Kasi Ningachita Wuli Kuti Niŵe na Nyengo Yakukwana Yakuchezgera na Mfumu Panji Muwoli Wane?

Ŵafumu na ŵawoli ŵanandi vikuŵasuzga kuyowoyeskana, nanga vingaŵa kuti ŵali lumoza. Kasi ntchivichi chikupangiska nthena?

• Ntchivichi chikupangiska kuti ŵakutorana ŵanyake ŵajipulikenge kuti ŵakutemwana viŵi yayi nanga vingaŵa kuti ŵakuchitira vinthu pamoza?

• Ivyo mungachita

• Ivyo ŵakutorana ŵanyake ŵakuyowoya

• Ivyo mungadumbiskana

Ntchivichi chikupangiska kuti ŵakutorana ŵanyake ŵajipulikenge kuti ŵakutemwana viŵi yayi nanga vingaŵa kuti ŵakuchitira vinthu pamoza?

• Vyakulema

  “Para nyengo yasangika yakuti tichezge panji kudumbiskana, kanandi ine panji mfumu wane wakuŵa kuti wavuka chomene. Para navuka nkhukaŵa yayi kuthukira. Mbwenu tikuwona kuti ntchiwemi tose tiwonelerenge waka TV.”—Anna.

• Kutimbanizgika na vinthu nga ni foni, matabuleti na vinyake

  “Kuchezga pa intaneti kweniso vyakusanguluska ivyo vikuŵa pa intaneti vingamulyerani nyengo. Mungamalira nyengo yinandi pa intaneti kwambura kuyowoyeskana na mfumu panji muwoli winu. Nakuti vingaŵa waka nga kuti waliyose wali mu chipinda chayekha.”—Katherine.

• Kutemwa vinthu vyakupambana

  “Para mfumu wane waŵeruka ku ntchito, wakumalira nyengo yake pa vinthu ivyo wakutemwa kuchita. Wakulimbikira chomene ntchito ntheura mphake kuti wasangenge nyengo yakuti wachitenge ivyo wakutemwa. Kweni nkhukhumba kuti mphanyi nyengo yinandi tikuŵira lumoza.”—Jane.

• Ntchito

  “Pakuti sono kuli tekinoloje tingagwira ntchito uku tili ku nyumba lumoza na mabanja ghithu. Kanandi waka nkhuzgoranga ma meseji na ma imelu gha ku ntchito m’malo mwakuchezga na muwoli wane.”—Mark.

Ivyo mungachita

• Muwonenge nyengo iyo mukuchezgera na mfumu panji muwoli winu kuti njakuzirwa chomene

  Fundo ya mu Baibolo: “Musande ivyo ni vinthu vyakuzirwa chomene.”—Ŵafilipi 1:10.

  Fundo yakuti mughanaghanirepo: Kasi ivyo mukuchita vikulongora kuti mukuwona kuti nthengwa yinu njakuzirwa chomene kuluska ntchito panji vinthu ivyo mukutemwa kuchita? Kasi mukuchezga na mfumu panji muwoli winu para mwasoŵa chakuchita?

  Ivyo mungachita: Nyengo zose mupaturenge nyengo yakuchezgera na mfumu panji muwoli winu kwambura vyakutimbanizga

  “Nkhukondwa chomene para mfumu wane wanozga chinthu chinyake chakuti tizakachite. Nkhujipulika kuti wakunitemwa nadi, ndipo wakukondwa para tili lumoza. Ivi vikunipangiska kuti nimutemwenge chomene.”—Anna.

• Manyani umo mungachitira kuti vinthu nga ni mafoni na matabuleti vileke kumutimbanizgani.

  Fundo ya mu Baibolo: “Kanthu kalikose kali na nyengo yake yakutemeka.”—Mupharazgi 3:1.

  Fundo yakuti mughanaghanirepo: Kasi nkhalinga apo ma meseji panji ma imelu ghakumutimbanizgani kuti muleke kuŵikako mahara ku mfumu panji muwoli winu?

  Ivyo mungachita: Yezgani kusanga nyengo yakuti muryele lumoza chakurya zuŵa lililose, ndipo mafoni ghinu mughaŵike mu chipinda chinyake. Nyengo ya chakurya yingamupani mwaŵi uwemi chomene wakudumbiskirana ivyo mwachitanga zuŵa ilo.

• Usange mungafiska, lutirani lumoza kukagura vinthu panji kugwilira lumoza ntchito za pa nyumba.

  Fundo ya mu Baibolo: “Ŵaŵiri ŵakuluska yumoza, chifukwa ŵasangenge chandulo chikuru pa kutokatoka kwawo.”—Mupharazgi 4:9, mazgu gha musi.

  Fundo yakuti mughanaghanirepo Kasi nkhalinga apo waliyose wakuluta yekha kukagura vinthu vyakukhumbikwa pa nyumba?

  Ivyo mungachita: Chitirani vinthu pamoza, nanga zingaŵa ntchito izo mungafiska kuchita waliyose payekha.

  “Muwone vinthu nga ni kukagura vinthu ku msika, kusuka mbale, kupeteka malaya, kweniso kupwelera maluŵa, kuti vikumupani mwaŵi wakuti muchezgerenge na mfumu panji muwoli winu.”—Nina.

• Lekani kukhazga vinandi ku munyinu

  Fundo ya mu Baibolo: “Mahara ghinu ghamanyikwe ku ŵanthu wose.”—Ŵafilipi 4:5.

  Fundo yakuti mughanaghanirepo: Kasi mungachita wuli kuti muleke kukhazga vinandi kwa mfumu panji muwoli winu?

  Ivyo mungachita: Mudumbiskanenge kuti mumanye ivyo waliyose wakukhumbikwira. Dumbiskanani umo mungachitira kuti mose muŵenge na nyengo yakukondweska.

  “Mfumu wane ngwankhongono apo ine nkhongono nilije chifukwa chakuti nkhulwaralwara. Kanandi nkhumuphaliranga mfumu wane kuti wangaluta na kukachita vinthu vinyake vyakukondweska ivyo wakutemwa ndipo ine wazamunisanga pa nyumba para wawerako. Ine nkhuŵa kuti nkhupumura panyumba, apo iyo wakuŵa kuti waluta kukachita maseŵero ghakukhozga thupi. Tose tikujipulika makora chifukwa tikuchita vinthu ivyo tikwenera kuchita.”—Daniela.

Ivyo mungadumbiskana

Chakwamba, waliyose wendemo mafumbo agha payekha. Kufuma apo, dumbiskanani mazgoro ghake.

• Kasi mukuwona kuti pasono imwe na mfumu panji muwoli winu muli na nyengo yakukwana yakuchezgera?

• Kasi ntchinthu wuli chapadera icho mfumu panji muwoli winu wachita pa nkhani ya kupatura nyengo yakuchezgera ndipo mukumuwonga?

• Kasi mungatemwa kuti mfumu panji muwoli winu wasinthe vichi?

• Kasi nkhalinga apo mukutondeka kuchezga na mfumu panji muwoli winu chifukwa cha foni panji matabuleti?

• Kasi mungalongora wuli mahara pa nkhani ya ivyo mukukhazga kwa mfumu panji muwoli winu?

• Kasi mose mungasintha vichi sabata yino kuti muŵe na nyengo yinandi yakuchezgera kwambura chakutimbanizga chilichose?