KUFUMA MU NTHAMBA YITHU

“Paŵavye Kanthu Kakumutondeskani”

Ungano wa mitundu yose uwo ukachitika mu Meyi 1931 ku Paris, France

MU CHAKA cha 1931, holo ya Pleyel ku Paris yikazura na ŵanthu awo ŵakafuma mu vyaru 23. Mu holo iyi ndiyo kanandi ŵakwimba ŵakimbirangamo sumu. Kweni pa nyengo iyi ŵanthu ŵakukwana 3,000 awo ŵakazura mu holo iyi, ŵakiza kuzakategherezga nkhani za Mubali Joseph F. Rutherford, uyo wakalongozganga mulimo wa kupharazga. Nkhani izo Mubali Rutherford wakayowoyanga, ŵakazing’anamuliranga mu Chifurenchi, Chijeremani, na Chipolishi. Mubali Rutherford wakayowoyanga nkhani zake mwankhongono chomene.

Ungano uwu ukawovwira kuti mulimo wa kupharazga Ufumu ulute panthazi mu France. Mubali Rutherford wakapempha ŵabali awo ŵakafuma ku vyaru vinyake, chomenechomene ŵawukirano kuti ŵajipeleke kuchita uteŵeti wa ukopotala panji kuti upayiniya mu charu cha France. John Cooke wakaŵa muwukirano uyo wakachiskika na mazgu gha Mubali Rutherford ghakuti: “Paŵavye kanthu kakumutondeskani ŵawukirano kuchita upayiniya.”a

Padera pa John Cooke uyo pamasinda wakaŵa mishonale, ŵabali na ŵadumbu ŵanyake ŵakazomera pempho lakwambukira ku Makedoniya ili. (Mil. 16:9, 10) Chiŵerengero cha ŵapayiniya mu France chikakwera chomene. Mu 1930 mukaŵa ŵapayiniya 27, ndipo mu 1931 ŵakafika pa 104. Ŵapayiniya ŵanandi ŵakachimanyanga yayi Chifurenchi, kweniso masuzgo ghanyake ghakaŵa ukavu na phukwa. Kasi ŵakachita wuli na masuzgo agha?

SUZGO LA CHIYOWOYERO

Ŵapayiniya awo ŵakatondekanga kuyowoya Chifurenchi, ŵakathembanga makadi pakupharazga makani ghawemi. Mubali munyake wa ku Germany uyo wakapharazganga mwachikanga ku Paris, wakati: “Tikamanyanga kuti Chiuta withu ngwankhongono. Kweni nyengo zinyake para tikupharazga, mtima withu ukachitanga phaphapha chifukwa tikenjerwanga kuti tingaluwa mazgu gha Chifurenchi gha pa kadi ghakuti ‘Chonde ŵazgani uthenga uwu.’ Ndipouli tikalutira kupharazga chifukwa tikamanyanga kuti mulimo uwu ngwakuzirwa chomene.”

Ŵapayiya ŵali na njinga — Pakupharazga makani ghawemi ku France, ŵapayiniya ŵakendanga pa njinga panji pa honda

Nyengo zinyake, para ŵapayiniya ŵakupharazga ku nyumba zinyake, ŵalonda ŵakaŵachimbizganga. Zuŵa linyake, ŵadumbu ŵaŵiri awo ŵakachimanyanga makora yayi Chifurenchi, ŵakakumana na mulonda mukali. Iyo wakaŵafumba kuti, mukukhumba njani? Ŵadumbu aŵa ŵakasoŵa chakuzgora. Mudumbu munyake wakawona kachikhwangwani pa mulyango ako kakaŵa na mazgu gha Chifurenchi ghakuti “Lizgani belu.” Mudumbu uyu wakaghanaghananga kuti mazgu agha ni zina la mweneko nyumba. Ntheura mudumbu uyu wakati: “Tapukwa amama a Lizgani Belu.” Chiyowoyero chikaŵatondeska yayi ŵapayiniya aŵa kupharazga, ndipo nyengo zose ŵakaŵanga ŵakukondwa.

UKAVU NA PHUKWA

Mu ma 1930, ŵanthu ŵanandi ku France ŵakaŵa ŵakavu, ndipo suzgo ili likakhwaska ŵapayiniya ŵanandi. Mudumbu Mona Brzoska wakalongosora ivyo wakachitanga na munyake uyo wakateŵeteranga nayo. Mona wakati: “Tikakhalanga mu kanyumba kambura kuwoneka makora. Kweniso ku malo agha kukazizimanga chomene, ndipo kanandi maji ghakakhomanga. Mulenji uliwose tikasungunuranga maji ghakuti tigeze ku maso.” Kasi ŵapayiniya ŵakagongowa na masuzgo agha? Yayi. Mupayiniya munyake wakati: “Tikaŵavya vinthu vinandi, kweni tikasoŵanga kanthu chara.”—Mat. 6:33.

Ŵadumbu 5 awo ŵakaŵapo pa ungano wa mitundu yose uwo ukachitika mu 1931 ku Paris, France — Ŵapayiniya awo ŵakaŵa pa ungano wa chigaŵa ku Paris mu 1931

Suzgo linyake ilo ŵapayiniya ŵakakumana nalo ni phukwa. Mu ma 1930, ku France kukaŵa ŵapharazgi ŵambura kujumpha 700, ndipo ŵanandi ŵakakhalanga patalipatali. Kasi ntchivichi icho chikawovwira ŵapayiniya kuti ŵamazge phukwa? Mudumbu Mona wakati: “Nyengo zose na munyane tikaŵazgiranga lumoza mabuku gha gulu kuti tileke kuchita phukwa. Kale tikalutanga yayi ku maulendo ghakuwelerako panji kuchitiska masambiro gha Baibolo. Ntheura pambere tindagone, tikalemberanga makalata ŵabali ŵithu kweniso ŵapayiniya ŵanyithu, kuŵalongosolera umo uteŵeti ukwendera na kukhwimiskana.”—1 Tes. 5:11.

Nangauli ŵapayiniya aŵa ŵakasangananga na masuzgo ghanandi, kweni ŵakalutilira kupharazga. Ukaboni wa fundo iyi ukusangika mu makalata agho ŵapayiniya ŵakalemberanga ofesi ya munthavi ya ku France. Mwachiyelezgero, Mudumbu Annie Cregeen uyo wakaŵa wakuphakazgika, wakateŵetera mu vigaŵa vinandi mu France pamoza na mfumu wake kwambira mu 1931 m’paka 1935. Mudumbu Annie wakalemba kuti: “Nyengo zose tikakondwanga ndipo tikaŵanga na vyakuchita vinandi mu uteŵeti. Tikakolerananga chomene na ŵapayiniya ŵanyithu. Tikachitanga nthena kuyana na mazgu gha mpositole Paulosi ghakuti, ‘Ine nkhapanda, Apolo wakathilira, kweni Chiuta ndiyo wakakuzganga.’ Tikukondwa chomene kuti tikaŵa na mwaŵi wakovwira ŵanthu kuti ŵamanye unenesko.”—1 Kor. 3:6.

Awo ŵakukhumba kusazgirako uteŵeti wawo, ŵangasambirako vinandi ku ŵapayiniya aŵa. Pasono, ku France kuli ŵapayiniya ŵakujumpha 14,000, ndipo ŵanandi ŵakuteŵetera mu mipingo panji magulu ya viyowoyero vinyake.b Ŵapayiniya aŵa nawo ŵakuzomerezga yayi kuti kanthu kanyake kaŵatondeske kuteŵetera Yehova.—Kufuma mu nthamba yithu ku France.

a Kuti mumanye vya ŵanthu ŵa ku Poland awo ŵakasamira ku France, wonani nkhani ya mutu wakuti, “Yehova Wiza Namwe Kuno ku France Kuti Musambire Unenesko,” mu Gongwe la Mulinda la Ogasiti 15, 2015.

b Mu 2014, pakaŵa magulu na mipingo yakujumpha 900 ya viyowoyero vinyake iyo yikalongozgekanga na ofesi ya France. Magulu na mipingo iyi yikovwira ŵanthu ŵa viyowoyero 70 kuti ŵamanye unenesko.