Kasi Mukuwonga Nadi Vitumbiko Ivyo Muli Navyo?

ŴAISRAYELI ŵakati ŵawombokwa mwamunthondwe ku wuzga mu caru ca Eguputo, ŵakakondwa comene kuti ŵamwamba kusopa Yehova mwawanangwa. (Ex. 14:29–15:1, 20, 21) Ndipouli, nyengo yicoko waka yikati yajumphapo, ŵakasintha maghanoghano. Ŵakamba kunyunyuta. Cifukwa wuli? Ŵakamba kwenjerwa comene na masuzgo agho ŵakakumananga nagho mu mapopa, m’malo mwa kughanaghanira ivyo Yehova wakaŵacitira. Ŵakaphalira Mozesi kuti: “Kasi mwatifumiskiraci mu [Eguputo] kuti tifwire mu mapopa? Pakuti palije cingwa nanga ndi maji wuwo, ndipo mtima withu wavuka naco cingwa ici cipepefu [mana].”—Maŵa. 21:5.

Vilimika vikati vyajumphapo, Themba Davide likimba kuti: “Kweni ine ndagomekezga lusungu lwinu; mtima wane tiusekelere mu ciponosko cinu. Tindimwimbire Yehova, cifukwa wandicitira kwawanangwa.” (Sal. 13:5, 6) Davide wakaluwa yayi milimo ya lusungu ya Yehova. Ndipo nyengo zose wakaghanaghaniranga ivyo Yehova wakamucitira. (Sal. 103:2) Nase Yehova watitumbika, ndipo tingacita makora kuleka kuwona mwakupepuka ivyo waticitira. Ipo tiyeni tisande vitumbiko vinyake ivyo tikusangwa navyo.

“Yehova Ndi Bwezi” Lithu

Wamasalmo wakimba kuti: “Yehova ndi bwezi la awo ŵakumopa.” (Sal. 25:14) Ni mwaŵi ukuru comene kuti taŵanthu ŵambura kufikapo tiŵe paubwezi na Yehova. Kweni, wuli usange tikutangwanika comene na vinthu vinyake mwakuti tikusoŵa na nyengo yakulombera? Para tikucita nthena, kasi ubwezi withu na Yehova uŵenge wuli? Pakuti Yehova ni mubwezi withu, wakukhumba kuti timugomezgenge ndipo para tikulomba timuphalirenge vyakusingo kwithu, ivyo tikufipa navyo mtima, ivyo tikukhumba, ndiposo ivyo tikwenjerwa navyo. (Zinth. 3:5, 6; Fil. 4:6, 7) Kasi cingaŵa cakwenelera yayi kusanda malurombo ghithu?

Apo Paul wakasandanga malurombo ghake, wakawona kuti wakukhumbikwira kusintha vinthu vinyake pakulomba.a Wakati: “Nkhaŵa na cizgoŵi ca kuwerezgawerezga mazgu pakulomba.” Paul wakapenjerezga fundo zinyake pa nkhani ya lurombo mu mabuku ghithu ndipo wakasanga kuti mu Baibolo muli malurombo pafupifupi 180. Mu malurombo agha, ŵateŵeti ŵa Yehova ŵakayowoyanga umo ŵakajipulikiranga. Paul wakati: “Nkhati naghanaghanirapo pa malurombo gha mu Malemba agha, nkhawona kuti nkhwenera kulomba mwakudunjika. Kucita nthena kwanovwira kuti niphalirenge Yehova ivyo vili mu mtima wane. Sono nkhukondwa comene cifukwa nkhusendelera kwa Yehova mu lurombo.”

‘Cakurya pa Nyengo Yakwenelera’

Yehova watitumbikaso mwa kutovwira kuti timanye vinandi ivyo Malemba ghakuyowoya. Apo tikusangwa na cakurya cinandi cauzimu ici, mphake nadi ‘kwimba na mitima ya cimwemwe.’ (Yes. 65:13, 14) Ndipouli, tikwenera kucenjera na vinthu vinyake ivyo vingatiwezgera nyuma mwauzimu. Mwaciyelezgero, para tikuŵika mahara ku mautesi gha ŵakugaluka tingatimbanizgika maghanoghano na kwamba kuwona mwakupepuka ‘cakurya ca pa nyengo yakwenelera’ ico Yehova wakupeleka kwizira mwa “muzga wakugomezgeka na wakucenjera.”—Mat. 24:45-47.

André, uyo wateŵetera Yehova kwa vilimika vinandi, wakapuluskikapo na maghanoghano gha ŵakugaluka. Wakaghanaghananga kuti kuwonamo waka patalipatali ivyo ŵakugaluka ŵakuŵika pa Intaneti kulije suzgo lililose. Wakati: “Nkhakopeka na ivyo ŵakugaluka ŵakuti mbunenesko. Apo nkhalutilira kusanda ivyo ŵakugaluka ŵakuyowoya, nkhamba kuwona kuti nacita makora kuleka gulu la Yehova. Kweni nkhati nasanda fundo zinyake izo ŵakugaluka ŵakususka Ŵakaboni ŵa Yehova, nkhamanya kuti ŵasambizgi ŵatesi aŵa mbaryarya comene. Nkhawona kuti ivyo ŵakutisuska comene ŵakucita kwata ŵekha. Ntheura, nkhambaso kuŵazga mabuku ghithu na kuluta ku maungano. Mwaluŵiro nkhawamo kuti nkhapuluskika comene.” Cakukondweska nchakuti André wali kuweleramo mu mpingo.

“Ŵabali Wose”

Yehova watitumbikaso na ubali wakukolerana wa pa caru cose. (Sal. 133:1) Lekani mpositole Petrosi wakalemba kuti: “Muŵe na citemwa pa ŵabali wose mu cipulikano.” (1 Pet. 2:17) Taŵakhristu tikwandula na ŵabali wose awo ŵali nga mbadada, ŵamama, ŵakuru panji ŵanung’una, na ŵadumbu ŵithu.—Mrk. 10:29, 30.

Ndipouli, pangaŵa vinthu vinyake ivyo nyengo zinyake vingacitiska kuti tipambane maghanoghano na ŵabali ndiposo ŵadumbu. Mwaciyelezgero, nchipusu kukhuŵazgika na maubudi gha munyithu na kwamba kumughanaghanira viheni pera. Usange vyaŵa nthena, kasi cingaŵa ciwemi yayi kukumbuka kuti Yehova wakutemwa ŵateŵeti ŵake nangauli ŵakubuda? Nakuti, “usange tikuyowoya kuti: ‘Tilije zakwananga,’ tikujipuluska tekha ndipo unenesko mulije mwa ise.” (1 Yoh. 1:8) Ipo kasi nchakwenelera yayi kuti tilutilire “kuzizipizgirana yumoza na munyake na kugowokerana na mtima wose”?—Kol. 3:13.

Muwukirano munyake, Ann, wakavimyantha dankha kuti wamanye kuzirwa kwa kucezga na Ŵakhristu ŵanyake. Nga ni mwana wakuzgeŵa wa mu ntharika ya Yesu, Ann wakaleka kuwungana na mpingo Wacikhristu. Wakati waghanaghanirapo makora wakaweleraso mu gulu. (Luka 15:11-24) Kasi Ann wakasambirapo vici? Wakati: “Pakuti sono nawelera mu gulu la Yehova, nkhuzirwiska ŵabali na ŵadumbu wose nangauli ŵakubudiska vinthu vinyake. Kale nkhatemwanga kuŵasanga tuvifukwa. Kweni sono nkhukhumba yayi kuti cinthu cinyake cinitondeske kusangwa na Ŵakhristu ŵanyane. Ku caru uku kulije cinthu cakuzirwa kuluska paradiso withu wauzimu.”

Nyengo Zose Muwongenge

Cigomezgo cithu cakuti Ufumu wa Ciuta uzamumazga masuzgo ghose gha ŵanthu mbusambazi wakuzirwa comene uwo tapika. Tikati tamanya waka za cigomezgo ici, mitima yithu yikakondwa comene. Tikajipulika nga ngwamalonda wa mu ntharika ya Yesu uyo “wakaguliska vinthu vyose ivyo wakaŵa navyo” mwakuti wakagule “ngale yimoza ya mtengo wapatali.” (Mat. 13:45, 46) Yesu wakayowoyapo yayi kuti wamalonda uyu nyengo yinyake wakaleka kuyizirwiska ngale iyi. Nase tingalekanga yayi kuzirwiska cigomezgo cithu capadera ici.—1 Tes. 5:8; Heb. 6:19.

Wonani ivyo wakayowoya Jean, uyo wateŵetera Yehova kwa vilimika vyakujumpha 60. Wakati: “Kupharazga kwanovwira kuti nikumbukenge Ufumu wa Ciuta. Nkhukhozgeka comene para nkhuwona ŵanji ŵakukondwa cifukwa cakuti ŵamanya Ufumu. Para msambiri wa Baibolo wakusintha umoyo wake cifukwa ca kumanya Ufumu, nkhwamba kughanaghana kuti: ‘Nili na cinthu cakuzirwa cakuti nigaŵireko ŵanji.’”

Tili na vifukwa viwemi vyakuwongera vinthu vinandi ivyo Yehova waticitira. Nangauli tingasangana na viyezgo nga ulwari, ucekuru, ukavu, kususkika, kusuzgika maghanoghano, ndiposo citima, kweni tikumanya kuti masuzgo agha ngakanyengo waka. Mu Ufumu wa Ciuta tizamusuzgika yayi. Masuzgo ghose agho tikulimbana nagho sono muzamuŵavya mu caru ciphya.—Uvu. 21:4.

Pa nyengo yasono, tiyeni tiwongenge Ciuta cifukwa ca ivyo waticitira, ngwa masalmo uyo wakimba kuti: “A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwelera; palije yumoza wakukozgana na Imwe! Ndighapharazgenge na kuyowoya nagho mphanyi ghawoneka ghambura mapendeka.”—Sal. 40:5.

[Mazgu ghamusi]

[Cithuzithuzi pa peji 18]

Para tikuyezgeka tikovwirika mwauzimu