵasuzga kuti ŵakwaniske kusambizga ŵana ŵawo ivyo Baibolo likuyowoya. (Dotoronome 6:6, 7) Ndipo awo ŵasambira waka sono unenesko vikaŵasuzganga kugwiliskira ntchito Baibolo para ŵakusambizga ŵanyawo.

Kwambiska Ntchito Yakusambizga Ŵanthu Kuŵerenga na Kulemba

Kwamba m’ma 1940 na 1950, Mubali Nathan H. Knorr, na Milton G. Henschel, awo ŵakalongozganga Ŵakaboni ŵa Yehova pa nyengo iyo, ŵakendanga mu vyaru vyakupambanapambana kuti ŵalutiske panthazi mulimo wakupharazga. Mu vyaru ivyo ŵanandi ŵakamanyanga yayi kulemba na kuŵerenga, ŵakachiska maofesi gha minthavi kuti ghayambiske makalasi gha ŵanthu awo ŵakumanya yayi kulemba na kuŵerenga mu mipingo.

Maofesi gha minthavi ghakapeleka ulongozgi mu mipingo wa umo masambiro agha ghakwenera kuchitikira. Mu vyaru vinyake boma likaŵa kuti layambiska kale ntchito iyi ndipo ŵabali wakagwiranga nalo lumoza. Mwachiyelezgero ku Brazil, Ofesi ya munthavi yikapokera mabuku kufuma ku boma agho ghakatumizgika mu mipingo. Mu vyaru vinyake Ŵakaboni ŵa Yehova ŵakapanganga ŵekha mapulogiramu gha umo ŵangasambizgira ŵanthu kuŵerenga na kulemba.

Mulyango wa masambiro agha ukaŵa wakujulika kwa ŵanalume na ŵanakazi, ŵana na ŵalara. Chilato chikuru chikaŵa chakuti ŵanthu ŵasambire kuŵerenga na kulemba mu chiyowoyero chawo chakonkhera, ndipo ivi vikang’anamuranga kuti mu mipingo yinyake ŵasambizgenge mu viyowoyero vinandi.

Pulogiramu Iyi Yikawovwira Ŵanthu Ŵanandi

Kasi pulogiramu iyi yikaŵawovwira wuli ŵanthu? Kaboni wa Yehova munyake wa ku Mexico wakuti: “Sono nkhupulikiska ivyo Baibolo likuyowoya ndipo uthenga wa mu Baibolo ukunifika pa mtima chomene. Kumanya kuŵerenga kwanovwira kuti niyowoyenge mwakufwatuka na ŵazengezgani ŵane kweniso kuti nipharazgirenge ŵanthu ŵanandi uthenga wa mu Baibolo.”

Pulogiramu iyi yawovwira ŵanthu kupulikiska Baibolo pera yayi. Isaac uyo wakukhala Burundi wakuti: “Kumanya kuŵerenga na kulemba kwanovwira kusambira luso lwa kuzenga. Sono kuzenga ndiko kukunovwira kusanga sopo na mchere, ndipo pasono nkhulongozganga ntchito zikuruzikuru za kuzenga.”

Jesusa uyo wakukhala ku Peru, wakaŵa na vyaka 49, apo wakambanga kusambira kuŵerenga na kulemba. Iyo wakuti, “Ndine mwanakazi uyo wakukhala waka panyumba, so para naluta ku msika nkhwenera kumanya mitengo na zina la lakatundu uyo nkhukhumba kugura ku msika. Kale, ili likaŵa suzgo likuru kwa ine. Nkhuwonga chomene chifukwa cha kunisambizga kuŵerenga na kulemba, sono nkhujikayikiraso yayi para naluta kukagura katundu ku msika.”

Kwa vyaka vinandi ivyo vyajumpha, ŵalara ŵa boma mu vyaru vinandi ŵakulumba Ŵakaboni ŵa Yehova chifukwa cha kulutiska panthazi ntchito yakusambizga ŵanthu kulemba na kuŵerenga. Mazuŵa ghano Ŵakaboni ŵa Yehova ŵachali kusambizga ŵanthu kulemba na kuŵerenga, ndipo ŵakuchita nthena mwakugwiliskira ntchito nthowa ziphya izo zilipo. Ŵali kupangaso mabuku pafupifupi 224 miliyoni mu viyowoyero vyakujumpha 720, kuti ŵawovwire ŵanthu awo ŵakumanya yayi kuŵerenga panji awo sukulu ŵakaluta nayo patali yayi.a