-
Kasi Ufumu wa Chiuta Ni Vichi?Mungakondwa na Umoyo Kwamuyirayira!—Kusambira Baibolo Mwakudumbiskana
-
-
SAMBIRO 31
Kasi Ufumu wa Chiuta Ni Vichi?
Nkhani yakuzirwa chomene mu Baibolo njakukhwaskana na Ufumu wa Chiuta. Yehova wazamugwiliskira ntchito Ufumu wake kuti wazakafiske khumbo lake pa charu chapasi. Kasi Ufumu wa Chiuta ni vichi? Kasi tikumanya wuli kuti sono nthena ukulamulira? Kasi wafiska vichi? Kasi munthazi uzamuchita vichi? Sambiro ili kweniso sambiro 32 na 33 ghazgorenge mafumbo agha.
1. Kasi Ufumu wa Chiuta ni vichi, ndipo Fumu yake ni njani?
Ufumu wa Chiuta ni boma ilo Yehova wali kwimika. Yesu Khristu ndiyo ni Fumu ya Ufumu wa Chiuta, ndipo wakulamulira kuchanya. (Mateyu 4:17; Yohane 18:36) Baibolo likuti Yesu “wazamuwusa nga ni Themba . . . muyirayira.” (Luka 1:32, 33) Pakuŵa Fumu ya Ufumu wa Chiuta, Yesu wazamuwusa waliyose pa charu chapasi.
2. Kasi mbanjani awo ŵazamulamulira na Yesu?
Yesu wazamulamulira yekha yayi. Ŵanthu “kufuma mu fuko lililose na lulimi na ŵanthu na mtundu . . . [ŵazamuwusa] charu chapasi nga ni mathemba.” (Chivumbuzi 5:9, 10) Kasi mbanthu ŵalinga awo ŵazamulamulira na Khristu? Kufuma waka apo Yesu wakizira pa charu chapasi, ŵanthu mamiliyoni ghanandi ŵazgoka ŵalondezgi ŵake. Kweni ŵanthu 144,000 pera ndiwo ŵamulamulira na Yesu kuchanya. (Ŵazgani Chivumbuzi 14:1-4.) Ŵakhristu ŵanyake wose ŵazamuŵa ŵenekaya ŵa Ufumu wa Chiuta pano pa charu chapasi.—Salimo 37:29.
3. Chifukwa wuli Ufumu wa Chiuta nguwemi chomene kuluska maboma gha ŵanthu?
Nangauli awo ŵakulamulira ŵakuyezgayezga kuchita vinthu viwemi, kweni ŵalije nkhongono zakuchitira chilichose icho ŵakukhumba. Kanandi awo ŵakunjira mu malo mwawo ŵakuŵa ŵaryezi, ndipo ŵakuŵavya maghanoghano ghakuti ŵawovwire ŵanthu. Kweni palije uyo wazamunjira mu malo mwa Yesu, uyo ni Fumu ya Ufumu wa Chiuta. Chiuta wali kwimika “ufumu uwo kuti uzamuparanyika chara.” (Daniyeli 2:44) Yesu wazamulamulira charu chose chapasi ndipo wazamutemweranga yayi. Iyo ngwachitemwa, ngwalusungu, kweniso wakuchita vinthu mwaurunji. Ndipo wazamusambizga ŵanthu kuti nawo ŵatemwanenge, ŵaŵenge ŵalusungu, kweniso kuti ŵachitenge vinthu mwaurunji.—Ŵazgani Yesaya 11:9.
MANYANI VINANDI
Wonani chifukwa icho Ufumu wa Chiuta uliri uwemi chomene kuluska maboma gha ŵanthu.
4. Boma lankhongono chomene lizamulamulira charu chose chapasi
Yesu Khristu ndiyo wali na nkhongono chomene zakuwusira ŵanthu kuluska waliyose pa charu chapasi. Ŵazgani Mateyu 28:18, kufuma apo dumbiskanani fumbo ili:
Chifukwa wuli Yesu wali na nkhongono chomene zakuwusira ŵanthu kuluska waliyose?
Maboma gha ŵanthu ghakulamulira mu vigaŵa vichoko ndipo ghakusintha para pajumpha nyengo. Kweni wuli pakuyowoya vya Ufumu wa Chiuta? Ŵazgani Daniyeli 7:14, kufuma apo dumbiskanani mafumbo agha:
Chifukwa wuli ntchakukondweska kuti Ufumu wa Chiuta “uzamuparanyika chara”?
Chifukwa wuli ntchakukondweska kuti uzamulamulira charu chose chapasi?
5. Maboma gha ŵanthu ghakwenera kuwukapo
Chifukwa wuli Ufumu wa Chiuta ukwenera kunjira mu malo mwa maboma gha ŵanthu? Wonelerani VIDIYO, kufuma apo dumbiskanani mafumbo agha.
Kasi maboma gha ŵanthu ghapangiska vichi?
Ŵazgani Mupharazgi 8:9, kufuma apo dumbiskanani mafumbo agha:
Kasi mukuwona kuti ntchiwemi kuti Ufumu wa Chiuta ndiwo uzakalamulire mu malo mwa maboma gha ŵanthu? Chifukwa wuli?
6. Awo ŵazamulamulira mu Ufumu wa Chiuta ŵakutimanya makora
Pakuti Fumu yithu Yesu Khristu yikaŵapo munthu pa charu chapasi, yizamulekapo yayi “kutichitira chitima pa kulopwa kwithu.” (Ŵahebere 4:15) Ŵanalume na ŵanakazi ŵakugomezgeka ŵakukwana 144,000 awo ŵazamulamulira na Yesu, ŵali kusankhika na Yehova “kufuma mu fuko lililose na lulimi na ŵanthu na mtundu.”—Chivumbuzi 5:9.
Kasi ntchakukhozga yayi kuti Yesu na awo ŵamulamulira nayo, ŵakumanya makora umoyo wa ŵanthu? Chifukwa wuli?
Yehova wali kusankha ŵanalume na ŵanakazi kufuma mu mitundu yose kuti ŵakalamulire na Yesu
7. Ufumu wa Chiuta uli na malango ghawemi chomene kuluska gha maboma gha ŵanthu
Maboma gha ŵanthu ghakupanga malango ghakuti ghawovwire na kuvikilira ŵanthu ŵawo. Ufumu wa Chiuta nawo uli na malango agho ŵanthu ŵake ŵakwenera kughalondezga. Ŵazgani 1 Ŵakorinte 6:9-11, kufuma apo dumbiskanani mafumbo agha:
Kasi mukughanaghana kuti vinthu vizamuŵa wuli pa charu chapasi para waliyose wazakamba kulondezga malango gha Chiuta?a
Kasi mukuwona kuti ntchakwenelera kuti Yehova wakhazgenge kuti ŵanthu ŵazamulondezga malango gha Ufumu wake? Chifukwa wuli?
Kasi ntchivichi chikulongora kuti awo ŵakulondezga yayi malango gha Chiuta ŵangasintha na kwamba kughalondezga?—Wonani vesi 11.
Maboma gha ŵanthu ghakupanga malango agho ghakuwona kuti ghangawovwira na kuvikilira ŵanthu ŵawo. Kweni Ufumu wa Chiuta uli na malango ghawemi chomene ghakovwira ŵanthu ŵake kuluska malango gha maboma gha ŵanthu
ŴANYAKE ŴANGAFUMBA KUTI: “Kasi Ufumu wa Chiuta ni vichi?”
Kasi mungazgora wuli?
MWAKUDUMURA
Ufumu wa Chiuta ni boma lanadi ilo lili kuchanya ndipo lizamuwusa pa charu chose chapasi.
Kuweleramo
Kasi mbanjani ŵazamuwusa mu Ufumu wa Chiuta?
Chifukwa wuli Ufumu wa Chiuta nguwemi chomene kuluska maboma gha ŵanthu?
Kasi ni vinthu wuli vinyake ivyo Yehova wakukhazga kuti ŵanthu awo ŵazamuŵa mu Ufumu wake ŵazamuchita?
SANGANI FUNDO ZAKUSAZGIKIRA
Wonani ivyo Yesu wakasambizga vyakukhwaskana na uko kuli Ufumu wa Chiuta.
“Kasi Ufumu wa Chiuta Wuli mu Mtima Winu?” (Nkhani ya pa Intaneti)
Chifukwa wuli Ŵakaboni ŵa Yehova mbakugomezgeka ku Ufumu wa Chiuta m’malo mwa kugomezgeka ku maboma gha ŵanthu?
Wonani ivyo Baibolo likuyowoya vyakukhwaskana na ŵanthu ŵakukwana 144,000 awo Yehova waŵasankha kuti ŵakalamulire na Yesu.
Kasi ntchivichi icho chikawovwira mwanakazi munyake uyo wakaŵa mu jele kugomezga kuti Chiuta yekha ndiyo wanganozga vinthu pa charu?
“Nkhamanya Chifukwa Icho pa Charu Pakuchitikira Vinthu Vyambura Urunji” (Wukani!, Novembala 2011)
-
-
Ufumu wa Chiuta Ukuwusa!Mungakondwa na Umoyo Kwamuyirayira!—Kusambira Baibolo Mwakudumbiskana
-
-
SAMBIRO 32
Ufumu wa Chiuta Ukuwusa!
Ufumu wa Chiuta ukamba kuwusa kuchanya mu 1914. Chaka ichi ndichoso mazuŵa ghaumaliro gha muwuso wa ŵanthu ghakambira. Kasi tikumanya wuli? Wonani ivyo Baibolo likayowoyerathu kweniso ivyo vyachitika pa charu chapasi kwambira waka mu 1914.
1. Kasi ni vinthu wuli ivyo Baibolo likayowoyerathu?
Buku la Daniyeli likayowoyerathu kuti Ufumu wa Chiuta uzamwamba kuwusa panji kuti kulamulira para “nyengo 7” zajumpha. (Daniyeli 4:16, 17) Pakati pajumpha vyaka, Yesu wakati nyengo izi ni “nyengo zakutemeka za ŵamitundu,” ndipo wakatiso nyengo izi zindamare. (Luka 21:24) Mu sambiro ili, tidumbiskanenge kuti nyengo 7 zikamara mu chaka cha 1914.
2. Kasi ni vinthu wuli ivyo vyachitika pa charu kufuma waka mu 1914?
Ŵasambiri ŵakamufumba Yesu kuti: “Ntchivichi chizamuŵa chimanyikwiro cha kuŵapo kwinu na cha umaliro wa charu?” (Mateyu 24:3) Pakuŵazgora, Yesu wakaŵaphalira vinthu vyakupambanapambana ivyo vizamuchitika pa charu, para wamba kulamulira nga Fumu ya Ufumu wa Chiuta. Vinyake mwa vinthu ivi ni nkhondo, njara, na vindindindi. (Ŵazgani Mateyu 24:7.) Baibolo likayowoyaso kuti nkharo ya ŵanthu mu “mazuŵa ghaumaliro” yizamuchitiska kuti umoyo uŵe ‘wakusuzga.’ (2 Timote 3:1-5) Ivi ndivyo vikuchitika nadi kwambira waka 1914.
3. Chifukwa wuli vinthu vyahenipa chomene pa charu kufuma waka apo Ufumu wa Chiuta ukambira kulamulira?
Yesu wakati wimikika waka kuŵa Fumu ya Ufumu wa Chiuta, wakarwa nkhondo na Satana kweniso viŵanda vyake. Satana na viŵanda vyake ŵakathereskeka. Baibolo likuti “wakaponyeka pa charu chapasi, ndipo ŵangelo ŵake ŵakaponyeka pasi pamoza nayo.” (Chivumbuzi 12:9, 10, 12) Satana ni mukali chomene chifukwa wakumanya kuti waparanyikenge. Ntheura wakupangiska kuti ŵanthu ŵasuzgikenge chomene pa charu chapasi. Lekani pa charu chapasi pakuchitika vinthu viheni vinandi chomene. Kweni Ufumu wa Chiuta uzamumazga masuzgo ghose agha.
MANYANI VINANDI
Wonani umo tikumanyira kuti Ufumu wa Chiuta ukamba kulamulira mu 1914 kweniso umo ukutikhwaskira.
4. Nyengo iyo mauchimi gha mu Baibolo ghakafiskikira, yikulongora kuti Ufumu wa Chiuta ukamba kulamulira mu 1914
Chiuta wakachitiska kuti Nebukadinezara, Themba la Babuloni, lilote vinthu ivyo vizamuchitika kunthazi. Daniyeli ndiyo wakang’anamulira loto ili, ndipo ivyo wakalongosora vikulongora kuti vikakhwaskanga Ufumu wa Chiuta kweniso wa Nebukadinezara.—Ŵazgani Daniyeli 4:17.a
Ŵazgani Daniyeli 4:20-26, ndipo gwiliskirani ntchito tchati kuti muzgore mafumbo agha:
(A) Kasi Nebukadinezara wakawona vichi mu loto?—Wonani vesi 20 na 21.
(B) Kasi ntchivichi chikachitikira khuni?—Wonani vesi 23.
(C) Kasi ntchivichi chikeneranga kuchitika para “nyengo 7” zajumpha?—Wonani vesi 26.
Kasi Loto Lakukhwaskana na Khuni Likukolerana Wuli na Ufumu wa Chiuta?
UCHIMI (Daniyeli 4:20-36)
Ufumu
(A) Khuni likuru
Ufumu ukatimbanizgika
(B) “Dumulira pasi chikhuni,” ndipo “nyengo 7 zijumphepo”
Kuweleraso pa Ufumu
(C) “Muzamulutilira na ufumu winu”
Kufiskika kakwamba . . .
(D) Kasi khuni likimiranga njani?—Wonani vesi 22.
(E) Kasi Nebukadinezara wakaleka pawuli kulamulira?—Ŵazgani Daniyeli 4:29-33.
(F) Kasi ntchivichi chikachitikira Nebukadinezara “nyengo 7” zikati zajumpha?—Ŵazgani Daniyeli 4:34-36.
KUFISKIKA KAKWAMBA
Ufumu
(D) Nebukadinezara, Themba la Babuloni
Ufumu ukatimbanizgika
(E) Chaka cha 606 B.C.E. chikati chajumpha, Nebukadinezara wakafuntha ndipo wakaleka kulamulira kwa vyaka 7
Kuweleraso pa Ufumu
(F) Nebukadinezara wakaŵaso makora ndipo wakambiraso kulamulira
Kufiskika kachiŵiri . . .
(G) Kasi khuni likimiranga anjani?—Ŵazgani 1 Midauko 29:23.
(H) Kasi ŵakaleka pawuli kulamulira? Kasi tikumanya wuli kuti apo Yesu wakaŵa pa charu chapasi ŵakaŵa kuti ŵandambe kulamulira?—Ŵazgani Luka 21:24.
(I) Kasi ufumu uwu ukawezgekerapo pawuli ndipo ukawezgekerapo nkhu?
KUFISKIKA KACHIŴIRI
Ufumu
(G) Mathemba gha Israyeli agho ghakwimira Ufumu wa Chiuta
Ufumu ukatimbanizgika
(H) Yerusalemu wakaparanyika, ndipo mzere wa mathemba gha Israyeli ukatimbanizgika kwa vyaka 2,520
Kuweleraso pa Ufumu
(I) Yesu wakwamba kulamulira kuchanya nga Fumu ya Ufumu wa Chiuta
Kasi nyengo 7 ni vyaka vilinga?
Mavesi ghanyake mu Baibolo ghakutovwira kuti tipulikiske makora mavesi ghanyake. Mwachiyelezgero, buku la Chivumbuzi likuti nyengo zitatu na hafu zikuyana waka na mazuŵa 1,260. (Chivumbuzi 12:6, 14) Para tapanga matapulayi nyengo zitatu na hafu na 2 tikusanga nyengo 7, panji kuti mazuŵa 2,520. Nyengo zinyake mu Baibolo, zuŵa limoza likwimira chaka chimoza. (Ezekiyeli 4:6) Ndimo viliriso na nyengo 7 izo zikuzunulika mu buku la Daniyeli. Nyengo izi zikwimira vyaka 2,520.
5. Charu chasintha chomene kufuma mu 1914
Yesu wakayowoyerathu umo vinthu vizamuŵira pa charu chapasi para wamba kulamulira. Ŵazgani Luka 21:9-11, kufuma apo dumbiskanani fumbo ili:
Kasi ni vinthu wuli ivyo vyazunulika pa lemba ili ivyo mukuviwona panji kupulika?
Mpositole Paulosi wakalongosora umo ŵanthu ŵazamuŵira mu mazuŵa ghaumaliro. Ŵazgani 2 Timote 3:1-5, kufuma apo dumbiskanani fumbo ili:
Kasi ni nkharo wuli izo zazunulika pa lemba ili izo ŵanthu ŵakuchita mazuŵa ghano?
6. Tikukhozgeka chomene na umo Ufumu wa Chiuta ukuwusira
Ŵazgani Mateyu 24:3, 14, kufuma apo dumbiskanani mafumbo agha:
Kasi ni ntchito wuli yakuzirwa iyo yikulongora kuti Ufumu wa Chiuta ukuwusa?
Kasi mungachita wuli kuti namwe muchiteko ntchito iyi?
Pasono Ufumu wa Chiuta ukulamulira kuchanya ndipo sonosono apa wambenge kulamulira charu chapasi. Ŵazgani Ŵahebere 10:24, 25, kufuma apo dumbiskanani fumbo ili:
Kasi tose tikwenera kuchita vichi “apo tikuwona zuŵa likuneng’enera”?
Kasi mungachita wuli para mwamanya chinthu chinyake icho chingawovwira na kuponoska ŵanthu ŵanyake?
ŴANYAKE ŴANGAFUMBA KUTI: “Chifukwa wuli Ŵakaboni ŵa Yehova ŵakuti chaka cha 1914 ntchapadera chomene?”
Kasi mungazgora wuli?
MWAKUDUMURA
Mauchimi gha mu Baibolo, mbiri panji kuti mdauko, kweniso ivyo vikuchitika pa charu vikulongora kuti Ufumu wa Chiuta ukulamulira. Tikulongora kuti tikugomezga fundo iyi para tikupharazga na kuwungana na mpingo nyengo zose.
Kuweleramo
Kasi ntchivichi chikachitika pati pajumpha nyengo 7 izo zikayowoyekerathu mu buku la Daniyeli?
Kasi ntchivichi chikumukhorweskani kuti Ufumu wa Chiuta ukamba nadi kulamulira mu 1914?
Kasi mungalongora wuli kuti mukugomezga kuti Ufumu wa Chiuta ukulamulira?
SANGANI FUNDO ZAKUSAZGIKIRA
Wonani ivyo ŵanthu awo ŵakulemba vya mbiri na ŵanyake ŵakuyowoya vya umo vinthu vili kusinthira pa charu kufuma mu 1914.
“Apo Mikhaliro ya Ŵanthu Yikambira Kuhenipa Chomene” (Wukani!, Epulero 2007)
Wonani umo mwanalume munyake wakasinthira wati waŵerenga uchimi wa pa Mateyu 24:14.
“Nkhatemwanga Chomene Kuseŵera Baseball” (Gongwe la Mulinda Na. 3 2017)
Kasi tikumanya wuli kuti uchimi uwo uli mu Daniyeli chaputara 4 ukuyowoya vya Ufumu wa Chiuta?
Kasi ntchivichi chikulongora kuti “nyengo 7” izo zikuzunulika mu Daniyeli chaputara 4 zikamara mu 1914?
a Wonani nkhani ziŵiri pa chigaŵa chakuti Sangani Fundo Zakusazgikira mu sambiro ili.
-
-
Kasi Ufumu wa Chiuta Uzamuchita Vichi?Mungakondwa na Umoyo Kwamuyirayira!—Kusambira Baibolo Mwakudumbiskana
-
-
SAMBIRO 33
Kasi Ufumu wa Chiuta Uzamuchita Vichi?
Ufumu wa Chiuta uli kwamba kale kulamulira kuchanya. Sonosono apa uzamusintha vinthu vinandi chomene pa charu chapasi. Tiyeni tidumbiskane vinyake mwa vinthu viwemi ivyo Ufumu wa Chiuta uzamuchita pano pasi.
1. Kasi Ufumu wa Chiuta uzamuwezgerapo wuli mtende na urunji pa charu chapasi?
Yesu, uyo ni Fumu ya Ufumu wa Chiuta, wazamuparanya ŵanthu ŵaheni na maboma ghose pa nkhondo ya Aramagedoni. (Chivumbuzi 16:14, 16) Pa nyengo iyo, uchimi wa mu Baibolo wakuti: “Kwakhala kanyengo kachoko waka, ŵaheni ŵazamuŵakoso chara,” uzamufiskika nadi. (Salimo 37:10) Kwizira mu Ufumu wa Chiuta, Yesu wazamuwoneseska kuti pa charu chose pali mtende na urunji.—Ŵazgani Yesaya 11:4.
2. Kasi umoyo uzamuŵa wuli para khumbo la Chiuta lazakafiskika pa charu?
Para Ufumu wa Chiuta wazakamba kulamulira pa charu, “ŵarunji ŵazamuhara charu chapasi, ndipo ŵazamukhala mwenemumo muyirayira.” (Salimo 37:29) Ghanaghanirani waka umo umoyo uzamuŵira pa charu para ŵanthu wose ŵazakaŵa ŵarunji, ŵakutemwa Yehova kweniso ŵanyawo! Palije uyo wazamulwara ndipo tose tizamukhala kwamuyirayira.
3. Kasi Ufumu wa Chiuta uzamuchita vichi para ŵaheni ŵazakaparanyika?
Para ŵaheni ŵazakaparanyika, Yesu wazamulamulira nga Themba kwa vyaka 1,000. Pa nyengo iyi, Yesu na ŵa 144,000 ŵazamovwira ŵanthu pa charu chapasi kuti ŵazakaŵe ŵakufikapo na ŵambura kwananga. Para vyaka 1,000 vyajumpha, charu chose chizamuŵa paradiso ndipo ŵanthu wose ŵazamuŵa ŵakukondwa na kupulikira Yehova. Kufuma apo, Yesu wazamuwezgera Ufumu kwa Adada ŵake, Yehova. Apa ndipo zina la Yehova ‘lizamutuŵiskika’ nadi. (Mateyu 6:9, 10) Tizamujiwonera tekha kuti Yehova ndiyo wakulamulira makora, ndipo wakupwelelera nadi ŵanthu ŵake. Kufuma apo, Yehova wazamuparanya Satana na viŵanda vyake kweniso ŵanthu wose awo ŵakugalukira Ufumu wake. (Chivumbuzi 20:7-10) Vinthu viwemi ivyo Ufumu wa Chiuta uzamuchita vizamukhalilira kwamuyirayira.
MANYANI VINANDI
Wonani chifukwa icho tikugomezgera kuti Ufumu wa Chiuta uzamufiska malayizgo ghose agho ghali mu Baibolo.
4. Ufumu wa Chiuta uzamumazga maboma gha ŵanthu
“Munthu wakuwusa munyake na kumupweteka.” (Mupharazgi 8:9) Yehova wazamugwiliskira ntchito Ufumu wake kuti wazakamazge vinthu vyambura urunji ivi.
Ŵazgani Daniyeli 2:44 na 2 Ŵatesalonika 1:6-8, kufuma apo dumbiskanani mafumbo agha:
Kasi Yehova na Mwana wake Yesu, ŵazamuchita vichi na maboma gha ŵanthu kweniso wose awo ŵakughalondezga?
Kasi ivyo mwasambira vyakukhwaskana na Yehova na Yesu, vyamovwirani wuli kumanya kuti ŵazamuchita vinthu mwaurunji?
5. Yesu ni Fumu yiwemi chomene
Pakuŵa Fumu ya Ufumu wa Chiuta, Yesu wazamuchitira ŵanthu vinthu viwemi chomene pa charu chapasi. Wonelerani VIDIYO iyo yikulongora kuti Yesu wakukhumba nadi kovwira ŵanthu, kweniso kuti Chiuta wali kumupa nkhongono zakusinthira vinthu.
Apo wakaŵa pa charu chapasi, Yesu wakalongora ivyo Ufumu wa Chiuta uzamuchita. Kasi ni vinthu wuli ivyo mwawona mu vidiyo, ivyo mukukhumba kuti vizakafiskike? Ŵazgani malemba ghakulondezgapo agha, agho ghakutovwira kumanya vinandi vyakukhwaskana na vitumbiko ivi.
APO WAKAŴA PA CHARU CHAPASI, YESU . . .
KUFUMA KUCHANYA, YESU . . .
wakaŵa na mazaza pa chilengiwa.—Mariko 4:36-41.
wazamumazga masuzgo agho ŵanthu ŵakukumana nagho.—Yesaya 35:1, 2.
wakalyeska ŵanthu ŵanandi mwa munthondwe.—Mateyu 14:17-21.
wazamumazga njara.—Salimo 72:16.
wakachizganga ŵalwari. —Luka 18:35-43.
wazamuwoneseska kuti ŵanthu wose ŵali na umoyo uwemi.—Yesaya 33:24.
wakawuska ŵakufwa.—Luka 8:49-55.
wazamumazga nyifwa.—Chivumbuzi 21:3, 4.
6. Ufumu wa Chiuta uzamuchita vinthu viwemi chomene
Ufumu wa Chiuta uzamufiska khumbo la Yehova ku ŵanthu. Ŵanthu ŵazamukhala kwamuyirayira mu paradiso pa charu chapasi. Wonelerani VIDIYO kuti muwone umo Yehova wazamufiskira khumbo lake kwizira mwa Mwana wake Yesu.
Ŵazgani Salimo 145:16, kufuma apo dumbiskanani fumbo ili:
Kasi mukujipulika wuli kumanya kuti Yehova ‘wazamukhorweska chamoyo chose’?
IVYO ŴANYAKE ŴAKUYOWOYA: “Usange tose tingakolerana, tingamazga masuzgo mu charu.”
Kasi Ufumu wa Chiuta uzamumazga masuzgo wuli agho maboma gha ŵanthu ghangamazga yayi?
MWAKUDUMURA
Ufumu wa Chiuta uzamufiska vyose ivyo Chiuta wakukhumba. Uzamuzgora charu chapasi kuŵa paradiso ndipo charu chose chizamuzura na ŵanthu ŵawemi awo ŵazamusopa Yehova kwamuyirayira.
Kuweleramo
Kasi Ufumu wa Chiuta uzamutuŵiska wuli zina lake?
Chifukwa wuli tikugomezga kuti Ufumu wa Chiuta uzamufiska ivyo Baibolo likulayizga?
Kasi imwe mukukhumba kuti Ufumu wa Chiuta uzakachite vichi?
SANGANI FUNDO ZAKUSAZGIKIRA
Manyani ng’anamuro la Aramagedoni.
“Kasi Nkhondo ya Aramagedoni Ni Vichi?” (Nkhani ya pa Intaneti)
Manyani vinthu ivyo vizamuchitika pa “suzgo yikuru” iyo Yesu wakayowoya.—Mateyu 24:21
Wonani ivyo mabanja ghangachita kuti ghaghanaghanirenge umo umoyo uzamuŵira mu Ufumu wa Chiuta.
Ŵerengani nkhani ya mutu wakuti “Nkhajifumbanga Mafumbo Ghanandi,” kuti mumanye umo munthu uyo wakagalukira boma wakasangira vinthu ivyo wakakhumbanga.
“Baibolo Likusintha Umoyo wa Ŵanthu” (Gongwe la Mulinda, Janyuwale 1, 2012)
-