Chaka chilichose, ŵachinyamata ŵanandi awo ŵakulelekera mu mbumba za Ŵakaboni ŵa Yehova ŵakubatizika. Kasi ndivyo namwe mukukhumba kuchita? Para ni nthena, chakwamba mukwenera kumanya dankha makora ng’anamuro la kujipeleka na ubatizo.

• Kasi ubatizo ni vichi?

• Kasi kujipeleka ni vichi?

• Chifukwa wuli ubatizo ngwakuzirwa?

• Ivyo ŵanyinu ŵakuyowoya

• Mautesi na unenesko pakuyowoya vya ubatizo

Kasi ubatizo ni vichi?

Ubatizo uwo ukuyowoyeka mu Baibolo ukung’anamura kubizga mu maji thupi lose—kuchita kumijirana waka maji yayi—ndipo uli na ng’anamuro lapadera chomene.

• Para munthu wabira mu maji thupi lose pa kubatizika wakulongora pakweru kuti sono wakhalengeso umoyo wakujikondweska waka yekha yayi.

• Para wakuzuwuka mu maji wakulongora kuti wayamba umoyo uphya ndipo waŵikengepo mtima kuchita vinthu ivyo vikukondweska Chiuta.

Para mwabatizika, mukuzomera pakweru kuti sono Yehova ndiyo wali na mazaza gha kumulongozgani pa nkhani ya icho ntchiwemi na chiheni, ndipo mukuzomeraso pakweru kuti mukalayizga kuti nyengo zose muchitenge ivyo Yehova wakukhumba kuti muchitenge.

Ghanaghanirani fundo iyi: Chifukwa wuli mukwenera kuzomera pakweru kuti nyengo zose mupulikirenge Yehova? Wonani lemba la 1 Yohane 4:19 na Chivumbuzi 4:11.

Kasi kujipeleka ni vichi?

Pambere mundabatizike, mukwenera kujipeleka dankha kwa Yehova kwamwekha. Mu nthowa wuli?

Kwizira mu lurombo, mukumuphalira Yehova kuti mumuteŵeterenge umoyo winu wose, kweniso kuti muchitenge ivyo iyo wakukhumba vilije kanthu kuti kwali vinthu vili wuli panji ŵanthu ŵanyake ŵasankha kuchita vichi.

Ubatizo ukulongora pakweru kuti mukajipeleka kwa Yehova kwamwekha. Ubatizo ukuphalira ŵanji fundo yakuti mwaleka kujikhalira mwekha ndipo sono ndimwe ŵa Yehova.—Mateyu 16:24.

Fundo yakuti mughanaghanirepo: Chifukwa wuli vinthu vikwenda makora para mwajipeleka kwa Yehova? Wonani Yesaya 48:17, 18 na Ŵahebere 11:6.

Chifukwa wuli ubatizo ngwakuzirwa?

Yesu wakati ubatizo ntchinthu chakuzirwa chomene kuti munthu waŵe msambiri wake. (Mateyu 28:19, 20) Ntheura ubatizo ntchinthu chakuzirwa chomene ku Ŵakhristu mazuŵa ghano. Nakuti Baibolo likuti ubatizo ngwakukhumbikwa kuti tizakaponoskeke.—1 Petrosi 3:21.

Ndipouli, mukwenera kubatizika chifukwa chakuti mukutemwa Yehova kweniso mukuzirwiska ubwezi uwo muli nawo na iyo. Mukwenera kuŵa na maghanoghano gha nga ni agho wakaŵa nagho wamasalimo uyo wakalemba kuti: “Kasi ningamuwezgera vichi Yehova pa viwemi vyose ivyo wanichitira? . . . Nichemenge pa zina la Yehova. Nifiskenge vilapo vyane kwa Yehova.”—Salimo 116:12-14.

Ghanaghanirani fundo iyi: Kasi ni vinthu wuli viwemi ivyo Yehova wamuchitirani ndipo kasi mungamuwezgera vichi? Wonani Dotoronome 10:12, 13 na Ŵaroma 12:1.

Para mukulondezga fundo za mu Baibolo pa umoyo winu ndipo muli pa ubwezi uwemi na Chiuta, ntchakawiro kuti mwambe kughanaghanira chomene vya nkhani ya ubatizo. Kasi mungamanya wuli usange ndimwe ŵakunozgeka nadi kuchita chinthu chakuzirwa ichi?a

Mu nkhani iyi

• Kasi nkhwenera kumanya vichi pambere nindabatizike?

• Kasi nkhwenera kuchita vichi?

• Ivyo ŵanyinu ŵakuyowoya

Kasi nkhwenera kumanya vichi pambere nindabatizike?

Kunozgekera kubatizika chikung’anamura waka kusunga vinthu pamtima nga ni para mwamulemba mayeso ku sukulu yayi. Kweni mukwenera kugwiliskira ntchito “nkhongono yinu ya kughanaghana” kuti musimikizge nadi kuti ivyo Baibolo likusambizga mbunenesko. (Ŵaroma 12:1) Mwachiyelezgero:

• Kasi mukukhorwa kuti Chiuta waliko nadi ndipo ndiyo mukwenera kumusopa?

  Baibolo likuti: “Uyo wakusendelera kwa Chiuta wakwenera kugomezga kuti waliko ndipo wakuŵapa njombe awo ŵakumupenja na mtima wose.”—Ŵahebere 11:6.

  Jifumbani kuti: ‘Chifukwa wuli nkhugomezga kuti Chiuta waliko?’ (Ŵahebere 3:4) ‘Chifukwa wuli nkhwenera kumusopa?’—Chivumbuzi 4:11.

  Kasi mukukhumba wovwiri? Wonani nkhani yakuti “Kodi Zinthu Zinachita Kulengedwa?—Gawo 1: N’chifukwa Chiyani Ndimakhulupirira Kuti Kuli Mulungu?”

• Kasi mukukhorwa kuti uthenga wa mu Baibolo ngwakufuma nadi kwa Chiuta?

  Baibolo likuti: “Malemba ghose ngakupelekeka na Chiuta kwizira mwa mzimu ndipo ngachandulo pa kusambizga, kuchenya, kunyoloska vinthu, na kulanga mu urunji.”—2 Timote 3:16.

  Jifumbani kuti: ‘Chifukwa wuli nkhugomezga kuti Baibolo ni maghanoghano gha ŵanthu yayi?’—Yesaya 46:10; 1 Ŵatesalonika 2:13.

  Kasi mukukhumba wovwiri? Wonani nkhani yakuti, “Kasi Baibolo Linganovwira Wuli?—Chigaŵa 1: Limanya Makora Baibolo Lako”

• Kasi mukukhorwa kuti Yehova wakugwiliskira ntchito mpingo Wachikhristu kuti wafiske khumbo lake?

  Baibolo likuti: “[Chiuta] wapike ntchindi kwizira mu mpingo ndiposo kwizira mwa Khristu Yesu mu miwiro yose muyirayira swii.”—Ŵaefeso 3:21.

  Jifumbani kuti: ‘Kasi nkhuwona kuti ivyo tikusambira kufuma mu Baibolo pa maungano gha Chikhristu, ni vyakufuma ku ŵanthu panji kwa Yehova?’ (Mateyu 24:45) ‘Kasi nkhuluta ku maungano nanga vingaŵa kuti ŵapapi ŵane ŵandalute (usange ŵakumuzomerezgani kuchita nthena)?’—Ŵahebere 10:24, 25.

  Kasi mukukhumba wovwiri? Wonani nkhani yakuti, “Chifukwa Wuli Nkhwenera Kusangikapo pa Maungano ku Nyumba ya Ufumu?”

Kasi nkhwenera kuchita vichi?

Mukwenera kuŵa ŵakufikapo yayi kuti mubatizike. Kweni mukwenera kulongora kuti mukukhumba nadi ‘kupatukako ku uheni na kuchita uwemi.’ (Salimo 34:14) Mwachiyelezgero:

• Kasi mukulondezga fundo za Yehova pa umoyo winu?

  Baibolo likuti: “Lutilirani kuŵa na njuŵi yiwemi.”—1 Petrosi 3:16.

  Jifumbani kuti: ‘Kasi ivyo nkhuchita vikulongora kuti ‘nkhongono zane zakamanyiro’ zikunovwira “kupambaniska pakati pa chiwemi na chiheni”?’ (Ŵahebere 5:14) ‘Kasi yilipo nyengo iyo nkhakana kuchichizgika na ŵanyane kuchita vinthu viheni? Kasi ŵabwezi ŵane ŵakunichiska kuti nichitenge icho ntchiwemi?’—Zintharika 13:20.

  Kasi mukukhumba wovwiri? Wonani nkhani yakuti, “Kasi Ningasambizga Wuli Njuŵi Yane?”

• Kasi mukumanya fundo yakuti muzamupatawura kwa Yehova pa ivyo mukuchita?

  Baibolo likuti: “Chiuta wazamweruzga waliyose wa ise kuyana na ntchito zake.”—Ŵaroma 14:12.

  Jifumbani kuti: ‘Kasi nkhuchita vinthu mwaunenesko na ŵanji kweniso kwa namwene?’ (Ŵahebere 13:18) ‘Kasi nkhuzomera para nabudiska, panji nkhutemwa kubisa kweniso kuyowoya kuti ŵanyake ndiwo ŵapangiska?’—Zintharika 28:13.

  Kasi mukukhumba wovwiri? Wonani nkhani yakuti, “Ningachita Wuli Para Nabudiska?”

• Kasi mukulutilira kuŵa paubwezi uwemi na Yehova?

  Baibolo likuti: “Sendelerani kwa Chiuta, ndipo iyo wasendelerenge kwa imwe.”—Yakobe 4:8.

  Jifumbani kuti: ‘Kasi nkhuchita vichi ivyo vikunovwira kuti nisendelere kwa Yehova?’ Mwachiyelezgero, ‘Kasi nkhutemwa kuŵerenga Baibolo?’ (Salimo 1:1, 2) ‘Kasi nkhutemwa kulomba nyengo zose?’ (1 Ŵatesalonika 5:17) ‘Kasi malurombo ghane ghakuŵa ghakudunjika? Kasi ŵabwezi ŵane nawo mbabwezi ŵa Yehova?’—Salimo 15:1, 4.

  Kasi mukukhumba wovwiri? Wonani nkhani yakuti, “Kasi Baibolo Linganovwira Wuli?—Chigaŵa 2: Ivyo Ungachita Kuti Ukondwenge Para Ukuŵazga Baibolo” na “Chifukwa Wuli Nkhwenera Kupemphera?”

FUNDO YAKUTI MUGHANAGHANIREPO: Kuti munozgekere ubatizo, ŵerengani chaputara 37 cha buku la Mayankho a Zimene Achinyamata Amafunsa, Buku Lachiwiri. Chomene wonani vyakuti muchite ivyo vili pa peji 308 na 309.

Kasi mukuchita wofi para mwamba kughanaghana vyakuti mujipeleke kwa Yehova na kubatizika? Para ni nthena, mbwenu nkhani iyi yimovwiraninge kuti mutonde suzgo ili.

Mu nkhani iyi

• Wuli usange ningazakachita ubudi ukuru pamanyuma pakuti nabatizika?

• Wuli usange nkhopa udindo uwo munthu wakuŵa nawo para wabatizika?

• Wuli usange nkhujiwona wambura kwenelera kuteŵetera Yehova?

• Ivyo ŵanyinu ŵakuyowoya

Wuli usange ningazakachita ubudi ukuru pamanyuma pakuti nabatizika?

Ivyo vingapangiska: Panyake mukumanyapo munthu munyake uyo wakachita ubudi ukuru ndipo wakasezgeka mu mpingo. (1 Ŵakorinte 5:11-13) Mbwenu mungamba kufipa mtima kuti namwe vingazakamuchitikirani.

“Nkhati namba kughanaghana vya kubatizika, nkhafipanga mtima kuti pamanyuma ningazakachita ubudi ukuru. Nkhawonanga kuti mbwenu nizamuŵalengeska chomene ŵapapi ŵane.”—Rebekah.

Lemba lakovwira: “Wakwananga waleke nthowa yake . . . Wawelere kwa Yehova, ndipo wamuchitirenge lusungu, kwa Chiuta withu, chifukwa wamugowokerenge chomene.”—Yesaya. 55:7.

Ghanaghanirani fundo iyi: Nangauli awo ŵakuleka kupera ŵakusezgeka mu mpingo, Yehova wakulongora lusungu kwa wose awo ŵakujiyuyura na kupera kweniso awo ŵakuzomera ntchenyo.—Salimo 103:13, 14; 2 Ŵakorinte 7:11.

Chakukondweska ntchakuti: Nangauli muli ŵambura kufikapo, kweni mungatonda viyezgo na wovwiri wa Chiuta. (1 Ŵakorinte 10:13) Nakuti ni njani uyo wangamusankhirani umo muchitirenge vinthu pa umoyo winu? Imwe mwaŵene? Panji munthu munyake?

“Nkhachitanga wofi kuti ningazakachita ubudi ukuru pamanyuma pakuti nabatizika kale, kweni pamasinda nkhawamo kuti para naleka kubatizika ndipo mphaheni chomene. Nkhamanya kuti nkhwenera yayi kuzomerezga maghanoghano ghakuti, ‘Wuli usange vinthu vyazakaŵa nthe kunthazi,’ kuti ghanitondeske kubatizika.”—Karen.

Fundo yikuru: Para mwasankha kuti mugege kuchita maubudi ghakuru, mungafiska makora waka nga umo viliri na ŵateŵeti ŵanandi ŵa Yehova.—Ŵafilipi 2:12.

Kasi mukukhumba wovwiri? Wonani nkhani yakuti, “Kodi Ndingatani Kuti Ndisamagonje Poyesedwa?”

Wuli usange nkhopa udindo uwo munthu wakuŵa nawo para wabatizika?

Ivyo vingapangiska: Mwachiyelezgero, mukumanya ŵachinyamata ŵanyake awo ŵali kusamira kutali na mbumba kweniso ŵabwezi ŵawo na chilato chakuti ŵasazgireko uteŵeti wawo. Mbwenu mungamba kufipa mtima kuti panji ŵanthu ŵangamba kukhazga kuti namwe ndivyo mukwenera kuchita.

“Para Mkhristu wabatizika wakuŵa na mwaŵi wakuti wangachita vinandi chomene pakuteŵetera Yehova, kweni ŵanthu ŵanyake ŵakuŵa kuti ŵandanozgeke kuchita nthena panji pali vinthu vinyake ivyo vikuŵatondeska kuchita nthena.”—Marie.

Lemba lakovwira: “Waliyose wapime mulimo wake, apo ndipo waŵenge na chifukwa chakukondwera pa iyo yekha, kwambura kujiyaniska na munthu munyake.”—Ŵagalatiya 6:4.

Ghanaghanirani fundo iyi: M’malo mwa kujiyaniska na ŵanyinu, ghanaghanirani fundo ya pa Mariko 12:30: “Utemwenge Yehova Chiuta wako na mtima wako wose.”

Manyani kuti mukwenera kuteŵetera Yehova na mtima winu wose—chifukwa cha munthu munyake yayi. Para mukumutemwa nadi Yehova, muŵikengepo mtima kusanga nthowa izo mungamuteŵetelera na kumupa vyose ivyo mungafiska.

“Nangauli ubatizo ntchinthu chakuzirwa chomene, kweni ni mphingo yayi. Para mwasankha mwamahara ŵabwezi, nyengo zose ŵakuŵa ŵakunozgeka kumovwirani. Mwa pachokopachoko, para mwamba kujipeleka kuchita vinyake mukuŵa ŵakukondwa chomene. Para munthu wakugwentha kubatizika mbwenu wakujipweteka waka yekha.”—Julia.

Fundo yikuru: Nyengo zose muŵenge ŵakukhumbisiska kulongora kuwonga chitemwa icho Yehova wakumulongorani. Ivi vimovwiraninge kuti muŵe ŵakukhumbisiska kumupa viwemi chomene.—1 Yohane 4:19.

Kasi mukukhumba wovwiri? Wonani nkhani yakuti, “Kodi Ndine Munthu Wodalirika?”

Wuli usange nkhujiwona wambura kwenelera kuteŵetera Yehova?

Ivyo vingapangiska: Yehova ndiyo ni Muwusi wa chilengiwa chose; pakuyaniska na ise taŵanthu, ndise kanthu yayi! Nyengo zinyake mungamba kukayika usange Yehova wakumanya kuti muliko.

“Pakuti ŵapapi ŵane Mbakaboni ŵa Yehova, nkhamba kuŵa na maghanoghano ghakuti nkhachita ‘kuhara waka’ ubwezi wane na Yehova kufuma ku ŵapapi ŵane, ndipo Yehova wakachita kuniguza yayi kuti nize mu gulu lake.”—Natalie.

Lemba lakovwira: “Palije munthu uyo wangiza kwa ine kwambura kuti Adada awo ŵakanituma ŵamuguza.”—Yohane 6:44.

Ghanaghanirani fundo iyi: Para mwamba waka kughanaghanira vya kubatizika, mbukaboni wakuti Yehova wakumuguzani kuti muŵe paubwezi wakukhora chomene na iyo. Ntheura, kasi imwe ndimwe ŵakunozgeka kuzomera ntchemo iyi?

Kumbukaniso kuti Yehova ndiyo wakulongozga awo wakhumba kuŵaguzira kwa iyo, mukujilongozga mwekha yayi panji kulongozgeka na munthu munyake. Nakuti Mazgu ghake ghakutisimikizgira kuti para ise ‘tasendelera kwa Chiuta, . . . iyo wasendelerenge kwa ise.”—Yakobe 4:8.

“Pakuti mukumumanya makora Yehova ndipo muli nayo paubwezi, mbukaboni wakuti wakumutemwani. Ntheura para mwamba kughanaghana kuti ndimwe ŵambura kwenelera kumuteŵetera, kumbukani kuti Yehova wangakolerana navyo yayi. Nakuti nyengo zose Yehova wakuneneska.”—Selina.

Fundo yikuru: Para mwafiska ivyo vikukhumbikwa kuti mubatizike, mbwenu ndimwe ŵakwenelera kusopa na kuteŵetera Yehova. Nakuti mukwenera kukumbuka kuti iyo ndiyo tikwenera kumusopa.—Chivumbuzi 4:11.

Kasi mukukhumba wovwiri? Wonani nkhani yakuti, “Chifukwa Wuli Nkhwenera Kupemphera?”