Kasi mukumanyapo ŵanthu ŵalinga awo Mbakaboni ŵa Yehova? Panji taŵanyake tili kuzengezgana namwe. Taŵanyake tikugwira namwe ntchito. Taŵanyake tikusambira namwe sukulu, nakuti panji tili kuchezgapo namwe vya Baibolo. Kweni kasi mukutimanya makora? Chifukwa wuli tikuphalirako ŵanyithu ivyo tikusambira?

Tikuyana waka na imwe. Tili ŵanthu ŵa mitundu na mafuko ghakupambanapambana. Ŵanyake mbakavu, kweni ŵanyake mbakusanga. Taŵanyake tikasopanga kunyake, ndipo ŵanyake ŵakaŵavya chigomezgo mwa Chiuta. Kweni pambere tindaŵe Ŵakaboni ŵa Yehova, tose tikasambira dankha ivyo Baibolo likuyowoya. (Milimo 17:11) Tikakhorwa na ivyo tikasambira, ndipo tikajipeleka kuti tisopenge Yehova Chiuta.

Ivyo tikusambira mu Baibolo vikutovwira. Tikupambana yayi na ŵanthu wose. Nase masuzgo ghakutisanga, ndipo nyengo zinyake tikupuvya. Kweni pa vyose ivyo tikuchita, tikuyezga chomene kulondezga fundo izo tikusambira mu Baibolo. Pa chifukwa ichi, tasintha nkharo yithu, ndipo sono vinthu vikwenda makorako kuluska kale. (Salimo 128:1, 2) Lekani tikuphalirako ŵanyithu viwemi ivyo tasambira mu Baibolo.

Tikulondezga fundo izo Chiuta wakutipa. Chifukwa cha ivyo tasambira mu Baibolo, njuŵi yithu yikutisuzga yayi ndipo tikuchindika ŵanyithu. Chinyake ntchakuti tasambira kuŵa ŵakugomezgeka na ŵalusungu. Pa chifukwa ichi, tikukoleranako makora na ŵanyithu. Mu nyumba zithu namo tikukolerana na kugomezgana. Tikukhorwa kuti “Chiuta wakutemwera yayi.” Pa chifukwa ichi, tose tili ŵamoza, nangauli tikupambana mitundu panji mafuko. Kweniso tikukana kuti ndyali zitimbanizge umoza withu. Nangauli tikuyana waka na ŵanthu wose, kweni tikupambanako vyakuchita.—Milimo 4:13; 10:34, 35.

• Kasi Ŵakaboni ŵa Yehova ŵakuyanako wuli na ŵanthu wose?

• Kasi Ŵakaboni ŵali na nkharo wuli chifukwa cha kusambira Baibolo?

Ŵanandi ŵakughanaghana kuti Ŵakaboni ŵa Yehova ntchisopa icho chiza sono. Kweni kale chomene, vilimika 2,700 ivyo vyajumpha, ŵateŵeti ŵa Chiuta waunenesko yekha ŵakachemekanga “ŵakaboni.” (Yesaya 43:10-12) Kumanyuma uku, tikachemekanga Ŵakusambira Baibolo, kweni tikasintha zina. Chifukwa wuli tikatora zina lakuti Ŵakaboni ŵa Yehova?

Ndilo ni zina la Chiuta withu. Mu Malemba Ghatuŵa agho ghakalembeka kale chomene, zina lakuti Yehova likasangikangamo kanandi waka. Mu Mabaibolo ghanandi, zina ili ŵakulembamo yayi, kweni ŵakulembamo waka Fumu panji Chiuta. Ndipouli, Chiuta wakavumbura zina lake kwa Mozesi, wakati: “Ili ndilo zina lane muyirayira.” (Ekisodo 3:15) Ntheura iyo wakupambana na ŵachiuta ŵatesi. Tikuwona kuti ni mwaŵi kuchemeka na zina lituŵa la Chiuta.

Likuphara mulimo uwo tikuchita. Kwamba kale, ŵanthu ŵakuphalirako ŵanyawo chigomezgo chawo mwa Yehova. Uyo wakamba kuchita ntheura wakaŵa Abelu. Kufuma apo, kukaŵa Nowa, Abrahamu, Sara, Mozesi, Davide na ŵanyake ŵanandi. Wose aŵa ŵakuchemeka “bingu likuru . . . la ŵakaboni.” (Ŵahebere 11:4–12:1) Ise tikupharazga kuti ŵanthu ŵamanye unenesko pa nkhani ya Chiuta. Vili nga umo munthu wangapelekera ukaboni mu khoti kuvikilira munthu wambura mulandu.

Tikuyezga Yesu. Baibolo likuti Yesu ni “kaboni wakugomezgeka na waunenesko.” (Chivumbuzi 3:14) Mwenecho Yesu wakati ‘wakamanyiska ŵanthu zina la Chiuta’ na ‘kuchitira ukaboni unenesko.’ (Yohane 17:26; 18:37) Ntheura awo ŵakulondezga Yesu mu unenesko, ŵakwenera kumanyikwa na zina la Yehova, na kulipharazga. Ndivyo ŵakuchita Ŵakaboni ŵa Yehova.

• Chifukwa wuli Ŵakusambira Baibolo ŵakatora zina lakuti Ŵakaboni ŵa Yehova?

• Kasi Yehova wakamba pawuli kuŵa na ŵakaboni pa charu chapasi?

• Kasi Kaboni mukuru wa Yehova ni njani?

Baibolo likayowoyerathu kuti para Khristu wafwa, ŵasambizgi ŵatesi ŵazamwiza na visambizgo vyautesi. (Milimo 20:29, 30) Ivi ndivyo vikachitika nadi. Ŵakamba kusazga visambizgo vya Yesu na visambizgo vyautesi. Chikhristu chautesi chikanjira. (2 Timote 4:3, 4) Ipo tingakhorwa wuli kuti ivyo tikugomezga vikufuma mu Baibolo?

Nyengo yakuti Yehova wavumbure unenesko yikakwana. Yehova wakayowoyerathu kuti mu “nyengo yaumaliro . . . umanyi wenecho uzamwandana.” (Daniyeli 12:4) Mu 1870, awo ŵakakhumbanga kumanya unenesko ŵakawona kuti vinandi ivyo matchalitchi ghakusambizga vikufuma mu Baibolo yayi. Ntheura ŵakamba kupenjerezga kuti ŵapulikiske ivyo Baibolo likusambizga, ndipo Yehova wakaŵatumbika.

Ŵakasambira Baibolo na Mtima Wose. Pakusambira, ŵanthu aŵa ŵakachita nthowa iyo tichali kulondezga m’paka muhanya uno. Ŵakasoranga mutu wa nkhani na kupenja mavesi mu Baibolo, na kudumbirana. Para ŵafika pa lemba ilo ndakusuzga kulipulikiska, ŵakapenjerezganga mavesi ghanyake kuti ŵapulikiske vesi lakusuzga. Para ŵakhorwa na ivyo ŵasambira, ndipo vikukolerana na ivyo Malemba ghanyake ghakuyowoya, ŵakalembanga. Iwo ŵakakhumbanga kuti Baibolo lijizgore lekha. Ntheura ŵakamanya zina la Chiuta, Ufumu wake, ivyo wakukhumba kuchitira ŵanthu na charu chapasi, icho chikuchitikira ŵanthu ŵakufwa, na chiwuka cha ŵakufwa. Iwo ŵakafwatuka ku visambizgo vyautesi, na mitheto yake.—Yohane 8:31, 32.

Ŵakawona kuti nyengo yakuti unenesko umanyikwe yikakwana. Ntheura mu 1879, ŵakamba kulemba magazini ya Gongwe la Mulinda, iyo yichaliko m’paka sono. Mu vyaru 240, ŵanthu ŵa viyowoyero vyakujumpha 750 ŵakusambira ivyo Baibolo likusambizga. Mazuŵa ghano, umanyi wenecho wandana kuluska kale.

• Kasi ntchivichi chikachitika Khristu wakati wafwa?

• Ntchivichi chatovwira kubowozga unenesko mu Mazgu gha Chiuta?

Kale, Ŵakaboni ŵa Yehova ŵakaŵazganga Mabaibolo ghakung’anamulika na ŵanthu ŵanyake. Kweniso ŵakasindikizganga Mabaibolo agha na kughapeleka ku ŵanthu. Ndipouli, tikawona kuti ntchakukhumbikwa kuŵa na Baibolo ilo lingawovwira ŵanthu kuti “ŵamanye makora unenesko.” Nakuti ili ndilo ni khumbo la Chiuta. (1 Timote 2:3, 4) Ntheura mu 1950 tikamba kufumiska Baibolo la Mang’anamuliro gha Charu Chiphya mu vigaŵavigaŵa. Baibolo ili lang’anamurika makora chomene mu viyowoyero vyakujumpha 130.

Tikakhumbanga Baibolo lakupulikikwa makora. Chiyowoyero chikusintha, ntheura mazgu agho ghakusangika mu Mabaibolo ghanandi ngakale chomene, nakuti ghanyake ŵanthu ŵakuyowoyaso yayi. Kweniso kwasangika Mabaibolo ghakale chomene, agho ghatovwira kupulikiska umo Malemba Ghatuŵa ghakalembekera pakwamba mu Chihebere, Chiaramu, na Chigiriki.

Tikakhumbanga Baibolo ilo likusazgirako yayi ku mazgu gha Chiuta, nesi kuwuskako. Awo ŵakung’anamura Baibolo ŵakwenera kusintha chilichose yayi. Iwo ŵakwenera kung’anamura waka ivyo vikalembeka pakwamba. Ndipouli, mu Mabaibolo ghanandi ŵali kuwuskamo zina la Chiuta, lakuti Yehova.

Tikakhumbanga Baibolo ilo likulumba uyo wakalipeleka kwa ise. (2 Samuyeli 23:2) Mu Baibolo Lachingelezi la Mang’anamuliro gha Charu Chiphya, zina la Yehova lili kuweleramo mu malo 7,000 umo likasangikanga kale, nga umo viliri mu Baibolo lakale chomene. Wonani chithuzithuzi icho chili musi. (Salimo 83:18) Ŵakafwasilira pakung’anamura Baibolo ili, ntheura likunozga pakuŵazga. Chinyake ntchakuti likutovwira kumanya umo Yehova wakughanaghanira. Kwali muli nalo Baibolo la Mang’anamuliro gha Charu Chiphya, kwali yayi, kweni tikumuchiskani kuti muŵazgenge Mazgu gha Yehova zuŵa na zuŵa.—Joshuwa 1:8; Salimo 1:2, 3.

• Chifukwa wuli tikawona kuti ntchakukhumbikwa kuŵa na Baibolo liphya?

• Kasi awo ŵakukhumba kumanya khumbo la Chiuta ŵangachita vichi zuŵa na zuŵa?