NKHANI ZAKWAMBILIRA: CIFUKWA WULI PALI MASUZGO GHANANDI? NDIPO GHAMALENGE PAWULI?
Ŵanthu Ŵanandi Ŵakukomeka Kwambura Mulandu
Noelle wakaŵa mwana wakufwatuka na ŵanji ndipo wakatemwanga kujambura. Zuŵa linyake namise wakendanga pa luŵaza ndipo mwasoka wakawira pa ciziŵa cakugezamo (swimming pool) ca pa nyumba. Wakafwa kwati kwakhala waka masabata ghaŵiri kuti ŵakondwelere caka cacinayi ca kubabika kwake.
Pa 14 Disembala 2012, munthu munyake wakakoma ŵanthu 26 na futi pa sukulu yinyake ku U.S.A. Pa ŵanthu aŵa, 20 ŵakaŵa ŵana ŵa vyaka vyapakati pa 6 na 7. Ghanji mwa mazina ghawo ni: Charlotte, Daniel, Olivia, Josephine . . . Pa zuŵa lakukumbukira nyifwa yawo Pulezidenti Obama wakazunura mazina gha ŵana aŵa. Ndipo wakaphalira awo ŵakaliranga kuti: “Vinthu vyanthena ivi vikwenera kumara.”
Mwana munyake zina lake Bano, mbumba yakwawo yikasamuka ku Iraq mu 1996 na kuluta ku Norway apo wakaŵa na vyaka 8. Ŵanyake ŵakatemwanga kumucema na zina la myati lakuti Zuŵa. Kweni cacitima nchakuti pa 22 Julayi 2011, Bano wakaŵa pa gulu la ŵanthu 77 awo ŵakakomeka na munthu munyake wandyali. Pamasinda, munthu uyu wakayowoya mwakujikuzga kuti: “Nkhukhumba kuphepiska . . . cifukwa nkhatondeka kukoma ŵanandi.”
Nkhani zakucitiska citima izi, zikucitika kaŵirikaŵiri pa caru cose. Tikuŵa na citima para tapulika vya ngozi, kuswa malango, nkhondo, ucigeŵenga, masoka ghacilengiwa, na masuzgo ghanyake. Ŵanthu ŵanandi ŵakukomeka panji kusuzgika kwambura mulandu.
Ŵanthu ŵanyake ŵakumupa mulandu Ciuta ndipo ŵakuti wakuŵapwelelera yayi. Ŵanji ŵakuti Ciuta wakughawona masuzgo ghithu, kweni wakukhumba yayi kucitapo kanthu. Ndipo ŵanji ŵakuti vinthu ivi vili kulembekerathu. Ŵanthu ŵakughanaghana vinandi pa nkhani iyi ndipo tingafiska yayi kuvizunura. Kweni kasi mazgoro ghakukhorweska tingaghasanga nkhu? Mu nkhani zakulondezgapo, tiwonenge ivyo Baibolo likuyowoya pa ivyo vikupangiska kuti paŵe masuzgo kweniso umo ghazamumalira.