KASI MUKUMANYA?

Kasi Ŵayuda mu nyengo yakale ŵakacitanga wuli na citanda pambere ŵandasunge?

Ŵayuda ŵakacedwanga yayi kusunga para munthu wafwa, ndipo kanandi ŵakasunganga zuŵa leneliro. Pakaŵa vifukwa viŵiri ivyo ŵakacitiranga nthena. Para munthu wafwa, wakacedwanga yayi kuvunda cifukwa cakuti ku malo agha kukawochanga comene. Cifukwa caciŵiri cikaŵa cakuti ŵanthu pa nyengo iyo ŵakawonanga kuti nkhuyuyura citanda kweniso ŵamumbumba usange ŵacedwa kusunga.

Mabuku gha Mateyu, Mariko, Luka, Yohane na Milimo, ghali na nkhani zinayi izo zikulongora kuti ŵakasunga nyifwa zuŵa leneliro. (Mateyu 27:57-60; Milimo 5:5-10; 7:60–8:2) Vilimika vinandi kumasinda, muwoli wa Yakobe Rakelo wakafwa apo Yakobe na mbumba yake ŵakaŵa pa ulendo. M’malo mwakunyamura thupi lake na kukasunga kwawo, Yakobe wakasunga Rakelo “mu nthowa ya kuya ku . . . Betelehemu.”—Genesis 35:19, 20, 27-29.

Baibolo likulongora kuti Ŵayuda ŵakanozganga makora citanda na kukasunga. Ŵamumbumba na ŵabwezi ŵakageziskanga citanda na kuciphaka vyakununkhira kweniso mafuta ghawemi na kucivunga na salu. (Yohane 19:39, 40; Milimo 9:36-41) Ŵazengezgani na ŵanji ŵakizanga kuzakalira nawo kweniso kupembuzga ŵamumbumba.—Mariko 5:38, 39.

Kasi Yesu wakasungika nga umo Ŵayuda ŵakasungikiranga?

Ŵayuda ŵanandi ŵakasunganga ŵakufwa mu mphanji na mu madindi. Ndimoso ŵasekuru ŵawo ŵakacitiranga. Mwaciyelezgero, Abrahamu, Sara, Yisake, Yakobe, na ŵanji ŵakasungika mu mphanji ku Makipela kufupi na Heburoni.—Genesis 23:19; 25:8, 9; 49:29-31; 50:13.

Yesu wakasungika mu dindi ilo likajobeka pa jalawe. (Mariko 15:46) Dindi la nga ni ili, likaŵanga na kamulyango kafinyi. Mukati ŵakajobanga ndipo mukaŵanga nga ni mashelufu umo ŵakagonekanga vitanda. Para thupi lavunda, ŵakatoranga viwangwa vyakomira na kuviŵika mu bokosi lakupangika na libwe nga umo ŵakacitiranga mu nyengo ya Yesu. Ntheura, mu dindi mukaŵanga malo ghakuti ŵangazakasungamoso munthazi.

Pa zuŵa la kupumura la Sabata, Dango ilo Ciuta wakapeleka kwizira mwa Mozesi likazomerezganga yayi kuti Ŵayuda ŵacitenge milimo yakukhwaskana na nyifwa. Pakuti Yesu wakafwa kwati kwakhala maora ghatatu kuti zuŵa la Sabata likwane, Yosefe wa ku Arimatiya, na ŵanji ŵakamusunga kwambura kunozga thupi lake mwakukwana. (Luka 23:50-56) Lekani Sabata yikati yajumpha, ŵanji ŵakaluta ku dindi na cilato cakuti ŵakamalizge kunozga thupi la Yesu.—Mariko 16:1; Luka 24:1.