Mbuto ya Unenesko Yathandazgika mu Vigaŵa vya ku Mizi

CARU ca Tuva cili kumwera kwa caru ca Siberia ndipo kumwera ca kuvuma kwa caru ca Tuva kuli caru ca Mongolia. Ŵanthu ŵanandi mu caru ca Tuva ŵakukhala ku vigaŵa vya ku mizi, uko nkhwakusuzga kufikako na uthenga wa Ufumu. Ndipouli, kumasinda uku, ŵanthu ŵakufuma mu vigaŵa vyakupambanapambana vya ku mizi ŵakaluta ku msumba ukuru wa caru ici uwo ukucemeka Kyzyl mwakuti ŵakaŵepo pa masambiro agho boma likanozga. Maria uyo ni mupayiniya mu msumba wa Kyzyl wakasangirapo mwaŵi kupharazgira ŵanthu aŵa makani ghawemi.

Maria wakalongosora umo vikaŵira, wakati: “Sukulu iyo nkhasambizganga yikanozga kuti tizakadumbirane umo tingamazgira suzgo la uloŵevu, kumwa munkhwala wakutimbanizga wongo, na minkhwala yinyake iyo njakukanizgika. Ndipo ŵanthu pafupifupi 50 ŵakiza kufuma mu vigaŵa vya ku mizi. Pakaŵa ŵasambizgi, ŵanthu awo ŵakumanya na kusanda umo ŵanthu ŵakughanaghanira, awo ŵakuwona vya umoyo wa ŵana ndiposo ŵanji.” Kwa Maria, uwu ukaŵa mwaŵi uwemi wakuti waŵapharazgire, kweniso cikaŵa cakusuzga kwa iyo kuti wacite ntheura. Wakalongosora kuti: “Mwakawiro nili wasoni, cikuŵa cakusuzga kwa ine kupharazga mwamwaŵi. Ndipouli, nkhalomba kwa Yehova kuti wanikhwimiske mwakuti niŵapharazgire.” Kasi wakakhwima mtima?

Maria wakati: “Nkhasanga Galamukani! iyo mukaŵa nkhani iyo yikalongosoranga za wofi (phobias). ‘Nkhaghanaghana kuti nkhani iyi ŵazamuyitemwa awo ŵakusanda umo munthu wakughanaghanira,’ ntheura nkhaluta nayo ku sukulu. Zuŵa ilo, yumoza wa ŵasambizgi awo ŵakaŵapo pa ungano uwu wakiza mu ofesi yane. Nkhamupa magazini yira ndipo wakakondwa comene. Nakuti, wakayowoya kuti nayo wakaŵa na suzgo iyi. Macero ghake, nkhamupa buku la Achichepere Akufunsa—Mayankho Amene Amathandiza. Buku ili nalo wakapoka ndipo wakakondwa nalo. Cifukwa cakuti wakapoka buku ili, nkhaŵa na cigomezgo kuti ŵasambizgi ŵanyake nawo ŵalikhumbenge. Ntheura nkhatora katoni yakuzura na mabuku agha, magazini ndiposo maburosha na kuluta nayo ku sukulu.” Pakatora nyengo yayi, ghose ghakamara. Maria wakalongosora ivyo vikacitika, wakati: “Ŵanyawo ŵa ŵasambizgi awo nkhaŵagaŵira mabuku agha, ŵakiza ku ofesi yane na kufumba kuti: ‘Kasi ni nkhu uko ŵakugaŵira mabuku agha?’” Ŵakiza kwa Maria, uyo wakagaŵiranga mabuku agha.

Zuŵa laumaliro la masambiro agha likaŵa la Cisulo. Pa zuŵa ili, Maria wakaŵapo yayi, ntheura wakaŵika mabuku ghara pa mathebulu mu ofesi yake. Ndipo wakalemba pa notisi bolodi kuti: “Ŵasambizgi Ŵakutemweka. Mungatora mabuku, magazini na maburosha agha, mungatoleraso ŵabwezi ŵinu. Ghamovwiraninge kuti musambizgenge makora ndiposo kuti mukhozge mbumba zinu.” Nchivici cikacitika pamanyuma pake? “Zuŵa lira nkhaluta ku ofesi yane, ndipo nkhasanga kuti ŵatora mabuku, magazini na maburosha ghanandi. Ntheura, nkhakatoraso mabuku na magazini ghanyake.” Peneapo masambiro agha ghakamaranga, Maria wakaŵa kuti wagaŵira magazini 380, mabuku 173 na maburosha 34. Apo ŵanthu aŵa ŵakaweleranga kukwawo, ŵakaluta na magazini, maburosha ndiposo mabuku agha. Maria wakati: “Nili wakukondwa comene cifukwa mbuto ya unenesko yili kufika ku vigaŵa vya ku mizi mu caru ca Tuva.”—Muph. 11:6.

[Mapu pa peji 32]

(Mu magazini yakusindikizga ndimo vikuwoneka makora)

RUSSIA

CARU CA TUVA