Mwamanya unenesko chifukwa chakuti mwasambira Baibolo na Ŵakaboni ŵa Yehova. Ivyo mwasambira vyamovwirani kuti muŵe ŵabwezi ŵa Chiuta kweniso kuti muzakasange umoyo wamuyirayira mu paradiso para Ufumu wa Chiuta wiza pa charu chapasi. Mwamba kugomezga chomene Mazgu gha Chiuta, ndipo mwatumbikika chomene chifukwa cha kuŵira lumoza na ŵabali na ŵadumbu. Mwamanya umo Yehova wakuchitira na ŵanthu ŵake mazuŵa ghano.—Zek. 8:23.

Apo mukunozgekera kubatizika, muzamupindura chomene apo ŵalara ŵazamuweleramo namwe chigaŵa cha Ivyo Ŵakhristu Ŵakugomezga. (Heb. 6:1-3) Yehova walutilire kumutumbikani apo mukuyezgayezga kuti mumumanye makora. Mphanyi wazakamupani njombe iyo wali kulayizga.—Yoh. 17:3.

1. Chifukwa wuli mukukhumba kubatizika?

2. Kasi Yehova ni njani?

•“Yehova ndiyo ni Chiuta waunenesko mu mtambo kuchanya na charu chapasi kusi. Kulije munyake.”—Doto. 4:39.

• “Mwaŵeneimwe zina linu ni Yehova, ndimwe mwekha Wapachanya Nkhanira pa charu chose chapasi.”—Sal. 83:18.

3. Chifukwa wuli ntchakuzirwa kuti muzunurenge zina la Chiuta?

• “Ntheura, pakulomba mutenge: ‘Adada ŵithu imwe muli kuchanya, zina linu lituŵiskike.’”—Mat. 6:9.

• “Waliyose uyo wakuchema pa zina la Yehova wazamuponoskeka.”—Rom. 10:13.

4. Kasi mazina ghanyake agho ghakulongosora vya Yehova ni nga?

• “Yehova, Mlengi wa vigoti vya charu chapasi ni Chiuta muyirayira swii.”—Yes. 40:28.

• “Adada ŵithu imwe muli kuchanya”—Mat. 6:9.

• “Chiuta ntchitemwa.”—1 Yoh. 4:8.

5. Kasi mungamupa vichi Yehova Chiuta?

• “Utemwenge Yehova Chiuta wako na mtima wako wose na umoyo wako wose na maghanoghano ghako ghose na nkhongono zako zose.”—Mrk. 12:30.

• “Yehova Chiuta wako ndiyo ukwenera kumusopa, ndipo ndiyo pera uyo ukwenera kumuchitira uteŵeti wakupatulika”—Luka 4:8.

6. Chifukwa wuli mukwenera kuŵa ŵakugomezgeka kwa Yehova?

• “Mwana wane, uŵe wavinjeru na kukondweska mtima wane, mwakuti nimuzgore uyo wakuninena.”—Zinth. 27:11.

7. Kasi mukwenera kulomba kwa njani, ndipo mu zina la njani?

• “Nadi [ine Yesu] nkhumuphalirani kuti, usange mulombenge kanthu kwa Adada ŵamupaninge mu zina lane.”—Yoh. 16:23.

8. Kasi ni vinthu wuli vinyake ivyo mungavizunura mu lurombo?

• “Pakulomba mutenge: ‘Adada ŵithu imwe muli kuchanya, zina linu lituŵiskike. Ufumu winu wize. Khumbo linu lichitike pano pasi nga nkhuchanya. Mutipe chakurya chithu cha zuŵa ili. Mutigowokere zakwananga zithu, nga umo nase taŵagowokera awo ŵatinangira. Ndipo mungatitoleranga mu kuyezgeka chara, kweni mutiwombore kwa muheni.’”—Mat. 6:9-13.

• “Ichi ntchigomezgo icho tili nacho mwa iyo, chakuti kanthu kalikose ako tingalomba mwakuyana na khumbo lake, wakutipulika.”—1 Yoh. 5:14.

9. Chifukwa wuli nyengo zinyake Yehova wakupulika yayi malurombo gha ŵanthu?

• “Pa nyengo iyo, ŵazamuchema Yehova kuti waŵawovwire, kweni wazamuŵazgora chara. . . . Chifukwa cha milimo yawo yiheni.”—Mika 3:4.

• “Maso gha Yehova ghali pa ŵarunji, ndipo makutu ghake ghakupulikizga maŵeyelero ghawo, kweni chisko cha Yehova chikususkana na awo ŵakuchita viheni.”—1 Pet. 3:12.

10. Kasi Yesu Khristu ni njani?

• “Simoni Petrosi wakazgora kuti: ‘Ndimwe Khristu, Mwana wa Chiuta wamoyo.’”—Mat. 16:16.

11. Chifukwa wuli Yesu wakiza pa charu chapasi?

• “Mwana wa munthu wakizira kuzakateŵetereka chara, kweni kuteŵetera na kupeleka umoyo wake kuŵa chiwombolero cha ŵanandi.”—Mat. 20:28.

• “[Ine Yesu] nkhweneraso kukapharazga makani ghawemi gha Ufumu wa Chiuta ku misumba yinyake, pakuti ndicho nkhatumikira.”—Luka 4:43.

12. Kasi mungalongora wuli kuti mukuwonga sembe yakuwombora iyo Yesu wakapeleka?

• “Wakaŵafwira wose kuti awo mbamoyo ŵaleke kujikhalira ŵekha, kweni ŵakondweskenge uyo wakaŵafwira na kuwuskika.”—2 Kor. 5:15.

13. Kasi Yesu wali na udindo wuli?

• “Mazaza ghose ghapika kwa ine kuchanya na pa charu chapasi.”—Mat. 28:18.

• “Chiuta wakamukwezga pa malo ghapachanya na kumupa zina ilo lili pachanya pa zina linyake lililose.”—Fil. 2:9.

14. Kasi mukugomezga kuti Wupu Wakulongozga wa Ŵakaboni ŵa Yehova ndiyo ni “muzga wakugomezgeka na wavinjeru” uyo Yesu wali kumwimika?

• “Kasi muzga wakugomezgeka na wavinjeru ni njani, uyo fumu yake yamwimika pa ŵateŵeti ŵake ŵa pa nyumba, kuti waŵape chakurya pa nyengo yakwenelera?”—Mat. 24:45.

15. Kasi mzimu utuŵa ni vichi?

• “Mungelo wakamuzgora kuti: ‘Mzimu utuŵa wizenge pa iwe, ndipo nkhongono ya Wapachanya Nkhanira yikubenekelerenge. Ntheura uyo wababikenge wazamuchemeka mutuŵa, Mwana wa Chiuta.’”—Luka 1:35.

• “Ntheura, usange imwe, nangauli muli ŵaheni, mukumanya kupeleka vyawanangwa viwemi ku ŵana ŵinu, ipo kuli wuli Adada ŵakuchanya? Asi ŵapelekenge mzimu utuŵa ku awo ŵakuŵalomba?”—Luka 11:13.

16. Kasi Yehova wakugwiliskira wuli ntchito mzimu wake utuŵa?

• “Machanya ghakapangika na mazgu gha Yehova, mawumba ghake ghose na mzimu wa mulomo wake.”—Sal. 33:6.

• “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane . . . ku vigaŵa vyakutali chomene vya charu chapasi.”—Mil. 1:8.

• “Palije uchimi wa Lemba uwo ukufuma mu maghanoghano gha munthu. Chifukwa nanga nkhamoza, uchimi undizepo na khumbo la munthu, kweni ŵanthu ŵakayowoyanga vyakufuma kwa Chiuta pakulongozgeka na mzimu utuŵa.”—2 Pet. 1:20, 21.

17. Kasi Ufumu wa Chiuta ni vichi?

• “Chiuta wakuchanya wazamwimika ufumu uwo kuti uzamuparanyika chara. Ufumu uwu uzamupelekeka ku ŵanthu ŵanyake chara. Uzamuteketa na kumazga maufumu ghose agha, ndipo iwo wekha ndiwo uzamuŵako kwamuyirayira”—Dan. 2:44.

18. Kasi muzamusanga vitumbiko wuli chifukwa cha Ufumu wa Chiuta?

• “Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivu. 21:4.

19. Kasi mukumanya wuli kuti Ufumu wa Chiuta wizenge sonosono?

• “Apo wakakhala pa Phiri la Maolive, ŵasambiri ŵakiza kwa iyo kumphepete, ŵakati: ‘Mutiphalire, vinthu ivi vizamuŵako pawuli, ndipo ntchivichi chizamuŵa chimanyikwiro cha kuŵapo kwinu na cha umaliro wa charu?’ Yesu wakaŵazgora kuti: ‘. . . Mtundu uzamuwukirana na mtundu unyake, ufumu na ufumu unyake. Kweniso kuzamuŵa njara na vindindindi mu malo na malo. Ndipo makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.’”—Mat. 24:3, 4, 7, 14.

• “Kweni umanye ichi, kuti mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, ŵakutemwa ndalama, ŵakujiŵikamo, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, ŵambura kugomezgeka, ŵambura chitemwa, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura na kunotha, ŵakutemwa vyakusanguluska m’malo mwa kutemwa Chiuta, ŵakuwoneka nga ŵakusopa Chiuta mwakujipeleka kweni ŵakukana nkhongono zake, ndipo upatukeko ku ŵanthu aŵa.”—2 Tim. 3:1-5.

20. Kasi mukulongora wuli kuti Ufumu wa Chiuta ngwakuzirwa chomene kwa imwe?

• “Lutilirani kupenja dankha Ufumu na urunji wake, ndipo vinthu vinyake vyose ivi visazgikirengeko kwa imwe.”—Mat. 6:33.

• “Penepapo Yesu wakati ku ŵasambiri ŵake: ‘Usange munthu wakukhumba kunilondezga, wajipate na kunyamura khuni lake lakusuzgikirapo ndipo walutilire kunilondezga.’”—Mat. 16:24.

21. Kasi Satana na viŵanda mbanjani?

• “Imwe muli kufuma kwa wiskemwe Dyabulosi . . . Kufuma apo wakagalukira iyo wakukoma ŵanthu.”—Yoh. 8:44.

• “Chinjoka chikuru chikaponyeka pasi, njoka ya papo kale, iyo yikuchemeka Dyabulosi na Satana, uyo wakupuluska charu chose. Wakaponyeka pa charu chapasi, ndipo ŵangelo ŵake ŵakaponyeka pasi pamoza nayo.”—Chivu. 12:9.

22. Kasi Satana wakamunena wuli Yehova na wose awo ŵakumusopa?

• “Mwanakazi wakati ku njoka: ‘Vipambi vya makuni gha mu munda wati tiryenge. Kweni vipambi vya khuni la pakatikati pa munda, Chiuta wati: “Mungaryanga yayi, nesi kulikhwaska, chifukwa mungafwa.’” Njoka yikati ku mwanakazi: ‘Kufwa mufwenge yayi. Chiuta wakumanya kuti pa zuŵa ilo muzamulyera vya mu khuni ili, maso ghinu ghazamujulika ndipo muzamuŵa nga ni Chiuta, kumanya uwemi na uheni.’”—Gen. 3:2-5.

• “Satana wakati kwa Yehova: ‘Chikumba kulipa chikumba. Munthu wapelekenge vyose ivyo wali navyo kuti wawombore umoyo wake.’”—Yobu 2:4.

23. Kasi mungalongora wuli kuti Satana ni mutesi?

• ‘Teŵeterani Chiuta na mtima wakufikapo.’—1 Mid. 28:9.

• “Nitayengepo chara kunyoloka kwane m’paka nifwe!”—Yobu 27:5.

24. Chifukwa wuli ŵanthu ŵakufwa?

• “Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose chifukwa wose ŵakananga.”—Rom. 5:12.

25. Kasi ŵakufwa ŵakuŵa wuli?

• “Pakuti ŵamoyo ŵakumanya kuti ŵafwenge, kweni ŵakufwa ŵakumanya kalikose chara.”—Muph. 9:5.

26. Kasi ntchivichi chizamuchitikira awo ŵali kufwa?

• “Kuzamuŵa chiwuka cha ŵarunji na ŵambura urunji.”—Mil. 24:15.

27. Kasi mbalinga awo ŵakuluta kuchanya kuti ŵakawuse na Yesu?

• “Nkhalaŵiska na kuwona Mwana wa mberere wimilira pa Phiri la Ziyoni, ndipo wakaŵa pamoza na ŵanthu 144,000 awo ŵali na zina lake na zina la Awiske lakulembeka pa visko vyawo.”—Chivu. 14:1.

Pakuti mwasambira Baibolo, mwamanya ivyo Yehova wakukhumba kuti muchitenge. Mwamanyaso umo mungalondezgera fundo za Yehova pa nkhani ya urunji. Mukwenera kuti mwasintha vinthu vinandi chomene chifukwa cha ivyo mwasambira. Pakuti mwasankha kuchita mwakuyana na fundo zaurunji za Yehova, muli ŵakwenelera kuŵa mupharazgi wa makani ghawemi.

Para mwaweleramo mafumbo ghakulondezgapo agha pamoza na Malemba, vimovwiraninge kuti mukumbukenge fundo zaurunji za Yehova kweniso ivyo mungachita kuti muŵe pa gulu la ŵateŵeti ŵake. Fundo izi zimovwiraninge kumanya kuti ntchakuzirwa kuchita vinthu vyose na njuŵi yituŵa kuti Yehova wachindikike.—2 Kor. 1:12; 1 Tim. 1:19; 1 Pet. 3:16, 21.

Tikukayika yayi kuti kuyana na ivyo mwasambira, sono ndimwe wakunozgeka kupulikira malango gha Yehova na kuŵa yumoza wa Ŵakaboni ŵa Yehova. Mafumbo kweniso malemba agho ghali pasi apa ghamovwiraninge kuti mujisande na kuwona usange mukukhozgera nadi fundo za Yehova mu mpingo, mu mbumba kweniso usange mukumanya maghanoghano gha Yehova pa vya ndyali. Tikugomezga kuti mukondwenge kumanya kuti Yehova wakusambizga na kukhozga ŵanthu ŵake mwauzimu. Nthowa yimoza iyo Yehova wakutisambizgira ni maungano gha mpingo, ndipo mukwenera kuyezgayezga kusangikapo na kutorapo chigaŵa.

Chinyake ntchakuti, chigaŵa ichi chikulongosora kuzirwa kwa kupharazga nyengo zose, ntchito iyo yikovwira ŵanthu kuti ŵamumanye Yehova na ivyo wachitirenge ŵanthu. (Mat. 24:14; 28:19, 20) Kweniso mumanyenge kuti mukwenera kuyiwona mwakupepuka yayi nkhani ya kujipeleka kwa Yehova na kubatizika. Manyani kuti Yehova wakukondwa chomene kuti muli kusankha kumuteŵetera.

1. Kasi dango la Yehova pa nkhani ya nthengwa ndakuti wuli? Kasi Baibolo likuti nthengwa yingamara pa chifukwa wuli?

• “Kasi mundaŵazge kuti uyo wakaŵalenga pakwamba wakaŵalenga iwo mwanalume na mwanakazi, ndipo wakati: ‘Pa chifukwa ichi mwanalume walekenge awiske na anyina ndipo wabatikanenge na muwoli wake, ndipo wose ŵaŵiri ŵaŵenge thupi limoza’? Ntheura mbaŵiriso yayi, kweni thupi limoza. Pa chifukwa ichi, icho Chiuta wagumanya pamoza munthu waleke kupatura. . . . Waliyose uyo wakupata muwoli wake, kwambura chifukwa cha uzaghali, na kutora munyake wakuchita uleŵi.”—Mat. 19:4-6, 9.

2. Chifukwa wuli ŵakutorana ŵakwenera kulembeska nthengwa yawo ku boma? Usange muli pa nthengwa, kasi muli kulembeska kale ku boma?

• “Lutilira kuŵakumbuska kuti ŵajilambikenge na kupulikira maboma na ŵamazaza, ŵaŵenge ŵakunozgeka kuchita mulimo uliwose uwemi.”—Tito 3:1.

• “Nthengwa yiŵenge yakuchindikika na ŵanthu wose, ndipo pakugona paŵenge pambura kufipirwa, chifukwa Chiuta wazamweruzga ŵazaghali na ŵaleŵi.”—Heb. 13:4.

3. Kasi waliyose wali na udindo wuli mu mbumba?

• “Pulika, mwana wane, chisambizgo cha awuso, ndipo ungasidanga yayi ulongozgi wa anyoko.”—Zinth. 1:8.

• “Mfumu ni mutu wa muwoli wake, umo Khristu nayo waliri mutu wa mpingo, pakuŵa mponoski wa thupi ili. Ŵafumu, lutilirani kutemwa ŵawoli ŵinu, umo Khristu nayo wakatemwera mpingo na kujipeleka yekha chifukwa cha iwo.”—Efe. 5:23, 25.

• “Ŵawiskewo, mungakwiyiskanga ŵana ŵinu yayi, kweni lutilirani kuŵalera makora pa kuŵalanga na kuŵasambizga maghanoghano gha Yehova.”—Efe. 6:4.

• “Imwe mwaŵana, pulikirani ŵapapi ŵinu mu vinthu vyose, pakuti ichi chikukondweska Fumu.”—Kol. 3:20.

• “Imwe ŵawoli, mujilambikenge ku ŵafumu ŵinu.”—1 Pet. 3:1.

4. Chifukwa wuli tikwenera kuchindika umoyo?

• “[Chiuta] wakupeleka ku ŵanthu wose umoyo na mvuchi na vinthu vyose. Pakuti mwa iyo tili ŵamoyo, tikwenda ndipo tiliko.”—Mil. 17:25, 28.

5. Chifukwa wuli tikwenera yayi kukoma munthu kusazgapo mwana uyo wandabike?

• “Usange ŵanalume ŵakutimbana ndipo ŵapweteka mwanakazi wanthumbo ndipo . . . pachitika nyifwa, wapeleke umoyo pa umoyo.”—Eks. 21:22, 23.

• “Maso ghinu ghakaniwona nkhati namba waka kupangika mu nthumbo, viŵaro vyane vyose vikalembeka mu buku linu kuyana na mazuŵa agho vikapangikira, pambere chilichose cha ivyo chindaŵeko.”—Sal. 139:16.

• “Yehova wakutinkha. . . . mawoko agho ghakuthiska ndopa zambura mulandu.”—Zinth. 6:16, 17.

6. Kasi dango la Chiuta ndakuti wuli pa nkhani ya ndopa?

• ‘Lulutilirani kuziŵizga ndopa na vinthu vyakunyongeka’—Mil. 15:29.

7. Chifukwa wuli tikwenera kutemwa ŵabali na ŵadumbu ŵithu?

• “Nkhumupani dango liphya, lakuti mutemwanenge, nga umo ine namutemwerani, ndimo namwe mutemweranenge. Usange mukutemwana, wose ŵamanyenge kuti ndimwe ŵasambiri ŵane.”—Yoh. 13:34, 35.

8. Kuti tileke kupirako ŵanyithu matenda ghakofya agho ghakwambukira, chifukwa wuli uyo wali na matenda agha wakwenera yayi (a) kufyofyontha panji kuvumbatira ŵanyake? (b) kukwiya para ŵanyake ŵakumuchemerako yayi ku nyumba zawo? (c) Chifukwa wuli munthu uyo wakuwona nga wali na nthenda yakwambukira wakwenera kukapimiska ndopa pambere wandambe chibwezi? (d) Chifukwa wuli munthu uyo wali na nthenda yakwambukira wakwenera kuphalira mulaŵiliri wa milimo ya ŵalara pambere wandabatizike?

• “Muleke kuŵa na ngongoli ya kanthu nanga nkhamoza kwa waliyose. . . . ‘Utemwenge mzengezgani wako nga umo ukujitemwera wamwene.’ Uyo wakutemwa mzengezgani wake wakumuchitira viheni yayi.”—Rom. 13:8-10.

• “Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Fil. 2:4.

9. Chifukwa wuli Yehova wakukhumba kuti tigowokerenge ŵanyithu?

• “Lutilirani kuzizipizgirana na kugowokerana na mtima wose usange munthu wali na chifukwa chakudandawulira na munyake. Nga umo Yehova wakamugowokelerani na mtima wose, ndimo namweso muchitirenge.”—Kol. 3:13.

10. Kasi mukwenera kuchita vichi para mubali winu wamukhuŵazgani panji kumubudirani?

• “Usange mubali wako wakunangira, luta ukamuphalire ubudi wake pakati pa iwe na iyo pamwekha. Usange wakupulikira, ndikuti wamuwezga mubali wako. Kweni usange wakupulika chara, tolerapo munthu yumoza panji ŵaŵiri, mwakuti nkhani yiliyose yikhozgeke na mulomo wa ŵakaboni ŵaŵiri panji ŵatatu. Usange wakuŵapulikira chara, phalira mpingo. Usange wakupulikira chara nanga ni mpingo, umuwone nga ni munthu wamitundu na wakusonkheska msonkho.”—Mat. 18:15-17.

11. Kasi Yehova wakuwona wuli?

▪ Uzaghali

▪ Kusopa vikozgo

▪ Kugonana kwa ŵanalume panji ŵanakazi pera

▪ Unkhungu

▪ Njuga

▪ Uloŵevu

• “Mungapuluskikanga yayi. Kwali mbazaghali, ŵakusopa vikozgo, ŵaleŵi, ŵanalume awo ŵakuzomera kugoneka na ŵanalume ŵanyawo, ŵanalume awo ŵakugonana na ŵanalume ŵanyawo, ŵankhungu, ŵaryezi, ŵaloŵevu, ŵakutuka, na ŵakuphanga ŵazamuhara yayi Ufumu wa Chiuta.”—1 Kor. 6:9, 10.

12. Kasi mwaŵikapo mtima kuchita vichi pa nkhani ya uzaghali na kugonana kulikose uko kukuchitika kuwaro kwa nthengwa?

• “Chimbirani uzaghali.”—1 Kor. 6:18.

13. Chifukwa wuli tikwenera yayi kumwa panji kukhweŵa munkhwala wakutimbanizga wongo?

• “Mupeleke mathupi ghinu kuŵa sembe yamoyo, yituŵa, na yakuzomerezgeka kwa Chiuta, uwo mbuteŵeti wakupatulika pamoza na nkhongono yinu ya kughanaghana. Lekani kutolera nkharo ya ŵanthu ŵa mu nyengo iyi, kweni musinthe maghanoghano ghinu, mwakuti mumanye khumbo la Chiuta, ilo ndiwemi, lakuzomerezgeka na lakufikapo.”—Rom. 12:1, 2.

14. Kasi ni vinthu wuli vinyake vyakukhwaskana na vyamizimu ivyo Yehova wakutinkha?

• “Pakati pinu pangasangikanga yayi . . . wakuwukwa, wakuchita masalamusi, wakupenja vinthumwa, fwiti, wakulowa ŵanyake, uyo wakuluta ku ng’anga panji wakuloska, panji uyo wakufumba ku ŵakufwa.”—Doto. 18:10, 11.

15. Para munthu wachita kwananga kukuru ndipo wakukhumba kuŵaso paubwezi na Yehova, kasi wakwenera kuchitachi mwaluŵiro?

• “Nkhaphara kwananga kwane kwa imwe, nkhabisa chara mphuvya zane. Nkhati: ‘Nipharenge maubudi ghane kwa Yehova.’”—Sal. 32:5.

• “Kasi walipo mulwari pakati pinu? Wacheme ŵalara ŵa mpingo, ndipo ŵamulombere na kumuphaka mafuta mu zina la Yehova. Lurombo lwa chipulikano lumuchizgenge mulwari, ndipo Yehova wamuwuskenge. Kweniso usange wananga, wazamugowokereka.”—Yak. 5:14, 15.

16. Para mukumanya kuti Mkhristu munyinu wachita kwananga kukuru, kasi mukwenera kuchita vichi?

• “Usange munthu wapulika kuti pakukhumbikwa ukaboni, ndipo iyo ni kaboni, kwali wakawona panji kumanya, kweni wakukhala waka chete, wananga ndipo wazgore pa ubudi wake.”—Lev. 5:1.

17. Para ŵapharazga kuti Mkhristu munyake ni Kaboni wa Yehova yayi, kasi mukwenera kuchita nayo vichi?

• “Muleke kwenderana na waliyose wakuchemeka mubali uyo ni muzaghali, muryezi, wakusopa vikozgo, wakutuka, muloŵevu, panji wakuphanga, ndipo mungaryanga nayo yayi munthu wanthena.”—1 Kor. 5:11.

• “Usange munyake wakwiza kwa imwe, ndipo wakwiza na chisambizgo ichi yayi, mungamupokeleranga yayi mu nyumba zinu, nesi kumutawuzga.”—2 Yoh. 10.

18. Chifukwa wuli ntchakuzirwa chomene kuti mabwezi ghinu ghaŵe agho ghakutemwa Yehova?

• “Uyo wakwenda na ŵavinjeru waŵenge wavinjeru, kweni uyo wakuchita vinthu pamoza na vindere wapwetekekenge.”—Zinth. 13:20.

• “Mungapuluskikanga yayi. Mendezgano ghaheni ghakunanga makhaliro ghawemi.”—1 Kor. 15:33.

19. Chifukwa wuli Ŵakaboni ŵa Yehova ŵakunjilirapo yayi pa vyandyali?

• “Ŵali ku chigaŵa cha charu chara, umo ine niliri ku chigaŵa cha charu chara.”—Yoh. 17:16.

20. Chifukwa wuli mukwenera kupulikira ŵamazaza ŵa boma?

• “Munthu waliyose wajilambikenge ku ŵamazaza, chifukwa palije wamazaza wambura kuzomerezgeka na Chiuta. Ŵamazaza awo ŵalipo ŵali mu malo ghawo mwakuzomerezgeka na Chiuta.”—Rom. 13:1.

21. Kasi mukwenera kuchitachi para malango gha boma ghakususkana na dango la Chiuta?

• “Tikwenera kupulikira Chiuta nga muwusi m’malo mwa ŵanthu.”—Mil. 5:29.

22. Kasi ni malemba wuli agho ghangamovwirani apo mukusankha ntchito kuti muleke kuŵa ku chigaŵa cha charu?

• “Mtundu uzamuwuskira lupanga mtundu unyake chara, ndipo ŵanthu ŵazamusambiraso nkhondo chara.”—Mika 4:3.

• “Fumanimo mwa iyo [Babuloni Mukuru], mwaŵanthu ŵane, usange mukukhumba yayi kuchitako zakwananga zake, ndiposo usange mukukhumba yayi kupokako masoka ghake.”—Chivu. 18:4.

23. Kasi ni vyakusanguluska wuli ivyo mukwenera kuchita, ndipo ni vi ivyo mukwenera kukana?

• “Yehova . . . wakutinkha waliyose uyo wakutemwa nkhaza.”—Sal. 11:5.

• “Nyanyarani icho ntchiheni, demelerani ku icho ntchiwemi.”—Rom. 12:9.

• “Vinthu vyose vyaunenesko, vinthu vyose vyakuzirwa, vinthu vyose vyaurunji, vinthu vyose vituŵa, vinthu vyose vyakutemweka, vinthu vyose vya mbiri yiwemi, nkharo yiliyose yiwemi, na vinthu vyose vyakulumbika, lutilirani kughanaghanira vinthu ivi.”—Fil. 4:8.

24. Chifukwa wuli Ŵakaboni ŵa Yehova ŵakusopera lumoza yayi na matchalitchi ghanyake?

• “Mungarya yayi pa ‘thebulu la Yehova’ na pa thebulu la viŵanda.”—1 Kor. 10:21.

• “Yehova wakuti: ‘Fumanipo pakati pawo, ndipo jipaturani kwa iwo, lekani kukhwaska chinthu chaukazuzi, ndipo nizamumupokelerani.’”—2 Kor. 6:17.

25. Kasi ni fundo wuli izo zingamovwirani kumanya usange mukwenelera kuchita viphikiro vinyake panji yayi?

• “Kweni ŵakasazgikana na ŵamitundu na kutolera mendero ghawo. Ŵakalutilira kuteŵetera vikozgo vyawo, ndipo ivi vikaŵa chipingo kwa iwo.”—Sal. 106:35, 36.

• “Ŵakufwa ŵakumanya kalikose chara.”—Muph. 9:5.

• “Ŵali ku chigaŵa cha charu chara, umo ine niliri ku chigaŵa cha charu chara.”—Yoh. 17:16.

• “Nyengo iyo yajumpha yikaŵa yakukwana kwa imwe kuchitira makhumbiro gha ŵamitundu. Mukachitanga milimo ya ukwakwa, makhumbiro ghaheni, kumwa vinyo mwakujumphizga, kwenda mu viphikiro ivyo mukuŵa vyongo, kuphalizgana pa kumwa, na kusopa vikozgo kwaunyankhasi.”—1 Pet. 4:3.

26. Kasi ni viyelezgero wuli vya mu Baibolo ivyo vingamovwirani kumanya usange mukwenera kukondwelera mazuŵa ghakubabikira panji yayi?

• “Zuŵa lachitatu likaŵa lakukumbukira kubabika kwa Farawo. Wakanozgera chiphikiro ŵateŵeti ŵake wose. Wakafumiska mulara wa ŵakupelekera vyakumwa na mulara wa ŵakuphika uku ŵateŵeti ŵake ŵakuwona. Wakamuwezgerapo pa ntchito mulara wa ŵakupelekera vyakumwa. . . . Kweni wakapayika mulara wa ŵakuphika, nga umo Yosefe wakayowoyera.”—Gen. 40:20-22.

• “Kweni apo ŵakakumbukiranga zuŵa ilo wakababikira Herode, mwana msungwana wa Herodiya wakavina pa chiphikiro ichi. Wakamukondweska chomene Herode, mwakuti wakachita chilapo na kulayizga msungwana kuti wamupenge chilichose icho wangalomba. Pakukhuŵilizgika na anyina, msungwana wakati: ‘Nipani sono nthena mutu wa Yohane Mubatizi pa mbale.’ Ntheura likatuma ŵanthu ndipo ŵakadumura mutu wa Yohane mu jele.”—Mat. 14:6-8, 10.

27. Chifukwa wuli mukwenera kupulikira ŵalara?

• “Pulikirani awo ŵakulongozga pakati pinu ndipo mujilambike kwa iwo, chifukwa ŵakulinda imwe nga ni awo ŵazamupatawura, mwakuti ŵachite ichi na chimwemwe na kukwenyelera yayi, chifukwa mungapwetekeka.”—Heb. 13:17.

28. Chifukwa wuli ntchakuzirwa kuti nyengo zose mupaturenge nyengo yakuŵazgira Baibolo pamoza na mbumba yinu?

• “Kweni wakukondwa na dango la Yehova, Wakuŵazga dango ili na kughanaghanirapo muhanya na usiku. Waŵenge nga ni khuni ilo lapandika musi mwa tumilonga twa maji, Khuni ilo likupambika vipambi mu nyengo yake, ilo mahamba ghake ghakufota chara. Ndipo chilichose icho wakuchita chendenge makora.”—Sal. 1:2, 3.

29. Chifukwa wuli mukwenera kusangika pa maungano na kutorapo chigaŵa?

• “Nipharazgenge zina linu ku ŵabali ŵane. Nimulumbaninge mukati mu mpingo.”—Sal. 22:22.

• “Ndipo tiyeni tighanaghaniranenge na kuchiskana kuti titemwanenge na kuchita milimo yiwemi. Tingalekanga yayi kuwungana pamoza nga umo ŵakuchitira ŵanyake, kweni tikhwimiskanenge, tichitenge vyose ivi chomene apo tikuwona zuŵa likuneng’enera.”—Heb. 10:24, 25.

30. Kasi ni mulimo wuli wakuzirwa uwo Yesu wali kutipa?

• “Ntheura, lutaninge mukazgore ŵanthu ŵa mitundu yose kuŵa ŵasambiri, mukaŵabatize. . . . mukaŵasambizge kusungilira vinthu vyose ivyo namuphalirani. Ndipo wonani, ine nili namwe mazuŵa ghose m’paka umaliro wa charu ichi.”—Mat. 28:19, 20.

31. Para mukupeleka vyawanangwa pa ntchito ya Ufumu panji kovwira ŵabali na ŵadumbu, kasi mukwenera kuŵa na maghanoghano wuli kuti mukondweske Yehova?

• “Chindika Yehova na vinthu vyako vyakuzirwa, na vipambi vyakwamba vya vuna yako yose.”—Zinth. 3:9.

• “Waliyose wachite umo wadumulira mu mtima wake, mwakukwenyelera yayi panji mwakuchichizgika, chifukwa Chiuta wakutemwa uyo wakupeleka mwakukondwa.”—2 Kor. 9:7.

32. Kasi Ŵakhristu ŵakukhazga kuti ŵakumanenge na masuzgo wuli?

• “Mbakukondwa awo ŵatambuzgika chifukwa cha urunji, pakuti Ufumu wakuchanya ngwawo. Ŵakukondwa ndimwe para ŵanthu ŵakumutombozgani na kumutambuzgani ndiposo kumuteterani uheni wa mtundu uliwose chifukwa cha ine. Sekelerani na kukondwa chomene, pakuti njombe yinu njikuru kuchanya, chifukwa ndimo ŵakatambuzgira ntchimi izo zikaŵako pambere imwe mundaŵeko.”—Mat. 5:10-12.

33. Chifukwa wuli ni mwaŵi ukuru chomene kuti munthu wabatizike na kuŵa Kaboni wa Yehova?

• “Mazgu ghinu ghakasangika, ndipo nkhagharya, mazgu ghinu ghakazgoka kwa ine chimwemwe na kusekelera mu mtima wane, pakuti nkhuchemeka na zina linu, A Yehova Chiuta wa mawumba.”—Yer. 15:16.

Kanandi pa maungano gha dera na gha chigaŵa gha Ŵakaboni ŵa Yehova pakuŵa ubatizo. Paumaliro wa nkhani ya ubatizo, uyo wakuyowoya nkhani wazamupempha ŵanthu awo ŵabatizikenge kuti ŵimilire na kuzgora mafumbo ghaŵiri ghakulondezgapo agha mwakukwezga:

1. Kasi mwalapa zakwananga zinu na kujipeleka kwa Yehova, ndipo mukugomezga kuti muzamuponoskeka kwizira mwa Yesu Khristu?

2. Kasi mukumanya kuti para mwabatizika muŵenge Kaboni wa Yehova mwakukolerana na gulu lake?

Para awo ŵakukhumba kubatizika ŵazgora mafumbo agha, ndikuti ‘ŵazomera pakweru’ kuti ŵali na chipulikano mu sembe ya Yesu ndipo ŵajipeleka kwa Yehova na mtima wose. (Rom. 10:9, 10) Awo ŵakukhumba kubatizika ŵakwenera kulomba na kughanaghanirapo mafumbo agha kunyumba kuti ŵazakazgore kufumira pasi pamtima.

Kasi mwajipeleka kwa Yehova mu lurombo na kumulayizga kuti musopenge iyo pera na kuchita khumbo lake nyengo zose?

Kasi mwasimikizga nadi kuti mungabatizika pa ungano wasonosono?

Kasi pakuluta kukabatizika mukwenera kuvwara wuli? (1 Tim. 2:9; Yoh. 15:19; Fil. 1:10)

Awo ŵakuluta kukabatizika ŵakwenera kuvwara mwakwenelera, ndipo ŵakwenera kukumbuka kuti nyengo ya ubatizo njakuzirwa chomene. Mkhristu wakwenera yayi kuvwara malaya ghakulangara. Wakwenera kujipwelelera kweniso kuvwara makora. Ndipo wakwenera yayi kuvwara malaya agho ghali na malemba panji vimanyikwiro vya vinthu vinyake. Para ivyo tikuchita panyengo ya ubatizo vikulongora kuti nyengo iyi njakuzirwa, tipambanenge na umo ŵanthu ŵakucharu ŵakuchitira.

Kasi munthu wakwenera kulongora nkharo wuli para wakubatizika? (Luka 3:21, 22)

Ivyo Yesu wakachita apo wakabatizikanga ntchiyelezgero chiwemi ku Ŵakhristu mazuŵa ghano. Wakamanya kuti ubatizo ngwakuzirwa chomene. Ivyo wakachita ndivyo vikulongora. Ntheura, malo gha ubatizo ni malo ghakuyowoyerako milangwe yayi, kuskamba [kushuwa], panji kuchitirako vinthu vinyake ivyo vingayuyura ubatizo. Awo ŵabatizika waka, ŵakwenera yayi kukondwa mwakujumphizga nga umo ŵakuchitira awo ŵahozga bola. Nangauli nyengo ya ubatizo njakukondweska, kweni tikwenera kulongora ntchindi.

Kasi para mukukolerana na mpingo vingamovwirani wuli kuti mulutilire kuchita vinthu vyakulongora kuti muli kujipeleka kwa Yehova?

Chifukwa wuli para mwabatizika, mukwenera kulutilira kusambira pamwekha na kupharazga nyengo zose?