Ntchito Zakuzenga Izo Zikamalizgika Pambere Muliri Undambe

Pakuti ŵanthu masauzandi ghanandi ŵakubatizika chaka chilichose, tikukhumbikwiraso kusazgirako malo ghakusoperapo. Kuti ivi vichitike, Dipatimenti ya Vyakuzenga pa charu chose yikapanga ndondomeko ya kuzenga panji kunozga malo ghakusoperapo ghakujumpha 2,700 mu chaka cha uteŵeti cha 2020.a

Chachitima ntchakuti ndondomeko iyi yikatimbanizgika na muliri wa COVID-19. Kuti tivikilire ŵabali na ŵadumbu ŵithu kweniso kuti tipulikire malango agho maboma ghakaŵika, Komiti Yakusindikizga ya Wupu Wakulongozga yikayimiska dankha ntchito zinandi zakuzenga izo zikachitikanga pa charu chose. Nangauli vikaŵa nthena, mu chaka cha uteŵeti cha 2020, tikazenga kweniso kunozga malo ghakusoperapo ghakujumpha 1,700 pambere muliri undambe. Kusazgirapo apa, ntchito zikuruzikuru zakuzenga na kunozga maofesi zakujumpha 100 zikamalizgika. Wonani umo ntchito ziŵiri izo zikamalizgika zawovwilira ŵabali na ŵadumbu ŵithu.

Ofesi ya munthavi ya Cameroon. Ofesi yakale iyo yili ku Douala yikaŵa yichoko chomene ndipo yikakhumbikwanga kusazgirako. Komiti Yakusindikizga yikaghanaghana vya kunozgaso ofesi iyi, kweni pakakhumbikwanga ndalama zinandi kuluska izo zingasangika para ŵangayiguliska. Ŵakaghanaghanaso vya kuzenga waka ofesi yinyake panji kugura waka yakuzengeka kale na kuyinozga, kweni vyose vikatondekaso.

Apo vyose ivi vikachitikanga, ŵabali ŵakapulika kuti kumpoto kwa Douala, boma likukhumba kupanga msewu kufupi na malo ghithu ghanyake gha kupangirako ungano. Ivi vikapangiska kuti ku malo agha kwize vinthu nga ni magesi na maji. Nakuti ivi ndivyo ofesi ya munthavi yikapenjanga nakale. Ntheura Wupu Wakulongozga ukazomerezga kuti ntchito yakuzenga ofesi yiphya yambe pa chigaŵa chinyake cha malo ghithu gha ungano.

Ŵakaboni kweniso ŵanthu ŵanyake awo ŵakaŵa Ŵakaboni yayi ŵakagwilira lumoza ntchito yakuzenga iyi, ndipo ivi vikawovwira kuti tileke kusakaza nyengo kweniso ndalama zinandi. Nakuti ntchito iyi yikamara ndalama zinandi yayi, ndipo tikaponoska ndalama zakujumpha madola 2 miliyoni gha ku America! Ŵabali awo ŵakuteŵetera pa Beteli, ŵakasamukira ku ofesi yiphya iyi pambere muliri wa COVID-19 undambe.

Nakuti pasono ŵabali ŵa ku ofesi ya munthavi ya Cameroon ŵali na malo ghawemi chomene ghakukhala kweniso ghakugwilira ntchito, ndipo ŵakuwona kuti ofesi iyi ntchawanangwa chakufuma kwa Yehova. Mbumba yinyake yikati, “Tikukhumba kuti titeŵetere Yehova na mtima wose mwakuti tilongore kuti tikuwonga nadi chawanangwa ichi.”

Ofesi ya Kung’anamura Mabuku ya Tojolabal, ku Mexico. Kwa vyaka vinandi, awo ŵakung’anamura mabuku ghithu mu Chitojolabal ŵakagwiliranga ntchito yawo ku ofesi ya munthavi ya Central America, iyo yili kufupi na Msumba wa Mexico. Ndipouli, Chitojolabal chikuyowoyeka chomene ku Altamirano na Las Margaritas, vigaŵa ivyo vili pamtunda wa makilomita pafupifupi 1,000 kufuma ku ofesi ya munthavi! Ivi vikapangiskanga kuti chiŵe chakusuzga kuti awo ŵakugwira ntchito yakung’anamura ŵamanye umo ŵanthu ŵakuyowoyera chiyowoyero icho. Ofesi nayo yikasuzgikanga kuti yisange ŵabali na ŵadumbu ŵa mu vigaŵa vyapafupi kuti ŵawovwirepo pa ntchito yakung’anamura kweniso pa kujambura mavidiyo na vinyake mu Chitojolabal.

Ivi vikapangiska kuti Komiti Yakulemba ya Wupu Wakulongozga yighanaghane vyakusamuska ŵabali awo ŵakang’anamuranga kuti ŵalute ku chigaŵa icho ŵanthu ŵakuyowoya Chitojolabal. Kuti ivi vichitike, ofesi yikawona kuti ntchiwemi kugura nyumba na kuyinozga. Kuchita nthena kukaŵa kwakutchipa kuluska kuzenga ofesi panji kuchita renti maofesi.

Yumoza wa awo ŵakung’anamura wakulongosora umo ivi vyamovwilira, wakuti: “Mu vyaka 10 ivyo nagwira ntchito yakung’anamura pa ofesi ya munthavi, nindakumanepo na mbumba iyo yikuyowoya chiyowoyero chane mu vigaŵa vyapafupi. Sono ofesi yithu yili ku chigaŵa icho ŵanthu ŵakuyowoya Chitojolabal. Nkhusangana na ŵanthu awo ŵakuyowoya Chitojolabal zuŵa lililose. Ivi vyanovwira kuti nimanye mazgu ghanandi kweniso kuti ning’anamurenge vinthu vyakupulikikwa makora.”

Ntchito Izo Zichitikenge mu Chaka cha Uteŵeti cha 2021

Usange vyose vingenda makora, mu chaka cha uteŵeti cha 2021, tikukhumba kugwira ntchito yakuzenga na kunozga maofesi ghakung’anamulirako mabuku ghakukwana 75 na malo agho tikuchitirako sukulu yakusambizga Baibolo. Ntchito iyi yizamulutilira kuchitikaso ku maofesi gha munthavi 8 kusazgapo ofesi yiphya ya ku Ramapo, New York, kweniso kusamuska maofesi gha munthavi gha Argentina na Italy. Padera pa ivi, pakukhumbikwa kuzenga Nyumba za Ufumu zakujumpha 1,000, malo ghakuchitirapo ungano ghakujumpha 6,000 ghakukhumba kunozga kweniso pali Nyumba za Ufumu 4,000 izo zikukhumba kunozgeka.

Kasi ndalama zakuzengera kweniso kunozga vyose ivi zikufuma nkhu? Mubali Lázaro González, uyo wakuteŵetera mu Komiti ya Munthavi ya Central America, wakazgora fumbo ili apo wakalongosoranga ntchito yakunozga Ofesi Yakung’anamulirako Mabuku ya Tojolabal. “Mu chigaŵa cha ofesi yithu, tilije vinthu vinandi. Ntheura kwambura wovwiri wakufuma ku ŵabali ŵithu, tate tikwaniskenge yayi kuzenga ofesi yakung’anamulirako mabuku. Vyawanangwa ivyo ŵabali ŵakupeleka pa charu chose ndivyo vyatovwira kuti tifiske kusamuska awo ŵakugwira ntchito yakung’anamura kuti ŵize ku vigaŵa ivyo ŵanthu ŵakuyowoya chiyowoyero chawo. Tikuwonga chomene ŵabali ŵithu pa charu chose chifukwa cha wovwiri uwo ŵakupeleka.” Nadi, ntchito zose zakuzenga izi zikuchitika chifukwa cha vyawanangwa ivyo mukupeleka kuti viwovwire pa ntchito ya pa charu chose, ndipo vinandi vikwizira pa donate.jw.org.