Cifukwa Wuli Mukwenera Kufwilirapo Kuŵazga Baibolo?

Baibolo ni buku lakumanyikwa comene pa caru cose. Cifukwa wuli? Cifukwa ndambura kusuzga kulipambaniska na mabuku ghanyake. Lili na nkhani zaunenesko za ŵanthu ŵakale. Ndipo likulongosora umo ŵanthu aŵa ŵakacitiranga vinthu na ŵanyawo kweniso na Ciuta. Nkhani izi zili na fundo zakovwira ndipo zili kulembeka munthowa yipusu. Kweniso zingang’anamurika mu viyowoyero vinandi ivyo ŵanthu ŵa miwiro yose ŵangapulika kulikose uko ŵali. Nyengo zose fundo za mu Baibolo ni zakovwira.

Cakuzirwa comene nchakuti Baibolo likuyowoya za Ciuta kweniso ndakufuma kwa iyo. Likutiphalira zina la Ciuta, wunthu wake, na cilato ico wakalengera caru na ŵanthu. Baibolo likutiphaliraso umo taŵanthu tikusuzgikira kuti ticite ico nchiwemi. Nkhondo iyi yaŵapo kwa nyengo yitali, kweni sono yili pafupi kumara. Para tikuŵazga Baibolo na cilato cakuti tilipulikiske, tiŵenge na cipulikano kweniso cigomezgo.

Mu Baibolo muli uthenga uwo tingawusanga yayi kunyake kulikose. Mwaciyelezgero, likutiphalira unenesko pa nkhani izi:

• Umo taŵanthu tili kuŵirako kweniso cifukwa ico tikusuzgikira

• Ivyo Ciuta wakacita kuti wawombore ŵanthu

• Ivyo Yesu wali kuticitira

• Umo caru cizamuŵira kunthazi kweniso ivyo vizamucitikira ŵanthu

Tikumupemphani kuti muŵazge magazini iyi kuti mumanye ivyo Baibolo likuyowoya.