Mugomezgekenge mu Vinthu Vyose

Waliyose wakukhumba kuŵa paubwezi na ŵanthu ŵakugomezgeka. Yehova nayo wakukhumba kuti ŵabwezi ŵake ŵaŵenge ŵakugomezgeka. Kweni ntchipusu yayi kuchita nthena, chifukwa ŵanthu ŵanandi mu charu ichi mbambura kugomezgeka. Kasi tikusanga vitumbiko wuli para tikugomezgeka mu vinthu vyose?

1. Chifukwa wuli tikwenera kugomezgeka?

Para tikugomezgeka ku ŵanyithu, tikulongora kuti tikutemwa Yehova kweniso kumuchindika. Ghanaghanirani waka fundo iyi: Yehova wakumanya chilichose icho tikughanaghana na kuchita. (Ŵahebere 4:13) Iyo wakumanya para tagomezgeka ndipo wakukondwa chomene. Baibolo likuti: “Yehova wakuseluka nayo munthu muryarya, kweni wakuŵa mubwezi wa ŵakunyoloka.”—Zintharika 3:32.

2. Kasi tingalongora wuli kugomezgeka nyengo zose?

Yehova wakukhumba kuti tiyowoyenge “unenesko kwa yumoza na munyake.” (Zekariya 8:16, 17) Kasi ichi chikung’anamura vichi? Apa fundo njakuti, tikwenera yayi kuyowoya utesi panji kubendezga nkhani para tikuyowoya na ŵa mu banja lithu, ŵabali na ŵadumbu, ŵanyithu ku ntchito, kweniso ŵalara ŵa boma. Ŵanthu ŵakugomezgeka ŵakwiba yayi panji kulyera ŵanyawo masuku pa mutu. (Ŵazgani Zintharika 24:28 na Ŵaefeso 4:28.) Ndipo ŵakuyezeska kupeleka misonkho yose. (Ŵaroma 13:5-7) Para tikuchita nthena ndikuti tikuŵa “ŵakugomezgeka mu vinthu vyose.”—Ŵahebere 13:18.

3. Kasi tikusanga vitumbiko wuli para tikugomezgeka mu vinthu vyose?

Ŵanyithu ŵakutigomezga chomene para tikumanyikwa kuti ndise ŵakugomezgeka. Tikovwiraso ŵabali na ŵadumbu mu mpingo kuti ŵakoleranenge kweniso kuti ŵaŵenge ŵakuvikilirika. Tikuŵa na njuŵi yituŵa. Kugomezgeka kukovwiraso kuti titozge “chisambizgo cha Chiuta, Mponoski withu,” ndipo ŵanthu ŵanandi ŵakwamba kusopa Yehova.—Tito 2:10.

MANYANI VINANDI

4. Tikukondweska Yehova para tikugomezgeka

Ŵazgani Salimo 44:21 na Malaki 3:16, kufuma apo dumbiskanani mafumbo agha:

• Chifukwa wuli ntchambura mahara kugomezga kuti tingabisa vyose ivyo tikuchita?

• Kasi mukuwona kuti Yehova wakujipulika wuli para mukuyowoya unenesko nyengo zose nangauli nyengo zinyake chingaŵa chakusuzga kuchita nthena?

5. Mugomezgekenge nyengo zose

VIDIYO: Ivyo Vingatovwira Kuti Tiŵe na Chimwemwe—Njuŵi Yituŵa (2:32)

Ŵazgani Ŵahebere 13:18, kufuma apo dumbiskanani umo tingalongolera kugomezgeka . . .

• mu banja.

• ku ntchito panji ku sukulu.

• mu vyakuchita vinyake.

6. Tikutumbikika para tikugomezgeka

Nyengo zinyake tinganjira mu masuzgo chifukwa cha kugomezgeka. Kweni unenesko ngwakuti kugomezgeka ndiko nkhwakuzirwa chomene. Ŵazgani Salimo 34:12-16, kufuma apo dumbiskanani fumbo ili:

• Kasi kugomezgeka kungamovwirani wuli?

1. Nthengwa yikukhora chomene para mfumu na muwoli mbakugomezgeka

2. Mabwana ghakutigomezga chomene para ndise ŵakugomezgeka

3. Tikuŵa na mbiri yiwemi para tikugomezgeka ku ŵalara ŵa boma

MWAKUDUMURA

Yehova wakukhumba kuti ŵabwezi ŵake ŵaŵenge ŵakugomezgeka mu ivyo ŵakuyowoya na kuchita.

Kuweleramo

• Kasi ni nthowa wuli zinyake izo tingalongolera kugomezgeka?

• Chifukwa wuli ntchambura mahara kughanaghana kuti tingabisa vyose ivyo tachita?

• Chifukwa wuli mukukhumba kugomezgeka nyengo zose?

SANGANI FUNDO ZAKUSAZGIKIRA

Kasi ŵapapi ŵangasambizga wuli ŵana ŵawo kuti ŵayowoyenge unenesko nyengo zose?

Yowoyani Unenesko (1:44)

Kasi pakuŵa uwemi wuli para mukufiska ivyo mwalayizga?

Lutilirani Kusunga Malayizgo gha Chiuta Ndipo Wamutumbikaninge (9:09)

Wonani chifukwa icho tikwenera kupelekera msonkho nanga vingaŵa kuti ndalama izo tikupeleka ŵakuzigwiliskira makora yayi ntchito.

“Kasi Mukwenera Kupeleka Msonkho?” (Gongwe la Mulinda, Seputembala 1, 2011)

Kasi ntchivichi chikawovwira mwanalume munyake uyo wakaŵa mukhuluku kuti wambe kugomezgeka?

“Nkhasambira Kuti Yehova Ngwalusungu Kweniso Wakugowokera” (Gongwe la Mulinda, Meyi 1, 2015)