Mafumbo Ghakufuma ku Ŵaŵazgi
Kasi Baibolo likuti wuli pa nkhani ya kuchita vilapo?
Chilapo chili kung’anamulika kuti “ni layizgo lakupulikikwa makora ilo munthu wayowoya kuti wafiskenge kwambura kutondeka, ndipo kanandi wakuzunura Chiuta . . . nga kaboni.” Chilapo chingaŵa chakuyowoya waka pa mulomo panji chakuchita kulemba.
Ŵanyake ŵangaghanaghana kuti mbuheni kuchita chilapo chifukwa chakuti Yesu wakati: “Mungalapanga chara napachoko. . . Para mwati ‘Enya’ waŵenge nadi enya, ‘Chara’ winu, waŵenge nadi chara, pakuti agho ghakujumpha pa mazgu agha ngakufuma kwa muheni.” (Mat. 5:33-37) Mbunenesko nadi kuti Yesu wakamanyanga kuti Dango la Mozesi likakhumbanga kuti Ŵaisrayeli ŵachitenge chilapo pa vyakuchitika vinyake, ndipo ŵateŵeti ŵakugomezgeka ŵa Chiuta ŵakaŵa kuti ŵalapizgapo vilapo. (Gen. 14:22, 23; Eks. 22:10, 11) Wakamanyangaso kuti Yehova mwenecho nayo wali kuchitapo vilapo. (Heb. 6:13-17) Ntheura apa Yesu wakakanizganga kuchita chilapo yayi. M’malo mwake, wakachenjezganga ŵanthu kuti ŵaleke kuchita vilapo pa vinthu vyambura kuzirwa kweniso munthowa yambura kwenelera. Nyengo zose tikwenera kufiska ivyo talayizga, chifukwa ndivyo Yehova wakukhumba kuti tichitenge.
Ipo kasi mukwenera kuchita vichi para mwaphalirika kuti muchite chilapo? Chakwamba, woneseskani kuti mufiskenge ivyo mwalapa kuti muchitenge. Para mukukayikira, ntchiwemi kuti muleke waka kuchita chilapo. Mazgu gha Chiuta ghakuchenjezga kuti: “Ntchiwemi kuleka kulapa kuluska kulapa na kuleka kufiska.” (Muph. 5:5) Chachiŵiri, ghanaghaniranipo pa fundo za mu Malemba izo zikukolerana na ivyo mukukhumba kulayizga, ndipo pamanyuma chitani vinthu mwakukolerana na njuŵi yinu yakusambizgika makora. Kasi zinyake mwa fundo za mu Malemba izi ni zini?
Vilapo vinyake vikususkana yayi na khumbo la Chiuta. Mwachiyelezgero, Ŵakaboni ŵa Yehova ŵakuchita vilapo para ŵakunjira mu nthengwa. Ivi ni vimoza mwa vilapo ivyo munthu wangachita. Pamaso pa Chiuta na pa ŵakaboni, mfumu na muwoli wake ŵakulayizga kuti ŵatemwanenge, kuchitira lumoza vinthu, na kuchindikana yumoza na munyake “chikuru wose mbamoyo.” (Ŵakutorana ŵanyake ŵakuyowoya ndendende mazgu agha yayi para ŵakutorana, kweni nawo ŵakulapizga panthazi pa Chiuta.) Kufuma apo ŵakwamba kuchemeka mfumu na muwoli, ndipo nthengwa yawo yikuŵa ya umoyo wawo wose. (Gen. 2:24; 1 Kor. 7:39) Chilapo cha nthengwa ntchakwenelera, chikukolerana na khumbo la Chiuta.
Vilapo vinyake vikususkana na khumbo la Chiuta. Mkhristu waunenesko wangachita yayi chilapo chanthena, nga ntcha kuvikilira charu na vilwero vya nkhondo panji kuleka chigomezgo chake mwa Chiuta. Kuchita nthena nkhususkana na malango gha Chiuta. Pakuti Ŵakhristu ŵakwenera kuŵa ku “chigaŵa cha charu chara,” ntheura tikunjilirapo yayi pa mphindano za charu panji kuchitako nkhondo.—Yoh 15:19; Yes. 2:4; Yak. 1:27.
Vilapo vinyake vikuthemba pa njuŵi yithu. Nyengo zinyake, tikwenera kughanaghanirapo mwakupwelelera ulongozgi wa Yesu wakuti “pelekani vinthu vya Kesare kwa Kesare, kweni vinthu vya Chiuta kwa Chiuta,” pambere tindasankhe usange tipangenge chilapo panji yayi.—Luka 20:25.
Tiyelezgere kuti Mkhristu wakukhumba kuŵa mwene charu panji kutora pasipoti ndipo wamanya kuti wakwenera kuchita chilapo cha kujilambika. Para mu charu icho, munthu uyo wachita chilapo chanthena ndikuti wakulayizgaso kuti wachitengeso chinthu chilichose nanga ni icho chikususkana na dango la Chiuta, Mkhristu uyo njuŵi yake njakusambizgika Baibolo, yingamuzomerezga yayi kuchita chilapo chanthena. Kweni nyengo zinyake boma lingamuzomerezga kuti wasinthe mazgu agho ghali mu chilapo na chilato chakuti njuŵi yake yimuzomerezge kuchita chilapo icho.
Kuchita chilapo icho boma lazomerezga kusintha mazgu ghanyake, vikukolerana na fundo iyo yikusangika pa Ŵaroma 13:1, iyo yikuti: “Munthu waliyose wajilambikenge ku ŵamazaza.” Ntheura Mkhristu wangasankha kuchita chilapo chanthena chifukwa wangawona kuti palije uheni uliwose kuchita chinthu icho Chiuta wakukhumba nakale ku Ŵakhristu kuti ŵajilambikenge ku ŵamazaza.
Ntchakuzirwaso chomene kupulikira njuŵi yinu yakusambizgika Baibolo para mungapempheka kuti mugwiliskire ntchito chinthu panji chimanyikwiro apo mukupanga chilapo. Mu nyengo yakale, Ŵaroma na Ŵasukuti ŵakalapanga uku ŵakolera malupanga ghawo, ndipo ichi chikang’anamuranga kuti ŵakagwiliskiranga chimanyikwiro cha chiuta wa nkhondo kuŵa ukaboni wakuti munthu wakuyowoya unenesko. Ŵagiriki ŵakawuskanga woko lawo muchanya para ŵakuchita chilapo. Iwo ŵakawonanga kuti pali chiuta uyo wakamanyanga ivyo munthu wakayowoyanga na kuchita para wakulapa, kweniso uko munthu wakwenera kuzakapatawura.
Nangauli muteŵeti wa Yehova wangalapa yayi mwakugwiliskira ntchito chimanyikwiro chilichose cha charu chakukhwaskana na kusopa kwautesi, kweni kasi mukwenera kuchita wuli para mungapempheka na khoti kuti muŵike woko linu pa Baibolo na kulapa kuti mupelekenge ukaboni waunenesko? Para vyaŵa nthena, mungasankha kuchita nthena, pakuti Malemba ghakuyowoya vya ŵanthu ŵakugomezgeka awo ŵakachita chilapo mwakugwiliskira ntchito chimanyikwiro. (Gen. 24:2, 3, 9; 47:29-31) Ntchakuzirwa chomene kukumbuka kuti para mukuchita chilapo chanthena, mukulapizga kwa Chiuta kuti muyowoyenge unenesko. Mukwenera kuŵa ŵakunozgeka kuzgora unenesko pa fumbo lililose ilo ŵangamufumbani.
Pakuti ubwezi withu na Yehova ndiwo ngwakuzirwa chomene kwa ise, tikwenera kulomba na kughanaghanirapo mwakupwelelera pa chilapo chilichose icho taphalirika kuti tichite, mwakuwoneseska kuti chikususkana yayi na njuŵi yithu panji fundo za mu Baibolo. Para mwasankha kuchita chilapo, mukwenera kufiska ivyo mwalapizga.—1 Pet. 2:12.