1, 2.Mwakuyana na Ezekiyeli 47:1-12, kasi Ezekiyeli wakawona na kumanya vichi? (Wonani chithuzi chakwamba.)

EZEKIYELI wakawonaso chinthu chinyake chakuzizika mu mboniwoni ya tempile. Wakawona kamugelo ka maji kakufuma mu malo ghakupatulika. Muŵe nga mukuwona Ezekiyeli wakulondezga umo maji ghakutowa agha ghakwendera. (Ŵazgani Ezekiyeli 47:1-12.) Maji agha ghakufuma pasi pa mulyango wa malo ghakupatulika, ndipo ghakubulikira kuwaro kwa tempile, pafupi na chipata cha kumafumiro gha dazi. Mungelo wakumulongozga Ezekiyeli kufuma nayo mu tempile, ndipo wakupima mtunda uliwose uwo ŵendapo. Mungelo wakumujumphiska Ezekiyeli mu maji kanandi waka, ndipo Ezekiyeli wakuwona kuti maji ghakunyang’amira luŵiro chomene. Paumaliro wakusanga kuti mlonga uwu wazgoka mlonga ukuru wakuti wakukhumbikwira kushuwa (kuskamba) kuti wambuke.

² Ezekiyeli wakuwona kuti mlonga uwu ukunjira mu Nyanja Yakufwa. Maji gha mu nyanja ghakuchira, ndipo chilichose icho chikukhwaskana na maji gha mlonga uwu chikuzgoka chamoyo, somba zikwandana chomene. Wakuwonaso makuni gha mtundu uliwose ghakumera mumphepete mwa mlonga uwu. Mwezi uliwose, makuni agha ghakupambika vipambi vyakunowa, ndipo mahamba ghake ghakovwira pakuchizga matenda. Pakuwona vyose ivi, Ezekiyeli wakwenera kuti wakaŵa na mtende mu mtima kweniso chigomezgo. Kweni kasi chigaŵa ichi cha mboniwoni ya tempile chikaŵa na ng’anamuro wuli kwa iyo na ŵazga ŵanyake? Kasi chili na ng’anamuro wuli kwa ise mazuŵa ghano?

Kasi Mlonga wa mu Mboniwoni Ukaŵa na Ng’anamuro Wuli ku Ŵazga?

3. Chifukwa wuli Ŵayuda ŵakale ŵakagomezganga yayi kuti mlonga uwo Ezekiyeli wakawona mu mboniwoni ukaŵa wanadi?

³ Ŵayuda ŵa mu nyengo yira ŵakwenera kuti ŵakamanyanga kuti mlonga wa mu mboniwoni iyi ukaŵa wanadi yayi. Kweni nkhani iyi yikwenera kuti yikaŵakumbuska uchimi unyake wakukhwaskana na kuwezgerapo vinthu, uwo ukalembeka na ntchimi Joyeli panji vyaka vyakujumpha 200 kumasinda. (Ŵazgani Joyeli 3:18.) Apo ŵazga Ŵachiyuda aŵa ŵakaŵazganga uchimi wa Joyeli, ŵakakhazgapo yayi kuti ‘mapiri ghanthonyenge vinyo lakunowa’ panji kuti mu tumapiri ‘mwendenge mkaka.’ Kweniso ŵakakhazgapo yayi kuti ‘mu nyumba ya Yehova’ mufumenge mbwiwi ya maji. Ndimo vikaŵiraso na apa, Ŵayuda aŵa ŵakwenera kuti ŵakamanya kuti uthenga wa mboniwoni ya Ezekiyeli ukuyowoya vya mlonga wenecho yayi.a Ipo kasi Yehova wakakhumbanga kupeleka uthenga wuli? Malemba ghakutovwira kumanya ng’anamuro la vigaŵa vinyake vya uchimi uwu. Kweni chomene tiwonenge vinthu vitatu vyakukhozga ivyo tikusambirako ku uchimi uwu.

4. (a) Kasi Ŵayuda ŵakwenera kuti ŵakakhazganga vitumbiko wuli chifukwa cha mboniwoni ya Ezekiyeli ya mlonga? (b)  Pakumanya umo Baibolo likugwiliskira ntchito mazgu ghakuti “mlonga” na “maji,” chifukwa wuli tikukhorwa kuti Yehova watumbikenge ŵanthu ŵake? (Wonani bokosi lakuti “Milonga ya Vitumbiko Kufuma kwa Yehova.”)

⁴ Mlonga wa vitumbiko. Kanandi mu Baibolo, mazgu ghakuti milonga na maji ghakwimira vitumbiko ivyo Yehova wakupeleka kuti ŵanthu ŵake ŵaŵe ŵamoyo. Ezekiyeli wakawona mlonga wanthena uwu ukufuma mu tempile. Ntheura mboniwoni iyi yikawovwira ŵanthu ŵa Chiuta kukhazga kuti Yehova waŵapungulirenge vitumbiko vyauzimu, chikuru ŵakukoleska kusopa kutuŵa. Kasi vikaŵa vitumbiko wuli? Ŵakaŵa na mwaŵi wakuti ŵangambaso kupokera ulongozgi ku ŵasembe. Nakuti para ŵambaso kupeleka sembe pa tempile, ŵangaŵa na chigomezgo kuti zakwananga zawo zagowokereka nadi. (Ezek. 44:15, 23; 45:17) Para vyaŵa nthena, ŵangaŵaso ŵakutowa, nga kuti ŵageziskika na maji ghakutowa ghakufuma mu tempile.

5. Kasi mboniwoni ya mlonga yikapembuzga wuli awo panji ŵakaghanaghananga kuti kwamuŵavya vitumbiko vyakukwanira waliyose?

⁵ Kasi vitumbiko ivi vikaŵa vyakuti vingakakwana ŵanthu wose? Usange munyake wakafipanga mtima na nkhani iyi, wakwenera kuti wakapembuzgika na mboniwoni iyi. Pakwamba tumaji twa mlonga uwu tukaŵa tuchoko chomene, kweni pamtunda uchoko waka tukazgoka mlonga ukuru. (Ezek. 47:3-5) Nkhani yikaŵa yakuti nanga Ŵayuda ŵangakababana chomene para ŵawelera kwawo, Yehova nayo wamusazgirako vitumbiko kuti vikakwanire waliyose. Mlonga uwu ukaŵa muzgezge wa vitumbiko vinandi na vyakukwana.

6. (a) Kasi uchimi uwu ukasimikizgiranga ŵanthu layizgo wuli? (b) Kasi mboniwoni iyi yikaŵaso na chenjezgo wuli? (Wonani mazgu ghamusi.)

⁶ Maji ghakupa umoyo. Mu mboniwoni ya Ezekiyeli, mlonga ukanjira mu Nyanja Yakufwa, na kuchizga chigaŵa chikuru cha nyanja iyi. Wonani kuti maji agha ghakachizga somba zinandi chomene, mwakuti unandi wake ukayananga waka na izo zikaŵa mu Nyanja Yikuru, panji kuti Nyanja ya Meditereniyani. Bizinesi ya somba nayo yikatotoma mumphepete mwa Nyanja Yakufwa, pakati pa matawuni ghaŵiri agho ghakwenera kuti ghakaŵa patali na patali. Mungelo wakati: “Kose uko mlonga uwu ukulazga chilichose chamuŵa chamoyo.” Kasi ichi chikung’anamura kuti maji ghakufuma mu nyumba ya Yehova ghakafika mu vigaŵa vyose vya Nyanja Yakufwa? Yayi. Mungelo wakalongosora kuti mu visapa, maji ghakupa umoyo agha ghamufikamo yayi. Malo agha ghakalekeka kuti ghaŵe “ghamchere.”b (Ezek. 47:8-11) Ntheura uchimi uwu ukaŵa na layizgo lakuti kusopa kutuŵa kuzamuchizga ŵanthu, ndipo ŵazamwambaso kuchita makora. Kweni pakaŵaso chenjezgo lakuti: Ni wose yayi awo ŵamupokelera vitumbiko vya Yehova; kweniso ni wose yayi awo ŵamuchizgika.

7. Kasi makuni gha mumphepete mwa mlonga wa mu mboniwoni, ghakaŵapa chigomezgo wuli ŵazga Ŵachiyuda?

⁷ Makuni gha vyakurya na kuchizgira. Kasi makuni gha mumphepete mwa mlonga ghakaŵa na ntchito wuli? Ghakatoweskanga malo, kweniso ghakaŵa na ntchito yinyake. Ezekiyeli na ŵanthu ŵakwake ŵakwenera kuti ŵakakondwanga kughanaghanira vipambi vyakunowa ivyo ŵangasanga mu makuni agha, vipambi viphya mwezi uliwose. Uchimi uwu ukaŵasimikizgiranga kuti Yehova wamuŵalyeska mwauzimu. Chinyakeso chikaŵa chakuti wuli? Wonani kuti mahamba gha makuni agha “ghamuŵa ghakuchizgira.” (Ezek. 47:12) Yehova wakamanya kuti para ŵazga ŵawelera kwawo, icho ŵamukhumbikwira chomene nkhuchizgika mwauzimu, ndipo wakalayizga kuti ndivyo wamuchita. Wakalongosora umo wamuchitira ivi mu mauchimi ghanyake ghakuwezgerapo vinthu, nga umo tikasambilira mu Mutu 9 wa buku ili.

8. Ntchivichi chikulongora kuti mboniwoni ya Ezekiyeli iyi yikaŵaso na kufiskika kunyake kukuru?

⁸ Kweni nga umo tikasambilira mu Mutu 9, mauchimi agha ghakafiskika pachoko waka ku ŵazga awo ŵakawelera kwawo. Ivi vikaŵa nthena chifukwa cha ŵanthu iwoŵene. Kasi Yehova wakate waŵatumbikenge wuli apo iwo ŵakambaso nkharo ziheni, kuleka kupulikira, na kusulako kusopa kutuŵa? Ŵanthu ŵakugomezgeka ŵakakwenyeleranga na kukhuŵara chifukwa cha nkharo ziheni za Ŵayuda ŵanyawo. Kweni ŵateŵeti ŵakugomezgeka aŵa ŵakamanyanga kuti ivyo Yehova walayizga vikutondeka yayi; vikufiskika nyengo zose. (Ŵazgani Joshuwa 23:14.) Ntheura ŵakagomezganga kuti zuŵa linyake mboniwoni ya Ezekiyeli yizamufiskika chomene. Kweni pawuli?

Mlonga Ukwenda Mazuŵa Ghano!

9. Kasi mboniwoni ya Ezekiyeli ya tempile yikufiskika chomene pawuli?

⁹ Nga umo tikawonera mu Mutu 14 wa buku ili, mboniwoni ya Ezekiyeli ya tempile yikufiskika chomene mu “mazuŵa ghaumaliro,” pa nyengo iyo kusopa kutuŵa kwakwezgeka chomene kuluska kumasinda kose. (Yes. 2:2) Kasi chigaŵa ichi cha mboniwoni ya Ezekiyeli chikufiskika wuli sono?

10, 11. (a) Kasi ni vitumbiko wuli ivyo vikwiza kwa ise nga ni mlonga mazuŵa ghano? (b) Kasi vitumbiko ivyo vikufuma kwa Yehova vyasazgikira wuli kuti vikwanire ŵanthu ŵanandi mu mazuŵa ghaumaliro agha?

¹⁰ Mlonga wa vitumbiko. Kasi maji ghakufuma mu nyumba ya Yehova ghakutikumbuska vitumbiko wuli mazuŵa ghano? Ghakutikumbuska vinthu vyose ivyo Yehova watipa kuti vitovwire kukura makora mwauzimu. Chikuru chomene ni nkhongono yakutozga ya sembe ya Khristu, iyo yikovwira kuti zakwananga zithu zigowokereke. Unenesko wa mu Mazgu gha Chiuta nawo ukuyana waka na maji ghakupa umoyo na ghakutozgera. (Efe. 5:25-27) Kasi vitumbiko ivi vikwenda wuli mazuŵa ghano?

¹¹ Mu 1919, kukaŵa ŵateŵeti ŵa Yehova masauzandi ghachoko waka. Ŵanthu aŵa ŵakaŵa ŵakukondwa kupokera chakurya chauzimu icho ŵakakhumbikwiranga. Mu vyaka vyakulondezgapo, ŵanthu aŵa ŵakasazgikiranga chomene. Mazuŵa ghano, ŵanthu ŵa Chiuta ŵakujumpha pa 8 miliyoni. Kasi maji gha unenesko nagho ghakusazgikira? Enya. Tili na vinthu vinandi chomene ivyo vyatovwira kupulikiska makora unenesko. Mu vyaka 100 ivyo vyajumpha, ŵanthu ŵa Chiuta ŵapokera Mabaibolo, mabuku, magazini, maburosha, na mathirakiti mabiliyoni ghanandi. Nga ni mlonga uwo Ezekiyeli wakawona mu mboniwoni, unenesko ukusazgikira kuti ufikire ŵanthu ŵanandi pa charu chose, awo ŵakukhumba kumanya Chiuta. Mabuku ghakulongosora Baibolo ghakamba nikale kusindikizgika. Kweni pasono nkhani zanthena izi zikusangikaso pa webusayiti ya jw.org, mu viyowoyero vyakujumpha 900. Kasi maji agha ghakuŵawovwira wuli ŵanthu ŵamitima yiwemi?

12. (a) Kasi tili na ukaboni wuli wakuti uthenga wa unenesko wapeleka umoyo uwemi wauzimu ku ŵanthu? (b) Kasi mboniwoni iyi yili na chenjezgo wuli kwa ise mazuŵa ghano? (Wonaniso mazgu ghamusi.)

¹² Maji ghakupa umoyo. Ezekiyeli wakaphalirika kuti: “Kose uko mlonga uwu ukulazga chilichose chamuŵa chamoyo.” Ghanaghanirani umo uthenga wa unenesko wafikira ku wose awo ŵiza mu charu chithu chauzimu. Unenesko wa mu Baibolo wapeleka umoyo wauzimu ku ŵanthu mamiliyoni awo ŵawupokelera. Kweni mboniwoni iyi yiliso na chenjezgo lakuti: Ni wose yayi awo ŵakulutilira kukoleska unenesko uwu. Nga ni visapa na madambo gha ku Nyanja Yakufwa ivyo Ezekiyeli wakawona mu mboniwoni, pali ŵanthu ŵanyake awo mbanonono mtima, ŵakukhumba yayi kupokera unenesko na kuwulondezga.c Ise tingaŵanga na mtima wanthena yayi.—Ŵazgani Dotoronome 10:16-18.

13. Kasi ise tikusambirako vichi ku makuni gha mu mboniwoni iyi?

¹³ Makuni gha vyakurya na kuchizgira. Kasi makuni gha mumphepete mwa mlonga wa mu mboniwoni ghali na sambiro lakukhozga kwa ise? Nkhanira kwali! Kumbukani kuti mwezi uliwose makuni agha ghakapambikanga vipambi viphya vyakunowa, ndipo mahamba ghake ghakaŵa ghakuchizgira. (Ezek. 47:12) Ivi vikutikumbuska kuti tikuteŵetera Chiuta uyo wakutilyeska na kutichizga mwauzimu. Ŵanthu ŵanandi mu charu mbalwari na ŵanjara mwauzimu. Kweni wonani waka ivyo Yehova wakupeleka. Kasi muli kuyowoyapo kuti mwatumbikika nadi mwati mwaŵazga magazini ghithu, mwimba sumu yaumaliro pa ungano, panji mwamalizga waka kuwonelera vidiyo? Tikulyeskeka mwakukwana nadi. (Yes. 65:13, 14) Kasi chakurya chauzimu ichi chikutovwira nadi kuŵa na umoyo uwemi wauzimu? Ulongozgi uwemi uwo tikupokera, wakujintha mu Mazgu gha Chiuta, ukutovwira kulimbana na vinthu vyawakawaka nga ni makhaliro ghaheni, uryezi, na kuŵavya chipulikano. Yehova wanozgaso ndondomeko yakovwilira Ŵakhristu awo ŵalwara mwauzimu chifukwa cha zakwananga zikuru. (Ŵazgani Yakobe 5:14.) Tili ŵakutumbikika nadi, nga umo mboniwoni ya Ezekiyeli ya makuni yikulongolera.

14, 15. (a) Kasi tingasambirako vichi ku visapa vya mu mboniwoni ya Ezekiyeli, ivyo vikachizgika yayi? (b) Kasi mboniwoni ya Ezekiyeli ya mlonga yikutovwira wuli mazuŵa ghano?

¹⁴ Pa nyengo yimozamoza, tingasambirako ku visapa ivyo vikachizgika yayi. Tingatemwa yayi kuti vitumbiko vya Yehova vitipambe. Para tingaleka kuchizgika, tingaŵa pangozi nga umo viliri na ŵanthu ŵanandi mu charu chilwari ichi. (Mat. 13:15) Kweni tikukondwa kuti tikusanga chandulo na mlonga wa vitumbiko. Para tikulimbikira kumwa maji gha unenesko kufuma mu Mazgu gha Chiuta, kuphalirako ŵanyithu unenesko uwu, kweniso kupokera ulongozgi wachitemwa, chipembuzgo, na wovwiri kufuma ku ŵalara awo ŵakusambizgika na muzga wakugomezgeka, tingakumbuka mlonga wa mu mboniwoni ya Ezekiyeli. Mlonga uwu ukupeleka umoyo na kuchizga chilichose kose uko ukulazga.

¹⁵ Kweni kasi mboniwoni ya mlonga yizamufiskika wuli munthazi? Nga umo tiwonerenge, mlonga uwu uzamwenda chomene mu Paradiso uyo wakwiza.

Kasi Mboniwoni Iyi Yizamufiskika Wuli mu Paradiso?

16, 17. (a) Kasi maji gha umoyo ghazamusazgikira chomene mu Paradiso munthowa wuli? (b) Kasi tizamusanga chandulo wuli na mlonga wa vitumbiko uwu mu Paradiso?

¹⁶ Kasi muli kughanaghanapo kuti muli mu Paradiso, muli pamoza na ŵabwezi na ŵabali, ndipo mukukondwa chomene na umoyo? Para mungafwasa kusambira mboniwoni ya Ezekiyeli ya mlonga, mungaŵa na chithuzithuzi cheneko cha umo vinthu vizamuŵira. Munthowa wuli? Wonaniso vigaŵa vitatu vya mboniwoni iyi.

¹⁷ Mlonga wa vitumbiko. Mlonga uwu uzamuŵa ukuru chomene mu Paradiso, chifukwa uzamovwira ŵanthu mwauzimu kweniso mwakuthupi. Mu Muwuso wa Yesu wa Vyaka 1,000, Ufumu wa Chiuta uzamovwira ŵanthu ŵakugomezgeka kusanga chandulo chikuru na sembe yakuwombora. Pachoko na pachoko ŵanthu ŵazamuzgoka ŵakufikapo. Pa nyengo iyo, kuzamuŵavya matenda, ŵadokotala, ŵanesi, na vipatala. Maji gha umoyo agha ghazamufika ku ŵanthu mamiliyoni awo ŵazamupona pa Aramagedoni, “mzinda ukuru” uwo uzamujumpha pa “suzgo yikuru.” (Chivu. 7:9, 14) Nangauli pakwamba mlonga wa vitumbiko uwu uzamuwoneka ukuru, kweni uzamuŵa nga ukutunkha waka pakuyaniska na ivyo vizamuchitika pamanyuma. Nga umo vikaŵira mu mboniwoni ya Ezekiyeli, mlonga uwu uzamusazgikira kuti ukwanire ŵanthu ŵanandi.

18. Kasi “mlonga wa maji gha umoyo” uzamuzgoka wuli ukuru chomene mu Muwuso wa Vyaka 1,000?

¹⁸ Maji ghakupa umoyo. Mu Muwuso wa Yesu, “mlonga wa maji gha umoyo” uzamuzgoka ukuru chomene. (Chivu. 22:1) Ŵanthu mamiliyoni panji mabiliyoni, ŵazamuwuskika ku ŵakufwa ndipo ŵazamupika mwaŵi wa kukhala kwamuyirayira mu Paradiso. Vinyake mwa vitumbiko ivyo Yehova wazamupeleka kwizira mu Ufumu, ni vyakuti wazamupelekaso umoyo ku ŵanthu ŵanandi awo ŵali kufwa, awo ŵagona mu fuvu la charu chapasi nyengo yitali chomene. (Yes. 26:19) Kweni kasi ni wose pa awo ŵazamuwuskika awo ŵazamuŵa ŵamoyo kwamuyirayira?

19. (a) Ntchivichi chikulongora kuti mu Paradiso muzamuŵa maji ghanyake gha unenesko ghakufuma kwa Chiuta? (b) Kasi kunthazi ŵanyake ŵazamulekeka wuli nga ni ‘maji ghamchere’?

¹⁹ Waliyose wazamukhumbikwira kusankha. Icho chizamuchitika ntchakuti, pazamujulika mipukutu yiphya. Ntheura maji ghawemi ghakufuma kwa Yehova ghazamusazgapo unenesko uphya, ulongozgi uphya wauzimu. Vikulongora kuti vinthu vizamunozga chomene. Kweni ŵanthu ŵanyake ŵazamukana thumbiko ili, ŵazamusankha kuleka kupulikira Yehova. Mu Muwuso wa Vyaka 1,000, ŵanthu ŵanyake ŵangazakagaluka, kweni ŵazamuzomerezgeka yayi kuti ŵatimbanizge Paradiso. (Yes. 65:20) Ivi vikutikumbuska visapa vya mu mboniwoni ya Ezekiyeli ivyo vikachizgika yayi, ndipo vikalekeka kuŵa maji “ghamchere.” Awo ŵazamukana kumwa maji gha umoyo agha ŵazamulongora kuti mahara ŵalije. Paumaliro wa Muwuso wa Khristu, gulu la ŵakugaluka ili lizamukolerana na Satana. Wose awo ŵazamukana muwuso waurunji wa Yehova umaliro wawo uzamuŵa umoza: nyifwa yamuyirayira.—Chivu. 20:7-12.

20. Kasi ni ndondomeko wuli iyo yizamuŵako mu Muwuso wa Vyaka 1,000 iyo yikutikumbuska vya makuni agho Ezekiyeli wakawona?

²⁰ Makuni gha vyakurya na kuchizgira. Yehova wakukhumba yayi kuti yumoza wa ise wazakatondeke kusanga umoyo wamuyirayira. Ntheura kuti wazakatovwire kukoleska mwaŵi wapadera uwo watipa, wazamuwoneseska kuti waŵikaso ndondomeko yakuŵa nga ni makuni agho Ezekiyeli wakawona. Kweni mu Paradiso, Yehova wazamupeleka vitumbiko vyakuthupi na vyauzimu. Yesu Khristu pamoza na ŵa 144,000 ŵazamuŵa lumoza kuchanya nga ni mathemba vyaka 1,000. Pakuŵa ŵasembe, ŵa 144,000 ŵazamupeleka vitumbiko vya sembe ya Khristu, na kovwira ŵanthu kuti ŵaŵe ŵakufikapo. (Chivu. 20:6) Ndondomeko yakuchizga mwakuthupi na mwauzimu iyi yikutikumbuska makuni agho Ezekiyeli wakawona mumphepete mwa mlonga, agho ghakapambikanga vipambi vyakunowa ndipo mahamba ghake ghakaŵa ghakuchizgira. Mboniwoni ya Ezekiyeli yikuyana waka na uchimi unyake, uwo mpositole Yohane wali kulemba. (Ŵazgani Chivumbuzi 22:1, 2.) Mahamba gha makuni agho Yohane wakawona ghakaŵa “ghakuchizgira mitundu.” Ŵanthu ŵakugomezgeka mamiliyoni ŵazamusanga chandulo na uteŵeti wa ŵa 144,000.

21. Kasi imwe mukujipulika wuli para mukughanaghanira mboniwoni ya Ezekiyeli ya mlonga, ndipo tisambirenge vichi mu mutu wapanthazi? (Wonani bokosi lakuti “Mbwiwi Yikazgoka Mlonga Ukuru”)

²¹ Apo mukughanaghanira mboniwoni ya Ezekiyeli ya mlonga, kasi mukuŵa na mtende mu mtima winu kweniso chigomezgo? Kunthazi kuli vinthu viwemi chomene. Wonani kuti vyaka masauzandi ivyo vyajumpha, Yehova wakapelekerathu chithuzithuzi cha umo vinthu vizamuŵira. Sono wakutipempha mwakuzikira kuti nase tizakaŵepo apo mauchimi agha ghazamufiskikira. Kasi imwe muzamuŵako? Nyengo zinyake mungakayika kuti malo ghinu ghangazakasangika mu Paradiso. Tiyeni tiwone umo nkhani zaumaliro za mu uchimi wa Ezekiyeli zikutipira chigomezgo.

1, 2. (a) Kasi Ezekiyeli wakapokera ulongozgi wuli kufuma kwa Yehova? (b) Kasi tizgorenge mafumbo wuli?

EZEKIYELI wakaŵa kuti wawona waka mboniwoni yinyake iyo yikwenera kuti yikamukumbuska ivyo vikachitika mu mazuŵa gha Mozesi na Joshuwa, vyaka 900 kumanyuma. Pa nyengo iyo, Yehova wakalongosolera Mozesi mphaka za Charu cha Layizgano, ndipo pamasinda wakazakaphalira Joshuwa umo wangagaŵira charu ku mafuko gha Israyeli. (Maŵa. 34:1-15; Josh. 13:7; 22:4, 9) Kweni sono mu 593 B.C.E., Yehova wakaphalira Ezekiyeli na ŵazga ŵanyake kuti ŵagaŵe Charu cha Layizgano ku mafuko gha Israyeli.—Ezek. 45:1; 47:14; 48:29.

² Kasi mboniwoni iyi yikaŵa na uthenga wuli kwa Ezekiyeli na ŵazga ŵanyake? Chifukwa wuli mboniwoni iyi yingakhozgaso ŵanthu ŵa Chiuta mazuŵa ghano? Kasi yizamufiskikaso kunthazi?

Mboniwoni Iyo Yili na Malayizgo Ghanayi Ghakukhozga

3, 4. (a) Mboniwoni yaumaliro ya Ezekiyeli yikaŵapa malayizgo ghanayi ŵazga, kasi ghakaŵa vichi na vichi? (b) Kasi tidumbiskanenge layizgo wuli mu mutu uwu?

³ Mboniwoni yaumaliro iyo Ezekiyeli wakawona yili kulembeka mu vyaputara 9 vya buku la Ezekiyeli. (Ezek. 40:1–48:35) Mboniwoni iyi yikaŵa na malayizgo ghanayi ghakukhozga gha ivyo vyamuchitika para mtundu wa Israyeli wazakambaso kukhala mu charu chawo. Kasi ghakaŵa malayizgo wuli? Chakwamba, ŵanthu ŵazamwambaso kusopa kutuŵa pa tempile la Chiuta. Chachiŵiri, ŵanthu awo ŵawelera kwawo ŵazamulongozgeka na ŵasembe na ŵaliska ŵaurunji. Chachitatu, wose awo ŵazamuwelera ku charu chawo ŵazamupokera chiharo. Ndipo chachinayi, Yehova wazamuŵa nawo, na kukhalaso pakati pawo.

⁴ Mu Mutu 13 na 14 wa buku ili tikawona umo malayizgo ghaŵiri, lakuti kusopa kutuŵa kuzamuwezgekerapo na lakuti ŵanthu ŵazamulongozgeka na ŵaliska ŵaurunji, ghazamufiskikira. Mu mutu uwu, tidumbiskanenge chomene layizgo lachitatu lakukhwaskana na kuhara charu. Mu mutu wakulondezgapo, tizamuwona layizgo lakukhwaskana na kuŵapo kwa Yehova.—Ezek. 47:13-21; 48:1-7, 23-29.

“Charu Ichi . . . Chapika kwa Imwe Kuŵa Chiharo Chinu”

5, 6. (a) Kasi chigaŵa icho chikeneranga kugaŵika chikaŵa chivichi mu mboniwoni ya Ezekiyeli? (Wonani chithuzi chakwamba.) (b) Kasi mboniwoni ya kugaŵa charu yikaŵa na chilato wuli?

⁵ Ŵazgani Ezekiyeli 47:14. Mu mboniwoni, Yehova wakamulongora Ezekiyeli chigaŵa cha charu icho chikaŵa pafupi kuŵa nga ni “munda wa Edeni.” (Ezek. 36:35) Yehova wakati: “Ichi ntchigaŵa cha charu icho mupelekenge ku mafuko 12 gha Israyeli kuŵa chiharo.” (Ezek. 47:13) ‘Chigaŵa’ icho chikeneranga kupelekeka, chikaŵa charu cha Israyeli. Kufuma apo, Yehova wakalongosora makora umo mphaka za charu ichi zizamuŵira, nga umo vili kulembekera pa Ezekiyeli 47:15-21.

⁶ Kasi chilato cha mboniwoni yakugaŵa charu chikaŵa chakuti wuli? Mboniwoni ya kugaŵa mphaka za charu mwandondomeko yikasimikizgira Ezekiyeli na ŵazga ŵanyake kuti ŵazamuweleraso nadi ku charu chawo. Ŵazga ŵara ŵakwenera kuti ŵakakhozgeka chomene pakuwona umo Yehova wakalongosolera makora nkhani ya kugaŵa charu. Kasi ŵanthu ŵa Chiuta ŵakale ŵakapokera nadi chiharo cha charu? Enya.

7. (a) Kasi ni vinthu wuli vikamba kuchitika mu 537 B.C.E., ndipo vikutikumbuska vichi? (b) Kasi tambenge kuzgora fumbo wuli?

⁷ Mu 537 B.C.E., pakati pajumpha vyaka 56 kufuma apo Ezekiyeli wakawonera mboniwoni iyi, Ŵaisrayeli masauzandi ghanandi ŵakamba kuwelera ku charu chawo na kuchihara. Nkhani izi zikutikumbuska vinthu vyakuyana waka ivyo vikuchitika pakati pa ŵanthu ŵa Chiuta mazuŵa ghano. Nase tingati tikupokera chiharo cha charu. Munthowa wuli? Yehova wakazomerezga ŵateŵeti ŵake kunjira mu charu chauzimu na kuchihara. Ipo nkhani yakuti Charu cha Layizgano chikawezgekerapo, yingatisambizga vinandi vya kuwezgekerapo kwa charu chauzimu. Kweni pambere tindawone ivyo tikusambirapo, tiyeni tizgore dankha fumbo lakuti, “Chifukwa wuli tingati charu chauzimu chiliko nadi mazuŵa ghano?”

8. (a) Kasi Yehova wakahalizgirapo Ŵaisrayeli na mtundu wuli? (b) Kasi charu chauzimu, panji kuti paradiso ni vichi? (c) Kasi charu ichi chikaŵako pawuli, ndipo mbanjani ŵakukhalamo?

⁸ Mu mboniwoni yinyake iyo Ezekiyeli wakawona, Yehova wakalongora kuti mauchimi ghakukhwaskana na kuwezgerapo mtundu wa Israyeli ghazamufiskika chomene para ‘muteŵeti wake Davide’, uyo ni Yesu Khristu, wazakaŵa Themba. (Ezek. 37:24) Ichi chikachitika mu 1914. Kuzakafika pa nyengo iyi, Yehova wakaŵa kuti wawuleka mtundu wa Israyeli na kuhalizgirapo Israyeli wauzimu, wakupangika na Ŵakhristu ŵakuphakazgika. (Ŵazgani Mateyu 21:43; 1 Petrosi 2:9.) Chinyake ntchakuti Yehova wakawuskapo charu cheneko cha Israyeli na kuhalizgirapo charu chauzimu, panji kuti paradiso. (Yes. 66:8) Nga umo tikasambilira mu Mutu 17 wa buku ili, charu chauzimu ni malo ghakuvikilirika, umo ŵakuphakazgika awo ŵachali pa charu chapasi ŵakusoperamo Yehova kwamba mu 1919. (Wonani bokosi 9B, “Chifukwa Wuli Tikuti Vikachitika mu 1919?”) Nyengo yikati yajumphapo, ŵa “mberere zinyake,” awo ŵali na chigomezgo cha kuzakakhala pa charu chapasi, nawo ŵakamba kukhala mu charu chauzimu ichi. (Yoh. 10:16) Nangauli paradiso wauzimu wakulutilira kukura na kusanuzgika mazuŵa ghano, kweni tizamuwona vitumbiko vyake vyose para Aramagedoni yazakajumpha.

Waliyose Wapokere Chigaŵa Chakuyana

9. Kasi Yehova wakamuphalira vichi Ezekiyeli pa nkhani ya kugaŵa charu?

⁹ Ŵazgani Ezekiyeli 48:1, 28. Wakati waŵika mphaka zakuwaro za charu, Yehova wakalongosora makora umo charu chingagaŵikira. Wakayowoya kuti viharo vipimike na kugaŵika mwakuyana ku mafuko 12, kufuma kumpoto kuya kumwera. Wakaphalirika kuti wambe kugaŵira fuko la Dani kumpoto chomene kwa charu na kumalira na fuko la Gadi, kumwera chomene kwa charu. Chiharo chilichose cha viharo 12 chikambiranga ku mphaka yakuwaro kumafumiro gha dazi, na kumalira ku Nyanja Yikuru, panji kuti Nyanja ya Meditereniyani, kumanjiliro gha dazi.—Ezek. 47:20.

10. Kasi chigaŵa ichi cha mboniwoni chikaŵasimikizgira vichi ŵazga?

¹⁰ Kasi chigaŵa ichi cha mboniwoni chikwenera kuti chikaŵakhozga wuli ŵazga? Ŵazga ŵara ŵakwenera kuti ŵakakhorwa kuti charu chamugaŵika mu ndondomeko yiwemi pakuwona umo Ezekiyeli wakalongosolera kagaŵiro ka charu ichi. Chinyake ntchakuti ŵakati ŵawona kuti charu chagaŵika ku mafuko ghose 12, ŵakakhorwa kuti waliyose uyo wazakawelera ku charu chawo wamupokera chiharo. Pazamuŵavya uyo wamusoŵa malo panji pakukhala.

11. Kasi tikusambirako vichi ku mboniwoni ya kugaŵa charu? (Wonani bokosi lakuti “Kugaŵa Charu.”)

¹¹ Kasi ni fundo wuli zakukhozga izo tingasambira ku mboniwoni iyi? Mu Charu cha Layizgano, mukaŵa malo gha ŵasembe, Ŵalevi, na ŵalongozgi kweniso waliyose wa mu mafuko 12. (Ezek. 45:4, 5, 7, 8) Mwakuyana waka, mu paradiso wauzimu muli malo gha Ŵakhristu ŵakuphakazgika awo ŵachali pa charu chapasi na ŵa “mzinda ukuru” awo ŵakutilongozga, kweniso gha waliyose wa mu mzinda ukuru.a (Chivu. 7:9) Nanga tingaŵa na udindo uchoko wuli mu gulu, kweni tili na malo ghakuvikilirika na mulimo wapadera mu charu chauzimu. Fundo iyi njakukhozga chomene, asi nthe?

Kasi Vinthu Viŵiri Vyakupambana Vikutikhwaska Wuli Ise?

12, 13. Kasi Yehova wakapeleka ulongozgi wuli wakudunjika pa nkhani ya kugaŵira mafuko charu?

¹² Vinyake ivyo Yehova wakamuphalira Ezekiyeli pa nkhani ya kugaŵa charu vikwenera kuti vikamuzizika Ezekiyeli, chifukwa vikapambananga na ivyo Chiuta wakaphalira Mozesi. Tiyeni tiwone vinthu viŵiri vyakupambana. Chakwamba, chikakhwaskanga charu; chinyake chikakhwaskanga ŵanthu ŵakukhalamo.

¹³ Chakwamba, charu. Mozesi wakaphalirika kuti awo mbanandi waŵagaŵire malo ghakuru kuluska awo ŵakaŵa ŵachoko. (Maŵa. 26:52-54) Kweni mu mboniwoni, Yehova wakaphalira Ezekiyeli kuti mafuko ghose waghape “chigaŵa chakuyana.” (Ezek. 47:14) Ntheura utali wa chigaŵa icho fuko lililose la mafuko 12 likenera kupokera ukaŵa wakuyana waka kufuma ku mphaka yakumpoto kuya ku mphaka yakumwera. Ŵaisrayeli wose, kwali mba fuko wuli, ŵakaŵa kuti ŵamuŵa na vitumbiko vyakuyana kufuma mu vundira ya Charu cha Layizgano.

14. Kasi ulongozgi uwo Yehova wakayowoya pakukhwaskana na ŵalendo ukapambana wuli na uwo ukayowoyeka mu Dango la Mozesi?

¹⁴ Chachiŵiri, ŵanthu ŵakukhalamo. Dango la Mozesi likavikiliranga ŵalendo ndipo likaŵazomerezganga kusopa Yehova, kweni ŵakaŵagaŵirangako yayi charu. (Lev. 19:33, 34) Kweni ivyo Yehova wakaphalira Ezekiyeli vikapambana na ivyo wakayowoya mu Dango la Mozesi. Yehova wakati: “Mulendo mumupenge chiharo cha malo mu chigaŵa cha fuko ilo wakukhala.” Dango ili likulongora kuti Yehova wakafumiskapo mphambano iyo yikaŵapo pakati pa ‘Ŵaisrayeli’ na ŵalendo mu charu chira. (Ezek. 47:22, 23) Mu charu icho Ezekiyeli wakawona mu mboniwoni, mukaŵa ŵanthu ŵakuyana awo ŵakasopanga Yehova mwakukolerana.—Lev. 25:23.

15. Kasi ulongozgi wakukhwaskana na charu kweniso ŵanthu ŵakukhalamo ukakhozgeranga unenesko wuli wambura kumara?

¹⁵ Fundo ziŵiri izo Yehova wakaphalira Ezekiyeli zakukhwaskana na charu kweniso ŵanthu ŵakukhalamo zikwenera kuti zikaŵapa nkhongono ŵazga. Ŵakamanya kuti Yehova wamuŵapa viharo vyakuyana, vilije kanthu kuti Mbaisrayeli panji ŵalendo. (Ezir. 8:20; Neh. 3:26; 7:6, 25; Yes. 56:3, 8) Ulongozgi uwu ukasimikizgirangaso fundo yakukhozga na yambura kusintha yakuti kwa Yehova, ŵateŵeti ŵake wose mbakuzirwa. (Ŵazgani Hagayi 2:7.) Mazuŵa ghano napo, fundo iyi yikutikhozga chomene, kwali tili na chigomezgo cha kuluta kuchanya panji cha kuzakakhala pa charu chapasi.

16, 17. (a) Kasi ivyo tasambira vyakukhwaskana na charu kweniso ŵanthu ŵakukhalamo vikutovwira vichi? (b) Kasi mu mutu wakulondezgapo tisambirenge vichi?

¹⁶ Kasi fundo zakukhwaskana na charu na awo ŵakukhalamo zikutovwira wuli? Zikutikumbuska kuti mu ubali withu wa pa charu chose, tose timanyenge kuti tikuyana ndipo tikoleranenge. Yehova wakutemwera yayi. Tikwenera kujifumba kuti: ‘Kasi nane nkhuyezga Yehova pa nkhani yakuleka kutemwera? Kasi nkhuchindika Mkhristu munyane waliyose, kwali ngwamtundu wuli panji vinthu vili wuli pa umoyo wake?’ (Rom. 12:10) Ndise ŵakukondwa kuti tose Yehova watipa paradiso wauzimu wakuyana, umo tikuteŵetera Adada ŵithu ŵakuchanya na mtima wose na kusangwa na vitumbiko ivyo ŵakutipa.—Gal. 3:26-29; Chivu. 7:9.

¹⁷ Sono tiyeni tiwone layizgo lachinayi la mu mboniwoni yaumaliro ya Ezekiyeli, ilo likuyowoya kuti Yehova wazamuŵa nawo ŵazga. Kasi tingasambirako vichi ku layizgo ili? Mutu wakulondezgapo ukuzgora fumbo ili.

1, 2. (a) Kasi ntchigaŵa wuli cha charu icho chikwenera kupatulika? (Wonani chithuzi pa chikopi.) (b) Kasi mboniwoni iyi yikaŵasamikizgira vichi ŵazga?

MU MBONIWONI yaumaliro, Ezekiyeli wakawona chigaŵa chinyake cha charu icho chikapatulikira mulimo wapadera. Chigaŵa icho chikapatulika, chikapelekeka ku fuko linyake la Israyeli yayi, kweni chikaŵa chakupeleka kwa Yehova. Ezekiyeli wakawonaso msumba wakuzizika uwo ukaŵa na zina lachilendo. Chigaŵa ichi cha mboniwoni chikaŵapa chigomezgo chapadera ŵazga chakuti: Yehova wamuŵa nawo para ŵawelera ku chikaya chawo icho ŵakachitemwanga.

² Ezekiyeli wakalongosora vinandi vya chakupeleka ichi. Tiyeni tiwone nkhani iyi, iyo yili ng’anamuro likuru chomene kwa ise ŵateŵeti ŵaunenesko ŵa Yehova.

“Chakupeleka Chakupatulika na Chigaŵa cha Msumba”

3. Kasi charu icho chikapatulikira Yehova chikaŵa na vigaŵa wuli vinkhondi,, ndipo vigaŵa ivi vikaŵa na ntchito wuli? (Wonani bokosi lakuti “Chigaŵa Chapadera Chakuti Muchipeleke.”)

³ Chigaŵa chapadera cha charu utali wake ukaŵa mikono 25, 000 (makilomita 13) kufuma kumpoto kuya kumwera kweniso mikono 25,000 (makilomita 13) kufuma kumafumiro gha dazi kuya kumanjiliro gha dazi. Chigaŵa ichi chikaŵa chakuyana mu vigaŵa vyose vinayi, ndipo chikachemekanga “malo ghose.” Chikagaŵika mu vigaŵa vitatu. Chigaŵa chakunena chikaŵa cha Ŵalevi, chapakati chikapatulika kuti chiŵe cha tempile na ŵasembe. Vigaŵa viŵiri ivi ndivyo vikapanga “chakupeleka chakupatulika.” Chigaŵa chichoko chamusi, panji kuti “malo agho ghakhalapo,” chikaŵa cha “ntchito zinyake.” Chikaŵa chakuzengapo msumba.—Ezek. 48:15, 20.

4. Kasi tingasambirako vichi ku nkhani ya chakupeleka kwa Yehova?

⁴ Kasi nkhani ya chakupeleka kwa Yehova iyi yikutisambizga vichi? Pakudankha kupatura malo gha chakupeleka chapadera ndipo pamasinda gha mafuko, Yehova wakalongora kuti ŵanthu ŵakwenera kuchindika chomene chigaŵa ichi cha charu. (Ezek. 45:1) Tikukayika yayi kuti ŵazga ŵara ŵakasambirako vinandi pa umo charu chikagaŵikira. Ŵakamanya kuti kusopa Yehova chikeneranga kuŵa chinthu chakwamba pa umoyo wawo. Mazuŵa ghano, nase tikuwona vinthu vyauzimu nga nkhusambira Mazgu gha Chiuta, kuwungana, na kupharazga kuŵa vyakuzirwa chomene. Para tikuyezga Yehova pa nkhani iyi, kusopa ndicho chiŵenge chinthu chakwamba pa umoyo withu.

“Msumba Uŵe Pakati Pake”

5, 6. (a) Kasi msumba uwu ngwanjani? (b) Kasi msumba uwu ukwimira vichi yayi, ndipo chifukwa wuli?

⁵ Ŵazgani Ezekiyeli 48:15. Kasi “msumba” na malo agho ghakawuzingilizga vikaŵa vya ntchito wuli? (Ezek. 48:16-18) Yehova wakaphalira Ezekiyeli mu mboniwoni kuti: ‘Chigaŵa cha msumba chiŵenge cha nyumba yose ya Israyeli.’ (Ezek. 45:6, 7) Ntheura msumba na malo agho ghakawuzingilizga vikaŵa chigaŵa cha chakupeleka icho ‘chikaŵa cha Yehova’ yayi. (Ezek. 48:9) Na fundo iyi, tiyeni tiwone ivyo tingasambirako ku ndondomeko ya msumba uwu mazuŵa ghano.

⁶ Kuti timanye ivyo tingasambirako ku nkhani ya msumba iyi, tikwenera kumanya dankha ivyo msumba uwu ukimiranga. Chakwamba, msumba uwu ukimiranga msumba wa Yerusalemu na tempile lake ivyo vikazengekaso yayi. Chifukwa wuli? Chifukwa msumba uwo Ezekiyeli wakawona mu mboniwoni ukaŵavya tempile mukati mwake. Kweniso msumba uwu ukimiranga msumba uliwose yayi mu charu cha Israyeli. Chifukwa wuli? Chifukwa ŵazga awo ŵakawelera kwawo panji ŵana ŵawo ŵakazengapo yayi msumba uwo ukaŵa na vinthu ivyo vili mu mboniwoni iyi. Chinyake ntchakuti msumba uwu ukimiranga msumba wakuchanya yayi. Chifukwa wuli? Chifukwa msumba uwu ukazengeka pa chigaŵa cha “ntchito zinyake,” mwakupambana na vinthu ivyo vikazengeka pa chigaŵa icho chikapatulika kuŵa chakusoperako.—Ezek. 42:20.

7. Kasi msumba uwo Ezekiyeli wakawona ni vichi, ndipo ukwenera kuti ukwimira vichi? (Wonani chithuzi chakwamba.)

⁷ Ipo kasi msumba uwo Ezekiyeli wakawona ukaŵa vichi? Kumbukani kuti wakawona msumba uwu mu mboniwoni iyo wakawona charu. (Ezek. 40:2; 45:1, 6) Mazgu gha Chiuta ghakulongora kuti charu ni charu chauzimu, ipo msumba nawo ukwenera kuti ukimiranga msumba wauzimu. Kweni kasi mazgu ghakuti “msumba” kanandi ghakung’anamurachi? Kanandi mazgu agha ghakung’anamura ŵanthu awo ŵakukhala pamoza ndipo ŵakuchita vinthu mwakukolerana kweniso mwandondomeko. Ntheura msumba uwo Ezekiyeli wakawona ukwenera kuti ukimiranga ndondomeko yiwemi ya kwendeskera vinthu.

8. Kasi ndondomeko yakwendeska vinthu iyi yikugwilira nkhuni ntchito, ndipo chifukwa wuli?

⁸ Kasi ndondomeko ya kwendeskera vinthu iyi yikugwilira nkhu ntchito yake? Mboniwoni ya Ezekiyeli yikulongora kuti msumba uwu ukugwira ntchito mukati mu charu chauzimu. Ntheura ndondomeko ya kwendeskera vinthu iyi yikugwira ntchito pakati pa ŵanthu ŵa Chiuta mazuŵa ghano. Kasi fundo yakuti msumba uwu ukaŵa pa chigaŵa cha ntchito zinyake, panji kuti malo ghambura kupatulika yikulongora vichi? Yikutikumbuska kuti msumba uwu ukwimira ndondomeko yakwendeskera vinthu yakuchanya yayi, kweni ya pa charu chapasi, iyo yikugwira ntchito kuti yiwovwire wose awo ŵakukhala mu paradiso wauzimu.

9. (a) Mbanjani awo ŵali mu gulu lakwendeska vinthu pa charu mazuŵa ghano? (b) Kasi Yesu wazamuchita vichi mu Muwuso wa Vyaka 1,000?

⁹ Kasi mbanjani awo ŵali mu gulu lakwendeska vinthu pa charu chapasi? Mu mboniwoni ya Ezekiyeli, uyo wakaŵa mulara wa boma mu msumba wakuchemeka “mulongozgi.” (Ezek. 45:7) Iyo wakaŵa mulaŵiliri wa ŵanthu, kweni wakaŵa wasembe panji Mulevi yayi. Mulongozgi uyu wakutikumbuska za ŵalaŵiliri ŵa mpingo mazuŵa ghano awo mbakuphakazgika yayi. Ŵaliska ŵauzimu aŵa ŵali mu gulu la “mberere zinyake,” ndipo mbateŵeti ŵakujiyuyura ŵa boma la Khristu lakuchanya. (Yoh. 10:16) Mu Ufumu wa Vyaka 1,000, Yesu wazamusora na kwimika ŵalara ŵakwenelera, panji kuti “ŵakaronga” mu “charu chose chapasi.” (Sal. 45:16) Ŵakaronga aŵa ŵazamupwelelera ŵanthu ŵa Chiuta mwakulongozgeka na Ufumu uwu.

“Yehova Wali Kwenekuko”

10. Kasi msumba uwu zina lake ni vichi, ndipo zina ili likutisimikizgira vichi?

¹⁰ Ŵazgani Ezekiyeli 48:35. Zina la msumba likaŵa “Yehova Wali Kwenekuko.” Zina ili likulongora kuti Yehova wakaŵa mu msumba uwu. Pakumulongora Ezekiyeli msumba uwu, Yehova wakaŵa nga wakuphalira ŵazga ŵara kuti: ‘Niŵengeso namwe.’ Mazgu agha ghakaŵakhozga chomene.

11. Kasi tingasambirako vichi ku mboniwoni ya Ezekiyeli ya msumba na zina la msumba uwu?

¹¹ Kasi tingasambirako vichi ku chigaŵa ichi cha uchimi wa Ezekiyeli? Zina la msumba uwu likutisimikizgira ise ŵateŵeti ŵa Chiuta kuti Yehova wakukhala na ŵanthu ŵake ŵakugomezgeka pano pasi, ndipo walutilirenge kuŵa pakati pawo. Zina ili likutiphaliraso fundo yakuzirwa yakuti: Msumba uwu uliko kuti upeleke nkhongono kwa munthu waliyose yayi, kweni kuti uwovwire kuti fundo ziwemi za Yehova zilondezgekenge. Mwachiyelezgero, panji tingayowoya kuti Yehova wandapeleke mazaza ku awo ŵakwendeska vinthu kuti ŵagaŵe charu. M’malo mwake, Yehova wakukhazga kuti awo ŵakwendeska vinthu ŵachindikenge vigaŵa, panji kuti mauteŵeti, agho iyo wakupeleka ku ŵateŵeti ŵake, nanga ŵangaŵa ‘ŵakavu.’—Zinth. 19:17; Ezek. 46:18; 48:29.

12. (a) Kasi chinthu chapadera na msumba uwu ntchivichi, ndipo chikulongora vichi? (b) Kasi chigaŵa ichi cha mboniwoni chikuŵakumbuska fundo wuli yakuzirwa ŵalaŵiliri Ŵachikhristu?

¹² Kasi chinthu chinyake chapadera mu msumba wakuchemeka “Yehova Wali Kwenekuko” ni vichi? Misumba yinandi yakale yikaŵanga na malinga na vipata vichoko waka, kweni msumba uwu ukaŵa na vipata 12. (Ezek. 48:30-34) Unandi wa vipata (vitatu chigaŵa chilichose mu makona ghanayi) ukulongora kuti awo ŵakwendeska vinthu mu msumba uwu mbakufwatuka ndipo ŵalipo kovwira ŵateŵeti wose ŵa Chiuta. Kweniso vipata 12 vya msumba, vikulongora waka kuti ngwakujulika kwa waliyose, enya “nyumba yose ya Israyeli.” (Ezek. 45:6) Unandi wa vipata vya msumba uwu, ukukumbuska ŵalara ŵa mpingo kanthu kanyake. Yehova wakukhumba kuti ŵalara ŵaŵenge ŵakufwatuka na ŵanthu ndipo nyengo zose ŵaŵenge ŵakunozgeka kovwira awo ŵali mu paradiso wauzimu.

Ŵanthu ŵa Chiuta ‘Ŵakunjira Kuti Ŵasope na Kuteŵetera mu Msumba’

13. Kasi Yehova wakayowoyachi vya mauteŵeti ghakupambanapambana agho ŵanthu ŵazamuchita?

¹³ Tiyeni tiwelere ku nyengo ya Ezekiyeli na kuwona vinyake ivyo wali kulemba mu mboniwoni ya kugaŵa charu. Yehova wakayowoya vya ŵanthu ŵakuchita mauteŵeti ghakupambanapambana. Wakati ŵasembe, awo ŵakaŵa “ŵateŵeti ŵa mu malo ghakupatulika,” ŵazamupeleka sembe na kusendelera kwa Yehova kuti ŵamuteŵetere. Ŵalevi, awo ŵakaŵa ‘ŵateŵeti ŵa pa tempile,’ ‘ŵazamuchita ntchito za pa tempile na vinthu vyose ivyo vikwenera kuchitika mukati.’ (Ezek. 44:14-16; 45:4, 5) Kweniso ŵanthu ŵazamugwira ntchito pafupi na msumba. Kasi ŵanthu aŵa mbanjani?

14. Kasi ŵantchito awo ŵakaŵa pafupi na msumba ŵakutikumbuska vichi?

¹⁴ Ŵanthu awo ŵakagwiranga ntchito pafupi na msumba ŵakafuma “mu mafuko ghose gha Israyeli.” Udindo wawo ukaŵa wakovwirapo waka. Ŵakaŵa na mulimo wakupanda mbuto kuŵa ‘chakurya cha awo ŵakuteŵetera msumba.’ (Ezek. 48:18, 19) Kasi chilipo icho tingasambirako ku ndondomeko iyi? Enya. Mazuŵa ghano, wose awo ŵali mu paradiso wauzimu ŵali na mwaŵi wakovwira ŵabali ŵa Khristu na ŵanyake ŵa “mzinda ukuru,” awo Yehova waŵasankha kuti ŵalongozgenge. (Chivu. 7:9, 10) Nthowa yikuru iyo tingawovwilirapo nkhupulikira ulongozgi wakufuma kwa muzga wakugomezgeka.

15, 16. (a) Kasi nkhanthu wuli kanyake ako tingasambirako ku mboniwoni ya Ezekiyeli? (b) Kasi tili na mwaŵi kuchitako milimo wuli yakuyana waka?

¹⁵ Mboniwoni ya Ezekiyeli yiliso na kanthu kanyake ako tingasambirako pa nkhani ya uteŵeti withu. Kasi nkhanthu wuli? Yehova wakayowoyaso kuti ŵanthu ŵakufuma mu mafuko 12 awo ŵakaŵa ŵa fuko la Levi yayi, ŵazamugwiranga ntchito mu malo ghaŵiri: mu luŵaza lwa tempile kweniso mu malo gha msumba ghakuliskirako viŵeto. Kasi mulimo wawo ukaŵa wakuti wuli mu vigaŵa ivi? Mu luŵaza lwa tempile, ŵanthu ŵa mafuko ghose ‘ŵakanjiranga kuti ŵasope’ pakupeleka sembe kwa Yehova. (Ezek. 46:9, 24) Pa malo ghakuliskirapo viŵeto, ŵanthu ŵa mafuko ghose ŵakizanga kuti ŵazakawovwirepo, ŵakalimanga minda yake. Kasi tingasambirako vichi ku ŵanthu aŵa?

¹⁶ Mazuŵa ghano, ŵamzinda ukuru ŵali na mwaŵi kuchitako milimo yakuyana na iyo ŵanthu ŵa mu mboniwoni ya Ezekiyeli ŵakachitanga. Iwo ŵakusopa Yehova “mu tempile lake” para ŵakupeleka sembe za malumbo. (Chivu. 7:9-15) Ŵakupeleka sembe izi para ŵakupharazga na kuzgorapo pa maungano. Ŵakuwona kuti kusopa Yehova ndicho ntchinthu chakuzirwa chomene. (1 Mid. 16:29) Chinyake ntchakuti ŵanthu ŵa Chiuta ŵanandi ŵakovwira gulu lake munthowa zinandi. Mwachiyelezgero, ŵanyake ŵakovwirapo pa kuzenga na kunozga Nyumba za Ufumu kweniso maofesi gha munthavi, ndipo ŵakovwiraso pa ntchito zinyake zinandi izo zikuchitika na gulu la Yehova. Ŵanyake ŵakupeleka makopara kovwirapo pa ntchito izi. Ŵanthu aŵa ŵakuŵa nga ŵakulima minda, ndipo ŵakuchita vyose ivi “kuti Chiuta wachindikike.” (1 Kor. 10:31) Ŵakulimbikira chomene pa mulimo wawo ndipo ŵakuwuchita mwakukondwa chifukwa ŵakumanya kuti Yehova “wakukondwa chomene na sembe zanthena.” (Heb. 13:16) Kasi mukuwugwiliskira ntchito makora mwaŵi uwu?

“Kuli Machanya Ghaphya na Charu Chapasi Chiphya Ivyo Tikulindilira”

17. (a) Kasi munthazi tizamuwona kufiskika wuli kukuru kwa mboniwoni ya Ezekiyeli? (b) Mbanjani ŵazamusanga chandulo na ndondomeko yakwendeska vinthu mu Muwuso wa Vyaka 1,000?

¹⁷ Kasi munthazi tizamuwona kufiskika kukuru kwa mboniwoni ya Ezekiyeli ya chakupeleka? Enya. Wonani fundo iyi: Ezekiyeli wakawona kuti chigaŵa chakuchemeka “chakupeleka chakupatulika,” chikaŵa pakatikati pa charu. (Ezek. 48:10) Mwakuyana waka, para Aramagedoni yazakajumpha, Yehova wazamuŵa nase kulikose uko tizamukhala pa charu chose. (Chivu. 21:3) Mu Ufumu wa Vyaka 1,000, ndondomeko ya msumba, kung’anamura awo ŵazamwimikika kuti ŵapwelelere ŵanthu ŵa Chiuta, yizamuthandazgika pa charu chose na kupeleka ulongozgi wachitemwa ku wose awo ŵakupanga “charu chapasi chiphya.”—2 Pet. 3:13.

18. (a) Chifukwa wuli tikugomezga kuti ndondomeko yakwendeska vinthu yizamukolerana na muwuso wa Chiuta? (b) Kasi zina la msumba likutisimikizgira vichi?

¹⁸ Chifukwa wuli tikugomezga kuti ndondomeko yakwendeskera vinthu yizamulutilira kukolerana na muwuso wa Chiuta? Chifukwa ntchakuti Mazgu gha Chiuta ghakuyowoya kuti msumba wa pa charu chapasi wa vipata 12 ukuyana waka na msumba wakuchanya wa vipata 12, uwo ni Yerusalemu Muphya. Msumba wakuchanya uwu ukupangika na ŵa 144,000 awo ŵamuwusa lumoza na Khristu. (Chivu. 21:2, 12, 21-27) Ichi chikulongora kuti awo ŵazamwendeska vinthu pa charu chapasi ŵazamuwoneseska kuti vyose ivyo Ufumu wa Chiuta wadumura kuchanya ndivyo vikuchitika pa charu. Nadi, zina la msumba lakuti “Yehova Wali Kwenekuko,” likutisimikizgira kuti kusopa kutuŵa kukhalilirenge ndipo kuzamuthaza muyirayira mu Paradiso. Tikulindilira vitumbiko vyamaseŵera cha!