Kusanga Usambazi Wakubisika

KASI muli kusangapo cinthu cinyake cakuzirwa pa malo agho mukaghanaghaniranga yayi? Ivi ndivyo vikacitikira Ivo Laud pa Malici 27, 2005, uyo njumoza wa Ŵakaboni ŵa Yehova ku Estonia. Wakawovwiranga mudumbu Alma Vardja kubwangandura nyumba yake yakale. Apo ŵakabwanganduranga ciliŵa cinyake, ŵakawona thabwa ilo likakhomeka ku lwande linyake la mzati. Ŵati ŵawuskapo thabwa, ŵakasanga kuti pali mphako ya masentimita 10 mu usani, mamita 1.2 mu utali, masentimita 10 kunjira mukati, yeneiyo yikabenekelereka na mathabwa. (1) Mu mphako iyi ŵakabisamo usambazi wakuzirwa comene. Usambazi wuli? Ni njani wakabisamo?

Ŵakasangamo mapaketi ghanandi agho ghakavungika mwaluso comene na mapepara. (2) Mu mapaketi agha mukaŵa mabuku gha Ŵakaboni ŵa Yehova, comenecomene nkhani zakusambira pa mpingo zakufuma mu Gongwe la Mulinda ndiposo zinyake za mu 1947. (3) Nkhani izi zikalembeka pa mawoko, mu Ciestoniya. Mu mapaketi agha mukaŵaso vinthu ivyo vingawovwira kumanya uyo wakabisa usambazi uwu. Mukalembeka vinthu ivyo ŵapolisi ŵakafumbanga Villem Vardja, mfumu wa Alma ndiposo vilimika ivyo wakakhalira mu jere. Cifukwa wuli ŵakamuponya mu jere?

Villem Vardja wakaŵa na milimo yinandi pakati pa Ŵakaboni ŵa Yehova mu mpingo wa Tartu ndipo pamasinda wakateŵetera mu mpingo wa Otepää, mu caru ca Estonia. Wakwenera kuti wakasambira unenesko pambere Nkhondo Yaciŵiri ya Caru cose yindacitike. Vilimika vicoko waka vikati vyajumphapo, pa Disembala 24, 1948, boma la Cikomunizimu likakaka Mbali Vardja cifukwa ca mulimo wa cisopa uwo wakacitanga. Wakafumbika ndiposo kuyuzgika na ŵapolisi ŵacisisi, mwakuti waphare mazina gha ŵakaboni ŵanyake. Ŵati ŵamukanira kuti mulandu wake ukeruzgikire ku khoti, ŵakamuphalira kuti wakakhale mu jere vilimika 10, mu caru ca Russia.

Villem Vardja wakalutilira kugomezgeka kwa Yehova mpaka apo wakafwira pa Malici 6, 1990. Muwoli wake wakamanyanga yayi kuti mu nyumba yawo mukaŵa malo ghanyake apo pakabisikanga mabuku. Panji wakakhumbanga kuvikilira muwoli wake ku ŵapolisi awo ŵakakhumbanga kumanya za mabuku agha. Cifukwa wuli wakabisanga mabuku agha? Wakaghabisanga cifukwa wakamanyanga kuti nyengo yiliyose kungiza ŵapolisi ŵa KGB awo ŵakanjiranga mwamabuci mu nyumba za Ŵakaboni ŵa Yehova na kupenjerezga mabuku ghithu. Mbali Vardja wakwenera kuti wakabisanga mabuku mwakuti ŵabali ŵake ŵaŵenge na cakurya cauzimu para ŵa KGB ŵangaphanga ghanyake. Mabuku ghanyake agho ghakabisika ghakasangika mu cihanya, mu cilimika ca 1990. Ghanyakeso ghakasangika ku Tartu, kumwera kwa caru ca Estonia. Agha nagho wakabisa ni Villem Vardja.

Cifukwa wuli tikuyowoya kuti vinthu ivi mbusambazi? Cifukwa nchakuti vikalembeka pa mawoko mwakupwelelera comene kulongora kuti Ŵakaboni ŵakazirwiskanga comene cakurya cauzimu ico ŵakaryanga pa nyengo iyo. (Mat. 24:45) Kasi namwe mukuwonga Yehova cifukwa ca cakurya cauzimu ico mukurya sono kwizira mu mpingo winu? Gongwe la Mulinda ndimoza mwa vyakurya ivyo vikusangika mu Ciestoniya ndiposo mu viyowoyero vinyake vyakujumpha 170.