Ise tilije ŵaliska awo ŵakupokera malipiro. Tikuchita ivyo ŵakachitanga Ŵakhristu ŵanyithu kale. Tili na ŵalaŵiliri awo ŵakusankhika ‘kuti ŵaliske mpingo wa Chiuta.’ (Milimo 20:28) Ŵalaŵiliri aŵa, panji kuti ŵalara, ŵakopa Chiuta. Iwo ŵakudangilira na kuliska mpingo. Ŵakuchita ivi ‘mwakuchichizgika yayi, kweni mwakukhumbisiska pamaso pa Chiuta. Ŵakukhumba kusanga chandulo munthowa yauryarya yayi, kweni ŵakuteŵetera na mtima wose.’ (1 Petrosi 5:1-3) Kweni kasi ŵakuchita ntchito wuli?

Ŵakutivikilira. Ŵalara ŵakulongozga na kuvikilira ŵanyawo mu mpingo, mwakuti waliyose walutilire kutemweka na Yehova. Ŵakumanya kuti Chiuta wali kuŵapa mulimo wakuzirwa, ntheura ŵakuwusa ŵanyawo yayi, kweni ŵakutovwira kuti tose tiŵe “ŵachimwemwe.” (2 Ŵakorinte 1:24) Nga ni muliska uyo wakupwelelera mberere zake, ŵalara nawo ŵakumanya munthu waliyose uyo wali mu mpingo.—Zintharika 27:23.

Ŵakutisambizga kuchita khumbo la Chiuta. Sabata yiliyose, ŵalara ŵakutisambizga pa ungano mwakuti chipulikano chithu chikhore. (Milimo 15:32) Kweniso ŵalara ŵakudangilira pa mulimo wa kupharazga. Ŵakuluta nase kukapharazga na kutisambizga nthowa zose zakupharazgira.

Ŵakukhozga waliyose. Iwo ŵakukhumba kuti waliyose walutilire kuŵa mubwezi wa Yehova. Ntheura ŵakwiza ku nyumba zithu, panji kuchezga nase pa Nyumba ya Ufumu. Ŵakutiŵazgira Malemba kuti ŵatovwire na kutipembuzga.—Yakobe 5:14, 15.

Padera pa ivyo ŵalara ŵakuchita mu mpingo, ŵakugwira ntchito zakulembeka, kweniso ŵakupwelelera mbumba zawo. Vyose ivi vikukhumba nyengo. Ntheura tikwenera kuŵachindika ŵabali aŵa, chifukwa ŵakufukafuka chomene.—1 Ŵatesalonika 5:12, 13.

• Kasi ŵalara ŵakuchita vichi mu mpingo?

• Kasi ŵakuchita vichi kulongora kuti ŵakughanaghanira Mkhristu waliyose?

Baibolo likuzunura magulu ghaŵiri gha Ŵakhristu ŵanalume awo ŵakudangilira, “ŵalaŵiliri na ŵateŵeti ŵakovwira.” (Ŵafilipi 1:1) Kanandi mu mpingo mukuŵa ŵabali ŵanandi awo ŵakuchita milimo iyi. Kasi ŵateŵeti ŵakovwira ŵakuchita vichi mu mpingo?

Ŵakovwirana na ŵalara. Ŵateŵeti ŵakovwira ŵakopa Chiuta, mbakugomezgeka, kweniso ŵakuŵikapo mtima pa ivyo ŵakuchita. Ŵanyake mbalara msinkhu, ŵanyake yayi. Iwo ŵakuchita milimo yinandi mu mpingo. Ntheura ŵalara ŵakuŵa na mpata kuti ŵasambizgenge na kuliska.

Ŵakuchita milimo yakuzirwa. Ŵateŵeti ŵakovwira ŵanyake mbalinda. Ŵalinda ŵakupokelera ŵanthu awo ŵakwiza pa ungano. Ŵanyake ŵakuŵa ku dipatimenti ya vyakukuzgira mazgu. Ŵanyake ŵakugaŵa mabuku. Ŵanyake ŵakupenda ndalama za mpingo, ndipo ŵanyake ŵakugaŵira waliyose chigaŵa chakupharazgako. Kweniso ŵakovwira kunozga Nyumba ya Ufumu. Nyengo zinyake ŵalara ŵakuŵapempha kovwira ŵachekuru. Pakuti ŵakuzomera kuchita mulimo uliwose uwo ŵatumika, ŵanyawo mu mpingo ŵakuŵachindika.—1 Timote 3:13.

Mpingo ukusambirako kwa iwo. Ŵateŵeti ŵakovwira ŵakusoleka chifukwa cha makhaliro ghawo ghawemi. Para ŵakusambizga pa ungano, tikukhozgeka. Para ŵakulongozga pa ntchito ya kupharazga, nase nkhongono zikukwera. Pakuti ŵakupulikira ŵalara, tose tikuŵa ŵakukondwa na ŵakukolerana. (Ŵaefeso 4:16) Kunthazi, nawo ŵakwenelera kuŵa ŵalara.

• Kasi ŵateŵeti ŵakovwira mbanthu ŵamtundu wuli?

• Kasi ŵateŵeti ŵakuchita vichi kuti mpingo wendenge makora?

Kanandi Paulosi na Baranaba ŵakuzunulika mu Baibolo. Ŵanthu aŵa ŵakaŵa ŵalaŵiliri. Ŵakenderanga mipingo iyo yikaŵako kale. Chifukwa? Ŵakafipiranga mtima Ŵakhristu ŵanyawo. Nyengo yinyake, Paulosi wakaghanaghana kuti ‘ŵawelere kuti ŵakendere ŵabali’ na kuwona umo ŵaliri. Wakaŵa wakunozgeka kwenda mtunda utali kuti wakakhozge ŵabali. (Milimo 15:36) Ndilo ni khumbo la ŵalaŵiliri ŵa dera awo tili nawo mazuŵa ghano.

Iwo ŵakwizira kutikhozga. Mulaŵiliri wa dera wakwendera mipingo pafupifupi 20 panji kujumpha. Wakuchezga na mpingo sabata yimoza, kaŵiri pa chaka. Ŵabali aŵa na ŵawoli ŵawo ŵangatovwira pa vinandi. Ŵakuyezgayezga kumanya Ŵakhristu ŵanyawo, ŵana na ŵalara wuwo. Ŵakwenda nase pakupharazga, na kuŵa nase pakusambira Baibolo na ŵanthu. Ŵalaŵiliri aŵa, pamoza na ŵalara, ŵakwendera Ŵakhristu ŵanyawo na kuŵakhozga. Kweniso ŵakusambizga pa maungano gha mpingo na maungano ghakuru.—Milimo 15:35.

Ŵakughanaghanira waliyose. Ŵalaŵiliri wa dera ŵakukhumba kuti Ŵakhristu ŵanyawo ŵachitenge makora pa vinthu vyauzimu. Ŵakukumana na ŵalara na ŵateŵeti ŵakovwira kuti ŵawone umo ŵakuchitira vinthu, na kuŵawovwira pa milimo yawo. Ŵakovwira ŵapayiniya kuti ŵapharazgenge makora. Kweniso ŵakukhumba kumanya awo ŵamba sono kuwungana na mpingo na kupulika umo ŵakuchitira vinthu vyauzimu. Ŵabali aŵa ŵakujipeleka chomene. Iwo ‘mbantchito ŵanyithu awo ŵakutiteŵetera kuti ŵatovwire.’ (2 Ŵakorinte 8:23) Tikusambirako kwa iwo para tikuwona chipulikano chawo na kujipeleka kwawo.—Ŵahebere 13:7.

• Chifukwa wuli ŵalaŵiliri ŵa dera ŵakuchezgera mipingo?

• Mungachita wuli kuti ŵamovwirani para ŵiza pa mpingo?

Para kwachitika soka, Ŵakaboni ŵa Yehova ŵakuchitapo kanthu mwaluŵiro kuti ŵawovwire Ŵakhristu ŵanyawo awo ŵakhwaskika. Uwu mbukaboni wakuti tikutemwana nadi. (Yohane 13:34, 35; 1 Yohane 3:17, 18) Kasi tikovwirana wuli?

Tikupeleka ndalama. Kale, njara yikuru yikawa mu charu cha Yudeya. Ntheura Ŵakhristu ŵa ku Antiyoke ŵakatuma ndalama kuti zovwire ŵanyawo ku Yudeya. (Milimo 11:27-30) Nase para tapulika kuti ŵabali ŵithu ku charu chinyake ŵasuzgika, tikutuma ndalama kwizira mu mpingo withu. Ndalama izi ŵakugulira ivyo ŵanyithu ŵasoŵerwa.—2 Ŵakorinte 8:13-15.

Tikovwira munthowa zinyake. Uko kwachitika soka, ŵalara ŵa mpingo ŵakupenja ŵabali wose na kuwoneseska kuti ŵali makora. Pakuŵa komiti iyo yikulaŵilira ntchito yakugaŵa chakurya, maji ghakumwa, vyakuvwara, pakugona, na munkhwala. Ŵakaboni ŵa Yehova awo ŵakumanya ntchito, ŵakujipeleka kunozga nyumba za Ŵakhristu ŵanyawo, na Nyumba za Ufumu. Pakuti tili ŵakukolerana kweniso tasambira maluso ghanandi chifukwa cha kugwilira ntchito pamoza, chikuŵa chipusu kovwirapo para kuli suzgo. Chakwamba, tikovwira “awo mbamoza na ise mu chipulikano,” kweni tikuŵataya chara ŵanthu ŵa visopa vinyake.—Ŵagalatiya 6:10.

Tikuŵapembuzga. Awo soka laŵawira, ŵakukhumbikwira chipembuzgo. Pa nyengo yakusuzga iyi, tikuzgokera kwa Yehova, pakuti ni “Chiuta wa chisangulusko chose.” (2 Ŵakorinte 1:3, 4) Tikuŵaphalira ivyo Chiuta walayizga mu Baibolo, na kuŵakumbuska kuti sonosono apa, Ufumu wa Chiuta umazgenge masoka ghose. Chitima na masuzgo vimalenge.—Chivumbuzi 21:4.

• Chifukwa wuli Ŵakaboni ŵa Yehova ŵakuchitapo kanthu mwaluŵiro para kwawa soka?

• Kasi tikuŵapembuzga wuli awo ŵali mu suzgo?

Pambere Yesu wandakomeke, wakatolera ŵasambiri ŵake ŵanayi pamphepete. Pakaŵa Petrosi, Yakobe, Yohane, na Andireya. Apo Yesu wakaŵaphaliranga chimanyikwiro cha kuŵapo kwake mu mazuŵa ghaumaliro, wakafumba fumbo lakuzirwa, wakati: “Kasi muzga wakugomezgeka na wavinjeru ni njani, uyo fumu yake yamwimika pa ŵateŵeti ŵake ŵa pa nyumba, kuti waŵape chakurya pa nyengo yakwenelera?” (Mateyu 24:3, 45; Mariko 13:3, 4) Apa fundo ya Yesu yikaŵa yakuti, iyo pakuŵa “fumu,” wimikenge ŵanthu awo ŵapelekenge chakurya chauzimu ku awo ŵakumulondezga. Kasi ŵanthu aŵa mbanjani?

Mbakhristu ŵachoko waka ŵakuphakazgika na mzimu. “Muzga” uyu wakupeleka chakurya chauzimu ku Ŵakhristu ŵanyake pa nyengo yakwenelera. Tikuthemba muzga uyu kuti watipe “chakurya chakukwana pa nyengo yakwenelera.”—Luka 12:42.

Ŵakwendeska vinthu mu nyumba ya Chiuta. (1 Timote 3:15) Yesu wali kupeleka ntchito yikuru kwa muzga wake. Iyi ni ntchito yakwendeska vinthu mu gulu la Yehova pano pasi. Wakupwelelera katundu wa gulu ili, kulongozga pa ntchito ya kupharazga, na kutisambizga kwizira mu mipingo. Muzga uyu wakutipa vinthu ivyo tikukhumba, pa nyengo iyo tikuvikhumbira. Vinyake ivyo wakutipa ni mabuku agho tikupharazgira, kweniso maungano gha mpingo na ghakuru wuwo.

Muzga uyu ngwakugomezgeka, chifukwa wakudemelera ku unenesko uwo Baibolo likusambizga, kweniso wakufiska ntchito ya kupharazga makani ghawemi. Ngwavinjeru, chifukwa wakupwelelera makora vinthu vya Khristu pano pasi. (Milimo 10:42) Chiuta wakutumbika ivyo muzga uyu wakuchita. Ŵanthu ŵanandi ŵakwiza mu gulu la Chiuta, kweniso tikukhuta na chakurya chauzimu.—Yesaya 60:22; 65:13.

• Kasi Yesu wakasora njani kuti walyeske ŵasambiri ŵake?

• Kasi muzga ngwakugomezgeka na wavinjeru munthowa wuli?

Kale, mu Yerusalemu mukaŵa “ŵapositole na ŵalara” ŵachoko waka awo ŵakadumuranga nkhani zakuzirwa m’malo mwa Ŵakhristu ŵanyawo. (Milimo 15:2) Para kuli nkhani, ŵakaŵazganga Malemba na kulomba mzimu wa Chiuta kuti uŵalongozge, ntheura ‘ŵakakolerananga na mtima umoza.’ (Milimo 15:25) Ndivyo Wupu Wakulongozga ukuchita mazuŵa ghano.

Ŵakuchita khumbo la Chiuta. Ŵakhristu awo ŵali mu Wupu Wakulongozga ŵakutemwa chomene Mazgu gha Chiuta, ndipo ŵakumanya kulongozga na kuzgora mafumbo ghakukhwaskana na Baibolo. Ŵakukumana sabata yiliyose kuti ŵawone umo ntchito yikwendera pa charu chose. Iwo ŵakuchita nga umo ŵakachitiranga ŵapositole na ŵanalume ŵalara kale. Ŵakulemba makalata panji kutuma ŵalaŵiliri ŵakwendakwenda kuti ŵapeleke ulongozgi. Ichi chikovwira kuti ŵanthu ŵa Chiuta ŵakoleranenge pakuchita vinthu. (Milimo 16:4, 5) Wupu Wakulongozga ukulaŵilira ntchito ya kunozga chakurya chauzimu, na kuchiska wose kuŵikapo mtima pa ntchito ya kupharazga. Kweniso ukwimika ŵabali kuti ŵachite milimo yakupambanapambana.

Ŵakulongozgeka na mzimu wa Chiuta. Kuti Wupu Wakulongozga umanye icho ungachita, ukulaŵiska kwa Muwusi wa Chilengiwa chose, Yehova, ndiposo kwa Mutu wa mpingo, Yesu. (1 Ŵakorinte 11:3; Ŵaefeso 5:23) Awo ŵali mu wupu uwu ŵakujitora nga mbalongozgi yayi. Iwo, pamoza na Ŵakhristu ŵanyawo ŵakuphakazgika na mzimu wa Chiuta, “ŵakulutilira kulondezga Mwana wa mberere kulikose uko wakuya.” (Chivumbuzi 14:4) Ŵabali mu wupu uwu, ŵakuwonga para tikuŵalombera kwa Chiuta.

• Kasi mbanjani ŵakalongozganga kale?

• Kasi awo ŵali mu Wupu Wakulongozga ŵakuchita wuli kuti Chiuta waŵadangilire?

Mu Chihebere, lizgu lakuti Beteli likung’anamura “Nyumba ya Chiuta.” (Genizesi 28:17, 19, mazgu ghamusi) Mphake kuti maofesi gha Ŵakaboni ŵa Yehova pa charu chose ghakumanyikwa na zina ili. Kuti ntchito ya kupharazga yende makora, ntchifukwa cha ivyo vikuchitika mu maofesi agha. Ŵakhristu awo ŵakulongozga ntchito iyo yikuchitika pa charu chose ŵali ku New York, mu charu cha United States. Ŵakhristu aŵa ŵakulaŵilira ivyo vikuchitika mu maofesi ghose, mu vyaru vyakupambanapambana. Wose awo ŵakuteŵetera mu maofesi agha ŵakuchemeka mbumba ya Beteli. Nga ni mbumba, vyose ŵakuchitira pamoza. Ŵakugwilira lumoza ntchito, ŵakulyera pamoza, na kusambira Baibolo pamoza.—Salimo 133:1.

Wose mbakujipeleka. Waliyose uyo wakuteŵetera pa Beteli wakujipeleka kuchita khumbo la Chiuta na vinthu vyakukhwaskana na Ufumu wake. (Mateyu 6:33) Palije uyo wakupokera malipiro, ndipouli, waliyose wakupika pakugona, chakurya, na kandalama kachoko waka kuti kamovwire. Waliyose wali na ntchito yake. Ŵanyake ŵakugwira ntchito mu maofesi, ŵanyake ŵakuphika, ndipo ŵanyake ŵakupwelelera malo ghakulyeramo. Ŵanyake ŵakusindikizga mabuku, ŵanyake ŵakuŵikako vikopi, ŵanyake ŵakunozga vipinda vyakugonamo, ŵanyake ŵakuchapa, ŵanyake ŵakunozga vinthu, na vinyake vyantheura.

Chilato ntchakuti ntchito ya kupharazga yendenge makora. Chilato chikuru cha Beteli ntchakuti ŵanthu ŵanandi ŵamanye unenesko. Nthena kabuku aka kali kufuma ku Beteli. Wupu wa Ŵakhristu awo ŵakulongozga ndiwo ukalaŵilira ntchito ya kulemba. Kufuma apo, ŵakatumizga kabuku aka ku vyaru vinandi kuti kang’anamulike. Ntchito ya kung’anamura yikati yamara, ŵakasindikizga kabuku aka pa makina ghankhongono, na kukatumizga ku mipingo yakujumpha 110,000. Pa vyose ivyo vikachitika kuti tiŵe na kabuku aka, awo ŵakuteŵetera pa Beteli ŵakawovwira chomene. Icho ŵakukhumba ntchakuti makani ghawemi ghapharazgike mwaluŵiro.—Mariko 13:10.

• Mbanjani ŵakuteŵetera pa Beteli, ndipo ŵakovwirika wuli?

• Kasi awo ŵali pa Beteli ŵakovwira pa ntchito wuli iyo yikwenera kuchitika luŵiro?

Awo ŵali pa Beteli ŵakuteŵetera mu madipatimenti ghakupambanapambana kuti ntchito ya kupharazga yende makora mu charu chawo. Ŵanyake ŵakuchita ntchito ya kung’anamura, ŵanyake ŵakusindikizga, ŵanyake ŵakuŵika vikopi ku mabuku, ŵanyake ŵakuteŵetera uko ŵakusunga mabuku, ŵanyake ŵakujambura mavidiyo na vinyake vyantheura.

Komiti ya Munthavi yikulaŵilira ntchito. Wupu Wakulongozga ukusora komiti ya ŵalara ŵatatu panji kujumpha apa kuti yilaŵilirenge ntchito pa ofesi yiliyose. Komiti iyi yikumanyiska Wupu Wakulongozga umo vinthu vikwendera. Usange pali masuzgo, yikuyowoya. Ivi vikovwira Wupu Wakulongozga kuwona ivyo vingalembeka mu mabuku, panji visambizgo ivyo ŵabali ŵangasambira pa mpingo panji pa maungano ghakuru. Kweniso Wupu Wakulongozga ukutuma ŵabali kuti ŵenderenge maofesi na kovwira komiti ya munthavi pa milimo iyo yikuchita. (Zintharika 11:14) Mu sabata iyo, mwimiliri wa ofesi yikuru ya Ŵakaboni ŵa Yehova wakuyowoya fundo zakukhozga awo ŵakuteŵetera mu charu icho.

Kovwira mipingo. Ŵabali pa ofesi ndiwo ŵakuzomerezga kuti kuŵe mipingo yinyake. Ŵabali aŵa ŵakulaŵilira ŵapayiniya, ŵamishonale, na ŵalaŵiliri ŵa dera mu charu chawo. Ŵakunozga maungano gha dera kweniso gha chigaŵa, na kulaŵilira ntchito ya kuzenga Nyumba za Ufumu. Ŵakuwoneseska kuti mipingo yikupokera mabuku ghakukwana. Vyose ivyo vikuchitika pa ofesi ya Ŵakaboni ŵa Yehova vikovwira kuti ntchito ya kupharazga yendenge makora.—1 Ŵakorinte 14:33, 40.

• Kasi makomiti gha munthavi ghakovwira wuli Wupu Wakulongozga?

• Kasi pa ofesi ya Ŵakaboni ŵa Yehova pakuchitika ntchito wuli?

Kuti tipharazge makora “makani ghawemi,” ku “mtundu uliwose, fuko lililose, lulimi lulilose, na ŵanthu wose,” tikuŵa na mabuku mu viyowoyero vyakujumpha 750. (Chivumbuzi 14:6) Vikwenda wuli kuti tiŵe na mabuku mu viyowoyero vyose ivi? Tikovwirika na Ŵakhristu ŵanyithu mu vyaru na vyaru, awo ŵakulemba mabuku. Kweniso kuli ŵakung’anamura mabuku awo ŵakugwira ntchito na mtima wose. Wose aŵa Mbakaboni ŵa Yehova.

Pakwamba, vyose vikulembeka mu Chingelezi. Wupu Wakulongozga, uwo uli ku maofesi ghithu ghakuru, ndiwo ukulaŵilira ntchito ya kulemba mabuku. Ukuchita ntchito iyi kwizira mu Dipatimenti Yakulemba Mabuku, iyo yikugaŵa ntchito ya kulemba. Ŵanyake awo ŵakulemba ŵali ku maofesi ghakuru, ndipo ŵanyake ŵakuteŵetera mu vyaru vinyake. Nkhani izo ŵakulemba zikukhwaska ŵanthu ŵanandi, chifukwa awo ŵakulemba mbanthu ŵakupambanapambana.

Mabuku agho ghalembeka ghakutumizgika ku ŵakung’anamura. Para ŵamara kuweleramo mabuku agho ghalembeka, ŵakughatumizga ku ŵakung’anamura pa charu chose chapasi. Iwo ŵakung’anamura, kuweleramo, na kuŵazga ivyo ŵang’anamura. Ŵakuyezgayezga kusanga ‘mazgu ghaunenesko’ mwakuti awo ŵakuŵazga ŵapulikiskenge.—Mupharazgi 12:10.

Makompyuta ghakovwira kuti ntchito yende luŵiro. Kompyuta payekha yingalemba panji kung’anamura yayi. Ndipouli, yikovwira kuti ntchito yende luŵiro, chifukwa yikuŵa na madikishonare kweniso vinthu vinyake vyakovwira. Ŵakaboni ŵa Yehova ŵali kunozga pulogiramu ya pa kompyuta yakuchemeka Multilanguage Electronic Publishing System (MEPS) iyo yikovwira kupanga mabuku mu viyowoyero vinandi. Para ŵamara kung’anamura buku, ŵakulinjizga mu MEPS, ndipo pulogiramu iyi yikusazgamo vithuzithuzi. Kufuma apo, ŵakulinozga kuti liwoneke makora, na kusindikizga.

Chifukwa wuli tikung’anamura mabuku mu viyowoyero vinandi, nangauli viyowoyero vinyake vikuyowoyeka na ŵanthu ŵachoko waka? Yehova wakukhumba kuti “ŵanthu ŵa mitundu yose ŵamanye makora unenesko na kuponoskeka.”—1 Timote 2:3, 4.

• Kasi mabuku ghithu ghakulembeka wuli?

• Chifukwa wuli tikung’anamura mabuku mu viyowoyero vinandi?

Chilimika chilichose, Ŵakaboni ŵa Yehova ŵakusindikizga na kugaŵa mabuku ghanandi chomene, kwambura kutchaja mtengo. Tikuzenga Nyumba za Ufumu na maofesi. Tikupwelelera ŵateŵeti ŵanandi awo ŵakugwira ntchito pa Beteli, na ŵamishonale. Kweniso para kwawa soka, tikovwirapo. Kweni fumbo ndakuti, ‘Kasi ndalama zakuchitira vyose ivi, zikufumankhu?’

Tikupeleka zithero yayi, nesi kwendeska mbale. Ntchito ya kupharazga iyo tikuchita yikurya ndalama zinandi chomene, kweni tikupempheska chara. Vyaka 100 ivyo vyajumpha, Gongwe la Mulinda likati Yehova wali nase, ntheura “tizamupempheskapo yayi wovwiri kufuma ku ŵanthu, nesi kuŵaŵeyelera kuti ŵapelekepo wovwiri.” Ndipo nadi, tindapempheskepo.—Mateyu 10:8.

Ntchito yikwenda na vyakupeleka. Ŵanthu ŵanandi ŵakukondwa na ntchito ya kusambizga ŵanthu Baibolo, ndipo ŵakovwirapo. Ŵenecho Ŵakaboni ŵa Yehova ŵakujipeleka na nyengo yawo, nkhongono zawo, ndalama, na vinthu vinyake pakuchita khumbo la Chiuta. (1 Midauko 29:9) Mu Nyumba ya Ufumu mukuŵa mabokosi gha vyakupeleka, ndipo uyo wakhumba wakuponyamo. Panji munthu wangapeleka vyawanangwa vyake kwizira pa webusayiti ya jw.org. Kanandi vyakupeleka ivi vikufuma ku ŵanthu ŵasambazi yayi. Ŵanandi awo ŵakovwirapo pa ntchito iyi ŵali nga ni chokoro chikavu icho Yesu wakachiwonga, nangauli chikapeleka tundalama tuŵiri twakuzirwa pachoko. (Luka 21:1-4) Ntheura waliyose wangakwaniska kuŵika “kanthu padera” kuti wapeleke kuyana na “umo wadumulira mu mtima wake.”—1 Ŵakorinte 16:2; 2 Ŵakorinte 9:7.

Tikukayika yayi kuti Yehova walutilirenge kuchiska awo ŵakukhumba ‘kumuchindika na vinthu vyawo vyakuzirwa,’ panji kuti vyuma vyawo, mwakuti khumbo lake lichitike.—Zintharika 3:9.

• Kasi tikupambana wuli na visopa vinyake?

• Kasi vyakupeleka vikugwira ntchito wuli?

Tikuti Nyumba ya Ufumu, chifukwa chakuti vyose ivyo vikuchitika pa malo agha vikukhwaskana na Ufumu wa Chiuta, uwo ukaŵa mutu wa upharazgi wa Yesu.—Luka 8:1.

Ndiko ŵanthu ŵakusopa Chiuta mu unenesko. Kuti Ŵakaboni ŵa Yehova ŵapharazge makora makani ghawemi gha Ufumu, ŵakunozgekera dankha pa Nyumba ya Ufumu. (Mateyu 24:14) Nyumba za Ufumu zikupambana ukuru na mawonekero, kweniso zikupambana na matchalitchi. Nyengo zinyake, mipingo yinandi yikuwungana mu Nyumba ya Ufumu yimoza. Mazuŵa ghano, Nyumba za Ufumu zinandi zikuzengeka pa charu chose. Zuŵa lililose, Nyumba za Ufumu 5 zikuzengeka. Ivi vikuchitika chifukwa chakuti mipingo nayo yikusazgikira. Kweni kasi ntchito ya kuzenga iyi yikuchitika wuli?—Mateyu 19:26.

Yikwenda na vyakupeleka ivyo vikuŵikika mu thumba limoza. Ndalama izi zikutumizgika ku ofesi, ndipo usange kunyake kukukhumbikwa Nyumba ya Ufumu yiphya panji kuyinozga waka, ofesi yikutora ndalama zenezizi.

Ŵakuzenga Mbakhristu ŵakupambanapambana awo ŵakujipeleka waka. Mu vyaru vinandi, muli Magulu Ghakuzenga Nyumba za Ufumu. Kweniso ŵanyake ŵakujipeleka kwenda mpingo na mpingo, kulikose uko kuli ntchito. Iwo ŵakulongozga pakuzenga, kweniso ŵakusambizgako ŵanyawo. Mu vyaru vinyake, Ŵakaboni ŵa Yehova awo ŵakumanya ntchito ŵakusoleka ndipo ŵakulaŵilira ntchito ya kuzenga panji kunozga Nyumba za Ufumu mu chigaŵa icho ŵapika. Kweni pose apo pakuzengeka Nyumba ya Ufumu, mpingo ndiwo ukovwira chomene. Ŵakhristu ŵakujipeleka na nkhongono zawo. Kuti ntchito ya kuzenga yichitike, Yehova wakovwira na mzimu wake, kweniso ŵanthu ŵake ŵakuŵikapo mtima wawo wose.—Salimo 127:1; Ŵakolose 3:23.

• Chifukwa wuli malo agho tikusoperapo ghakuchemeka Nyumba ya Ufumu?

• Ntchivichi chikovwira kuti ntchito ya kuzenga Nyumba za Ufumu yichitike pa charu chose?

Pa Nyumba ya Ufumu yiliyose pali kulembeka zina lituŵa la Chiuta. Ntheura tikuwona kuti ni mwaŵi kovwirapo kuti Nyumba ya Ufumu yiwonekenge makora, kweniso kuti yileke kunangika. Nakuti milimo iyo tingachita pa Nyumba ya Ufumu njakuzirwa chomene pakusopa. Waliyose wangawovwirapo.

Para ungano wamara, jipelekani kunozga. Para ungano wamara, ŵabali na ŵadumbu ŵakujipeleka kunozga Nyumba ya Ufumu. Pali ndondomeko ya kunozga Nyumba ya Ufumu, kamoza pa sabata. Mulara panji muteŵeti wakovwira ndiyo wakulaŵilira ntchito iyi, ndipo wakulondezga ndondomeko ya ivyo vikwenera kuchitika. Kuyana na ntchito iyo yilipo, ŵanyake ŵakujipeleka kuphyera, ŵanyake kukolopa, ŵanyake kupuputa mipando, ŵanyake ŵakuyiŵika makora, kweniso ŵanyake ŵakunozga ku vimbuzi, kupuputa mawindo, na kunozga kuwaro. Kamoza pa chaka, pakuŵa ntchito yikuru ya kunozga Nyumba ya Ufumu. Usange ŵana ŵithu nawo ŵakuchitako ntchito iyi, ndikuti tikuŵawovwira kuti ŵachindikenge malo ghithu ghakusoperapo.—Mupharazgi 5:1.

Jipelekani kunozga ivyo vyanangika. Chaka chilichose, ŵabali ŵakwendera Nyumba ya Ufumu, kuwaro na mukati, kuti ŵawone ivyo vingakhumbikwira kunozga. Kufuma apo, pa Nyumba ya Ufumu pakuchitika ntchito ya kunozga vinthu, mwakuti yileke kunangika. Usange tingayileka kuti yinangike, panganjira ndalama zinandi chomene kuti yinozgekeso. (2 Midauko 24:13; 34:10) Nyumba ya Ufumu iyo njakutowa kweniso yakuwoneka makora, ndiyo njakwenelera kusoperamo Chiuta withu. Usange nase tikukorako ntchito iyi, tikulongora kuti tikumutemwa chomene Yehova, ndipo tikuchindika malo ghakusoperapo. (Salimo 122:1) Kweniso usange malo ghithu ghakuwoneka makora, ghakupeleka ntchindi.—2 Ŵakorinte 6:3.

• Chifukwa wuli tikulekapo yayi kupwelelera nyumba yithu?

• Kasi pali ndondomeko wuli izo zikovwira kuti Nyumba ya Ufumu yiŵe yakutowa nyengo zose?

Kasi mukukhumba kuŵazga buku ilo lingamovwirani kupulikiska Baibolo? Kasi mukukhumba kumanya vinandi vya lemba, munthu, malo, panji chinthu icho chikuzunulika mu Baibolo? Panji kasi mukughanaghanira umo Mazgu gha Chiuta ghangamovwilirani pa suzgo yinu? Usange ni nthena, lutani ku layibulare mu Nyumba ya Ufumu.

Kuli mabuku agho ghangamovwirani. Mukwenera kuti mulije mabuku ghanyake ghakulongosora vya Baibolo gha chiyowoyero chinu. Kweni ku layibulare iyo yili mu Nyumba ya Ufumu, kuli mabuku ghanandi ghasono. Kweniso nyengo zinyake kukuŵa Mabaibolo ghakupambanapambana, dikishonare, na mabuku ghanyake. Muli ŵanangwa kunjira mu layibulare pambere ungano undambe panji para wamara. Usange mu layibulare muli kompyuta, mwamusangapo Watchtower Library. Iyi ni pulogiramu iyo pali mabuku ghanandi, ndipo njakusuzga yayi. Para mwajura, mukulembapo waka mutu wa nkhani, lizgu, panji lemba, mbwenu yikumulongorani ivyo mukupenja.

Layibulare njakovwira kwa awo ŵapika chakuchita mu Uteŵeti na Umoyo Wachikhristu. Pakunozgekera nkhani mungagwiliskira ntchito mabuku agho ghali pa layibulare iyo yili mu Nyumba ya Ufumu. Uyo wakulaŵilira Uteŵeti na Umoyo Wachikhristu ndiyo wakupwelelera layibulare. Ni ntchito yake kuŵikapo mabuku ghasono, na kuwoneseska kuti ghakuŵikika mu malo ghake. Iyo, panji uyo wakusambira namwe Baibolo wangamulongorani umo mungasangira ivyo mukukhumba. Kweni kufuma nagho yayi mabuku, ndipo ntchakuzirwa kughapwelelera. Ntchakuzomerezgeka yayi kulembamo.

Baibolo likutiphalira kuti para tikukhumba “kumumanya nadi Chiuta,” tikwenera ‘kuupenjisiska nga mbusambazi wakubisika.’ (Zintharika 2:1-5) Layibulare iyo yili mu Nyumba ya Ufumu yingamovwirani kuti mwambepo kupenja.

• Kasi mu layibulare iyo yili mu Nyumba ya Ufumu muli vichi ivyo vingamovwirani?

• Ni njani wangamovwirani kuti musange ivyo mukupenja pa layibulare?

Yesu wakaphalira ŵasambiri ŵake kuti: “Ungweru winu uŵale panthazi pa ŵanthu, mwakuti ŵawone milimo yinu yiwemi na kupeleka uchindami kwa Awiskemwe ŵakuchanya.” (Mateyu 5:16) Kuti ivi vichitike, tikusangirapo mwaŵi pa ivyo ŵanthu ŵakupanga mazuŵa ghano, nga ni Intaneti. Tili na webusayiti ya jw.org, iyo yikulongosora ivyo tikugomezga na ivyo tikuchita. Kweni kasi pali vichi chomenechomene?

Mazgoro agho Baibolo likupeleka pa mafumbo ghanandi. Ŵanthu ŵakufumba mafumbo ghakuzirwa chomene, ndipo ivyo Baibolo likuyowoya pa mafumbo agha vikusangika pa webusayiti yithu. Mwachiyelezgero, pali mathirakiti ghakuti Kasi Masuzgo Ghamalenge?, na lakuti Kasi Ŵakufwa Ŵazamuwuka Nadi? ndipo ghali mu viyowoyero vyakujumpha 600. Pakusangikaso Baibolo la Malemba Ghakupatulika mu Mang’anamuliro gha Charu Chiphya mu viyowoyero vyakujumpha 130. Vinyake ivyo mungasanga ni mabuku ghakovwira kusambira Baibolo, nga ni buku lakuti Kasi Baibolo Likusambizgachi Chomenechomene? Kweniso pali magazini ghasono gha Gongwe la Mulinda na Wukani! Vinandi mwa vinthu ivi mungaŵazgira papo pa kompyuta, panji mungachita dawunilodi. Mungachita dawunilodi ma MP3, PDF, panji EPUB. Nakuti mungapulinta mapeji ghanyake kuti mupeko ŵanyinu awo ŵangatemwa kuŵazga vinthu ivi mu chiyowoyero chawo. Paliso mavidiyo ghanandi gha chiyowoyero cha mawoko. Mungachita dawunilodi Baibolo lakuti mupulikizgenge, panji madirama, na sumu zakunozga.

Pakusangika vyakukhwaskana na Ŵakaboni ŵa Yehova. Pa webusayiti yithu pakuŵa nkhani na mavidiyo ghakulongosora umo ntchito yithu yikwendera pa charu chose. Mungaŵazga vya Ŵakaboni ŵa Yehova, na ivyo tikuchita pakovwira awo ŵasuzgika.Mungawona madeti gha maungano ghakuru agho ghaŵengeko, kweniso maadiresi na manambara gha foni gha maofesi ghithu.

Nthowa iyi yikovwira kuti ungweru wa unenesko uŵale m’paka ku vigaŵa vyakutali chomene pa charu chapasi. Kosekose, pa charu chapasi, m’paka ku Antarctica, ŵanthu ŵakovwirika kumanya unenesko. Tikulomba kuti “mazgu gha Yehova ghalutilire kuthandazgika mwaluŵiro” pa charu chose chapasi, mwakuti Chiuta wapike uchindami.—2 Ŵatesalonika 3:1.

• Kasi webusayiti ya jw.org yikovwira wuli ŵanthu kumanya unenesko?

• Kasi mungatemwa kuŵazga vichi pa webusayiti iyi?