“Nkhongono Zikakwera Ndipo Ŵakamba Kulimbikira Chomene Kupharazga”

PAKAŴA pa Chinkhondi mulenji, mu Seputembala, 1922, ndipo kukaŵa kuti kwamba kotcha. Ŵanthu 8,000 ŵakazura mu holo. Cheyamani wakapharazga kuti chigaŵa icho chiŵengeko sono ntchakuzirwa chomene ndipo munthu waliyose ni mwanangwa kufuma mu holo, kweni wazomerezgekenge yayi kunjiraso.

Mulenji pakaŵa dankha chigaŵa cha kwimba sumu za kulumba Yehova. Ŵanthu ŵakimba sumu, ndipo pamanyuma mubali Joseph F. Rutherford wakaluta pa pulatifomu. Ŵanthu ŵanandi mitima yikaŵa muchanya kuti ŵapulike ivyo wayowoyenge, ndipo ŵakamanyanga yayi icho chichitikenge. Ŵanthu ŵanyake ŵakamba kwendendeka chifukwa kukawotchanga. Mubali Rutherford wakaŵaphalira kuti ŵakhale pasi na kutegherezga. Wakati wamba kuyowoya nkhani, ŵanthu ŵakamanya yayi kuti mumphepete mwa pulatifomu ŵakakamo salu yikuru yakutowa.

Mubali Rutherford wakayowoya nkhani ya mutu wakuti, “Ufumu wa kuchanya waneng’enera.” Wakayowoya nkhani iyi pafupifupi ora na hafu. Wakayowoya mwakukhuka kweniso na mazgu ghankhongono agho waliyose mu holo wakapulikanga. Wakayowoya umo ntchimi zakale zikapharazgiranga mwachikanga kuti Ufumu wa Chiuta ukwiza. Apo nkhani yikafika pakunozga chomene, wakafumba kuti, “Kasi mukugomezga kuti Themba lauchindami lamba kuwusa?” Wose pamoza ŵakazgora mwankhongono kuti, “Enya!”

Mubali Rutherford wakachemerezga kuti: “Pakuŵa ŵana ŵa Chiuta wapachanya nkhanira, tiyeni tikapharazge! Wonani, Themba likuwusa! Imwe ndimwe ŵapharazgi ŵake. Ntheura pharazgani, pharazgani, pharazgani.”

Panyengo iyi, salu yikuru yira ŵakazinga mu mphepete mwa pulatifomu ŵakayizungulura, ndipo pakalembeka mazgu ghakuti: “Pharazgani Themba na Ufumu.”

Ray Bopp wakati: “Ŵanthu nkhongono zikakwera.” Anna Gardner wakati: “Ŵanthu ŵakakuŵa mapi nyengo yitali.” Fred Twarosh wakati: “Ŵanthu wose ŵakimilira nyengo yimoza nga ŵapangana.” Evangelos Scouffas wakati: “Vikaŵa nga kuti nkhongono yinyake yatiguza na kutiwuska apo tikakhala uku masozi ghali gelegele.”

Ŵanthu ŵanandi awo ŵakaŵa pa ungano uwu ŵakapharazganga kale makani ghawemi gha Ufumu. Kweni kufuma pa nyengo iyi, nkhongono zikakwera chomene. Ethel Bennecoff wakati: “Ŵasambiri ŵa Baibolo nkhongono zikakwera ndipo ŵakamba kulimbikira chomene kupharazga.” Apo Odessa Tuck uyo panyengo iyi wakaŵa na vyaka 18 wakaweranga ku ungano uwu, wakaŵikapo mtima kuti wakazgore fumbo lakuti, “Ni njani walutenge?” Wakati: “Nkhamanyanga yayi uko nilutenge, ivyo namuchita, panji umo namuchitira. Icho nkhamanyanga ntchakuti nkhakhumbanga kuchita nga ni Yesaya, uyo wakati: ‘Ndine pano. Nitumani!”’ (Yes. 6:8) Ralph Leffler wakati: “Zuŵa ili likaŵa lakukondweska chomene kweniso ndilo tikambira kulimbikira chomene ntchito yakupharazga Ufumu iyo pasono yikuchitika pa charu chose chapasi.”

Lekani ungano uwo ukachitika mu 1922 ku Cedar Point, Ohio, ngwambura kuluwika mu mbiri ya gulu la Yehova. George Gangas wakati: “Ungano uwu ukanipangiska kuti nileke kukhala ku maungano gha chigaŵa.” Wakati wakukumbuka yayi usange wali kukhalapo ku ungano wa chigaŵa kufuma panyengo iyi. Julia Wilcox wakalemba kuti: “Nkhutondeka na kuyowoya wuwo umo nkhujipulikira para nkhuŵerenga nkhani mu mabuku ghithu iyo yikulongosora ungano uwo ukachitika mu 1922 ku Cedar Point. Nyengo zose nkhuyowoya kuti, ‘Nkhumuwongani chomene Yehova chifukwa mukazomerezga kuti nisangikepo pa ungano uwu.’”

Mazuŵa ghano napo, taŵanandi tikukumbukira ungano wa chigaŵa uwo ukatifika chomene pamtima na kutovwira kuti tilimbikirenge chomene kupharazga, kutemwa Chiuta na Fumu iyo wali kusankha. Para tikughanaghanira ungano uwo ukatifika pamtima, nase tikuyowoya kuti, “Nkhumuwongani chomene Yehova chifukwa mukazomerezga kuti nisangikepo pa ungano uwu.”