Kasi Vingacitika Kuŵa Ŵakugomezgeka mu Caru Cakuzura na Vimbundi?
“Tikukhumba kucita mwakugomezgeka mu vinthu vyose.”—ŴAHEBERE 13:18.
Nangauli kwananga, caru, na Dyabulosi vingaticicizga, kweni tingachintha. Mwawuli? Para tingaŵa paubwezi na Yehova kweniso kucita mwakukolerana na fundo za mu Baibolo izo zawovwira ŵanthu kwa nyengo yitali. Wonani viyelezgero viŵiri ivi.
FUNDO YA MU BAIBOLO: “Lekani kulinganizgika na mgonezi uno.”—Ŵaroma 12:2.
Cakucitika canadi: Guilherme wa ku Brazil, wakucita bizinesi ndipo yikumwendera makora. Iyo wakuzomerezga kuti nchakusuzga kugomezgeka nyengo zose. Wakati: “Nyengo zinyake nchipusu kuti munthu wabizinesi wambe upusikizgi na cilato cakuti wafiske vilato vya kampani panji kuti vinthu vimwendere makora mu caru ca ciphalizgano ici. Ŵanthu ŵanandi ŵakuwona kuti kupeleka na kupokera vimbundi nchiwemi waka. Usange munthu wamba waka bizinesi yiphya ndipo pali vinandi ivyo vikukhumba ndalama, cingaŵa cakusuzga kuŵa wakugomezgeka.”
Nangauli vili nthena, Guilherme ngwakugomezgeka pa nkhani iyi. Iyo wakati: “Munthu wangagomezgeka nanga wangaŵa pa malo gha bizinesi agho ŵanthu ŵanandi ŵakuwona kuti kucita vimbundi nkhuwemi waka. Ico cikukhumbikwa nchakuti uŵe na nkharo yiwemi. Baibolo lanovwira kuti nisange candulo cifukwa ca kuŵa wakugomezgeka. Munthu uyo ngwakugomezgeka wakuŵa na njuŵi yituŵa, mtende wa mu maghanoghano kweniso wakujicindika. Munthu wanthena wangawovwiraso ŵanji kuti ŵaŵe ŵakugomezgeka.”
FUNDO YA MU BAIBOLO: “Awo ŵakukhumbisiska kuŵa ŵasambazi, ŵakuwa mu ciyezgo na cipingo ndiposo makhumbiro ghanandi ghauzeleza na ghakupweteka, agho ghakubizga ŵanthu mu pharanyiko na phasulo. Pakuti kutemwa ndalama ni msisi wa mtundu uliwose wa vinthu vyakupweteka.”—1 Timote 6:9, 10.
Cakucitika canadi: André ni mweneko wa kampani iyo yikunozga vya civikiliro. Ghanji mwa makasitomara ghake ni kilabu yikuru ya bola. Zuŵa linyake pamasinda pa maseŵera ghakuru gha bola, André wakaluta ku maofesi gha awo ŵakendeskanga vinthu kukapeleka bilu ya mulimo uwo wakacita. Dipatimenti ya vya ndalama yikatangwanika kupendesera ndalama za matikiti izo ŵakapokera kufuma ku maofesi ghanyake. Nyengo yikaŵa kuti yamara, ntheura bwana wakalipiranga ŵanthu mwakucimbilira. André nayo wakaŵa pa gulu la ŵanthu aŵa.
André wakati: “Apo nkhalutanga ku nyumba nkhawona kuti bwana uyu wanilipira ndalama zinandi. Nkhamanya kuti cikaŵa cakusuzga kuti wamanye munthu uyo wakamupa ndalama zinandi. Nkhamanyaso kuti munthu uyu wakeneranga kuwezgerapo ndalama izi kufuma mu thumba lake. Ntheura, nkhawelera na kuphapatizga mu gulu la ŵanthu mpaka nkhakawezga ndalama izi. Bwana yura wakazizwa comene. Ndipo wakati, palije uyo wali kumuwezgerapo ndalama nanga ni zuŵa limoza.”
André wakalutizga kuti: “Cifukwa cakuti nkhagomezgeka, bwana wakamba kunicindika comene. Sono pajumpha vilimika vinandi, kweni pa ŵanthu wose awo ŵakacitiranga milimo kilabu iyi kumasinda uku, ndine pera nicali kukolerana nayo. Nili wakukondwa cifukwa cakuti kulondezga fundo za mu Baibolo kwanovwira kuti niŵe na lumbiri luwemi.”
Nchakukhozga kumanya kuti Ciuta wangatovwira kuti tileke kuwa mu ciyezgo ca kuleka kugomezgeka. Ndipouli, ŵanthu paŵekha ŵangamazgirathu yayi vimbundi. Vinthu ivyo vikupangiska ŵanthu kucita vimbundi ni vyakuti munthu wambura kufikapo wangavimazga yayi. Kasi fundo iyi yikung’anamura kuti vimbundi vilutilirenge muyirayira? Nkhani yaumaliro pa nkhani izi, yili na zgoro lakukhozga la mu Baibolo.
[Cithuzithuzi pa peji 6]
[Mazgu Ghakukhozgera pa peji 6]
“Baibolo lanovwira kuti nisange candulo cifukwa ca kuŵa wakugomezgeka.”—GUILHERME
[Cithuzithuzi pa peji 6]
[Mazgu Ghakukhozgera pa peji 6]
“Nili wakukondwa cifukwa cakuti kulondezga fundo za mu Baibolo kwanovwira kuti niŵe na lumbiri luwemi.”—ANDRÉ