Kasi Mukateŵeterapo? Kasi Mungateŵeteraso?
KASI mukateŵeterapo nga ni mulara panji muteŵeti wakovwira pa mpingo? Panji mukacitapo cigaŵa cinyake ca uteŵeti wa nyengo zose. Mwambura kukayika mukasangwanga ndiposo kukhorwa na uteŵeti winu. Kweni pa vifukwa vinyake mukaleka kuteŵetera.
Mutepanji mukaleka kuteŵetera mwakuti mupwelelere ŵa mu mbumba yinu. Nyengo zinyake mukaleka cifukwa ca ucekuru panji ulwari. Usange mukaleka kuteŵetera pa vifukwa ivi, cikung’anamura kuti ndimwe ŵakutondeka yayi. (1 Tim. 5:8) Mu nyengo ya Ŵakhristu ŵakwambilira, Filipu wakaŵa mishonale kweni pamasinda wakaleka na kuyakakhala ku Kesareya, uko wakapweleleranga mbumba yake. (Mil. 21:8, 9) Themba Davide likati lacekura, likanozga kuti mwana wake Solomoni wahalire uthemba. (1 Mathe. 1:1, 32-35) Nangauli Filipu na Davide ŵakaleka kucita milimo iyo ŵakacitanga, Yehova wakalutilira kuŵatemwa ndipo ŵacali kucindikika mpaka sono.
Vingacitika kuti ŵakamulekeskani kucita mulimo uwo mukacitanga. Kasi cikaŵa cifukwa cakuti mukacita cinthu cinyake cambura kwenelera? Panji cikaŵa cifukwa ca masuzgo gha mu mbumba yinu? (1 Tim. 3:2, 4, 10, 12) Mutepanji mukakondwa yayi cifukwa cakuti ŵakamulekeskani, ndipo mucali kukonthora.
Munganwekera Kuti Mwambeso Kuteŵetera
Kasi munthu wangambaso kucita uteŵeti uwo wakaleka? Enya, kweni ni nyengo zose yayi. Kuti mwambeso kuteŵetera, mukwenera kunwekera. (1 Tim. 3:1) Kweni cifukwa wuli mukukhumbaso kuteŵetera? Kasi nchifukwa cakuti mukutemwa Yehova ndiposo ŵanthu awo ŵakumuteŵetera, nga umo vikaŵira pakudanga apo mukajipeleka kwa iyo? Usange mukukhumbisiska nadi kulongora citemwa ici mwa kuteŵeteraso, Yehova wazomerenge kuti mugwiliskire nchito ivyo mukasambira apo mukateŵeteranga ndiposo ivyo mwasambira pa nyengo iyo mukaleka.
Kumbukani ivyo Yehova wakaphalira Ŵaisrayeli ŵati ŵaleka kumuteŵetera. Mazgu ghake ghakuti: ‘Ine Yehova kuti nkhuzgoka cara; ntheura imwe, ŵana ŵa Yakobe, mulije kumara.’ (Mal. 3:6) Yehova wakatemwanga Ŵaisrayeli, ndipo wakakhumbanga kuti ŵamuteŵeterenge. Wakukhumbaso kuti namwe mumuteŵeterenge. Kasi mungacitaci panyengo yasono? Kuteŵetera Yehova kukuthemba pa kuŵa na umoyo uwemi wauzimu, kuti maluso yayi. Ntheura, pakuti pasono mulije milimo yakusazgikira mu mpingo, fwiliranipo kukhozga umoyo winu wauzimu.
Kuti “muŵe ŵankhongono” mu cipulikano, mukwenera ‘kupenja Yehova na nkhongono zake.’ (1 Kor. 16:13; Sal. 105:4) Kulomba mwakufumira pasi pa mtima ni nthowa yimoza iyo mungapenjera Yehova ndiposo nkhongono zake. Muphalirani Yehova umo vinthu vilili ndiposo umo mukujipulikira na kulomba mzimu wake. Kucita nthena kumovwiraninge kuti musendelere kwa iyo, ndiposo kuti muŵe ŵakukhora. (Sal. 62:8; Fil. 4:6, 13) Nthowa yinyake iyo mungakhozgera umoyo winu wauzimu nkhusambira Mazgu ghake mwakufwilirapo. Pakuti panyengo yasono muli na milimo yicoko, mungacita vinandi nga ni sambiro la mwaŵene ndiposo la mbumba, mutepanji mungacita vinthu ivyo kale mukatondekanga.
Nakuti mucali yumoza wa Ŵakaboni ŵa Yehova. (Yes. 43:10-12) Ndipo waliyose wa ise wali na mwaŵi wapadera comene wa kuŵa yumoza wa “ŵalimi ŵamoza na Ciuta.” (1 Kor. 3:9) Kucita vinandi mu uteŵeti wa m’munda ni nthowa yakuzirwa yakukhozgera ubwezi winu na Yehova ndiposo na awo mukupharazgira lumoza.
Ghanaghanani Mwamahara
Kutaya mwaŵi wa kuteŵetera kungapangiska kuti muŵe ŵasoni panji ŵakudandawura. Mungamba kujirunjiska. Wuli usange mukaŵaphalira vya kusingo kwinu ŵabali awo ŵali na mulimo wa ulaŵiliri kweni ŵakawona kuti mukaŵa ŵakwenelera yayi kulutilira kucita mulimo uwo muli kuleka? Mungamba kuŵaghanaghanira viheni, ndipo vingamujandizgani kunwekeraso milimo panji kupangiska kuti cimuŵirani cinonono kusambira ku ivyo vikacitika. Tiyeni tiwone umo ivyo vikacitikira Yobu, Manase na Yosefe vingatovwilira kuti tiŵe na maghanoghano ghakwenelera.
Yobu wakimiranga ŵanji kwa Yehova, wakaŵa mulara ndiposo mweruzgi. (Job 1:5; 29:7-17, 21-25) Panyengo iyo vinthu vikamwenderanga makora, wakataya ŵana ŵake ndiposo usambazi wake. Padera pa ivi, lumbiri lwake lukanangika. Yobu wakati: “Awo ŵalije kufika ku msinkhu wane ŵakundiseka.”—Job 30:1.
Yobu wakawonanga kuti palije ico wakananga ndipo wakakhumbanga kujirunjiska pamaso pa Ciuta. (Job 13:15) Kweni Yobu wakalindilira mwakunweka kuti Yehova wacitepo kanthu, ndipo nadi vikamovwira. Wakasambira kuti wakakhumbikwiranga nadi kusintha kaghanaghaniro kake, comenecomene umo wakawoneranga viyezgo ivyo wakakumana navyo. (Job 40:6-8; 42:3, 6) Kweni cifukwa cakuti Yobu wakaŵa wakujiyuyura, Ciuta wakamuwezgera kaŵiri pa ivyo wakaŵa navyo.—Job 42:10-13.
Usange muli kuleka kucita uteŵeti unyake cifukwa cakuti mukacita cinthu cinyake cambura kwenelera, panji mungaghanaghana kuti Yehova ndiposo ŵabali ŵangaluwa yayi ivyo mukacita nesi kumugowokerani. Wonani ciyelezgero ca Manase, Themba la Yuda. Baibolo likuti “wakacita uheni unandi pamaso pa Yehova, kumusosomolera iye ku ukali.” (2 Mathe. 21:6) Kweni wakasintha ndipo wakaŵa wakugomezgeka mpaka nyifwa. Vikaŵa wuli kuti waŵe wakugomezgeka mpaka nyifwa?
Paumaliro Manase wakazomera ulongozgi. Wati wakana nchenjezgo, Yehova wakamupeleka ku Ŵaasiriya, awo ŵakamukaka na kumutumizga ku cigaŵa ca kutali ca Babuloni. Apo wakaŵa ku malo agha, Manase ‘wakaŵeyelera Yehova Ciuta wake, na kujiyuyura comene pamaso pa Ciuta wa ŵasekuru ŵake. Wakalombanga kwa Iye.’ Cifukwa ca kupera kufumira pasi pa mtima, wakasintha ndipo wakagowokereka.—2 Mid. 33:12, 13.
Vikucitika kamoza na kamoza yayi kuti munthu wambeso kucita uteŵeti uwo wakacitanga pakudankha. Kweni para pajumpha nyengo mungamba kupika milimo yinyake yicokoyicoko. Kuzomera milimo iyi ndiposo kuyicita na mtima wose kungajura nthowa ya milimo yinyake yikuruyikuru. Fundo iyi kuti yikung’anamura kuti nchipusu kwambaso kucita uteŵeti uwo mukaleka yayi. Pangaŵa vinthu vinyake ivyo vingamuwezgerani nyuma. Ndipouli, vinthu vingamwenderani makora usange mungaŵikapo mtima.
Wonani ivyo vikacitikira Yosefe, mwana wa Yakobe. Apo wakaŵa na vilimika 17, ŵakuru ŵake ŵakamuguliska. (Gen. 37:2, 26-28) Wakaghanaghananga kuti ŵakuru ŵake ŵangamucitira nthena yayi. Kweni wakazizipizga ivyo vikacitika, ndipo cifukwa cakuti Yehova wakamutumbika “wakakhalanga mu nyumba ya sekuru wake.” (Gen. 39:2) Pamasinda Yosefe wakaponyeka mu jere. Kweni wakalutilira kuŵa wakugomezgeka, ndipo Yehova wakaŵa nayo, mwakuti wakapika mazaza gha kulaŵilira ivyo vikacitikanga mu jere.—Gen. 39:21-23.
Yosefe wakamanyanga yayi kuti vyose ivyo vikamucitikiranga vikaŵa na cilato. Wakalutilira kucita ivyo wakafiska. Kwizira mu ivyo vikamucitikira, Yehova wakaponoska mbumba iyo kunthazi mukafuma mphapu yakulayizgika. (Gen. 3:15; 45:5-8) Nangauli palije uyo wangacita vinthu ndendende nga ni umo wakacitira Yosefe, kweni nkhani za mu Baibolo zikulongora kuti Yehova ndiyo wakuŵikapo woko kuti ŵateŵeti ŵake ŵapike milimo yakusazgikira. Fwatukani kucita nga umo Yosefe wakacitira.
Sambirani pa Ivyo Vikacitika
Yobu, Manase na Yosefe ŵakakumana na masuzgo. Nakuti ŵanji ŵakeneranga nadi kusuzgika cifukwa ca ivyo ŵakacita. Wose ŵatatu ŵakasambirapo kanthu pa ivyo Yehova wakazomerezga kuti viŵacitikire. Kasi imwe mukusambirapo vici?
Wonani ivyo Yehova wakukhumba kuti musambire. Cifukwa ca kuhangayika, Yobu wakaleka kupulikira vya ŵanyake ndipo wakaŵikako mahara yayi ku fundo zakuzirwa. Cifukwa ca kupulikira ulongozgi wacitemwa wa Yehova, wakasintha na kuzomerezga kuti, ‘wakayowoya ivyo wakawura kuvipulikiska.’ (Job 42:3) Usange mukudandawura cifukwa cakuti muli kuleka kucita uteŵeti unyake, ‘lekani kujighanaghanira mwakujumphizga kuluska umo mukwenera kughanaghanira; kweni mughanaghanenge mwakuti muŵe na maghanoghano ghakwenelera.’ (Rom. 12:3) Yehova wangaŵa kuti wakumusambizgani mu nthowa iyo imwe mundayipulikiske mwakuti musinthe.
Pokelerani cilango. Pakwamba Manase wakwenera kuti wakawonanga kuti wakeneranga yayi kucenyeka. Kweni wakazomera na kupera, ndipo wakaleka nthowa zake ziheni. Mwambura kupwelelerako za cilango ico mukapokera, “jiyuyurani pamaso pa Yehova, ndipo iyo wamukwezganinge.”—Yak. 4:10; 1 Pet. 5:6; Yak. 4:10.
Ŵani ŵakuzika mu mtima na ŵakukhumbisiska kusambizgika. Ivyo vikacitikira Yosefe mphanyi vikamupangiska kuti wawezgere panji kutinkha ŵabali ŵake. M’malo mwake wakacita vinthu mwamahara ndiposo mwalusungu. (Gen. 50:15-21) Usange muli kukhuŵara na ivyo vikacitika, ŵani ŵakuzika mu mtima. Ŵani ŵakukhumbisiska kusambizgika na Yehova.
Kasi mukateŵeterapo nga ni mulara panji muteŵeti wakovwira mu mpingo? Panji mukacitapo cigaŵa cinyake ca uteŵeti wa nyengo zose. Zomerezgani kuti Yehova wamupani milimo yakusazgikira munthazi. Khozgani umoyo winu wauzimu. Ŵani ŵakuzika ndiposo ŵakujiyuyura. Citani na mtima wose milimo yiliyose iyo mungapika. Manyani kuti Yehova “wakuŵanora kanthu kawemi cara awo ŵakwenda mwakukongora [mwakunyoloka].”—Sal. 84:11.
[Mazgu Ghakukhozgera pa peji 30]
Kuti muŵe ŵankhongono mu cipulikano mulombenge kufumira pasi pa mtima
[Cithuzithuzi pa peji 31]
Kucita vinandi mu uteŵeti wa m’munda ni nthowa yakuzirwa yakukhozgera umoyo winu wauzimu
[Cithuzithuzi pa peji 32]
Zomerezgani kuti Yehova wamupani milimo yakusazgikira munthazi