Ciuta Wakacitapo Kanthu Kuti Wawombore Ŵanthu

Ciuta wakaphalira Abrahamu kuti “mphapu” yakulayizgika yizamufuma mu yumoza wa ŵa mu mphapu yake. Wakati kwizira mwa munthu uyu, “mitundu yose” ya ŵanthu yizamutumbikika. (Genesis 22:18) Pamasinda, Yakobe muzukuru wa Abrahamu wakasamira ku Eguputo, uko mbumba yake yikakura na kuzgoka mtundu wa Israyeli.

Pamasinda, Faro munthu wankhaza wakaŵakora wuzga Ŵaisrayeli mpaka apo Ciuta wakasolera Mozesi kuŵa nchimi. Nchimi iyi yikadangilira Ŵaisrayeli pakufuma mu Eguputo, kweniso kwambuka pa Nyanja Yiswesi apo Ciuta wakagaŵa maji mwa munthondwe. Pamasinda, Ciuta wakapa Ŵaisrayeli malango kuti ghaŵalongozgenge na kuŵavikilira. Malango agha ghakatenge Ŵaisrayeli ŵapelekenge sembe kuti ŵagowokereke zakwananga. Mwakulongozgeka na Ciuta, Mozesi wakaphalira Ŵaisrayeli kuti Ciuta waŵatumirenge nchimi yinyake. Nchimi iyi yikaŵa “mphapu” yakulayizgika.

Vyaka pafupifupi 500 vikati vyajumphapo, Ciuta wakalayizga Themba Davide kuti “mphapu” iyo yikayowoyekerathu mu munda wa Edeni yizamuwusa mu ufumu uwo uzamumara cara. Mphapu iyi ni Mesiya, uyo ni Muponoski ndipo wali kusoleka na Ciuta kuti waponoske ŵanthu na kuzgora caru kuŵa Paradiso.

Kwizira mwa Davide na nchimi zinyake, Ciuta wakalutilira kuvumbura vinandi vyakukhwaskana na Mesiya. Ŵakayowoyerathu kuti wazamuŵa wakujiyuyura na walusungu. Ndipo para wamba kuwusa, njara, vinthu vyambura urunji, na nkhondo vizamumara. Ŵanthu ŵazamukhala mwa mtende na ŵanyawo kweniso na vinyama. Ulwari, kusuzgika panji nyifwa vizamuŵako cara ndipo ŵanthu awo ŵali kufwa ŵazamuwuka na kuŵaso ŵamoyo mu caru ciphya.

Ciuta wakayowoyerathu kwizira mwa nchimi Mika kuti Mesiya wazamubabikira ku Betelehemu. Ndipo Daniyeli wakati Mesiya wazamukomeka. Kweni wakati Ciuta wazamumuwuska na kumupa Uthemba kucanya. Daniyeli wakamanyaso kuti Ufumu uwu uzamunjira m’malo mwa maboma ghose gha caru. Kasi Mesiya wakiza nadi nga umo ucimi ukayowoyera?

—Yafuma mu Genesis 22-50, Exodus, Duteronome, 2 Samuel, Salmo, Yesaya, Daniel, Mika, Zekariya 9:9.