Ŵanthu Ŵakwenera Kusambizgika Pakati pa Chiwemi na Chiheni

Apo ŵana ŵa sukulu ŵakaŵa paulendo wakuluta ku malo ghanyake, ŵanyamata ŵanyake pa gulu ili ŵakasangika na mulandu wakuti ŵakakolelera mwana wa sukulu munyawo munyamata. Ŵana wose aŵa ŵakasambiranga pa sukulu yapachanya ku Canada. Ivi vikati vyachitika, Leonard Stern wakalemba mu nyuzipepara ya Ottawa Citizen kuti: “Ŵachinyamata ŵakuleka yayi kuchita vinthu viheni nangauli ŵangaŵa ŵamahara chomene, ŵakusambira chomene, kweniso ŵasambazi.”

Stern wakayowoyaso kuti: “Chinthu chakuzirwa chomene icho taŵanthu tikukhazga ku ŵapapi ntchakuti ŵasambizgenge ŵana ŵawo icho ntchiwemi na chiheni. Kweni unenesko ngwakuti ŵapapi ŵanandi ŵakuwona kuti chinthu chakuzirwa chomene ntchakuti ŵana ŵawo ŵasambire chomene na kusanga ntchito ziwemi mwakuti ŵapange ndalama zinandi.”

Mbunenesko kuti sukulu njakuzirwa. Kweni masambiro gha ku sukulu nanga ghangaŵa gha pachanya chomene, ghangawovwira yayi munthu kuti walimbane na makhumbiro ghaheni panji kuleka kuchita viheni. Ipo ni nkhu uko tingasanga masambiro agho ghangatovwira kuti tiŵe na mikhaliro yiwemi panji kuti tichitenge vinthu viwemi?

MASAMBIRO AGHO GHANGAWOVWIRA

Baibolo lili nga ni gilasi, ndipo para tikulaŵiskamo, tikuwona makora ivyo tikutondeka kweniso ivyo tikubudiska. (Yakobe 1:23-25) Kweni paliso vinyake ivyo Baibolo likuchita. Likutovwira kuti tisinthe apo mphakwenelera mwakuti tiŵe na mikhaliro iyo yikovwira kuti tiŵe ŵamtende na ŵakukolerana. Yinyake mwa mikhaliro iyi ni uwemi, lusungu, kuzikira, kujikora, na chitemwa. Chitemwa chikumanyikwa kuti “chikukakilira ŵanthu pamoza.” (Ŵakolose 3:14) Chifukwa wuli chitemwa ntchapadera? Wonani ivyo Baibolo likuyowoya pa nkhani iyi.

• “Chitemwa chikuzikira ndipo ntchalusungu. Chitemwa chilije sanji. Chikujilumba yayi, chikujitukumura yayi, chikuchita mwambura kwenelera yayi, chikupenja vyake pera yayi, ndipo chikukwiya luŵiro yayi. Chitemwa chikusunga vyakusingo yayi. Chikusekelera na kwananga yayi, kweni chikusekelera na unenesko. Chikubenekelera vinthu vyose, . . . chikuzizipizga vinthu vyose. Chitemwa chikumara yayi.”—1 Ŵakorinte 13:4-8.

• “Uyo wakutemwa mzengezgani wake wakumuchitira viheni yayi.”—Ŵaroma 13:10.

• “Kuluska vyose mutemwanenge chomene, chifukwa chitemwa chikubenekelera zakwananga zinandi.”—1 Petrosi 4:8.

Kasi mukujipulika wuli para muli na ŵanthu awo ŵakumutemwani? Asi mukujipulika kuti ndimwe ŵakuvikilirika kweniso ŵakukondwa? Tikugomezga kuti mukujipulika nthena chifukwa mukumanya kuti ŵakumukhumbirani viwemi ndipo ŵangakhumba yayi kumukhuŵazgani panji kumupwetekani.

Chitemwa chingawovwiraso ŵanthu kuti ŵajinore panji kusintha umoyo wawo mwakuti ŵawovwire ŵanyawo. Mwachiyelezgero, mwanalume munyake uyo timuchemenge George wakaŵa na muzukuru ndipo wakakhumbanga chomene kuti nyengo zose wachezgenge nayo. Kweni pakaŵa suzgo linyake. George wakakhweŵanga chomene hona, ndipo mukweni wake wakakhumbanga yayi kuti wakhweŵenge para wali na mwana wake. Kasi George wakachita wuli? Nangauli wakaŵa kuti wakhweŵa hona kwa vyaka 50, wakaleka kukhweŵa chifukwa cha muzukuru wake. Nadi, chitemwa chili na nkhongono chomene!

Tikuchita kusambira kuti tiŵe na chitemwa. Ŵapapi ŵakugwira ntchito yikuru chomene pakusambizga ŵana ŵawo kuti ŵaŵe na chitemwa. Ŵapapi ŵakuŵapa chakurya ŵana ŵawo na kuŵavikilira kweniso ŵakuŵawovwira para ŵapwetekeka panji ŵalwara. Ŵapapi ŵawemi ŵakuyowoyeskana na ŵana ŵawo ndiposo kuŵasambizga. Kweniso para ŵabuda ŵakuŵapa chilango na kuŵasambizga icho ntchiwemi na chiheni. Ndipo ŵapapi ŵawemi ŵakuchita makora vinthu mwakuti ŵana ŵawo ŵasambirengeko.

Chachitima ntchakuti ŵapapi ŵanyake ŵakuŵasambizga yayi ŵana ŵawo. Kasi vingachitika kuti ŵana aŵa ŵaŵe na nkharo yiwemi? Enya. Ŵanthu ŵanandi na ŵanyake awo ŵali kukulira mu mabanja agho ghakaŵa na nkharo ziheni, ŵali kusintha umoyo wawo ndipo pasono mbanthu ŵawemi na ŵakugomezgeka. Mu nkhani yakulondezgapo, tiwonenge ŵanthu ŵanyake awo ŵakawonekanga kuti ŵangasintha yayi umoyo wawo, kweni pasono ŵali kusintha.