Ŵaŵazgi Ŵithu Ŵakufumba Kuti . . .
Kasi Ŵanakazi Awo Mbakaboni ŵa Yehova Ŵakupharazga?
▪ Enya. Pa caru cose capasi pali ŵanakazi ŵanandi Ŵakaboni ŵa Yehova awo ŵakupharazga. Iwo ni gulu likuru la ŵapharazgi ŵa Makani ghawemi gha Ufumu wa Ciuta. Pa lemba la Salmo 68:11 pali ucimi wakuyowoya za ŵapharazgi aŵa. Lemba ili likuti: ‘Yehova wakulangura dango; wumba wa ŵanakazi awo ŵakuthuwuska makani ngukuru.’
Kweni pali mphambano yikuru comene pakati pa mulimo uwo ŵanakazi awo Mbakaboni ŵa Yehova ŵakucita na wa ŵanakazi awo mbaliska mu visopa. Kasi ukupambana wuli?
Mphambano yili pa ŵanthu awo ŵakuŵapharazgira. Ŵaliska ŵanakazi ŵa mu visopa ŵakuŵa na maudindo mu mpingo ndipo kanandi ŵakupharazgira ŵanthu ŵa mu mpingo wawo. Kweni ŵapharazgi ŵanakazi awo Mbakaboni ŵa Yehova, ŵakupharazga mu mpingo yayi. M’malo mwake ŵakupharazgira ŵanthu awo ŵakusangana nawo para ŵakupharazga ku nyumba na nyumba na kulikose.
Ŵanakazi awo Mbakaboni ŵa Yehova ŵakupambanaso na ŵanakazi ŵavisopa vinyake pa nkhani ya milimo iyo ŵakucita mu mpingo. Ŵapharazgi ŵanakazi ŵa mu machalichi ghanyake ŵakudangilira na kusambizga ŵanthu ŵa mu mpingo wawo. Kweni ŵanakazi awo Mbakaboni ŵa Yehova ŵakusambizga mu mpingo yayi para ŵanalume ŵakubapatizika ŵalipo. Ŵanalume ŵekha awo ŵali kwimikika kuti ŵasambizgenge mu mpingo ndiwo ŵakucita nthena.—1 Timote 3:2; Yakobe 3:1.
Baibolo likulongosora kuti ŵanalume pera ndiwo ŵali na mulimo wakulaŵilira mpingo. Wonani ivyo Paulosi wakayowoya mu kalata iyo wakalembera mulaŵiliri munyake Tito. Wakati: “Pa cifukwa ici nkhakuleka mu Kerete, kuti . . . wimike ŵanalume ŵalara mu msumba na msumba.” Paulosi wakayowoyaso kuti mwanalume waliyose wakwimikika wakwenera kuŵa “wambura kafukwa, mfumu wa muwoli yumoza.” (Tito 1:5, 6) Paulosi wakayowoyaso ulongozgi wakuyana waka mu kalata iyo wakalembera Timote. Wakati: “Usange munthu wakunwekera mulimo wa ulaŵiliri, wakukhumba mulimo uwemi. Mulaŵiliri wakwenera kuŵa wambura kafukwa, mfumu wa muwoli yumoza, . . . wakumanya kusambizga.”—1 Timote 3:1, 2.
Cifukwa wuli ŵanalume pera ndiwo ŵakuzomerezgeka kuŵa ŵalaŵiliri mu mpingo? Paulosi wakati: “Nkhuzomerezga cara kuti mwanakazi wasambizgenge, nesi kuŵa na mazaza pa mwanalume, kweni wakhalenge cisisi. Pakuti Adamu ndiyo wakamba kupangika, ndipo pamanyuma pake, Eva.” (1 Timote 2:12, 13) Ntheura, ndondomeko ya umo Ciuta wakalengera ŵanthu yikulongora cifukwa ico wakapira ŵanalume pera mulimo wa kusambizga na kulaŵilira.
Ŵapharazgi ŵa Yehova ŵakucita nga ni Yesu Khristu Mulongozgi wawo. Luka wakalemba vyakukhwaska na mulimo wa Yesu kuti: “Wakamba kwenda msumba na msumba kweniso muzi na muzi, kupharazga na kuthuwuska makani ghawemi gha ufumu wa Ciuta.” Pamasinda Yesu wakatuma ŵasambiri ŵake kuti ŵakacite mulimo wakuyana waka. Baibolo likuti: “Ŵakenda mu cigaŵa cose muzi na muzi, kupharazga makani ghawemi.”—Luka 8:1; 9:2-6.
Mazuŵa ghano ŵateŵeti ŵa Yehova ŵanalume na ŵanakazi ŵakujipeleka kucita mulimo uwo Yesu wakayowoyerathu kuti: “Makani ghawemi agha gha ufumu, ghazamupharazgika mu caru cose kuti uŵe ukaboni ku mitundu yose; penepapo ndipo umaliro wizenge.”—Mateyu 24:14.
[Cithuzithuzi pa peji 23]