Mafumbo Ghakufumira ku Ŵaŵazgi

Yesu wakapharazga mu caru cose ca Israyeli. Kweni nchifukwa wuli mpositole Petrosi wakayowoya kuti, Ŵayuda na ŵawusi ŵawo ‘ŵakacitira mu ulemwa’ apo ŵakalomba kuti Yesu wakomeke?—Mil. 3:17.

Pakuyowoya na Ŵayuda za nyifwa ya Mesiya, mpositole Petrosi wakati: “Nkhumanya kuti mukacitira mu ulemwa, nga ni umo ŵawusi ŵinu nawo ŵakacitira.” (Mil. 3:14-17) Ŵayuda ŵanji ŵakwenera kuti ŵakamumanya makora yayi Yesu ndiposo kupulikiska visambizgo vyake. Kweni ŵanji ŵakaŵa ŵalemwa mwauzimu cifukwa ca sankho, bina, thinkho ndiposo kuŵavya khumbo la kukondweska Ciuta.

Wonani umo ŵanandi ŵakawoneranga cisambizgo ca Yesu cifukwa ca kuŵavya khumbo la kukondweska Yehova. Kanandi Yesu wakasambizganga mu ntharika, izo wakazilongosoranga ku wose awo ŵakakhumbanga kusambira vinandi. Kweni ŵanji ŵa iwo ŵakafumangapo waka, kwambura kufumba kuti ŵapulikiske. Nyengo yinyake ŵanji ŵa ŵasambiri ŵakakhuŵara na mazgu agho Yesu wakayowoya. (Yoh. 6:52-66) Ŵanthu aŵa, ŵakatondeka kumanya kuti ntharika za Yesu zikaŵayezganga usange ŵakaŵa ŵakunozgeka kusintha kaghanaghaniro kawo ndiposo vyakucita. (Yes. 6:9, 10; 44:18; Mat. 13:10-15) Kweniso ŵakasulako ucimi uwo ukayowoya kuti Mesiya wazamuyowoya ntharika mu kusambizga kwake.—Sal. 78:2.

Ŵanji ŵakakana visambizgo vya Yesu cifukwa ca sankho. Apo Yesu wakasambizganga mu sunagoge lakwake ku Nazarete, ŵanthu “ŵakazizikika.” Kweni m’malo mwakuti ŵazomere kuti Yesu ni Mesiya, ŵakamba kufumba za mukoka wake, ŵakati: “Kasi munthu uyu wali kuvitora nkhu vinthu ivi? . . . Asi uyu ni misiri wa mathabwa mwana wa Mariya kweniso mukuru wa Yakobe na Yosefe na Yudasi na Simoni? Ndipo ŵadumbu ŵake, asi ŵali pano pamoza na ise?” (Mrk. 6:1-3) Ŵanthu ŵa ku Nazarete ŵakawonanga visambizgo vya Yesu kuŵa vyawakawaka cifukwa ŵakamanyanga mbumba iyo wakakuliramo.

Kasi ŵalongozgi ŵa cisopa ŵakacita wuli? Ŵanandi ŵakaŵikako mahara viŵi yayi kwa Yesu pa vifukwa vyakuyana waka. (Yoh. 7:47-52) Kweniso ŵakakana cisambizgo cake cifukwa ca kucita bina na Yesu, uyo ŵanthu ŵakamutemwanga comene. (Mrk. 15:10) Ndipo ŵanandi awo ŵakaŵa ŵakumanyikwa ŵakwenera kuti ŵakakwiya comene apo wakaŵasuska cifukwa ca upusikizgi wawo. (Mat. 23:13-36) Yesu wakacita makora kuŵasuska cifukwa ca ulemwa wawo wakucita kukhumba, wakati: “Soka kwa imwe ŵakumanya Dango, cifukwa mukawuskako cijuliro ca kumanya; imwe mwaŵene mukanjiramo cara [mu Ufumu], ndipo awo ŵakanjiranga mukaŵajandizga!”—Luka 11:37-52.

Kwa vilimika vitatu na hafu, Yesu wakapharazga makani ghawemi mu caru. Kweniso wakasambizga ŵanandi kuti ŵacitenge mulimo uwu. (Luka 9:1, 2; 10:1, 16, 17) Yesu na ŵasambiri ŵake ŵakapharazga makora comene mwakuti Ŵafarisi ŵakadandawura kuti: “Wonani! Caru camulondezga.” (Yoh. 12:19) Ntheura fundo iyi yikulongora kuti Ŵayuda ŵanandi ŵakaŵa ŵambura kumanya kanthu yayi. Ndipouli, ŵakalutilira “mu ulemwa” pakuyowoya za Yesu kuti ni Mesiya. Ŵakaŵa na mwaŵi wa kumanya vinandi ndiposo kutemwa Mesiya, kweni ŵakawutaya waka. Ŵanji ŵakawovwira kuti Yesu wakomeke. Ntheura mpositole Petrosi wakaciska ŵanandi kuti: “Ntheura, perani ndipo muwelere mwakuti zakwananga zinu zisisitike, kuti nyengo zakusamphuska zize kufuma ku cisko ca Yehova ndiposo kuti watume Khristu uyo wakimikika cifukwa ca imwe, ndiyo Yesu.” (Mil. 3:19, 20) Vikuwoneka kuti Ŵayuda vikwi vinandi ŵakamba kuŵikako mahara, kusazgapo “mzinda wa ŵasofi.” Kuti ŵakacitaso mu ulemwa yayi. Kweni ŵakapera ndipo ŵakamba kutemweka na Yehova.—Mil. 2:41; 4:4; 5:14; 6:7.