Mkhristu Wakalongora Lusungu

ADADA ŵa John ŵakakhalanga mu tawuni yichoko ku Gujarat, India. Iwo ŵakabatizika na kuŵa Kaboni wa Yehova kuumaliro wa m’ma 1950. John na ŵana ŵakwake 5, kweniso amama ŵake ŵakaŵa ŵakugomezgeka chomene ku Katolika. Ŵakasuskanga chomene ivyo adada ŵawo ŵakagomezganga.

Zuŵa linyake, John wakatumika na adada ŵake kuti wakapeleke kalata kwa mubwezi wawo uyo ŵakawungananga lumoza. Kweni pa zuŵa ili namulenji, John wakajicheka chomene pa kamunwe apo wakajuranga chithini. Chifukwa chakuti wakakhumba kupulikira adada ŵake, wakakakapo kasalu pa chilonda kuti ndopa zileke kufuma, na kuluta kukapeleka kalata.

John wati wafika, wakasanga muwoli wa mubwezi wa adada ŵake. Mwanakazi uyu nayo wakaŵa Kaboni wa Yehova. Apo wakapokanga kalata, wakawona kasalu pa munwe, ndipo wakamupempha kuti waŵikepo munkhwala. Wakawuskapo kasalu ako John wakakaka pa chilonda. Wakachichapa na mukhwala, na kukakapo bandeji. Pamanyuma wakamuphikira tiyi uku wakuchezga nayo nkhani za mu Baibolo.

John wakatinkhanga chomene Ŵakaboni, kweni apo wakachezganga na mudumbu uyu, wakamba kusintha maghanoghano. John wakamufumba mafumbo ghaŵiri agho iyo na adada ŵake ŵakapambananga. Wakakhumbanga kumanya usange Yesu ni Chiuta kweniso usange ntchakwenelera kuti Ŵakhristu ŵalombenge kwa Mariya. Mudumbu uyu wakaŵa kuti wasambira chiyowoyero cha Chigujarati icho John wakayowoyanga ndipo wakamuzgora na Baibolo. Kweniso wakamupa kabuku kakuti, “This Good News of the Kingdom” (Makani Ghawemi Agha gha Ufumu).

John wakati waŵerenga kabuku aka, wakawona kuti ivyo wakuŵerenga mbunenesko. Kakaŵa kakwamba kuti wajipulike nthena. Wakaluta kwa wasembe na kumufumba mafumbo ghaŵiri agho wakafumba mudumbu. Wasembe wakakwiya chomene ndipo wakamuponyera Baibolo. Wakachemerezga kuti, “Wazgoka Satana! Nilongora apo Baibolo likuti Yesu ni Chiuta yayi. Nilongora apo pakuti tikwenera kulomba kwa Mariya yayi. Nati nilongora!” John wakazizwa chomene na ivyo wasembe wakachita. Ndipo wakamuphalira kuti, “Nizamukandamoso yayi mu tchalitchi la Katolika.” Wakakandamoso nadi yayi.

John wakamba kusambira Baibolo na Ŵakaboni, wakabatizika, na kwamba kuteŵetera Yehova. Pamanyuma, ŵanyake mu banja lakwake ŵakamba kusambira Baibolo na kwamba kuteŵetera Yehova. John wachali na bamba pa woko lamalyero ilo wakajicheka, ndipo pajumpha vyaka 60. Iyo wakukumbuka umo Mkhristu wakamulongolera lusungu kamoza pera ndipo vikamupangiska kuti wambe kusopa Yehova.—2 Kor. 6:4, 6.