Kucezga na Munthu
Kasi Ciuta Wakulanga Ŵanthu mu Moto wa Helo?
ŴAKABONI ŴA YEHOVA ŵakutemwa kudumbiskana na ŵanthu vya mu Baibolo. Kasi muli na fumbo pa ivyo Baibolo likusambizga? Kasi pali vinthu ivyo Ŵakaboni ŵa Yehova ŵakugomezga, kweni imwe mukuvipulikiska yayi? Usange ni nthena, fumbani yumoza wa Ŵakaboni ŵa Yehova para mwakumana nayo. Wazamukondwa comene kumuzgorani.
Musi umu, muwonenge umo Ŵakaboni ŵa Yehova ŵakuzgolera mafumbo agho ŵanthu ŵakuŵafumba. Titore kuti a Citete, awo Mbakaboni ŵa Yehova, ŵiza ku nyumba ya a Mwale.
Kasi Ciuta Wazamulanga Ŵanthu Ŵaheni?
A Citete: Nakondwa kusanganaso namwe a Mwale.
A Mwale: Nane nakondwa.
A Citete: Nkhaghanaghanirangapo cinthu cinyake ico mukazunura pa nyengo iyo nkhiza kuno.
A Mwale: Nchinthu wuli?
A Citete: Mukaniphalira kuti mukazizwa comene kupulika kuti Ŵakaboni ŵa Yehova ŵakugomezga yayi kuti kuli Gehena wa moto.
A Mwale: Enya, nkhazizikika nadi. Kuyowoya unenesko, nkhupulikiska yayi cifukwa ico mukulekera kugomezga.
A Citete: Nawonga cifukwa ca kuniphalira maghanoghano ghinu. Nyengo zose nkhukondwa kupulika maghanoghano gha ŵanji. Pakuti ŵanthu ŵali na maghanoghano ghakupambana pa nkhani ya Gehena, ntheura ningatemwa kupulika maghanoghano ghinu pa nkhani iyi.
A Mwale: Nyengo zose nkhugomezga kuti ŵanthu ŵaheni para ŵafwa ŵakuluta ku Gehena ndipo ŵakukasuzgika kwa muyirayira.
A Citete: Ŵanthu ŵanandi ndimo ŵakughanaghanira. Kweni nimufumbani kuti, kasi imwe vinthu viheni vili kumucitikiranipo?
A Mwale: Enya. Mudumbu wane wakakomeka vyaka vinkhondi ivyo vyajumpha.
A Citete: Phepani comene. Mukwenera kuti mukumulira comene.
A Mwale: Mbunenesko. Nkhumukumbuka zuŵa lililose.
A Citete: Nkhuwona kuti ŵanthu ŵanandi ŵakugomezga comene kuti kuli moto cifukwa ŵakukhwaskika na ivyo ŵaheni ŵakucita. Nakuti ŵanthu awo ŵakusuzgika kwambura cifukwa ŵakukhumbisiska kuti ŵaheni ŵalangike cifukwa ca ivyo ŵakacita.
A Mwale: Mwaneneska nadi, nkhukhumba kuti munthu uyo wakakoma mudumbu withu wazakalangike.
A Citete: Mwakawiro waliyose wakujipulika nthena. Baibolo likusambizga kuti Ciuta nayo wakukwenyelera para ŵanthu ŵakusuzgika kwambura cifukwa. Ndipo wakulayizga kuti wazamulanga ŵanthu ŵaheni. Wonani ivyo lemba la Yesaya 3:11 likuyowoya. Likuti: “Soka kwa muheni! Tikumuŵire kuheni kwa iye, pakuti ico mawoko ghake ghakacita ndico ticimucitikire.” Ntheura, tingaŵa na cigomezgo cose kuti Ciuta wazamulanga ŵanthu ŵaheni.
A Mwale: Ipo ŵazamulangika wuli pera usange Gehena wa moto kulije?
A Citete: Ilo ni fumbo liwemi. Fundo njakuti Ciuta wazamulanga ŵanthu ŵaheni mwa kuŵaparanyirathu. Wonani ivyo Baibolo likuyowoya pa 2 Ŵatesalonika 1:9. Kasi mungaŵazga?
A Mwale: Enya. Likuti: “Ŵeneaŵa, ŵazamupokera cilango ca pharanyiko lamuyirayira, kufumapo panthazi pa Fumu.”
A Citete: Mwawona, ŵanthu awo ŵeruzgika na Ciuta kuti mbaheni, ŵakulindilira kalikose yayi. Cifukwa Ciuta wakuŵaparanyirathu ndipo ŵazamuŵaso ŵamoyo yayi kunthazi.
A Mwale: Napulika ivyo vesi ili layowoya, kweni uwu mbwe mburunji yayi. Ka waliyose wakufwa. Asi ŵanthu ŵaheni ndiwo ŵakukhumbikwira cilango cikuru comene?
Kasi Urunji Ukung’anamuraci?
A Citete: Nawona kuti ndimwe munthu wakutemwa urunji.
A Mwale: Nkhuwutemwa comene.
A Citete: Ico nchiwemi, cifukwa taŵanthu Ciuta wali kutilenga kuti tipambaniskenge pakati pa ciwemi na ciheni. Nakuti nayo wakutemwa comene urunji. Kweni para ŵalongozgi ŵa visopa ŵakuti Ciuta wakulanga ŵanthu mu Gehena wa moto, ŵakulongora kuti Ciuta ngwambura urunji.
A Mwale: Mukung’anamuraci?
A Citete: Oho! Lekani nimupani ciyelezgero. Kasi nkhani ya Adamu na Eva mukuyimanya makora?
A Mwale: Enya nkhuyimanya. Ciuta wakaŵaphalira kuti ŵaleke kurya cipambi ca khuni linyake, kweni iwo ŵakapulikira yayi.
A Citete: Mwaneneska nadi. Tiyeni tiyiwonere lumoza nkhani iyi mu Baibolo. Yikusangika pa Genesis 2:16, 17. Mavesi agha ghakuti: “Yehova Ciuta wakamulangulira munthu, wakati, ‘Vya makuni ghose gha mu munda uryenge kwawanangwa; kweni vya khuni la kumanyiska uwemi na uheni ungaryanga, cifukwa mu zuŵa leneilo tiuryerengepo, tiufwenge nadi.’” Kasi Ciuta wakati nchivici cimucitikirenge Adamu para warya cipambi cakukanizgika?
A Mwale: Wakati Adamu wafwenge.
A Citete: Mbunenesko. Wonani kuti cifukwa ca kwananga kwa Adamu, ŵanthu wose ŵakubabika ŵakwananga.a Nangauli vikaŵa nthena, kasi Ciuta wakayowoyapo kuti wamulangenge mu moto?
A Mwale: Yayi.
A Citete: Ciuta wamanyenge kuti para Adamu na Eva ŵananga ŵamuphya mu Gehena wa moto kwamuyirayira, asi mphanyi wakaŵacenjezgerathu? Asi kucita nthena mphanyi ukaŵa urunji kweniso citemwa?
A Mwale: Ni nthena nadi.
A Citete: Wonaniso ivyo Ciuta wakaphalira Adamu na Eva ŵati ŵananga. Kasi mungaŵazga Genesis 3:19?
A Mwale: Enya, likuti: “Tiuryenge kurya thukuta pa cisko cako usuke uwelere ku fuvu, cifukwa ukatoleka mwenemumo; ndiwe fuvu, ndipo ku fuvu tiuwelereko.”
A Citete: Nawonga comene. Mwakukolerana na mazgu gha Ciuta, kasi Adamu wakeneranga kuluta nkhu para wafwa?
A Mwale: Ciuta wakati wawelerenge ku fuvu.
A Citete: Mwazgora makora comene. Panji mungazomerezga kuti para munthu wakuwelera ku malo ghanyake ndikuti wakaŵako kale ku malo agho, asi nthe?
A Mwale: Ndimo vikwenera kuŵira.
A Citete: Kasi Adamu wakaŵa nkhu pambere Ciuta wandamulenge?
A Mwale: Kukaŵavya.
A Citete: Mwaneneska. Ndipo muwonenge kuti Baibolo likuyowoyapo yayi kuti Ciuta wakweruzga ŵanthu mu Gehena wa moto. Kasi Ciuta wakatenge wacitenge makora kuphalira Adamu kuti wawelerenge ku dongo uku wakumanya kuti wakuluta ku Gehena wa moto?
A Mwale: Yayi, uwu mphanyi ukaŵa urunji yayi.
Kasi Dyabulosi Wakucita Khumbo la Ciuta?
A Citete: Paliso cinthu cinyake ico tikwenera kughanaghanira ca kukhwaskana na cisambizgo ca Gehena wa moto.
A Mwale: Cinthu wuli?
A Citete: Kasi ŵanandi ŵakuti ni njani wali na “mazaza” pa Gehena wa moto? Ndipo ni njani uyo wakulanga ŵanthu awo ŵali mu Gehena?
A Mwale: Dyabulosi.
A Citete: Kweni Dyabulosi ni mulwani mukuru wa Ciuta. Usange Ciuta wakutuma ŵanthu ku Gehena kuti ŵakayuzgike na Dyabulosi, asi cingang’anamura kuti pa malo ghanyake Dyabulosi na Ciuta ŵakukolerana?
A Mwale: Nindaghanaghanepo ntheura.
A Citete: Kuti tipulikiske makora fundo iyi: Asi imwe ndimwe mupapi?
A Mwale: Enya, nakuti nili na mwana munyamata uyo wali na vyaka 15.
A Citete: Tiyelezgere kuti mwana winu wamugalukirani. Wakucita vinthu viheni vinandi ivyo vikumukwenyerezgani. Kasi mungacita wuli?
A Mwale: Ningayezga kumovwira.
A Citete: Nkhugomezga kuti mungamovwira kanandi waka kuti wasinthe, asi nthe?
A Mwale: Nkhanira kwali!
A Citete: Wuli usange mwayezgera umu na umu kweni wakupulika yayi? Pamasinda panji mungawona kuti palijeso ico mungacita kuluska kumupa cilango.
A Mwale: Enya.
A Citete: Kweni wuli usange mwamanya kuti munthu munyake muheni ndiyo wakasambizganga mwana winu kucita viheni vyose ivi?
A Mwale: Ningamukwiyira munthu uyu.
A Citete: Apa ndipo ningapulikiska fundo yinu. Pamanyuma pakuti mwamanya kuti munthu muheni wananga mwana winu, kasi mungakolerana nayo munthu uyu?
A Mwale: Yayi. Ici cingaŵa cakupulikikwa yayi.
A Citete: Kasi cingaŵa camahara kuti Ciuta watume Satana Dyabulosi kulanga ŵanthu uku ndiyo wakuŵapuluska?
A Mwale: Yayi, cingaŵa camahara ca.
A Citete: Usange Ciuta wakukhumba kuti ŵanthu ŵaheni ŵalangike, cifukwa wuli wangatuma Dyabulosi uyo ni mulwani wake mukuru kuti ndiyo waŵalange?
A Mwale: Nindaghanaghanepo nthena.
Yehova Wazamumazga Uheni Wose
A Citete: Ghanaghanirani fundo iyi: Ciuta wazamucitapo kanthu kuti wamazge uheni wose. Panji tingaŵazgira lumoza lemba la umaliro ili ilo likulongora makora fundo iyi. Lemba ili ni Salmo 37:9. Kasi mungaŵazga?
A Mwale: Palije suzgo. Likuti: “Ŵaheni tiŵadumulikenge; kweni awo ŵakumulindilira Yehova tiŵahare caru.”
A Citete: Nawonga comene. Kasi mwawona ivyo Yehova Ciuta wazamucita na ŵanthu ŵaheni?
A Mwale: Vesi ili likuti Ciuta wazamuparanya ŵaheni.
A Citete: Ndivyo likuyowoya nadi. Mukayowoyero kanyake tingati wazamuŵaparanya kwamuyirayira. Kweni ŵanthu ŵawemi, awo “ŵakumulindilira Yehova” ŵazamusangwa na umoyo pano pasi kwamuyirayira. Nyengo zinyake fundo iyi yingapangiskaso kuti muŵe na mafumbo ghanyake. Mwaciyelezgero, panji mungajifumba kuti kasi Ciuta wakalekeraci kukanizgirathu ŵanthu pakwamba kucita viheni? Kweniso usange wakukhumba nadi kulanga ŵaheni, cifukwa wuli wandaŵalange?
A Mwale: Agha ni mafumbo ghakukondweska nadi.
A Citete: Ningazakamulongorani mazgoro gha mafumbo agha mu Baibolo pa ulendo wakulondezgapo.b
A Mwale: Ningakondwa comene.
[Mazgu ghamusi]
a Wonani lemba la Ŵaroma 5:12.
b Kuti mumanye vinandi wonani cipaturo 11 ca buku lakuti Kasi Baibolo Likusambizgaci Comenecomene? lakupharazgika na Ŵakaboni ŵa Yehova.
[Cithuzithuzi pa peji 12]