SAMBIRO 47
Kasi Mwanozgeka Kubatizika?
Kufuma apo mukambira kusambira Baibolo, mukwenera kuti mwamanya vinthu vinandi vyakukhwaskana na Yehova. Nakuti panji mwasintha vinthu vinyake kuti muchite ivyo Baibolo likuyowoya. Kweni panji pali vinthu vinyake ivyo vikumutondeskani kuti mujipeleke kwa Yehova na kubatizika. Mu sambiro ili, tidumbiskanenge vinthu vinyake ivyo vingamutondeskani kuti mubatizike kweniso umo mungavitondera.
1. Kasi mukwenera kumanya vinthu vinandi wuli kuti mubatizike?
Kuti mubatizike mukwenera kuwumanya “makora unenesko.” (1 Timote 2:4) Ichi chikung’anamura kuti mukwenera kumanya dankha mazgoro gha mafumbo ghose gha mu Baibolo yayi. Nanga Mbakhristu awo ŵali kubatizika kale chomene ŵachali kusambira. (Ŵakolose 1:9, 10) Kweni mukwenera kupulikiska visambizgo vyakwambilira vya mu Baibolo. Ŵalara ŵamovwiraninge kuti mumanye usange mukuvipulikiska makora visambizgo vyakwambilira vya mu Baibolo.
2. Kasi ni vinthu wuli vinyake ivyo mukwenera kuchita pambere mundabatizike?
Pambere mundabatizike, mukwenera ‘kung’anamuka mtima na kuwelera.’ (Ŵazgani Milimo 3:19.) Ichi chikung’anamura kuti mukwenera kujinyumwa chifukwa cha zakwananga izo mukachita kumasinda na kupempha Yehova kuti wamugowokerani. Mukweneraso kuŵikapo mtima kukana nkharo ziheni, na kulutilira kuchita vinthu ivyo vikukondweska Chiuta. Mukwenera kuwungana na mpingo kweniso kuŵa mupharazgi wambura kubatizika.
3. Chifukwa wuli mukwenera yayi kopa kubatizika?
Ŵanyake ŵakopa kuti ŵangazakatondeka kufiska ivyo ŵakalayizga Yehova. Mbunenesko kuti nyengo zinyake muzamubudiska vinthu vinyake. Nakuti Baibolo likuzunura ŵanalume na ŵanakazi ŵanyake ŵakugomezgeka awo nawo ŵakabudiskanga vinthu vinyake. Kweniso Yehova wakukhazga kuti ŵateŵeti ŵake ŵachitenge vinthu nkhanira ndendende umo iyo wakukhumbira yayi. (Ŵazgani Salimo 103:13, 14.) Yehova wakukondwa chomene para tikuyezgayezga kuchita ivyo tingafiska! Iyo wamovwiraninge. Nakuti Yehova wakutisimikizgira kuti palije icho ‘chitipaturenge ku chitemwa chake.’—Ŵazgani Ŵaroma 8:38, 39.
MANYANI VINANDI
Wonani ivyo mungachita kuti mutonde masuzgo agho ghangamutondeskani kubatizika, na kumumanya makora Yehova kweniso kuzomera wovwiri wake.
4. Mumanyani makora Yehova
Kasi mukwenera kumanya vinthu wuli vyakukhwaskana na Yehova pambere mundabatizike? Mukwenera kumumanya makora, kumutemwa na kuchita vinthu ivyo vikumukondweska. Wonelerani VIDIYO kuti muwone ivyo ŵasambiri ŵa Baibolo pa charu chose ŵakuchita kuti ŵamumanye makora Yehova na kumukondweska. Kufuma apo dumbiskanani fumbo ili.
Kuyana na ivyo mwawona mu vidiyo, kasi ntchivichi chikawovwira ŵanyake kuti ŵabatizike?
Ŵazgani Ŵaroma 12:2, kufuma apo dumbiskanani mafumbo agha:
Kasi mukukayikira ivyo Baibolo likuyowoya panji ivyo Ŵakaboni ŵa Yehova ŵakusambizga?
Usange mukukayikira, kasi mungachita wuli?
5. Tondani viyezgo kuti mubatizike
Para munthu wakukhumba kujipeleka na kubatizika, wakusangana na masuzgo ghakupambanapambana. Kuti muwone ghanyake mwa masuzgo agho ŵanthu ŵakusangana nagho, wonelerani VIDIYO, kufuma apo dumbiskanani mafumbo agha.
Kuyana na ivyo mwawona mu vidiyo, kasi ni masuzgo wuli agho Narangerel wakeneranga kutonda kuti wateŵetere Yehova?
Kasi kutemwa Yehova kukamovwira wuli kuti watonde masuzgo agha?
Ŵazgani Zintharika 29:25 na 2 Timote 1:7, kufuma apo dumbiskanani fumbo ili:
Kasi ntchivichi chikutipa chikanga kuti titonde masuzgo?
6. Gomezgani wovwiri wa Yehova
Yehova wamovwiraninge kuti muchite vinthu ivyo vikumukondweska. Wonelerani VIDIYO, kufuma apo dumbiskanani mafumbo agha.
Kuyana na ivyo mwawona mu vidiyo, kasi ntchivichi chikatondeskanga msambiri kuti wabatizike?
Kasi ntchivichi chikamovwira kuti wagomezgenge chomene Yehova?
Ŵazgani Yesaya 41:10, 13, kufuma apo dumbiskanani fumbo ili:
Chifukwa wuli mukugomezga kuti mungafiska ivyo mukalayizga apo mukajipelekanga kwa Yehova?
7. Muwongani Yehova chifukwa chakuti wakumutemwani
Mumuwongenge chomene Yehova para mukughanaghanirapo za chitemwa icho wamulongorani ndipo mumuteŵeterenge kwamuyirayira. Ŵazgani Salimo 40:5, kufuma apo dumbiskanani fumbo ili:
Kasi Yehova wamupani vyawanangwa wuli ivyo mukukondwa navyo chomene?
Ntchimi Yeremiya yikatemwanga chomene Yehova na mazgu ghake, ndipo yikawonganga chomene kuti yikaŵa na mwaŵi wakuchitira ukaboni zina la Chiuta. Iyo yikati: “Mazgu ghinu ghakazgoka kwa ine chimwemwe na kusekelera mu mtima wane, pakuti nkhuchemeka na zina linu, A Yehova Chiuta.” (Yeremiya 15:16) Zgorani mafumbo agha:
Chifukwa wuli ni mwaŵi wapadera chomene kuŵa yumoza wa Ŵakaboni ŵa Yehova?
Kasi mukukhumba kubatizika na kuŵa yumoza wa Ŵakaboni ŵa Yehova?
Kasi chilipo icho chikumutondeskani kuti mubatizike?
Kasi mukughanaghana kuti mungachita vichi kuti mufiske chilato chinu cha kubatizika?
IVYO ŴANYAKE ŴAKUYOWOYA: “Nkhopa kubatizika chifukwa nkhuwona kuti ningafiska yayi kuchita vyose ivyo ningalayizga Yehova.”
Kasi ndimo namwe mukujipulikira?
MWAKUDUMURA
Yehova wangamovwirani kuti mutonde masuzgo ghose agho ghakumutondeskani kubatizika.
Kuweleramo
Kasi mukwenera kumanya vichi vya mu Baibolo kuti mubatizike?
Kasi ni vinthu wuli ivyo mukwenera kusintha pambere mundabatizike?
Chifukwa wuli mukwenera yayi kuchita wofi kubatizika?
SANGANI FUNDO ZAKUSAZGIKIRA
Manyani chifukwa icho mukwenera kubatizikira.
“Kasi Ndimwe Ŵakunozgeka Kubatizika?” (Gongwe la Mulinda, Malichi 2020)
Manyani ivyo mungachita kuti mutonde masuzgo agho ghangamutondeskani kubatizika.
“Ntchivichi Chikunitondeska Kubatizika?” (Gongwe la Mulinda, Malichi 2019)
Wonani ivyo mwanalume munyake wakachita kuti watonde masuzgo agho ghakamutondeskanga kubatizika.
Pakwamba, Ataa wakachitanga wofi kubatizika. Wonani ivyo vikamukhorweska kuti wabatizike.