Mafumbo Ghakufumira ku Ŵaŵazgi

Kasi tikusambiraci pa Zintharika 24:27?

Pa nkhani yakukhwaskana na kupeleka ulongozgi kwa munyamata, uyo wakalemba buku la Zintharika wakati: “Nozga makora mulimo wako kuwaro, uvinozge vyose vyaku munda ndipo pamanyuma uzenge nyumba yako.” Kasi pa lemba ili tikusambirapo fundo wuli? Fundo njakuti munyamata wakwenera kunozgekera makora pambere wandatore, cifukwa ca kughanaghanira milimo iyo waŵenge nayo para watora.

Kumanyuma uku, vesi ili nyengo zinyake likalongosorekanga kuti mfumu panji dada wakwenera kugwira nchito zakuthupi pera yayi, kweni wakweneraso kukhozga na kuciska mbumba yake mwauzimu. Nangauli fundo iyi njaunenesko ndiposo njakukolerana na Malemba, kweni kuti ndico nchilato ca vesi ili yayi. Cifukwa wuli? Ghanaghanirani vifukwa viŵiri ivi.

Cakwamba, vesi ili kuti likuyowoya za kukhozga mbumba iyo yilipo kale yayi. M’malo mwake, nkhani nja kuzenga nyumba. Lizgu lakuti ‘kuzenga’ lingaŵa na ng’anamuro linyake para likuyowoya za kuzenga mbumba, panji kuti kutora na kuŵa na ŵana.

Caciŵiri, vesi ili likudidimizga fundo ya kucita vinthu mu ndondomeko yiwemi. Mwantheura, kasi uyo wakalemba buku la Zintharika, wakang’anamuranga kuti tikwenera kufiska dankha nchito zakuthupi ndipo ticitenge vyauzimu? Yayi.

Kale, usange munyamata wakukhumba ‘kuzenga nyumba’ panji kuti kutora, wakeneranga kujifumba kuti, ‘Kasi nili wakunozgeka kupwelelera mwanakazi kweniso ŵana awo tingababa?’ Pambere wandatore, wakeneranga kugwira dankha nchito, kupwelelera munda wake panji vyakurya. Ndico cifukwa mu Baibolo la Today’s English Version, vesi ili lili kulembeka kuti: ‘Kuzenga dankha nyumba na kukhazikiska cikaya yayi mpaka apo vya m’munda wako vicirenge na kukhorwa kuti vili makora.’ Kasi ulongozgi uwu ucali kugwira nchito?

Enya. Munthu uyo wakukhumba kutora wakwenera kunozgekera makora milimo iyo munthu wakutora wakwenera kucita. Usange wangafiska, wakwenera kugwira nchito. Kweni wakwenera kulimbikira kupwelelera mbumba yake mwakuthupi pera yayi. Mazgu gha Ciuta ghakuyowoya kuti munthu uyo wakuleka kupwelelera ŵa mu nyumba yake mwakuthupi ndiposo mwauzimu ni muheni kuluska wambura cipulikano. (1 Tim. 5:8) Ntheura, pakunozgekera nthengwa, munyamata wakwenera kujifumba mafumbo agha: ‘Kasi nili wakunozgeka nadi kupwelelera mbumba mwakuthupi? Kasi nili wakunozgeka mwauzimu kuŵa mutu wa mbumba? Kasi nizamufiska kusambira Baibolo nyengo zose na muwoli wane ndiposo ŵana?’ Mazgu gha Ciuta ghakudidimizga comene pa milimo yakuzirwa iyi.—Dute. 6:6-8; Efe. 6:4.

Mwantheura, munyamata uyo wakukhumba kutora wakwenera kughanaghanirapo mwamahara pa ulongozgi uwo ukusangika pa Zintharika 24:27. Mwakuyana waka, mwanakazi wangacita makora kujifumba usange ngwakunozgeka kucita ivyo muwoli wakwenera kucita kusazgapo kulera ŵana. Awo ŵatorana waka nawo ŵangajifumba mafumbo ghakuyana waka para ŵakughanaghanira za kuŵa na ŵana. (Luka 14:28) Kulondezga ulongozgi wakupelekeka na mzimu uwu, kungawovwira ŵanthu ŵa Ciuta kuŵambara masuzgo mwakuti ŵakondwenge na umoyo wa mbumba.

[Mazgu Ghakukhozgera pa peji 12]

Ni mafumbo wuli ghakukhwaskana na nthengwa agho munyamata wakwenera kujifumba?