Kasi Taŵanthu Tikaŵako Wuli?

Mwakudumura, buku la Genesis likulongosora umo vinthu vyose vili kuŵirako. Likuti: “Pakudanga Ciuta wakata mtambo na Caru.” (Genesis 1:1) Ciuta wakati walenga vyakumera na vinyama, wakalenga Adamu na Eva. Ŵanthu aŵa ŵakaŵa ŵakupambana na vinyama, cifukwa ŵakalengeka na mikhaliro ya Ciuta kweniso ŵakaŵa na wanangwa wakusankha. Ntheura vyose vikathembanga pa iwo. Ŵapulikirenge mphanyi khumbo la Ciuta lakuti ŵanthu ŵakhalenge mwamtende kweniso na umoyo wamuyirayira pa caru lili kufiskika.

Kweni mungelo munyake wakasangirapo mwaŵi pa ŵanthu na cilato cakuti wafiske khumbo lake liheni. Ntheura mungelo uyu wakazgoka Satana, kung’anamura “Wakususka.” Kwizira mu njoka, Satana wakapusika Eva kuti vinthu vingamwendera makora comene nanga wangaleka kulongozgeka na Ciuta. Adamu na Eva ŵakapulikira Satana, ndipo ubwezi wawo na Ciuta ukamara. Cifukwa cakuti ŵakasankha uheni, ŵakataya umoyo wamuyirayira ndipo tose tili kuhara kwananga na nyifwa.

Ciuta wakacitapo kanthu mwaluŵiro kuti wanozge vinthu na kujura nthowa kuti ŵana ŵa Adamu ŵazakasange umoyo wamuyirayira. Ciuta wakayowoyerathu kuti “mphapu” [munthu wapadera] yizamuparanya Satana na kuwuskapo masuzgo ghose agho ghalipo. (Genesis 3:15) Kasi “mphapu” iyi yikeneranga kuŵa njani? Pakeneranga kujumpha nyengo kuti yimanyikwe.

Ndipouli, Satana wakayezgayezga kutondeska khumbo liwemi la Ciuta. Mwaluŵiro ŵanthu ŵaheni ŵakandana mu caru. Ndipo Ciuta wakadumura kuti waŵaparanyenge na ciwowota. Ntheura Ciuta wakaphalira Nowa munthu murunji kuti wakhome cingalaŵa cakuti iyo na mbumba yake pamoza na vinyama ŵazakaponeremo.

Pati pajumpha cilimika cimoza kufuma apo ciwowota cikambira, Nowa na mbumba yake ŵakafuma mu cingalaŵa. Caru cikaŵa kuti catozgeka. Kweni “mphapu” yikaŵa yindamanyikwe.

—Yafuma pa Genesis cipaturo 1-11; Yuda 6, 14, 15; Uvumbuzi 12:9.