Sambirani Kufuma mu Mazgu gha Ciuta
Kasi Mungacita Wuli Kuti Muŵe Ŵakukondwa mu Mbumba Yinu?
Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.
1. Cifukwa wuli nthengwa njakukhumbikwa kuti mbumba yiŵe yakukondwa?
Yehova uyo ni Ciuta wakukondwa ndiyo wakambiska nthengwa. Kuti mbumba yiŵe yakukondwa, nthengwa njakukhumbikwa cifukwa yikovwira kuti pa mbumba paŵe citemwa kweniso civikiliro mwakuti ŵana ŵalereke makora. Kasi Ciuta wakuyiwona wuli nthengwa? Wakukhumba kuti mwanalume na mwanakazi ŵalembeskenge nthengwa yawo ndipo ŵangalekananga yayi. (Luka 2:1-5) Ciuta wakukhumba kuti mfumu na muwoli ŵagomezganenge. (Ŵahebere 13:4) Yehova wakuzomerezga kuti mfumu na muwoli ŵapatane pekha para yumoza wacita uleŵi. Para vyaŵa nthena, uyo wandabude ngwakufwatuka kutoraso panji kutengwaso.—Ŵazgani Mateyu 19:3-6, 9.
2. Kasi mfumu na muwoli ŵakwenera kukhala wuli?
Yehova wakalenga ŵanalume na ŵanakazi kuti ŵawovwiranenge mu nthengwa. (Genesis 2:18) Pakuŵa mutu wa mbumba, mfumu wakwenera kusangira mbumba yake vinthu vyakuthupi na kuyisambizga vya Ciuta. Mfumu wakwenera kujinora vinthu vinyake kuti walongore citemwa kwa muwoli wake. Mfumu na muwoli ŵakwenera kutemwana na kucindikana. Kweniso pakuti mfumu na muwoli ŵakwananga, ŵakwenera kusambira kugowokerana. Kugowokerana nkhwakuzirwa comene cifukwa kukovwira kuti ŵakutorana ŵakondwenge mu nthengwa yawo.—Ŵazgani Ŵaefeso 4:31, 32; 5:22-25, 33; 1 Petrosi 3:7.
3. Usange mukukondwa yayi mu nthengwa yinu, kasi mukwenera kulekana na mfumu panji muwoli winu?
Usange imwe na munyinu wa mu nthengwa mukukumana na masuzgo, mukwenera kusambira kucitirana vinthu mwacitemwa. (1 Ŵakorinte 13:4, 5) Mazgu gha Ciuta ghakuzomerezga yayi kuti ŵakutorana ŵapatukanenge para ŵakumana na masuzgo mu nthengwa yawo. Ndipouli, usange vinthu vyasuzga comene, Mkhristu wangawona usange nchakwenelera kupatukana panji yayi.—Ŵazgani 1 Ŵakorinte 7:10-13.
4. Mwaŵana, kasi Ciuta wakukhumba kuti mucitenge wuli?
Yehova wakukhumba kuti mukondwenge. Wakumupani ulongozgi uwemi comene wa umo mungakondwera pa nyengo ya uwukirano winu. Wakukhumba kuti movwirike na vinjeru vya ŵapapi ŵinu ndiposo ivyo ŵakumanya. (Ŵakolose 3:20) Yehova wakuwonga cilicose ico mukucita kuti mupulikire ŵapapi ŵinu.—Ŵazgani Mupharazgi 11:9–12:1; Mateyu 19:13-15; 21:15, 16.
5. Ŵapapi, kasi mungacita vici kuti ŵana ŵinu ŵaŵe ŵakukondwa?
Mukwenera kulimbikira nchito kuti musangire ŵana ŵinu cakurya, malo ghakukhala, na vyakuvwara. (1 Timote 5:8) Kweni kuti ŵana ŵinu ŵaŵe ŵakukondwa, mukweneraso kuŵasambizga kuti ŵatemwenge Ciuta na kusambira kwa iyo. (Ŵaefeso 6:4) Para ŵana ŵinu ŵangamuwonani kuti mukutemwa comene Ciuta, nawo ŵamutemwenge. Usange ulongozgi winu ukufuma mu Mazgu gha Ciuta, ŵana ŵinu ŵacitenge vinthu mu nthowa yiwemi.—Ŵazgani Duteronome 6:4-7; Zintharika 22:6.
Ŵana ŵakukondwa usange mukuŵakhozga na kuŵawonga. Mukweneraso kuŵalanga na kuŵalongozga. Para mukucita nthena, mukuŵawovwira kuti ŵaleke kucita vinthu ivyo vingaŵanjizga mu masuzgo. (Zintharika 22:15) Kweni cilango cileke kuŵa cinonono comene panji cankhaza.—Ŵazgani Ŵakolose 3:21.
Ŵakaboni ŵa Yehova ŵakusindikizga mabuku ghanandi agho ghali kulembeka kuti ghawovwire ŵapapi na ŵana. Mabuku agha ghakulongosora fundo za mu Baibolo.—Ŵazgani Salmo 19:7, 11.
Kuti mumanye vinandi wonani cipaturo 14 ca mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.