Kuŵa Paubwezi na Chiuta
Nga umo tikawonera mu nkhani yakwamba, ŵanthu ŵanandi ŵakuwona kuti Baibolo ni buku lakupatulika. Ŵakuwona kuti para ŵaŵerenga Baibolo na kulondezga ivyo ŵaŵerenga, ŵakuŵa paubwezi na Chiuta ndipo ŵakuŵa ŵakukondwa.
Munthu uyo wakutemwa vinthu vyauzimu wakuwona vinthu mwakwenelera pa umoyo wake. (Yuda 18, 19) Munthu uyo wakughanaghanira vyathupi, wakughanaghana vyake pera, kweni uyo wakughanaghanira vyauzimu wakuchindika fundo za Chiuta.—Ŵaefeso 5:1.
CHIGOMEZGO
FUNDO YA MU BAIBOLO: “Usange ukulopwa mu nyengo ya suzgo, nkhongono zako ziŵenge zichoko.”—Zintharika 24:10, mazgu ghamusi.
IVYO FUNDO IYI YIKUNG’ANAMURA: Tingaŵavya nkhongono za kulimbana na suzgo usange tikulopwa para tasangana na masuzgo. Nkhongono zikukwera usange tamanya kuti masuzgo agho tikusangana nagho ngakanyengo, nakuti para masuzgo ghamara pakuŵa viwemi ivyo tikusambirapo.
IVYO MUNGACHITA: Ghanaghanirani vinthu viwemi ivyo vizamuchitika munthazi. M’malo mwa kufipa waka mtima na umo vinthu viŵirenge kunthazi panji kulindilira kuti vinthu viyambe kwendako dankha makora, chitanipo kanthu kuti mufiske vilato vinu. Nyengo zinyake“vyamabuchi”vingachitika. (Mupharazgi 9:11) Kweni kanandi vinthu vikwenda makora kuluska umo tikughanaghanira. Pa fundo iyi, mu Baibolo muli chiyelezgero cha mulimi apo likuti: “Seŵa mbuto yako mulenji, ndipo ungapumuzganga chara woko lako m’paka mise, pakuti ukumanya yayi iyo yichitenge makora, kwali ni iyi panji iyo, panyake zose ziŵiri zichitenge makora.”—Mupharazgi 11:6.
BAIBOLO LIKUZGORA MAFUMBO GHAKUZIRWA
FUNDO YA MU BAIBOLO: “Novwirani kuti niŵe wakupulikiska . . . Mazgu ghinu ghose mbunenesko.”—Salimo 119:144, 160.
IVYO FUNDO IYI YIKUNG’ANAMURA: Baibolo likuzgora mafumbo ghakuzirwa agho ŵanthu ŵanandi ŵakufumba. Mwachiyelezgero, likuzgora mafumbo nga ghakuti
Kasi ŵanthu ŵakafuma nkhu?
Chifukwa wuli Chiuta wali kutipa umoyo?
Kasi para munthu wafwa wakumanya kalikose?
Kasi tilutilirenge waka kufwa?
Ŵanthu mamiliyoni ghanandi ŵawovwirika chifukwa cha kufufuza mazgoro gha mafumbo agha na ghanyake mu Baibolo.
IVYO MUNGACHITA: Fufuzani ivyo Baibolo likusambizga. Fumbani yumoza wa Ŵakaboni ŵa Yehova kuti wamovwirani kupulikiska Baibolo. Lutani pa webusayiti yithu, ya jw.org, panji mungaluta uko tikusopera. Kulije zithero ndipo waliyose ngwakupokelereka.
FUNDO ZINYAKE ZA MU BAIBOLO
Wonelerani vidiyo ya mutu wakuti Chifukwa Wuli Mukwenera Kusambira Baibolo? pa jw.org. Yikusangika mu viyowoyero vyakujumpha 880
MANYANI IVYO MUKUSOŴERWA MWAUZIMU.
“Mbakukondwa awo ŵakumanya kuti ŵali na njara yauzimu.”—MATEYU 5:3.
MANYANI VINANDI VYA CHIUTA UYO NI MWENEKO WA BAIBOLO.
“Penjani Chiuta . . . na kumusanga nadi, . . . Wali kutali yayi na waliyose wa ise.”—MILIMO 17:27.
ŴERENGANI NA KUGHANAGHANIRA IVYO BAIBOLO LIKUYOWOYA.
‘Wakukondwa na dango la Yehova,a wakughanaghanirapo muhanya na usiku, ndipo chilichose icho wakuchita chendenge makora.’—SALIMO 1:2, 3.
a Zina la Chiuta ni Yehova nga umo Baibolo likuyowoyera.