NKHANI ZAKWAMBILIRA: KASI SANKHO LIZAMUMARA—PAWULI?

Sankho Ni Suzgo la pa Caru Cose

JONATHAN, uyo ŵapapi ŵake ŵakaŵa ŵa ku Korea wakababikira ku America ndipo wakasangana na suzgo la sankho kufumira waka pa wanici. Apo wakakuranga, wakakhumbanga kukhala ku malo uko kulije vyakusankhana mtundu. Pamasinda, wakaŵa dokotala mu tawuni ya Alaska, U.S.A., ndipo ŵalwari ŵanandi ŵakawonekanga nga mbamtundu wake. Wakaghanaghananga kuti panji ku malo agha suzgo la kusankhana mtundu licepengeko.

Kweni zuŵa linyake wakakhuŵara apo wakawovwira mama munyake wa vilimika 25 uyo wakazemphuka. Mama uyu wati wasisipuka wakamudodoliska kumaso Jonathan na kwamba kumunyoza cifukwa kufuma pa wanici wakasambizgika kuti watinkhenge ŵanthu ŵa ku Korea. Ivi vikamupweteka comene Jonathan cifukwa wakawona kuti suzgo ili wakaligwentha yayi nangauli wakasamira ku malo agha.

Ivyo vikacitikira Jonathan nchidokoni waka yayi, kweni vikucitika nadi. Suzgo la kusankhana mtundu lili pa caru cose. Vikuwoneka kuti kose uko kuli ŵanthu kusankhana mtundu kuli kwenekuko.

Nangauli sankho lili palipose, kweni ŵanandi ŵakuti ŵakulitinkha. Fundo iyi njakuzizika comene. Kasi vingacitika wuli kuti cinthu ico ŵanandi ŵakucitinkha ciŵeso palipose? Vikuwoneka kuti ŵanthu awo ŵakuti ŵakutinkha sankho, ŵakumanya yayi kuti nawo ŵali nalo. Kasi namwe mungaŵa kuti muli na suzgo ili? Kasi mungazgora wuli fumbo ili?

NKHANI YA WALIYOSE PAYEKHA

Kwali tikumanya panji yayi, nchakusuzga kumanya usange tili na suzgo ili mu mtima withu. Baibolo likutiphalira cifukwa cake, likuti: “Mtima ngwakupusika kwakuluska vyose.” (Yeremiya 17:9) Ntheura, nyengo zinyake kungaŵa kujipusika kughanaghana kuti tilije sankho. Nyengo zinyakeso tingati tili na cifukwa cakupulikikwa ico tikutinkhira ŵanthu ŵa mtundu unyake.

[Cithuzithuzi pa peji 4] — Kasi mungacita wuli para mungakumana na ŵanthu nga ni aŵa?

Kuti tisimikizge kuti nchakusuzga nadi kujimanya kuti tili na mzimu wa sankho, tiyeni tiwone ciyelezgero ici: Tiyelezgere kuti muli mwekha usiku, ndipo mwawona ŵanyamata ŵaŵiri ŵacilendo ŵakwiza kunthazi. Ŵakuwoneka ŵankhongono, ndipo munyake wakuŵa nga wali na cinthu kuwoko.

Kasi mungadumura kuti ŵanyamata aŵa ni vigeŵenga? Nangauli vyanthena ivi vingaŵa kuti vili kumucitikiranipo ndipo panji vili kumovwirani kuŵa maso, kweni kasi mbukaboni wakuti ŵanyamata aŵa nawo ni vigeŵenga? Fumbo linyake lingaŵa lakuti, Kasi mukughanaghana kuti ŵanthu aŵa ŵangaŵa kuti mbafuko ndi? Zgoro linu lingavumbura vinandi. Lingalongora usange kasankho kalimo mu mtima winu.

Usange tili ŵanenesko mtima, tikwenera kuzomerezga kuti tose tili na kamzimu kasankho. Baibolo likuzunura mtundu wa sankho ilo ndakuzara comene, likuti ŵanthu ŵakweruzga ŵanyawo kuyana na umo ŵakuwonekera. (1 Samuel 16:7) Pakuti tose tili na kamzimu kasankho, ako kanandi kakunanga vinthu, kasi vingacitika kuti ticepeskeko panji kumazga suzgo ili? Ndipo kasi sankho lizamumara pa caru?

SANKHO NI SUZGO LA PA CARU COSE

Canada: “Nangauli [caru] ici cili na malango ghanandi ghakuvikilira wanangwa wa ŵanthu ŵa mitundu yakupambanapambana, kweni sankho licali suzgo likuru comene.”—Amnesty International briefing on Canada, 2012.

Europe: “Pa ŵanthu [100 ŵaliwose 48] ŵakuwona kuti caru cawo cikuŵikapo mtima yayi kuti cimazge kusankhana mtundu.”—Intolerance, Prejudice and Discrimination: A European Report, 2011.

Africa: Lipoti la pa caru cose la mu 2012 likati, “Nkhaza na kuyuyura ŵanakazi ni vyakuzara comene mu vyaru vinandi.”—Amnesty International Report 2012.

Nepal: “Ŵanthu ŵakucemeka Madaliti nawo ŵakusangana na suzgo la sankho mu caru, comenecomene pa nkhani ya vyacuma, umoyo, na mitheto.”—Human Rights Watch World Report, 2012.

Eastern Europe: “Ŵanthu ŵa mtundu wakucemeka Roma ku mafumiro gha dazi kwa Europe ŵakuŵacitira nkhaza. Ŵakunyozeka mu caru cawo na ku vyaru vinyake ndipo ŵandyali ŵakukhumba yayi kuŵawovwira.”—The Economist, September 4, 2010.