Unenesko Ungasintha Umoyo Winu
MUTEPANJI muli kupulikapo panji kusambizgika mautesi ghanyake ghakukhwaskana na Ciuta agho ghalongosoreka mu nkhani zakumanyuma. Kweni panji vingamutolerani nyengo kuti musinthe vigomezgo vinu, comene para mautesi agha ghakhomelera mu mutu winu.
Nchakupulikikwa. Machalichi ghanyake ghakukana kuyaniska visambizgo vyawo na ivyo Baibolo likusambizga. Ŵanyake ŵakukhozgera vinthu vyautesi ivyo ŵakusambizga mwakuyowoya kuti Baibolo ndakusuzga kulipulikiska, nakuti ni waliyose yayi wangalipulikiska. Kweni ŵasambiri ŵanandi ŵa Yesu ŵakaŵa ŵanthu bweka, ŵambura kusambira, ndipo ŵakapulikiskanga ivyo Yesu wakaŵasambizganga.—Milimo 4:13.
Panji mungakhumba yayi kusanda makora ivyo mukugomezga cifukwa ca kopa kuti mungawoneka kuti mulije cipulikano. Pakuti Baibolo ni uthenga uwo Ciuta wapeleka ku ŵanthu, kasi nchakupulikikwa kuti wangakwiya namwe usange mukulisanda mwakuti mupulikiske ivyo wakukhumba kuti mucitenge? Ndimo viliri yayi. Baibolo likumuciskani kuti pamwekha mulisandenge, likuti: “Mupime kwa mwaŵene ico nchiwemi na cakuzomerezgeka na khumbo lakufikapo la Ciuta.”—Ŵaroma 12:2.
Para mungasambira unenesko wakukhwaskana na Ciuta, musambirenge vinthu viphya pera yayi, kweniso umoyo winu uŵenge makora. (Yohane 8:32) Deanne, uyo wazunulika mu nkhani yakwambilira, sono wali na cipulikano mu Mazgu gha Ciuta. Iyo wakuti: “Nkhamanyanga yayi kuti Malemba ngakupulikikwa makora mpaka apo nkhamba kusambira Baibolo. Sono nkhumanya kuti Yehova ngwanadi ndipo ni Dada wane wakucanya uyo wakunitemwa comene. Sono nkhumanya cifukwa ico niliri na umoyo.”
Mutepanji muli kusambirapo Baibolo ndipo mukasanga candulo cilicose yayi. Usange ni nthena, lekani kugongowa. Para mukuyezga kuti mupulikiske Baibolo uku muli kusambizgika mautesi ghakukhwaskana na Ciuta vili nga mukukhumba kumata cithuzithuzi ico cakeruka kweni mukugwiliskira nchito tumapisi twa cithuzithuzi cinyake. Panji mungamata tumapisi tucoko kweni mungaleka waka cifukwa ca kukhuŵara kuti mukusangapo yayi apo mungaŵika mapisi ghanyake. Kweni para mapisi ghose gha cithuzithuzi ico ghalipo, ndipo ngeneghagho nadi, vingamusuzgani yayi kuŵika pisi lililose pamalo ghake.
Kasi mungatemwa kusambira unenesko wakukhwaskana na Ciuta? Tikumupemphani kuti mukumane na Ŵakaboni ŵa Yehova mu cigaŵa cinu panji lemberani ku adiresi yakwenelera pa peji 4 la magazini yino kuti ŵazakasambire namwe Baibolo kwawanangwa.
[Mazgu Ghakukhozgera pa peji 9]
“Mupime kwa mwaŵene ico nchiwemi na cakuzomerezgeka na khumbo lakufikapo la Ciuta.”—ŴAROMA 12:2.