Mu Baibolo Muli Uthenga Wakufuma kwa Chiuta

Yehova watipa Baibolo ilo ntchawanangwa chapadera chomene. Mu Baibolo muli mabuku ghachokoghachoko 66. Kweni panji mungajifumba kuti: ‘Kasi Baibolo likaŵako wuli? Kasi mweneko ninjani?’ Kuti tizgore mafumbo agha, tiyeni tidumbiskane umo uthenga wa mu Baibolo ukalembekera.

1. Usange ŵanthu ndiwo ŵakalemba Baibolo, chifukwa wuli tikuti ndakufuma kwa Chiuta?

Baibolo likalembeka na ŵanthu 40, ndipo likatora vyaka pafupifupi 1,600 kuti lilembeke. Buku lakwamba likalembeka vyaka 3500 ivyo vyajumpha, ndipo buku laumaliro likalembeka vyaka pafupifupi 1900 ivyo vyajumpha. Awo ŵakalemba Baibolo ŵakakulira mu malo na nyengo zakupambana, kweni ivyo ŵakalemba vikukolerana. Kasi ivi vikachitika wuli? Chifukwa Chiuta ndiyo ni Mweneko wa Baibolo. (Ŵazgani 1 Ŵatesalonika 2:13.) Awo ŵakalemba Baibolo, ŵakalemba maghanoghano ghawo yayi. Kweni “ŵakayowoyanga vyakufuma kwa Chiuta pakulongozgeka na mzimu utuŵa.”a (2 Petrosi 1:21) Chiuta wakaŵawovwira na mzimu utuŵa kuti ŵalembe maghanoghano ghake.—2 Timote 3:16.

2. Kasi mbanjani ŵangasanga chandulo na Baibolo?

Ŵanthu ŵakufuma mu “fuko lililose, lulimi lulilose, na ŵanthu wose,” ŵangasanga chandulo na uthenga uwemi wa mu Baibolo. (Ŵazgani Chivumbuzi 14:6.) Nakuti Chiuta wawoneseska kuti Baibolo lisangike mu viyowoyero vinandi chomene kuluska buku linyake lililose. Pafupifupi waliyose mazuŵa ghano, wangaŵazga panji kupulikizga uthenga wa mu Baibolo, kwali wakukhala nkhu, panji wakuyowoya chiyowoyero wuli.

3. Kasi Yehova wavikilira wuli Baibolo?

Baibolo likalembeka pa vinthu ivyo vikakaŵanga yayi kunangika, nga ni vikumba na malukwa. Kweni kuti lilutilire kusangika, ŵanthu awo ŵakatemwanga Baibolo ŵakalikoperanga na kulembaso pa mipukutu yiphya. Nangauli ŵamazaza ŵanyake na ŵalara ŵa visopa ŵakayezgayezga kuti Baibolo lileke kusangika, kweni ŵanthu ŵanyake ŵakaŵika umoyo wawo pangozi kuti ŵalivikilire. Yehova wandazomerezge munthu panji chinthu chilichose kumutondeska kuyowoya nase. Baibolo likuti: “Mazgu gha Chiuta withu ghakukhalilira muyirayira.”—Yesaya 40:8.

MANYANI VINANDI

4. Baibolo likutiphalira uyo ni Mweneko

Wonelerani VIDIYO. Kufuma apo ŵazgani 2 Timote 3:16, na kudumbiskana mafumbo agha.

VIDIYO: Kasi Baibolo Ni Mazgu gha Njani?—Yakudumura (2:48)

• Usange ŵanthu ndiwo ŵakalemba Baibolo, chifukwa wuli pera likuchemeka Mazgu gha Chiuta?

• Kasi mukugomezga kuti awo ŵakalembanga Baibolo ŵakalembanga nadi maghanoghano gha Chiuta?

5. Baibolo lapona ku vinandi

VIDIYO: Ŵakachindikanga Chomene Baibolo—Yakudumura (William Tyndale) (6:17)

• Pakuti mwamanya ivyo vikachitika kuti Baibolo livikilirike, kasi mungatemwa kuliŵazga? Chifukwa wuli?

Ŵazgani Salimo 119:97, kufuma apo dumbiskanani fumbo ili:

• Chifukwa wuli ŵanthu ŵanandi ŵakaŵika umoyo wawo pangozi kuti ŵang’anamure Baibolo na kugaŵizga?

6. Buku la ŵanthu wose

Baibolo ni buku ilo likusangika mu viyowoyero vinandi chomene kuluska buku lililose. Ŵazgani Milimo 10:34, 35, kufuma apo dumbiskanani mafumbo agha:

• Chifukwa wuli Chiuta wakukhumba kuti Mazgu ghake ghang’anamulike mu viyowoyero vinandi?

• Kasi imwe ntchivichi chikumukondweskani na Baibolo?

MWAKUDUMURA

Baibolo ni Mazgu gha Chiuta, ndipo wawoneseska kuti lisangike na ŵanthu wose.

Kuweleramo

• Kasi tikung’anamura vichi para tikuti Chiuta ndiyo wakawovwira ŵanthu kuti ŵalembe Baibolo?

• Kasi ntchivichi chikumukondweskani para mukuwona umo Baibolo laponera, lang’anamulikira kweniso kuthandazgikira?

• Kasi fundo yakuti Chiuta wakukhumba kuti muyowoyeskanenge nayo, yamupangiskani kuti mumuwonenge wuli Chiuta?

SANGANI FUNDO ZAKUSAZGIKIRA

Ŵazgani kuti mumanye umo ŵanthu ŵakang’anamulira Baibolo kufuma ku chiyowoyero chakale kuya mu chiyowoyero chasono.

“Baibolo Lapona ku Vinandi” (Wukani!, Novembala 2007)

Wonani umo Baibolo laponera ku vinthu vitatu.

“Baibolo Lapona ku Vinandi” (Gongwe la Mulinda Na. 4 2016)

Wonani umo ŵanthu ŵanyake ŵakaŵikira umoyo wawo pangozi kuti ŵang’anamure Baibolo.

Ŵakachindikanga Chomene Baibolo (14:26)

Baibolo lang’anamurika nyengo zinandi chomene. Kasi mungagomezga wuli kuti awo ŵakang’anamuranga Baibolo ŵakasintha yayi uthenga wake?

“Kasi Baibolo Lili Kusinthika?” (Nkhani ya pa Intaneti)