Para Ŵakhristu Ŵakupeteka nga Ni Tirigu
APO YESU wakaŵa pafupi kufwa, wakacenjezga ŵasambiri ŵake kuti: “Ehena Satana wali kumubangani imwe, mwakuti wamupetani nga ndi trigu.” (Luka 22:31) Kasi pakuyowoya mazgu agha wakang’anamurangaci?
Mu nyengo ya Yesu, mulimo wa kuvuna tirigu ukakhumbikwiranga nyengo yinandi ndiposo kufwilirapo. Pakwamba, ŵakuvuna ŵakeneranga kusenga tirigu na kumuwunjika pamoza. Para ŵacita nthena, ŵakeneranga kumupwantha. Nyengo zinyake ŵakagwiliskiranga nchito viŵeto kuti viguze cakupwanthira. Kupwantha kukawovwiranga kuti tirigu walekane na visasuni ndiposo mwelero. Pamasinda ŵakapetangako mwelero ku tirigu. Tirigu wakawiranga apo ŵakapwanthiranga, ndipo mwelero ukawulukanga na mphepo. Paumaliro ŵakamupetangaso makoramakora kuti ŵawuskeko tuviswaswa.
Mwakuyana na ivyo Yesu wakayowoya, Satana wakawukira ŵasambiri ŵa Yesu. Mazuŵa ghano napo wakutiwukira. (Efe. 6:11) Mbunenesko kuti ni masuzgo ghose yayi agho tikukumana nagho agho ghakufuma kwa Satana. (Muph. 9:11) Ndipouli, Satana wakukhumbisiska kugwiliskira nchito nthowa yiliyose iyo wangasanga kuti watitondeske kugomezgeka kwa Yehova. Mwaciyelezgero, wangapangiska kuti titemwenge comene vinthu vyakuthupi, kutemwa vyakusanguluska vyaukazuzi, panji kuti ticitenge uzaghali. Wangagwiliskiraso nchito awo tikusambira nawo sukulu panji awo tikugwira nawo nchito ndiposo ŵabali ŵithu awo tikupambana nawo vigomezgo kuti ŵatikoselezge kuti tilimbikirenge vinthu vyacaru vyakukhwaskana na sukulu panji nchito. Wangapangiskaso kuti titambuzgike mwakuti tileke kugomezgeka kwa Ciuta. Kweni pali nthowa zinyake zinandi izo wangatipetera.
Kasi tingacita wuli kuti timikane na mulwani wankhongono uyu? Tingamutonda, kweni na nkhongono zithu yayi. Satana wali na nkhongono zinandi kujumpha zithu, ndipouli, tikumanya kuti Yehova wali na nkhongono zinandi comene kuluska Satana. Usange tikugomezga comene Yehova, kumulomba mwakufumira pasi pa mtima kuti watipe vinjeru ndiposo cikanga kuti tizizipizge, kulondezga ulongozgi uwo wakutipa, wazamutikhozga kuti titonde Satana.—Sal. 25:4, 5.
Para tikuyezgeka, tikwenera kumanya “kupatula uwemi na uheni,” ndiposo kukana kupuluskika na mauryarya gha Satana. (Heb. 5:13, 14) Yehova wangatovwira kuti ticite nthena. Mwambura kupwelerako ivyo vingacitika, tikwenera kuskepelera ku ico nchiwemi. Usange na cigomezgo cose tingalondezga ulongozgi wa Yehova, mwambura kukayika wazamutovwira kuti tiskepelere pa ico nchiwemi.—Efe. 6:10.
Satana wangayezgayezga kutipeta nga ni tirigu. Kweni mu nkhongono ya Yehova, tingimikana nayo, na kuŵa na cipulikano cakukhora. (1 Pet. 5:9) Mazgu gha Yehova ghakutisimikizgira, kuti: ‘Yimikanani na Satana, ndipo wati wamucimbirani.’—Yak. 4:7.