Ivyo Ŵanthu Ŵakuyowoya pa Nkhani ya Kulomba kwa Chiuta
“Para nkhulomba, nkhujipulika nga Chiuta wali pafupi nane, wanikora pa woko na kunilongozga para napuluka.”—MARÍA.
“Muwoli wane wali kufwa wakati walwara kansa kwa vyaka 13. Nkhukumbuka kuti nkhalombanga kwa Chiuta zuŵa lililose ndipo nkhawonanga kuti wakutegherezga malurombo ghane pa nyengo yakusuzga iyi. Ntheura nkhaŵanga na mtende.”—RAÚL.
“Lurombo ntchawanangwa chapadera chomene icho Chiuta wali kutipa taŵanthu.”—ARNE.
María, Raúl, Arne, na ŵanyake ŵanandi ŵakuwona kuti lurombo ntchawanangwa chapadera chomene. Iwo ŵakuwona kuti kwizira mu lurombo, ŵangayowoya na Chiuta, kumuwonga na kupempha wovwiri. Ŵakugomezga na mtima wose kuti ivyo Baibolo likuyowoya pa nkhani ya kulomba ni vyaunenesko. Baibolo likuti: “Ichi ntchigomezgo icho tili nacho mwa iyo, chakuti kanthu kalikose ako tingalomba mwakuyana na khumbo lake, wakutipulika.”—1 Yohane 5:14.
Kweni ŵanthu ŵanandi vikuŵasuzga kugomezga ivyo Baibolo likuyowoya pa nkhani ya lurombo. Steve wakulongosora umo wakajipulikiranga pa nkhani ya kulomba. Iyo wakuti: “Apo nkhaŵa na vyaka 17 ŵabwezi ŵane ŵatatu ŵakafwa pangozi. Yumoza wakafwa pangozi ya galimoto ndipo ŵaŵiri ŵakabira mu nyanja.” Kasi Steve wakachita wuli? Iyo wakuti: “Nkhalomba kwa Chiuta kuti nimanye chifukwa icho vinthu ivi vyachitikira, kweni Chiuta wakanizgora yayi. Ntheura nkhajifumba kuti: ‘Pali chifukwa cha kulombera nthena?’” Ŵanthu ŵanandi ŵakuwona kuti malurombo ghawo ghakuzgoreka yayi, ntheura wakuwona kuti palije chifukwa chakusuzgikira na kulomba.
Kweniso pali vifukwa vinyake ivyo ŵanyake ŵakuwonera kuti lurombo ndakuzirwa yayi. Ŵanyake ŵakuti, pakuti Chiuta wakumanya vinthu vyose, ndikuti wakumanya kale masuzgo ghithu, ntheura palije chifukwa cha kumuphalilira vinthu ivyo wakuvimanya kale.
Kweni paliso ŵanthu ŵanyake awo ŵakuwona kuti Chiuta wangapulika yayi malurombo ghawo chifukwa cha viheni ivyo ŵakachita. Jenny wakuti: “Suzgo lane likuru ndakuti nkhujiwona kuti ndine wawakawaka. Nili kuchita vinthu ivyo nkhudandawura navyo, ntheura nkhuwona kuti Chiuta wangapulika yayi malurombo ghane.”
Kasi imwe mukuti wuli pa nkhani ya kulomba? Usange namwe mukuwona kuti lurombo ndambura kovwira nga umo ŵanyake ŵakuwonera, ipo wonani fundo zakukhorweska izo Baibolo likuyowoya. Baibolo ndilo lingatiphalira unenesko pa nkhani ya lurombo.a Lingamovwirani kusanga mazgoro gha mafumbo agha:
Kasi Chiuta wakupulika nadi malurombo ghithu?
Chifukwa wuli Chiuta wakuzgora yayi malurombo ghanyake?
Kasi mungalomba wuli kuti Chiuta wapulikenge malurombo ghinu?
Kasi lurombo lungamovwirani wuli?
a Mu Baibolo muli malurombo ghanandi gha ŵateŵeti ŵakugomezgeka ŵa Chiuta kusazgapo gha Yesu Khristu. Mu Malemba Ghachihebere panji kuti Testamente la Kale muli malurombo ghakujumpha 150.