Ŵanthu ŵanandi ŵali kuleka kusopa, chifukwa ŵakuwona kuti ŵakovwirika yayi. Chifukwa wuli pera mukwenera kuwungana na Ŵakaboni ŵa Yehova? Kasi vinthu vikuŵa wuli para ŵawungana pamoza?

Pakuŵa chimwemwe, chifukwa tikutemwana. Kale Ŵakhristu ŵakawungananga mu magulu, panji kuti mipingo. Para ŵawungana, ŵakasopanga Chiuta, kusambira Malemba na kuchiskana. (Ŵahebere 10:24, 25) Pa maungano agha, ŵakakondwanga chifukwa cha kuŵa pamoza na Ŵakhristu ŵanyawo. (2 Ŵatesalonika 1:3; 3 Yohane 14) Ndimo nase tikuchitira mazuŵa ghano, ndipo tikukondwa.

Tikusambira umo tingalondezgera fundo izo zili mu Baibolo. Kale, ŵanalume, ŵanakazi, na ŵana ŵakawungananga pamoza. Nase ndimo tikuchitira. Ŵasambizgi ŵakujura Malemba na kutovwira umo tingalondezgera fundo izo zilimo. (Dotoronome 31:12; Nehemiya 8:8) Wose awo ŵiza ŵangayowoyapo na kwimbako sumu. Ntheura waliyose wakuŵa na mwaŵi kuti wayowoye chigomezgo icho wali nacho.—Ŵahebere 10:23.

Chipulikano chithu mwa Chiuta chikukhozgeka. Kale, mpositole Paulosi wakaphalira mpingo unyake kuti: “Nkhukhumba chomene kumuwonani, kuti nizakamupaniko chawanangwa chauzimu kuti mukhozgeke, panji kuti tizakakhwimiskane, waliyose kwizira mu chipulikano cha munyake, chinu na chane.” (Ŵaroma 1:11, 12) Para tikuchezga na ŵanyithu pa ungano, tikukhozgana mu chipulikano, ndipo tikukhuka kuchita ivyo Baibolo likuyowoya.

Mungachita makora kuluta ku ungano wakulondezgapo mwakuti mukajiwonere mwekha ivyo tayowoya apa. Tikumupokelerani na mawoko ghaŵiri. Kufipa mtima na zithero yayi.

• Para tawungana tikuchita nga mbanjani?

• Kasi tingachita wuli kuti nase tovwirike na maungano?

Taŵanyake tikwenda mitunda yitali muthondo kuti tikafike ku ungano. Ŵanji ŵakwenda uku zuŵa lili dee! ndipo mazuŵa ghanyake kukuŵa vula. Kweni nanga vingasuzga wuli, panji nanga vingalema wuli, Ŵakaboni ŵa Yehova ŵakuwungana na ŵanyawo. Chifukwa wuli?

Maungano ngakovwira pa umoyo wa munthu. Nyengo yinyake, Paulosi wakayowoyanga vya ŵanthu awo tikuwungana nawo, wakati: “Tighanaghaniranenge.” (Ŵahebere 10:24) Mazgu agha ghakung’anamura kuti tikwenera kumanyana makora. Ntheura, apa Paulosi wakuti tifipiranenge mtima. Para tikuchezga na ŵanyithu, tikusanga kuti nawo ŵakujumpha mu visuzgo, kweni ŵachali kuteŵetera, ntheura tikukhwimiskika.

Ubwezi ukukonda. Awo tikuwungana nawo mbanthu ŵakuti tikuwonana waka yayi, kweni mbabwezi ŵithu. Nyengo zinyake tikuchezga nawo kunyumba. Kasi ivi vikutovwira wuli? Vikutovwira kumanya kuti ŵanyithu nawo mbakuzirwa, ntheura tikuŵatemwa chomene. Para ŵasuzgika, tikuŵawovwira, chifukwa mbabwezi ŵithu. (Zintharika 17:17) Usange tikuchezga na waliyose mu mpingo, tikulongora kuti ‘tikupwelelerana.’—1 Ŵakorinte 12:25, 26.

Ntheura chingaŵa makora kuti mutemwanenge na ŵanthu awo ŵakuchita khumbo la Chiuta. Mungasanga ŵanthu ŵantheura pakati pa Ŵakaboni ŵa Yehova. Paŵavye chakumutondeskani kusopa nase.

• Chifukwa wuli ntchakovwira kuwungana na ŵanyithu?

• Mwambenge pawuli kusopa nase?

Kale, para Ŵakhristu ŵawungana, ŵakimbanga sumu, kulomba, kweniso kuŵazga na kulongosora Malemba. Pakaŵavya mitheto yinyake. (1 Ŵakorinte 14:26) Ndivyo muzamuwona para mwiza uko tikuwungana.

Ivyo tikusambira vikufuma mu Malemba, ndipo vikovwira. Kuumaliro wa sabata, mpingo uliwose ukuwungana na kutegherezga nkhani yakufuma mu Malemba, panji kuti nkhani ya Baibolo. Mu nkhani iyi, tikusambira umo Malemba ghangatovwilira pa umoyo withu. Pa chisambizgo ichi, waliyose wakuchiskika kuti waŵazgenge malemba mu Baibolo lake. Kufuma apo, pakuŵa Sambiro la Gongwe la Mulinda. Pa sambiro ili, waliyose wakuŵa mwanangwa kuyowoyapo. Sambiro ili likutovwira umo tingalondezgera fundo izo Baibolo likusambizga. Pa charu chose, mipingo yakujumpha 110,000 yikusambira mutu wakuyana waka sabata yiliyose.

Tikovwirika kuti tisambizgenge makora. Mukati mwa sabata tikukumanaso, ndipo tikuŵa na ungano unyake wa vigaŵa vitatu wakuchemeka Uteŵeti na Umoyo Wachikhristu. Ivyo tikusambira vikuŵa mu kabuku ka Uteŵeti na Umoyo Wachikhristu ako kakufuma mwezi uliwose. Chigaŵa chakwamba cha ungano uwu ni Mazgu gha Chiuta Mbusambazi. Chigaŵa ichi chikutovwira kuti timanye makora nkhani yinyake ya mu Baibolo. Ndipo waliyose wakuŵazgirathu. Chigaŵa chachiŵiri ni Pharazgani Mwaluso. Mu chigaŵa ichi ŵanthu ŵakuyezgelera umo tingachitira pa kuyowoya vya Baibolo na ŵanthu. Uyo wakulongozga wakuyowoya ivyo vingatovwira kuti tiŵazgenge na kusambizga makora. (1 Timote 4:13) Chigaŵa chachitatu ni Umoyo Wachikhristu. Chigaŵa ichi chikutovwira umo tingalondezgera fundo za mu Baibolo pa umoyo withu zuŵa lililose. Munthu yumoza wakufumba mafumbo ndipo ŵanyake wose ŵakuzgorapo. Ivi vikovwira kuti tipulikiske makora Baibolo.

Para mwawungana nase, namwe muzamukhorwa kuti tikusambizgika vinthu vyakuzirwa nadi kufuma mu Baibolo.—Yesaya 54:13.

• Kasi muzamupulika vichi para mwawungana na Ŵakaboni ŵa Yehova?

• Kasi mungatemwa kwiza ku ungano ngu?

Mu kabuku aka, panji mwawona kuti Ŵakaboni ŵa Yehova ŵakuvwara makora chomene pa ungano. Chifukwa wuli tikuyezgayezga kuti tiwonekenge makora?

Kuti tichindike Chiuta withu. Chiuta wakuwona kuwaro pera yayi. (1 Samuyeli 16:7) Ndipouli, para tawungana kuti timusope, tikukhumba kumupa ntchindi, kweniso tikuchindika awo tikusopera lumoza. Usange tingaŵa mu khoti panthazi pa mweruzgi, tingavwara bweka kuko yayi, chifukwa tikumanya kuti mweruzgi ni munthu wakuzirwa. Lekani tikuvwara makora para tawungana, chifukwa tikukhumba kupeleka ntchindi kwa Yehova Chiuta, pakuŵa “Mweruzgi wa charu chose chapasi.” Kweniso tikuchita ivi kulongora kuti tikuchindika malo agho tikusoperapo.—Genizesi 18:25.

Tikulondezga ivyo tikusambira. Baibolo likuti Ŵakhristu ŵavwarenge “mwasoni ndiposo mwamahara” pakuŵa ŵanthu awo “ŵakusopa Chiuta.” (1 Timote 2:9, 10) Kuvwara “mwasoni” chikung’anamura kuleka kuvwara na chilato chakuti ŵanthu ŵatiwone, panji kuti ŵambe kughanaghana viheni. Kweniso para tikugura malaya, ‘mahara’ ghakutovwira kusankha vyakuvwara vyakwenelera. Fundo izi zikutipoka wanangwa yayi, chifukwa munthu wangagura chakuvwara icho mweneko watemwa. Kweni tingaluwanga yayi kuti na kavwaliro kithu, ‘tingatozga chisambizgo cha Chiuta’ na ‘kupeleka uchindami’ kwa iyo. (Tito 2:10; 1 Petrosi 2:12) Ntheura ŵanthu ŵakuwona usange ntchakuzirwa kwa ise kusopa Yehova panji yayi. Icho chikuŵaphalira nkhavwaliro kithu.

Nangauli mungaŵavya malaya, mukupokelereka nipera ku Nyumba ya Ufumu. Icho tikukhumba ni malaya ghakudura yayi. Chakuzirwa ntchakuti ghaŵe ghakuchapa kweniso ghakuwoneka makora.

• Chifukwa wuli ntchakuzirwa kuvwara makora pakusopa Chiuta?

• Kasi tikulondezga fundo wuli pa nkhani ya vyakuvwara na kujipwelelera?

Usange mukusambira Baibolo na Ŵakaboni ŵa Yehova, mukwenera kuti mukunozgekera ivyo mukusambira. Ndimo mukwenera kuchitira na maungano kuti ghaŵe ghakovwira kwa imwe. Tikwenera kunozgekera nyengo zose pambere tindalute ku ungano.

Sangani nyengo na malo ghawemi. Ni nyengo wuli iyo munganozgekera makora? Mulenji para mwawuka waka, panji usiku para ŵana ŵagona? Nyengo zinyake chingaŵa chakusuzga kuti musambire nyengo yitali. Ndipouli, patulani nyengo yakusambilira, ndipo mungatondekanga yayi kusambira pa nyengo iyo. Khalani pa malo ghambura chiwawa. Chingaŵa chiwemi kujara wayilesi, TV, panji selufoni. Ntchakuzirwa kulomba pambere tindambe kusambira. Lurombo lukovwira kuti maghanoghano ghaŵe pa ivyo tikusambira, m’malo mwa kughanaghana vinthu vinyake.—Ŵafilipi 4:6, 7.

Gwarani mzere apo pali zgoro, ndipo nozgekani kuzgorapo. Ŵazgani dankha nkhani yose kuti mumanye apo pagona fundo. Wonani mutu ukuru wa nkhani na mitu yichokoyichoko. Kasi mitu yichokoyichoko yikukolerana wuli na mutu ukuru? Wonani vithuzithuzi na mafumbo agho ghakovwira kupulikiska fundo zikuru. Kufuma apo, ŵazgani ndime yiliyose na kusanga mazgoro gha mafumbo. Julani malemba na kuŵazga. Kasi ghakukolerana wuli na nkhani yose? (Milimo 17:11) Para mwasanga zgoro la fumbo, gwarani mzere kusi kwake. Ivi vyamumovwirani kuti mukamanye luŵiro apo pali zgoro. Pa ungano, para mukukhumba kuzgorapo, mwamuwuska woko na kuyowoyapo mwakudumura.

Usange mukunozgekera nkhani izo zikusambirika sabata yiliyose, mumanyenge vinandi kufumira mu Baibolo. Vikuŵa nga mukusazgamo vinthu viphya mu nthamba yinu ya vinthu vyakuzirwa.—Mateyu 13:51, 52.

• Kasi mungachita vichi nyengo zose pakunozgekera ungano?

• Kasi munganozgekera wuli kuzgorapo pa ungano?

Kwamba kale, Yehova wakukhumba kuti ŵanthu ŵasoperenge pamoza mu mbumba zawo. Ichi chikovwira kuti ŵatemwe Yehova kweniso kuti ŵatemwanenge. (Dotoronome 6:6, 7) Lekani Ŵakaboni ŵa Yehova ŵakupatura nyengo sabata yiliyose kuti ŵasopere pamoza. Iwo ŵakusambira vya Chiuta mwakufwatuka. Ŵakuŵika mtima chomene pa ivyo vingawovwira mbumba zawo. Kweni para mukukhala mwekha ke? Namwe mungapatura nyengo kuti musope Chiuta. Mungasora mutu wa nkhani mu mabuku panji magazini ghakulongosora Baibolo na kusambira.

Ni nyengo yakuti tisendelere kwa Chiuta. Baibolo likuti “sendelerani kwa Chiuta, ndipo iyo wasendelerenge kwa imwe.” (Yakobe 4:8) Para tikusambira Mazgu gha Chiuta, tikumanya wunthu wake na umo wakuchitira vinthu. Kwa awo ŵakwamba sono, nthowa yipusu yakwambira kusopa pamoza na mbumba nkhuŵazgira lumoza Baibolo mwakukwezga. Ŵangaŵazga vyaputara ivyo vili pa ndondomeko ya Uteŵeti na Umoyo Wachikhristu. Ŵangagaŵana mavesi ghakuti ŵaŵazge, ndipo para ŵamara, ŵangayowoyapo ivyo ŵasambira.

Ni nyengo yakuti timanyane makora mu mbumba. Ŵafumu, ŵawoli, ŵapapi na ŵana ŵakumanyana makora chomene para ŵakusambilira lumoza Baibolo. Iyi ni nyengo yakukondweska kweniso yapadera chomene mu sabata. Ŵapapi ŵangasora nkhani zakuti ŵasambire kufuma mu Gongwe la Mulinda na Wukani! panji pa webusayiti ya jw.org. Mitu ya nkhani izo ŵasorenge yikwenera kukolerana na msinkhu wa ŵana. Mungadumbirana masuzgo agho ŵana ŵakukumana nagho ku sukulu, kweniso umo ŵangachitira nagho. Mungawonelera nawo mapulogiramu gha pa JW Broadcasting (tv.jw.org.) ndipo paumaliro mungaŵafumba ivyo ŵasambirapo. Mungasambilira sumu izo zamwimbika ku ungano. Nyengo zinyake para mwamara kusopa na mbumba yinu, mungachezgapo.

Para mukusopa pamoza na mbumba yinu sabata yiliyose, waliyose watemwenge Mazgu gha Chiuta, ndipo iyo wamutumbikaninge.—Salimo 1:1-3.

• Chifukwa wuli tikupatura nyengo kuti tisope pamoza na mbumba?

• Ŵapapi ŵangachita wuli kuti waliyose wakondwenge na nyengo yakusopera?

Kasi ŵanthu aŵa ŵakondwa na vichi? Ŵali pa ungano ukuru. Kale, ŵateŵeti ŵa Chiuta ŵakaphalirika kuti ŵawunganenge katatu pa chaka. Nase tikunweka kuwungana pamoza. (Dotoronome 16:16) Chaka chilichose, tikuŵa na maungano ghakuru ghatatu: maungano gha dera, ghaŵiri gha zuŵa limoza, na ungano wa chigaŵa wa mazuŵa ghatatu. Kasi maungano agha ghakutovwira wuli?

Ghakutovwira kuŵa ŵakukolerana. Nga Mbaisrayeli, nase tikulumba Yehova “mu maungano ghakuru.” Tikukondwa kumusopa pa maungano ghapadera agha. (Salimo 26:12, mazgu ghamusi; 111:1) Pa maungano agha, tikuchezga na Ŵakaboni ŵakufuma mu mipingo yinandi. Nyengo zinyake Ŵakaboni ŵanji ŵakufuma ku vyaru vinyake. Muhanya, para tikupumura, tikulyera pamoza pa malo gha ungano, ntheura ntchezgo yikukonda. (Milimo 2:42) Pa maungano agha, tikujiwonera tekha umo “ŵabali wose” mu charu ŵakuŵira ŵamoza chifukwa cha chitemwa.—1 Petrosi 2:17.

Ghakutovwira mu umoyo wauzimu. Ŵaisrayeli “ŵakapulikiska” ivyo vikaŵazgikanga chifukwa chakuti ŵasambizgi ŵakaŵalongosoleranga makora Malemba. (Nehemiya 8:8, 12) Nase tikuchindika ivyo tikusambira pa maungano ghakuru. Vyose ivyo tikusambira vikufuma mu Malemba. Ŵasambizgi ŵakupokerana pakulongosora mitu ya nkhani, ndipo ŵanyake ŵakuyezgelera ivyo vikachitika. Vyose ivi vikutovwira kuti tichitenge khumbo la Chiuta. Nyengo zinyake Ŵakhristu ŵanyithu ŵakutiphalirako suzgo iyo ŵali nayo mu nyengo zinonono izi, kweni ŵakugomezgeka. Nkhongono zikukwera para tikupulika ivi. Pa ungano wa chigaŵa, para ŵanyithu ŵakuchita dirama, kuyezgelera vinthu ivyo Baibolo likutiphalira, tikuŵa nga nase tikaŵako, ndipo tikusambirapo kanthu. Pa ungano ukuru uliwose, pakuŵa mwaŵi wakuti awo ŵakukhumba kubatizika, ŵalongore kuti ŵali kujipeleka kuchita khumbo la Chiuta.

• Chifukwa wuli maungano ghakuru ngakukondweska?

• Kasi maungano agha ghangamovwirani wuli?

Pambere Yesu wandakomeke, wakati: “Ndipo makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.” (Mateyu 24:14) Kweni kasi ntchito iyi yingachitika wuli pa charu chose? Nthowa yake nkhulondezga ivyo Yesu wakachitanga apo wakaŵa pano pasi.—Luka 8:1.

Tikuluta ku nyumba za ŵanthu. Yesu wakasambizga ŵasambiri ŵake kupharazga nyumba na nyumba. (Mateyu 10:11-13; Milimo 5:42; 20:20) Ŵasambiri aŵa ŵakapika chigaŵa chakupharazgako. (Mateyu 10:5, 6; 2 Ŵakorinte 10:13) Mazuŵa ghano napo, mpingo uliwose ukupika chigaŵa chakupharazgako. Ntheura chikuŵa chipusu “kupharazga ku ŵanthu na kupeleka ukaboni wakukwana.” Para tikuchita ivi, tikufiska dango la Yesu.—Milimo 10:42.

Tikuluta uko ŵanthu ŵakusangika. Yesu wakapharazganga uko kukasangikanga ŵanthu. Wakalutanga mumphepete mwa nyanja kweniso apo ŵanthu ŵakunegha maji. (Mariko 4:1; Yohane 4:5-15) Nase tikupharazgira ŵanthu uko ŵakusangika. Tikuluta mu misewu, mu misika, na malo ghanyake. Nyengo zinyake tikupharazgira ŵanthu pa foni. Kweniso tikupharazgira ŵazengezgani ŵithu, awo tikugwira nawo ntchito, awo tikusambira nawo sukulu na ŵabali ŵithu. Pakuti tikuyezgayezga kupharazga munthowa zose izi, ŵanthu ŵanandi pa charu chose ŵapulika “makani ghawemi gha chiponosko.”—Salimo 96:2.

Kasi walipo uyo mungatemwa kumuphalirako makani ghawemi gha Ufumu wa Chiuta, na ivyo Ufumu uwu ungamuchitira? Kubisa yayi makani agha. Phaliraniko ŵanyinu mwaluŵiro!

• Kasi ni makani wuli ghawemi agho ghakwenera kupharazgika?

• Kasi Yesu wakapharazganga wuli, ndipo Ŵakaboni ŵa Yehova ŵakuchita wuli?

Kanandi lizgu lakuti “mupayiniya” likung’anamura chiswakhata, panji kuti uyo wakujulira ŵanyake nthowa. Yesu nayo wakaŵa mupayiniya, panji kuti chiswakhata. Wakatumika pa charu chapasi kuti wapharazge na kujulira ŵanthu nthowa ya chiponosko. (Mateyu 20:28) Mazuŵa ghano, awo ŵakumulondezga ŵakumalira nyengo yinandi pakovwira ŵanthu kuti ŵaŵe ŵasambiri ŵa Yesu. (Mateyu 28:19, 20) Ŵanyake ŵakuchita ntchito iyo tikuti upayiniya.

Mupayiniya wakupharazga nyengo zose. Ŵakaboni ŵa Yehova wose ŵakupharazga makani ghawemi. Kweni ŵanyake ŵakupharazga maora 70 mwezi uliwose. Aŵa ŵakuchemeka ŵapayiniya ŵanyengozose. Kuti ŵaŵe na nyengo yakukwana yakupharazgira, ŵanyake ŵakugwira waka maganyu. Pali ŵanyake awo tikuti ŵapayiniya ŵapadera, ndipo ŵakupharazga uko ntchito njikuru. Mwezi uliwose, ŵakupharazga maora 130 panji kujumpha. Ŵapayiniya ŵakukhorwa na tuchoko uto ŵakusanga. Iwo ŵakumanya kuti Yehova wangaŵataya yayi. (Mateyu 6:31-33; 1 Timote 6:6-8) Awo ŵangakwaniska yayi kupharazga nyengo zose, ŵakuchita upayiniya wakanyengo. Iwo ŵakupharazga maora 30 panji 50 pa mwezi.

Mupayiniya wakutemwa Chiuta na ŵanthu. Nga ni Yesu, nase tikuwona kuti ŵanthu ŵanandi ŵakukhumbikwira kumanya Chiuta. (Mariko 6:34) Ise tikumanya unenesko uwo ungaŵawovwira sono, na kuŵapa chigomezgo chakuti vinthu viŵenge makora munthazi. Mupayiniya wakupeleka nyengo na nkhongono zake kuti wawovwire ŵanthu kumanya Chiuta, chifukwa wakuŵatemwa. (Mateyu 22:39; 1 Ŵatesalonika 2:8) Pakuchita ivi, chipulikano chake chikukhora, wakuŵa pafupi na Chiuta, ndipo wakuŵa wakukondwa chomene.—Milimo 20:35.

• Kasi imwe mukuti mupayiniya ni njani?

• Ntchivichi chikutuma mupayiniya kuti wapharazgenge nyengo zose?

Kwamba kale, Ŵakaboni ŵa Yehova ŵakutemwa chomene kusambira. Wose awo ŵajipeleka kupharazga Ufumu nyengo zose ŵakusambizgika mwakuti ‘ŵafiske uteŵeti wawo mwakukwana.’—2 Timote 4:5.

Sukulu ya Uteŵeti wa Upayiniya. Para pajumpha chaka chimoza kufuma apo mupayiniya wakambira uteŵeti wanyengozose, wakuchemeka ku sukulu iyo yikuchitikira pa Nyumba ya Ufumu. Sukulu iyi yikutora mazuŵa 6. Chilato cha sukulu iyi nkhovwira ŵapayiniya kukhozga ubwezi wawo na Yehova, kuti ŵaŵenge ŵaluso pakupharazga muthowa yiliyose, kweniso kuti ŵalutilire kugomezgeka.

Sukulu ya Ŵapharazgi ŵa Ufumu. Sukulu iyi yikutora myezi yiŵiri, ndipo yikovwira ŵapayiniya awo ŵangakwaniska kukapharazga kulikose uko ŵangatumika. Iwo mbakunozgeka nga ni Yesu, Mupharazgi Mukuru chomene kuluska wose awo ŵali kuteŵeterapo pano pasi. Nawo ŵakuti, “Ndine pano. Nitumani!” (Yesaya 6:8; Yohane 7:29) Para munthu wasama wakwenera kusintha na kukhala nga mbanthu awo wasanga. Wakwenera kuzgoŵera makhaliro, mphepo, na vyakurya vyachilendo. Kweniso wangakhumbikwira kusambira chiyowoyero chinyake. Ŵabali na ŵadumbu ŵakutorana panji awo ŵachali ŵekha, ndipo ŵali na vyaka vya pakati pa 23 na 65, ŵangasambirako sukulu iyi. Ŵakusambizgika makhaliro agho ghakukhumbikwa chomene pakuteŵetera Yehova mu gulu lake ili.

Sukulu Yakusambizga Baibolo ya Giliyadi. “Giliyadi” ni lizgu Lachihebere ilo likung’anamura “Mulu wa Ukaboni.” Kwamba mu 1943, ŵamishonale 8,000 ŵasambizgika na kutumizgika “ku vigoti vya charu chapasi,” ndipo ŵakupharazga. (Milimo 13:47) Apo ŵamishonale ŵakafikanga mu charu cha Peru, kukaŵavya mpingo, kweni sono kuli mipingo yakujumpha 1,000. Apo ŵamishonale ŵakiziranga mu charu cha Japan, Ŵakaboni ŵa Yehova ŵakakwananga yayi 10, kweni sono ŵakujumpha 200,000. Sukulu ya Giliyadi yikutora myezi 5, ndipo ŵakusambira Baibolo. Awo ŵakuchemeka ku sukulu iyi mbapayiniya ŵapadera, ŵamishonale, awo ŵakuteŵetera pa Beteli panji awo ŵakwendera mipingo. Para ŵasambira sukulu iyi ŵakovwira chomene pa ntchito yithu iyo tikuchita pa charu chose.

• Kasi chilato cha Sukulu ya Uteŵeti wa Upayiniya ntchakuti wuli?

• Kasi mbanjani ŵakuluta ku Sukulu ya Ŵapharazgi ŵa Ufumu?