Ŵakavwaranga Tuvigamba Twa mtundu wa pepo twa Makona Ghatatu

Maud wakukhala ku France ndipo wakugwira ntchito pa sukulu yinyake, wakovwira ŵana ŵakupendera nyengo ya makilasi. Sonosono apa ŵana mu kilasi linyake ŵakasambiranga vya kukomeka kwa ŵanthu ŵanandi (Holocaust) na misasa yakuyuzgirako ŵanthu ya Nazi. Ŵakayidi mu misasa iyi ŵakavwaranga yunifomu iyo ŵakasonelerangapo tuvigamba twa mtundu unyake. Mtundu na kawonekero ka chigamba ukalongoranga chifukwa icho munthu uyo wajalilikira mu jele.

Pakuyowoya vya tuvigamba twa mtundu wa pepo twa makona ghatatu (purple-triangle) uto ŵakayidi ŵanyake ŵakavwaranga, msambizgi wakati: “Nkhughanaghana kuti ntchifukwa chakuti ŵakaŵa na nkharo yakugonana ŵanalume panji ŵanakazi ŵekhaŵekha.” Kilasi likati lamara, Maud wakayowoya na msambizgi uyu ndipo wakalongosora kuti chipani cha Nazi chikaŵikanga tuvigamba twa mtundu wa pepo twa makona ghatatu pa yunifomu ya Ŵakaboni ŵa Yehova.a Wakati wangakamutolera mabuku agho ghali na fundo zinyake pa nkhani iyi. Msambizgi wakazomera ndipo wakapempha Maud kuti fundo izi wazakaphalireko ŵana ŵa sukulu.

Mu kilasi linyake pa nkhani yeneyiyi pera, msambizgi munyake wakalongora tchati icho chikaŵa na vimanyikwiro vyakupambanapambana ivyo ŵakayidi ŵakavwaranga. Tchati ichi chikalongora makora kuti tuvigamba twa mtundu wa pepo twa makona ghatatu tukaŵa chimanyikwiro cha Ŵakaboni ŵa Yehova. Pamanyuma pa kilasi, Maud wakapempha msambizgi uyu kuti wazakamulongosolere vinyake pa nkhani iyi. Msambizgi wakazomera ndipo wakanozga vyakuti Maud wazakayowoye ku ŵana ŵa sukulu.

Maud wakanozga chidumbirano cha maminiti 15 kuti wakayowoye mu kilasi lakwamba, kweni nyengo yikati yakwana, msambizgi wakamuphalira kuti: “Mungayowoya ora lose lamsuma.” Maud wakamba na kuwoneska vidiyo yakulongosora umo chipani cha Nazi chikayuzgira Ŵakaboni ŵa Yehova. Vidiyo yikati yafika pa chigaŵa icho chikayowoyanga kuti chipani cha Nazi chikatora ŵana 800 ŵa Ŵakaboni na kuluta nawo, Maud wakayimiska dankha vidiyo na kuŵazga ivyo vikachitikira ŵatatu mwa ŵana aŵa. Wati wawoneska vidiyo, Maud wakamalizga na kuŵazga kalata ya malayirano ya mu 1940 iyo Kaboni wa vyaka 19 wa ku Austria, Gerhard Steinacher, wakalembera ŵapapi ŵake kwati kwakhala maora ghachoko waka kuti wakomeke na chipani cha Nazi.b

Maud wakayowoya fundo zakuyana waka mu kilasi lachiŵiri. Chifukwa cha chikanga cha Maud, ŵasambizgi wose ŵaŵiri ŵakuwoneseska kuti ŵakuzunura Ŵakaboni ŵa Yehova para ŵakusambizga vya ŵanthu awo ŵakayuzgikira mu misasa ya Nazi.