Cifukwa Wuli Fumbo la pa Cikopi Ndakuzirwa?

Pa cikhwangwani cinyake ca ŵanthu awo ŵakugomezga kuti Ciuta kulije, pali mazgu ghakuti: “Kasi mungakhala yayi kwambura Ciuta? Ŵanandi ŵakukhala makora waka.” Ŵanthu aŵa ŵakuwona kuti Ciuta walije nchito kwa iwo.

Ndipouli, ŵanandi awo ŵakugomezga kuti Ciuta waliko, ŵakucita vinthu nga nipara Iyo kulije. Pakuyowoya za ŵanthu ŵa mu chalichi lake, Bishopu munyake wa Katolika wakati: “Palije uyo wangamanya kuti tili Ŵakhristu, cifukwa vyakucita vithu vikuyana waka na vya ŵanthu ŵambura kusopa.”

Ŵanji ŵakuwona kuti palije cifukwa cakutangwanikira na vya Ciuta. Iwo ŵakuwona kuti wali kutali comene mwakuti palije ico wangaŵacitira. Ŵanthu aŵa ŵakupenja Ciuta pekha para ŵasuzgika panji para ŵakukhumba cinthu cinyake.

Ŵanji ŵakutondeka kulondezga visambizgo vya cisopa cawo cifukwa ŵakuwona kuti vingaŵawovwira yayi. Mwaciyelezgero, Ŵakatolika 76 pa 100 ŵaliwose ku Germany, ŵakuwona kuti palije suzgo usange ŵanthu ŵangagonana pambere ŵandatorane. Kweni ici cikupambana comene na visambizgo vya chalichi lawo kweniso Baibolo. (1 Ŵakorinte 6:18; Ŵahebere 13:4) Mbakatolika pera yayi awo ŵakutondeka kulondezga ivyo ŵakusambira. Ŵaliska ŵa machalichi ghanandi ŵakudandawura kuti ivyo ŵanthu ŵawo ŵakucita vikuyana waka na vya “ŵanthu awo ŵakuti Ciuta kulije.”

Ivi ndivyo vikupangiska kuti paŵe fumbo lakuti: Kasi Ciuta ngwakukhumbikwa nadi kwa ise? Nkhani iyi njacilendo yayi. Yikusangika kukwambilira kwa Baibolo. Kuti tisange zgoro la fumbo ili, tiyeni tisande nkhani izo zikambika kale izo zili mu buku la Genesis.