Kufuma mu Nthamba Yithu
Kwendera Lumoza na Ŵateŵeti Ŵakwendakwenda
“NINGAPHARAZGA yayi ku nyumba na nyumba.” Ŵasambiri ŵaphya ŵanandi ŵa Baibolo ŵali kujipulikapo nthena para ŵakughanaghana vya kupharazgira ŵanthu. Ndipouli, mazgu agha wakayowoya ni munthu uyo wakayowoyanga makora nkhani pa wumba ndiposo msambizgi wa Baibolo uyo wakaŵa muteŵeti wakwendakwenda.
Ŵaŵazgi ŵanandi ŵa Zion’s Watch Tower (Gongwe la Mulinda) awo ŵakaleka machalichi ghawo ŵakaŵa ŵakukhumbisiska kuwungana na ŵanthu awo ŵakatemwanga unenesko wa mu Baibolo. Magazini iyi yikaciska ŵaŵazgi kuti ŵapenje ŵanji awo ŵali na cipulikano cakuyana na cawo ndipo ŵawunganenge nyengo zose kuti ŵasambirenge Baibolo. Kwambira waka ca mu 1894, Watch Tower Society yikatumizganga ŵimiliri ŵake ŵakwendakwenda kuti ŵakakumane na magulu agho ghapempha kuti ŵaghayendere. Ŵanalume ŵakumanya vinthu kweniso ŵakulimbikira mulimo aŵa, ŵakasolekanga cifukwa ŵakaŵa ŵakuzika, ŵakamanyanga Baibolo, ndiposo ŵakayowoyanga makora nkhani na kusambizga mwaluso, kweniso ŵakalongoranga kuti ŵali na cipulikano mu sembe yakuwombora. Magulu ŵakaghacezgeranga kwa zuŵa limoza panji ghaŵiri. Ŵasambiri ŵa Baibolo ŵanandi ŵakambanga kuluta mu uteŵeti wa m’munda para ŵakucemera ŵanthu ku nkhani yacisanisani ya muteŵeti wakwendakwenda. Wakati wadumba nkhani yake yacisanisani iyo yikaŵako namise mu sukulu, Hugo Riemer, uyo pamanyuma wakaŵa mu Wupu Wakulongozga, wakazgora mafumbo ghakukhwaskana na Baibolo mpaka usiku pakati. Nangauli wakavuka kweni wakaŵa wakukondwa, ndipo wakayowoya kuti ungano uwu ukaŵa “wakukondweska comene.”
Gongwe la Mulinda likati “cilato cikuru” ca ŵabali ŵakwendakwenda cikaŵa cakuti ŵakhozge “nyumba ya cipulikano” kwizira mu maungano agho ghakacitikiranga mu nyumba za ŵakugomezga. Ŵasambiri ŵa Baibolo ŵa mufupimufupi ŵakizanga ku nkhani na ku cigaŵa ca mafumbo na mazgoro. Pamanyuma ŵakambanga kucezga pakuŵa Ŵakhristu. Apo wakaŵa msungwana, Maude Abbott wakiza kuzakategherezga nkhani ya mulenji, ndipo pamanyuma wose ŵakakhala pa mipando pa thebulu ilo likaŵa pa luŵaza. Iyo wakati: “Pakaŵa vyakurya vinandi kweniso vyakunowa. Nyama ya nkhumba, ya nkhuku, mabuledi na vinyake. Waliyose wakarya umo wangakhumbira, ndipo ca m’ma 2 koloko namise tikawungana kuti titegherezge nkhani yinyake.” Wakasazgirapo kuti: “Pa nyengo iyi waliyose wakakokomeranga waka na tulo.” Benjamin Barton uyo wakaŵa kuti wacita mulimo wa kwendakwenda kwa nyengo yitali wakati: ‘Usange niryenge vyakurya vyose ivyo ŵakanipanga, mphanyi nili kufwa ni kale comene.’ Pamanyuma, kalata yakufuma ku ofesi yithu yikuru ku Brooklyn yikayowoya kuti cingaŵa ciwemi kuti ŵadumbu “ŵaphikirenge” ŵateŵeti ŵakwendakwenda cakurya ico ŵanthu wose ŵakurya na kuŵanozgera “malo ghawemi ghakugona.”
Ŵateŵeti ŵakwendakwenda ŵakaŵa ŵaluso pakusambizga ndipo ŵakagwiliskiranga nchito machati, viyelezgero, panji cilicose ico ŵakaŵa naco mwakuti nkhani iyo ŵakudumba yiŵe yakupulikikwa makora. Nkhani izo wakadumbanga R. H. Barber “nyengo zose zikaŵanga zakukondweska.” W. J. Thorn wakayowoyanga nkhani “nga mbateŵeti ŵakugomezgeka ŵa mu nyengo yakale.” Zuŵa linyake mu galimoto yakucemeka Model A Ford, mubali Shield Toutjian wakacemerezga kuti, ‘yimikani dankha galimoto!’ Wakaduka mu galimoto, na kuphyora maluŵa gha muthondo, ndipo wakasambizga ŵanyake sambiro liwemi lakukhwaskana na cilengiwa ca Yehova.
Mulimo wa kwendakwenda ukaŵa na masuzgo ghanandi, comenecomene kwa awo ŵakaŵa na vyaka 45 panji 65 panji kujumpha apa. Ndipouli, ŵanji ŵakakumana na ciyezgo cikuru apo cilato cikuru ca mulimo wawo cikasinthira. Sono ŵakeneranga kulongozga pa mulimo wa kupharazga ku nyumba na nyumba. Gongwe la Mulinda la Malici 15, 1924, likayowoya kuti “umoza wa milimo yikuru” ya Ŵakhristu ŵaunenesko “nkhupharazga ufumu. Ŵateŵeti ŵakwendakwenda ŵakutumika na cilato ici.”
Nakuti ŵateŵeti ŵakwendakwenda ŵanyake ŵakakwiya cifukwa ca kusintha uku, ndipo ŵakaleka mulimo wa kwendakwenda. Ŵanji ŵakambiska na visopa vyawo wuwo. Robie D. Adkins wakayowoya kuti wakwendakwenda munyake uyo wakayowoyanga makora nkhani wakayowoya mwakukwiya comene, wakati: “Ine nkhumanya kupharazga pa pulatifomu pera. Ningapharazga yayi ku nyumba na nyumba.” Mubali Adkins wakati: “Nkhamuwonaso mubali uyu pa ungano wa cigaŵa wa caka ca 1924 ku Columbus, Ohio. Wakaŵa wacitima comene, wakayimilira payekha pa muthuzi wa kakhuni kanyake, nangauli pakaŵa ŵabali ŵanandi comene ŵakukondwa. Kufuma pa nyengo iyi nindamuwoneposo. Pakajumpha nyengo yitali viŵi yayi ndipo wakalileka gulu la Yehova.” Kweni, “ŵabali ŵanandi ŵakukondwa ŵakajumphanga uku ŵayegha mabuku mu magalimoto ghawo,” kulongora kuti ŵakaŵa ŵakukhumbisiska comene kupharazga ku nyumba na nyumba.—Mil. 20:20, 21.
Nangauli ŵateŵeti ŵanandi ŵakwendakwenda ŵakacitanga wofi na mulimo wa kupharazga ku nyumba na nyumba nga umo ŵakacitiranga awo ŵakaŵenderanga, kweni ŵakapharazganga mwamwamphu. Pakuyowoya za kupharazga ku nyumba na nyumba, muteŵeti wakwendakwenda wa ku German, zina lake Maxwell G. Friend (Freschel), wakalemba kuti: “Mulimo wa kupharazga ku nyumba na nyumba ukupeleka vitumbiko vyakusazgikira.” Muteŵeti wakwendakwenda munyake John A. Bohnet wakayowoya kuti ŵabali ŵakawupokelera na mtima wose mulimo wa kupharazga Ufumu. Mwakuyana na umo iyo wakayowoyera, ŵabali ŵanandi “ŵakaŵa na mwamphu comene ndipo ŵakaŵa ŵakukhumbisiska kuti ŵaciteko mulimo uwu.”
Kwa vyaka vinandi, ŵabali ŵakwendakwenda ŵakugomezgeka ŵawovwira comene ŵabali na ŵadumbu. Norman Larson, Kaboni wa nyengo yitali, wakati: “Nangauli nkhaŵa mwana kweni nkhamanya kuti ŵateŵeti ŵakwendakwenda ŵakucita mulimo wakuzirwa ndiposo wacandulo. Ŵakanovwira comene kuti nicitenge vinthu mwakwenelera.” Mpaka sono, ŵalaŵiliri ŵakwendakwenda ŵakujipeleka ndiposo ŵakugomezgeka aŵa ŵakovwira Ŵakhristu ŵanyawo kuyowoya kuti: “Tingapharazga ku nyumba na nyumba.”
[Mazgu Ghakukhozgera pa peji 32]
Likaŵanga zuŵa lakukondweska para ŵateŵeti ŵakwendakwenda ŵiza kuzakatiyendera
[Cithuzithuzi pa peji 31]
Pa ulendo uwo Benjamin Barton wakenda mu caka ca 1905, wakima pa malo 170
[Cithuzithuzi pa peji 32]
Walter J. Thorn wakaŵa muteŵeti wakwendakwenda uyo wakamanyikwanga kuti Pappy (Mupapi) cifukwa cakuti wakaŵa walusungu, mukhaliro wakuyana na wa Khristu
[Cithuzithuzi pa peji 32]
J. A. Browne ŵakamutuma ku Jamaica kukacita mulimo wa kwendakwenda cadera mu 1902 kuti wakakhozge na kuciska magulu 14 ghacokoghacoko
[Cithuzithuzi pa peji 32]
Mulimo wa ŵateŵeti ŵakwendakwenda ukakhozga cipulikano, ukawovwira kuti umoza wa Ŵakhristu ulutilire, ndipo ukawovwira kuti ŵabali ŵasendelere kufupi comene na gulu