IVYO VIKUCHITIKA MU CHARU | EUROPE
Nkhani za ku Europe
Ŵanthu ŵa ku Europe ndiwo ŵakatemwanga chomene kusopa, kweni sono ŵanthu ŵanandi chomene ŵakusopa yayi. Ndipouli, nkhani zinyake izo zikuchitika ku Europe zikukolerana na ivyo Baibolo likuyowoya. Panji ivi vingamutindikani.
Uwemi wa Mazgu gha Mama
Ŵanthu ŵanyake ku Milan, Italy, ŵali kubowozga kuti ŵabonda awo ŵababika ŵateta (ŵamapilimu) ŵakuŵa makora usange ŵapulika mazgu gha ŵanyinawo kwizira pa kachisulo ako ŵakuŵika pa woko la ŵabonda aŵa para ŵali ku chipatala. Na nthowa iyi ŵakukhumba kumanya umo kabonda kakamanyiranga mazgu gha nyina apo kakaŵa munthumbo. Iwo ŵakati: “Para ŵabonda aŵa ŵatendekera kupulika mazgu gha ŵanyinawo, ŵakuŵa makora.”
IVYO BAIBOLO LIKUYOWOYA: “Natuniska na kuchetamiska umoyo wane nga ni mwana wakulumulika uyo wali na nyina.”—Salimo 131:2.
Kasi Ndikuti Ŵakusambizga Ŵana Kujitemwa?
Ku Netherlands, ŵakachita kafukufuku pa ŵana 565 kuti ŵawone umo ŵakukhwaskikira na ivyo ŵapapi ŵawo ŵakuŵaphalira. Vikawoneka kuti ŵana awo ŵapapi ŵawo ŵakuŵaphalira kuti “mbapachanya chomene kuluska ŵana ŵanyawo” kweniso kuti mbana awo ŵanthu ŵakwenera “kuŵachindika” ŵakachita makora chomene pa mayeso kuluska ŵanyawo chifukwa cha kujitemwa. Kweniso ŵakajiwonanga kuti mbapachanya ndipo ŵanyawo ŵakwenera kuŵachindika. Uyo wakambiska kafukufuku uyu wakati: “Para ŵapapi ŵakuphalira ŵana ŵawo kuti mbapachanya, ŵana ŵakugomezga nadi. Kweni kuchita nthena nkhukoma mwana.”
IVYO BAIBOLO LIKUYOWOYA: “Nkhuphalira waliyose wa imwe kuti waleke kujighanaghanira mwakujumphizga kuluska umo wakwenera kughanaghanira. Kweni waghanaghanenge mwakwenelera.”—Ŵaroma 12:3.
Ŵanthu ŵa VYaka 100 AWO Ŵakukhumba Nipera Kuŵa Ŵamoyo
Lipoti la yunivesite ya Heidelberg ku Germany likulongora kuti ŵanthu awo ŵali na vyaka 100 ŵakukhumbisiska nipera kuŵa ŵamoyo nangauli ŵakulwaralwara kweniso ŵakutondeka kuchita vinandi. Pa ŵanthu ŵa vyaka 100 awo ŵakafumbika, ŵatatu pa ŵanayi ŵakulongora kuti ŵakukhumbisiska kuŵa ŵamoyo ndipo ŵakachitanga vyose ivyo ŵangafiska. Ŵakachitanga ivyo ŵakukhumba, ŵakagomezganga kuti ŵachali na vyaka vinandi kunthazi ndipo ŵakawonanga kuti umoyo ngwakuzirwa. Kweniso ŵakaleka yayi kulondezga chisopa chawo na kusungilira makhaliro ghawemi.
FUNDO YAKUGHANAGHANIRAPO: Nga umo lemba la Mupharazgi 3:11 likuyowoyera, kasi khumbo ilo tili nalo lakuti tilutilire kuŵa ŵamoyo likutiphalira vichi?